Elegh ạMak 10 - Ạḍinya Iigbia

ẠJizos ạkaaph ịlo ọgbaranaan olhom rꞌạnir

¹ Kụ ạJizos ạḍua ni ẹpe phọ ạghi aḍigh eelhe aJudia, kụ ạḅeeny Ọphiiny ạJodan, kụ aḍita awe uru kẹn ni ọteeny nyọdi, kụ ọdi rꞌẹeghara phọ ọdi ạtughemi bịdi.

² Kụ buniin aFarisi phọ uru ni ọteeny nyọdi kụ ọwa ghan ọlogh ọdi esi ịiḅaghami, kụ opuru nyọdi mọ, “Ụḅeni iyoor, ologh phọ ayira ameeraam ni mọ oye aseere ghan ni ạnir ọdi ḍụghum?”

³ Kụ ạJizos apuru ạgbagh mọ, “Ologh phọ aMozis ạḅem ika ḍịen?”

⁴ Kụ bịdi mọ, “AMozis ameeraam ni mọ oye aseere ghan ni ạnir ọdi ạngoom ḍịnya ọgbaranaan.”

⁵ Kụ ạJizos ạḅeni bịdi mọ, “AMozis ạtuan ịikpara iloghi phọ anyina kụ ạlogh bọ ologh phọ ọphon ịngo inyina.

⁶ Kꞌẹḅel egbiom mọ ọlhem bọ aḅirini phọ, Ẹnaan ịlhem bịdi ẹya rꞌelephiri.

⁷ Kụ loor ịduon phọ kụ ẹdi oye kạtuan ạgbatanaan ọde rꞌonhiin ọdi kụ ạḅophan rꞌạnir ọdi.

⁸ Kụ ịyal phọ ạbidi koḍighi iniin iphulupul, bịdi kóḍighi mun ịyal, koḍighi nyoniin.

⁹ Bụlo Ẹnaan kụ mẹḅophoghi, oye kụ́gbarion ghan!”

¹⁰ Kụ mem dị bịdi moḅula ẹpe ologhi otu, ạbumatuan phọ ọdi ụḅile ni opuru nyọdi ịlo ịphen phọ.

¹¹ Kụ ọdi ạḅeni bịdi mọ, “Oye lọ aseere ạnir ọdi kụ aphin ọnon, pọ malhiom ẹmha ọḅel phọ.

¹² Ịduon phọ kẹn kụ ịdi ạnir lọ ạḅam ikpoki kụ ạal ịnon ilom, pọ malhe aani ẹmha.”

ẠJizos ạngo ọghor ịbam ạnmuny

¹³ Kụ ụsighe ni ịbam ạnmuny oruom Jịzos mọ ọdi ạḅam rạghaagh ọdi rụmhu ạbidi, kụ ạbumatuan phọ ọḅaam we phọ ạbuen.

¹⁴ Kụ mem dị ạJizos ạmiin bọ ịphen phọ, ịghagh ni ologhi ọdi, kụ ạḅeni bụmatuan phọ mọ, “Imeera ịbam ạnmuny phọ oru ụteeny ịmi. Kémirighan bịdi. Ọmar phọ kꞌẸnaan ọlo ọdo phọ ạbuen phọ.

¹⁵ Mị ạkar rịḅeni ghan inyina mọ oye lọ úsooromi loor ịdipho ọbumoony káḍigh ọmar phọ kꞌẸnaan.”

¹⁶ Kụ ọdi aḅerion bịdi agbororian, kụ ạḅam rạghaagh phọ ọdi rụmhu phọ ạbidi, kụ ạngo bịdi ḍịseph.

Ịlo oniin ọolha

¹⁷ Kụ ạJizos raḅetenu ọghi erelhe, kụ oniin oye aghiil aru akpuḍian ghisigh ọdi, kụ apuru mọ, “Ogey ọtughemia, mịna kaḍighi bọ ika kụ ạmoogh aani ghuḍum kꞌagee-pọ?”

¹⁸ Kụ ạJizos apuru nyọdi mọ, “Nạ ụtuan eeghe kụ ụmagh bọ ịmi mọ ‘ogey’ phọ? Ogey oye ólho emuton Ẹnaan bịn.

¹⁹ Nạ alegheri ni iilogh mọ: ‘Enu kạ́ko, ẹmha kále, imi kámi, ịkaraph ạsiagba kạ́gbaanaan oye, káagbegheḍiom oye, ọde rꞌonhiin lọgh eegu.’”

