Elegh ạMak 1 - Ạḍinya Iigbia

Ịdi ạJon oburogh mụum ạghaaph

¹ Ooḅi ọghaaph ịlo ạJizos Kraist Ọony phọ Ẹnaan

² amiigh ịdipho oyil Azaya ạmiin bọ. Ọdi ạge pạ ạḍinya phọ ọdi ịdi Ẹnaan ẹḅeni Mọony phọ ọdi mọ, “Pogh aani, mị ratom ni ọokpaany ạmi dị kaḍiemi ghan aselemi eten aseenaan nyịna.

³ Oye atu ni rạlooghi ẹpe ẹdala phọ mọ, ‘Ọmoogh-we ratu. Iseleminaan eten phọ ọdi esele yogh iloghi phọ anyina!’”

⁴ Ịmiin phọ imunughan mem mọ ạJon oburogh mụum mọ amite bọ ẹpe ẹdala phọ kụ ạghaaph ghan mọ, “Ikiton esi ịkaraph phọ anyina eru mị iwurogh mụum, ọbo Ẹnaan ẹsar ịwilenaan inyina.”

⁵ Kụ oomo ạbuo eelhe phọ aJudia rꞌẹmha phọ aJeruselem ụghi ghan ni ọteeny nyọdi, kụ ọgba ịkaraph phọ ạbidi omitiom, kụ ọdi awurogh ghan bịdi mụum ẹpe Ọphiiny ạJodan.

⁶ ẠJon ạkpologhian ghan ạsuoma asuphuugh ạsikamel rꞌokuughaam ozu ẹnam. Eḍien ọdi, igurubia rꞌẹnuum aḍiowo.

⁷ Kụ ọdi ạghaaph ghan mọ, “Oye dị upu ịmi ratu ni, dị mị ụ́manam ozuman ọokpo iḍigh arokoro phọ ọdi.

⁸ Mị ạsighe mụum kụ riwur inyina, kụ ọdi phọ kạsighe Uwaloor Iigbia phọ kụ iwurom inyina.”

Ịdi owur Jịzos mụum

⁹ Ịphen phọ eten bọ íbia kụ ạJizos ạḍua ẹpe Nạzeret aGalili, aru ạteeny Jọn, kụ ạJon awur nyọdi mụum pạ Ọphiiny ạJodan.

¹⁰ Kụ ạJizos rạsoghoronu pạ ạmuum mọ, bịn ạmiin ni okuaḍio dị rakughuronu, rꞌUwaloor Iigbia, dị ạghigh ọkurughozo, dị rasoorom nyọdi.

¹¹ Kụ ẹḍogh ẹḍua ẹpe kꞌạke kụ ẹḅem mọ, “Nạ kụ ogina Ọony phọ ạmi. Eḍighinom ịyaar phọ ạna kụ ịḅeeraan ịmi iboom.”

Ịdi ọdegh Jịzos ophogh

¹² Kụ egina amem bịn Uwaloor Iigbia phọ ạpham Jịzos ạghimom ẹpe ẹdala phọ.

¹³ Kụ ọdi ạrol ẹpe ẹdala phọ inyadi aḍughul-otu, kụ aSetan ạdeghogh nyọdi aphogh. Kụ ẹpe phọ, ilhom ịnam ịrol li, kụ ạruukpaany phọ Ẹnaan kụ iiko ghan nyọdi.

ẠJizos ạmagh inya ạbukoniom ạkoni

¹⁴ Mem mọ mosiph bọ Jọn ọlogh ikoli phọ, kụ ạJizos ạghi ẹpe Galili, kụ ạghaaph ghan ooḅi ọghaaph phọ Ẹnaan mọ,

¹⁵ “Amem mọ mẹteeny. Ọmar phọ kꞌẸnaan masi sịen ẹda ạḍighaagh. Ikiton esi ịkaraph anyina emeeraam ooḅi ọghaaph phọ.”

¹⁶ Eniin aḍio ạJizos ratelhe oogbom Ọphiiny aGalili, kụ ạmiin ịyal ạbukoniom ạkoni, Saimon rꞌẠndru, umor ọdi, dị rozu ghan ọzuguru.

¹⁷ Kụ ạJizos ạḅeni bịdi mọ, “Itu ịdaph ịmi. Mị kiḍighi inyina bụo ạkoni awe.”

¹⁸ Kụ egina amem bịn bịdi ọwile ịzuguru phọ ạbidi ọdaph nyọdi.

¹⁹ Kụ ạJizos arelhe ạghi ghisigh ẹphurukpu, kụ ạmiin Jems ọony aZebidi, rꞌạJon umor ọdi, dị odi ologhi oghuugh rọokoḍi ghan ịzuguru phọ ạbidi.

²⁰ Kụ ọdi rọmagh bịdi, bịn bịdi ọwile Zebidi ọde phọ ạbidi, rꞌiphirineen awe phọ pạ ologhi oghuugh phọ, kụ ọghi ọdaph nyọdi.

Ịlo oye dị eru eghola

²¹ Kụ bịdi ụghi ni Kạpaniom, kụ rẹteeny ḍio ophooghian phọ, kụ ạJizos aḍigh pạ obughotu phọ kụ ạtughemi.

