Elegh ạMak 13 - Ạḍinya Iigbia

ẠJizos ạkaaph ịlo olereghi Otu Ịiḅereghi phọ

¹ Kụ ạJizos rọḍua pạ Otu Ịiḅereghi phọ romite, bịn oniin ạmatuan ọdi ạmagh nyọdi ạḅeni mọ, “Ọtughemia, pọ eeghe ọdo asighiigh dị ọloghoḍiom ịma aruutu phọ ịphen!”

² Kụ ạJizos ạḅeni nyọdi mọ, “Nạ rạmiin ni ịdeghedeghe phọ aruutu phọ ịphen. Rꞌaḍiniin aḍighiigh ạnyu ạḍinon kọ́bile dị kőlhereghi.”

Ịiḅaghami rꞌịgbiphoghom

³ Kụ ạJizos ạrol li ude, sịphe Eegum Ọlivs, asoman Otu Ịiḅereghi phọ, kụ mem dị ọdi bịn odi, aPita rꞌaJems rꞌạJon rꞌẠndru uru ni opuru nyọdi mọ,

⁴ “Ụḅeni iyoor. Pụr amem kụ ẹdi ịphen phọ kemite bọ? Eeghe kụ keḍighi eḍeenaan amem dị oomo phọ ịphen kemiteghu bọ?”

⁵ Kụ ạJizos amiigh ọtughemi ạbidi mọ, “Igona loor anyina, ọbo oye kiikeleghi ghan bọ inyina.

⁶ Ịbadi kotu ni kụ okophora ḍien phọ ạmi kụ ọḅem ghan mọ ạbuno kụ aKraist phọ kụ ookeleghi ḍita.

⁷ Mem lọ nyina ẹnaghan oghur ạraagham lọ mẹebeeph rꞌọghaaph ạraagham lọ edi egher, kékiilaan. Ạraraar phọ ịphen kemiteghu ni, kụ eekuna phọ kẹ̋teeny.

⁸ Eelhe kotuphiom ni eelhe ẹgham, ẹmha otuphiom ẹmha, kụ ade phọ kepiigha ni ịminighan arikpisi. Ịgbakuro kẹtol li. Ạraraar phọ ịphen phọ kụ emiighom ịminimiin.

⁹ “Igona loor. Kirorori ni inyina osoorom erugh kꞌikumoor awe phọ, kụ ịgurogh inyina rubughotu. Ạbudaam eelhe rꞌaruwo ẹmha kịmagh ni inyina ọgba ạsiagba loor ẹmhu phọ ạmi, kụ nyina ẹḅeni bịdi ooḅi ọghaaph phọ.

¹⁰ Tụtu rẹteeny eekuna phọ, kọpur ọkaaph ooḅi ọghaaph oleenye oomo areelhe.

¹¹ Kụ mem lọ isiphi inyina osoorom erugh, kékaphian ghan oomiigh ịlo nyina kẹgba, kụ mem ạsiagba ịlo eḍigh ologhi anyina bịn ịgba ni, esi dị nyina kụ rẹ́gba, Uwaloor Iigbia phọ kụ rịgbaanaan inyina.

¹² Kụ umor katorori ni umor ạlogh esi aḍuugh, ọde kạtuugh ni ịdipho aḍighi aani mọony ọdi, ạnmuny kọmoogh ni oḅom ẹmhu ọḅogh bụphe ọmar bọ bịdi ọlogh esi aḍuugh.

¹³ Oomo awe kịlogh ni inyina ḍien loor ẹmhu phọ ạmi, kụ oye lọ ạkparam asi eekuna phọ kạmoogh ni pẹleeny.”

Ịlo ạḅaphanya amuphe

¹⁴ “Kụ mem dị nyina ẹmiin ḅạphanya amuphe dị odi sịphe ạdol phọ ítu bọ ḍịphe ọdi (ọlo rạbal ạmaar ạnaghan!), kụ bụlo odi Judia oghiil ogheel ẹpe ạraaḅaraph phọ!

¹⁵ Kụ oye lọ odi ạnyu otu kúsoor ookoroghian ạraraar!

¹⁶ Kụ oye lọ odi ozo kúḅula ologhi otu ọsighe oonmenemineen ọdi!

¹⁷ Kụ ịminimiin kẹtolonaan ni nmạriir lọ odi rꞌịyal amem aloor, rꞌạbulo ọpham nmụny dị kőghin mạmaam riiḍio phọ ịpe.