²⁰ Kụ oye phọ ạḅeni nyọdi mọ, “Ọtughemia, kꞌẹghoroghor ạmi, mị raako ghan ni oomo phọ iilogh phọ ịphen.”

²¹ Kụ rꞌẹphomoghian kụ ạJizos aphogh nyọdi, kụ ạḅeni mọ, “Eniin ịyaar bịn kụ ịḅile esughanaan nyịna oḍighi, keel aalhaghi oomo ạraraar phọ nạ ạmoogh bọ ạsighe ikpoki phọ ạngo rukulom, kụ nạ kạmoogh ni ẹelha ẹpe kꞌạke, kụ aru ụdaph ịmi.”

²² Kụ oye phọ rọnaghan ịphen phọ bịn akiriri, ịdi eḍighi bọ ọdi ạmoogh ni eboom ẹelha, kụ ạpham ọto kụ agheelom.

²³ Kụ ạJizos aphogh akitonom, kụ ạḅeni bụmatuan phọ ọdi mọ, “Ẹkpar ri iboom dị awe phọ ạbuphe ọmoogh bọ ẹelha koḍigh ọmar phọ kꞌẸnaan.”

²⁴ Kụ ịphen ọdi ạḅem bọ eḍigh ruugu esi ạbumatuan phọ ọdi, kụ ạJizos ạḅem ạkpaariom mọ, “Nmụny ạmi, ẹkpar ri iboom oḍigh ọmar phọ kꞌẸnaan.

²⁵ “Edugh ghụn ni dị ạkamel kạbol epogh ạlaga epu dị ọolha kaḍigh ọmar phọ kꞌẸnaan.”

²⁶ Ịphughanam ni kụ eḍigh ḍiigu esi oomo phọ ạbidi, kụ bịdi opuruan ghan siloor mọ, “Ạnhian kụ ẹdi kọpel bọ otene?”

²⁷ ẠJizos aphogh ni bịdi, kụ ạḅem mọ, “Ịphen phọ ídughanaan oye, edughanaan Ẹnaan. Ịyaar dị ẹkparanaan Ẹnaan ílho.”

²⁸ Kụ ẹkpaariom Pita ọḅem mọ, “Yoor phọ ạbuen ọbile ni oomo ạraraar phọ kụ rọdaph bọ nyịna.”

²⁹ Kụ ạJizos ạḅem mọ, “Mị ạkar rịḅeni ghan inyina ịphen phọ. Oye ólho dị mạwile otu ọdi, mꞌabumor, mꞌabumarani, mꞌonhiin, mꞌọde, mꞌạnmuny, mꞌarere ọdi loor ẹmhu ạmi rꞌooḅi ọghaaph phọ,

³⁰ dị kónmoom sịen aḅirini phọ ọphon oogh arukuron opuemiom ruutu, rꞌabumor, rꞌabumarani, rꞌaburunhiin, rꞌạnmuny, rꞌarere, ḅịle rꞌịgbiphoghom, kụ ọlo aḅirini phọ ọpo ratu bọ ọdi kạmoogh ni ghuḍum kꞌagee-pọ.

³¹ Kụ ịbadi ạbudi oḍia ghisigh koḅula ni ọman, kụ bụphe odi bọ ọman phọ koḍia ni ghisigh.”

ẠJizos ạkaaph akol ḍuugh phọ ọdi amuneniom ịraar amem

³² Kụ bịdi oten rọki Jeruselem, kụ ạJizos aḍiemiom kụ ạbumatuan phọ ọdi omaghagha yogh, kụ aruugu asiph bụphe odi bọ ọman phọ. Kụ ọdi ạgbatan ḍioph rꞌịyal phọ atenom ọgbal, kụ amiigh ọḅeni ạbidi rạraar dị kemiteghunaan nyọdi mọ,

³³ “Ịnaghan, ịduon yira rọki bọ Jeruselem, kọḅogh ni Mọony phọ Oye ọngo bụo ạrumhu ariil ạrikia phọ rꞌạbutughemia iilogh phọ, kụ bịdi osoph erugh aḍuugh opume, kụ ọsighe nyọdi ọlogh ḍịghaagh aruuruen,

³⁴ kụ ọnmoghoghoom yogh kụ omurughiom ịghor, kụ ọgurogh kụ okiigh, kụ ḍughul otu dị kemuneniom ịraar kụ ọdi aḅetenu esi aḍuugh phọ.”

Ịlom aJems rꞌạJon

³⁵ Kụ aJems rꞌạJon, ạnmuny phọ aZebidi, uru ni ọteeny Jịzos, kụ ọḅeni nyọdi mọ, “Ọtughemia, uḍighi iyoor iiḅi lọ yoor rọwa.”