²² Kụ ịtughemi phọ ọdi iḍighi ni iikia esi awe, ịdi eḍighi bọ ọdi ạtughemi bịdi ịdipho oye dị ạmoogh ịikpo, kị́dipho ạbutughemia iilogh phọ.

²³ Ị́man mem bịn oye dị eru eghola aru aḍigh obughotu phọ ạbidi, kụ ạlooghi mọ.

²⁴ “Jịzos, ọnyo ạNazeret, nạ rụwa ghan iyoor eeghe ịyaar? Nạ uru ophiemi ayoor ḍụghum? Mị alegheri ni oye dị nạ aru. Nạ kụ oye aghuḍuul phọ kꞌẸnaan.”

²⁵ Kụ ạJizos amooghaam nyọdi mọ, “Ḅoorian amite loor ọdi ạḍua!”

²⁶ Kụ eru phọ ẹsiiny oye phọ kụ ạlooghi, kụ emite loor phọ ẹḍua.

²⁷ Kụ oomo phọ ạbidi omaghagha yogh, kụ oniin apuru ghan nyoniin mọ, “Ịphen phọ ịghen ọdo? Ịphen ịghen ọdo imoom ịtughemi? Rꞌịikpo kụ ạtooghi ghan rạraar rạngo ruru, bịn kụ aruru phọ rẹnaghanan ghan nyọdi.”

²⁸ Bịn ọdu phọ ọdi aaleghaan oomo areelhe phọ etuman bọ Galili.

ẠJizos aakonom ịbadi awe

²⁹ Kụ bịdi romite pạ obughotu phọ, kụ ọghi kꞌaSaimon rꞌẠndru, kụ aJems rꞌạJon ụghi aani ni.

³⁰ Kụ pạ otu phọ, onhiin ạnir aSaimon ạmina ni, dị osipheeny odi uloor, kụ ọghaaph ịphen phọ ọḅeni Jịzos.

³¹ Kụ ọdi ạghi ạpham ḍịghaagh ạnir phọ aphoophe ạrolomi ude, bịn osipheeny phọ amite, kụ ạnir phọ ạko bịdi igoni.

³² Dulhe mem dị ẹnam-aḍio memeel ighool, ụsighe ni oomo ạbidi úmoonogh, rꞌạbudi aruru eghola yogh, oruom nyọdi.

³³ Kụ oomo ẹmha phọ uukpomoghan ni sịphe ọnhu-aḍibuo otu phọ.

³⁴ Kụ ọdi aakonom ni ḍita ạbuo ạreezegh, ạḅile aphorogh yogh ịbadi aruru, kụ ọdi ómeera mọ aruru phọ ẹtagharan ọnhu, ịdi eḍighi bọ bịdi ilegheri ni nyọdi.

Ọghaaph ạJizos ẹpe Galili

³⁵ Eḅon ạḍiroor kụ ạJizos aḅon aḅetenu ạḍua ạghi ekpisi dị enamian, kụ ạaḅereghi.

³⁶ Kụ aSaimon, rꞌạbuphe rꞌọdi ọrol bọ sịphe, ụwa ni nyọdi ọghi

³⁷ ọmiin, kụ ọḅeni nyọdi mọ, “Oomo awe phọ rọwa ni nyịna.”

³⁸ Kụ ạJizos ạḅeni bịdi mọ, “Itu ọḍua ọghi ịpheri phọ ạramha phọ etuman bọ ẹphen, mị ụḅile ụkaaph ooḅi ọghaaph phọ ụḅeni aani bịdi. Esi ịphen kụ ịdi mị ạtuan bọ aru.”

³⁹ Kụ ọdi arelhe yogh oomo phọ aGalili ạghaaph ghan ịlo Ẹnaan pạ arubughotu phọ ạbidi, ạḅile aphorogh yogh ruru.

ẠJizos aakonom oye ẹzegh ọku ufe

⁴⁰ Oniin oye dị ẹzegh ọku ufe eḍighi aru ni ạteeny Jịzos, akpuḍian kụ ạḅem mọ, “Seseeny, lọ nạ kameera ni, pọ uukonom aani ịmi.”

⁴¹ Rꞌigbiririph kụ ạJizos asele ḍịghaagh ọdi ạḅogh nyọdi, kụ ạḅem mọ, “Mị ameera ni. Ḍum!”

⁴² Kụ ẹzegh ọku ufe phọ ẹnighe, bịn oye phọ aatolonu.

⁴³ Kụ ạJizos ạphur nyọdi rụru mọ, “Nyeene agheel,

⁴⁴ ụ́kaaph ghan ụḅeni oye. Kịa aḍeenaan loor phọ ạna-oyil ạrikia phọ. Kịa ạphighiron ẹkia ootolonu phọ ẹpe aMozis ạtooghi bọ, ịlo oḍeenaan awe mọ nạ mamoon.”

⁴⁵ Kụ oye phọ rọḍua, bịn amiigh ogbeelom ịphen phọ oleenyemi, tụtu ạJizos ạwile omite egaan rạmha phọ, kụ ạrol ghan rikpisi dị enamian. Kụ ụḍuaghu ghan ni oomo areelhe phọ ọghi ọteeny nyọdi.