¹⁸ Ịiḅereghi ghan mọ kíḍighi mem ẹephoom,

¹⁹ ịdi eḍighi bọ ịminimiin ariiḍio phọ ịpe kẹloghori ni epu ịdi memite ghan, emiigh kꞌẹḅel egbiom mọ Ẹnaan ẹlhem bọ aḅirini phọ, kụ ẹteeny nyịidipho. Kụ ịnon ịdi epu ịphen phọ kẹn kémite mun.

²⁰ Mọ Ọmoogh-we phọ kụ ómeera bọ osoph ariiḍio ịminimiin phọ okpere, ọbo rꞌoniin oye músugha. Kụ loor ẹmhu ạbuphe ọdi mạsaḅar bọ ọdi kasoph ni riiḍio phọ akpere.

²¹ “Kụ mọ oye ịḅeni inyina mọ ipogh ẹphen, mọ aKraist phọ odi sịen mꞌẹpe, kémeeraam.

²² Ariil ọkpe rꞌạbudi kokola ḍien aKraist komite ni oḍighi yogh reḍeenaan rꞌịiḍaany, lọ ẹghigh, ịlo ookeleghiom ạbuphe Ẹnaan mẹsaḅar bọ.

²³ Kụ igona loor. Mị mịphur ri inyina rụru ịlo oomo ịphen phọ.”

Erumom Ọony phọ Oye

²⁴ “Kụ riiḍio phọ ịpe, mem dị ịminimiin phọ meten, ootaany katen ni ufiri, ụnwanyu phọ kạ́mu mun.

²⁵ Ạraanaan phọ kẹḍuaghu ni kꞌạke ẹkaraghu, kụ ịikpo ịpe edi bọ kꞌạke kepiigha ni.

²⁶ Kụ ọmiin dị Ọony phọ Oye ạḍua ẹpe okuaḍio phọ kụ ratu rꞌiboom ịikpo rꞌigbogh phọ ọdi.

²⁷ Kụ ọdi atom rụukpaany phọ ọdi ọghi inya ạsiagaany aḅirini phọ, emiigh sịen ade phọ esiemi kꞌạke, ookpomoghi ạbuphe Ẹnaan mẹsaḅar bọ.”

Ịsighe oreeny dị oghol mọ ạfig ẹtuughaam olegheri ịyaar

²⁸ “Ịsighe oreeny dị oghol mọ ạfig ẹtuughaam olegheri ịyaar. Mem lọ oreeny ratigheel ọnam, nyina elegheri ni mọ osoor mạteeny.

²⁹ Ịduon phọ kẹn, mem dị nyina ẹmiin dị oomo phọ ịphen remiteghu, nyina kelegheri ni mọ Ọony phọ Oye masi sịen ẹda ạḍighaagh.

³⁰ Mị ạkar rịḅeni ghan inyina mọ oghiil phọ ọphon káten kụ oomo phọ ịphen phọ emiteghu.

³¹ Ạke phọ rꞌade phọ kepe ni, ikpo ọnhu phọ ạmi képe aani.”

Oye ólhegheri ḍio phọ

³² “Kụ ịlo aḍio phọ ạḍiphe rꞌamem mọ ạmuphe, ọnon oye ólhegheri emuton Ọde phọ bịn. Ạruukpaany phọ odi bọ kꞌạke, rꞌỌony phọ, úlegheri.

³³ Kébulama loor, igon ghan ịdi eḍighi bọ nyina ílegheri mem ịphen phọ.

³⁴ Ẹkigh ịdipho olephiri uwotu lọ ạwile we phọ ọdi kụ ạghi erelhe, kụ ạngo rẹbene phọ ọdi, uwo oḍighi rꞌoḍighi, kụ ạḅeni nyọpo rapogh bọ otu phọ mọ ạmaar akori.

³⁵ Igona ni loor, ịdi eḍighi bọ nyina ílegheri mem mọ uwotu phọ katigheel bọ, mꞌadulhe, mꞌogbo aḍughul, mꞌịḅel ạsikenegh, mꞌạḍiroor,

³⁶ ọbo arigheel ekperenom kạmiin ghan bọ dị nyina rẹnaani yogh.

³⁷ Ịphen mị rịḅeni bọ inyina, mị rạḅeni aani ni oomo awe phọ mọ ogona ni loor.”