³⁶ Kụ ọdi mọ, “Eeghe ịyaar kụ ẹdi nyina rẹwa bọ mọ ạmi iḍighinaan inyina?”

³⁷ Kụ bịdi mọ, “Mem dị nạ kạtolom bọ ạgada ọdaam ẹmha phọ ạna ẹpe ọmar phọ kꞌẸnaan, meera ni mọ oniin ạrol aani ḍịghaagh elhiom, ọphori phọ ḍịghaagh ekeeny ạna.”

³⁸ Kụ ạJizos mọ, “Nyina ílegheri ịyaar phọ nyina rẹlom bọ. Nyina ketue ni ẹpugholom ẹgo ịminimiin phọ ẹphen mị rạpugholom bọ ḍụghum? Ọḅile kẹn iwur aani inyina mụum ịminimiin phọ ạmuen ruwur bọ ịmi ḍụghum?”

³⁹ Kụ bịdi mọ, “Yoor kotue ni.” Kụ ạJizos mọ, “Ẹgo phọ mị rạpugholom bọ nyina ketue ni ẹpugholom; ọḅile otue iwur inyina mụum mọ ruwur bọ ịmi.

⁴⁰ Kụ ịikpo ọngo awe sịdol, oniin elhiom, ọphori phọ ekeeny, mị kụ ụ́moogh. Ẹnaan bịn kụ kẹngo sịdol phọ ịpe we phọ ạbuphe dị maseenaan bọ.”

⁴¹ Kụ bụeri phọ aḍioph ạbumatuan phọ ọnaghan bọ ịphen phọ, ụghagham ni Jems rꞌạJon ologhi.

⁴² Kụ ạJizos ạmagh bịdi mọ oru, kụ ạḅeni bịdi mọ, “Nyina elegheri ni mọ awe phọ ạbuphe oseere bọ mọ ọda ruuruen ọmoogh ni ịikpo esi awe phọ bịdi ọda bọ, ḅịle kẹn abugbogh phọ rọtooghi ghan ni ịtooghi kọngo bịdi.

⁴³ Kẹ́tol ịdipho sịen ogbo phọ anyina. Ogbo phọ anyina, ọlo rạwa oḍighi ogbogh, pọ kaḍighi oye dị kakumu ghan ạngo bụeri phọ.

⁴⁴ Kụ ọlo rạwa oḍighi oḍiemiom, pọ ọdi kaḍighi eekuna ẹbene.

⁴⁵ RꞌỌony phọ Oye bịn óru mọ okumu ọngo nyịno, aru okumu ọngo awe rꞌọsighe aghuḍum mọ ọdi ọtagharanam aḍita.”

Ạjizos ạḅarion riḍien aBatimios

⁴⁶ Kụ bịdi ụghi ni osi Jeriko. Kụ ạJizos rạḍua bọ, kụ ạbumatuan phọ ọdi rꞌaḍita awe ọdaph nyọdi. Kụ rotenom ẹmha phọ, kụ oniin ọlom-le ikpom ariḍien dị oghol mọ aBatimios, ọony aTimios, ạrol li ude ọgbal oḅodo phọ.

⁴⁷ Kụ rọnaghan mọ ạJizos ọpo ạNazeret kụ ratu oten, kụ ạlooghi mọ, “Jịzos, ọony aDevid, ụnma ịmi ighirigiir.”

⁴⁸ Kụ ịbadi awe uubophoghi ni nyọdi mọ, “Kpomori ọnhu ạna,” kụ ọdi ạkparami ghụn ịlooghi phọ mọ, “Mọony aDevid, ụnma ịmi ighirigiir.”

⁴⁹ Kụ ạJizos ạmeera kụ ạḅem mọ, “Ịmagh nyọdi.” Kụ ọmagh ọḅeni mọ, “Kpạrami ologhi ạna, aḅetenu. Ọdi rạmagh ni nyịna.”

⁵⁰ Kụ rọkporonaan ạsuoma phọ ọdi rotebeeny, kụ apel ạghi ạteeny Jịzos.

⁵¹ Kụ ạJizos mọ, “Nạ rạwa mọ mị aḍighinaan nyịna eeghe?” Kụ oye ikpom ariḍien phọ mọ, “Oye phọ, mị ụḅile ụmiin eten.”

⁵² Kụ ạJizos mọ, “Keel, omeeraam mọ ạna maakonom nyịna.” Kụ egina amem bịn ọdi ạmiin eten, kụ ạdaph aani nyọdi ẹpe oḅodo phọ.