Elegh aLuk 9 - Ạḍinya Iigbia

ẠJizos ạmagh ḍioph rꞌịyal ạbumatuan phọ aaromogh sidom

¹ Kụ ạJizos ạmagh ni ḍioph rꞌịyal ạbumatuan phọ aakpomoghi kụ ạngo bịdi ịikpo ophoroghom ghan aruru rꞌookonom ghan ạreezegh esi aḍien phọ ọdi.

² Kụ ọdi ạlogh bịdi ọghi ọghaaph ghan ịlo ọmar phọ kꞌẸnaan rꞌookonom ạbuphe úmoonogh bọ.

³ Kụ ọdi ạḅeni bịdi mọ, “Ịyaar kẹ́pam. Mꞌịkpara mꞌokuru, mꞌeḍien, mꞌikpoki, mꞌịyal ạrusuoma kẹn ni bịn kẹ́pam.

⁴ Kụ tọrobo otu lọ nyina eḍigh, ịtol li tụtu ẹteeny mem lọ nyina kẹḍua.

⁵ Kụ tọrobo ẹmha lọ nyina ẹghi esi kụ inyina ị́sighe ịlogh otu, mem lọ rẹḍua, ịikpa ịisaar aruwol phọ anyina eseere, ẹsighenaan ḍiigira ọnhu anyina.”

⁶ Kụ bịdi ọḍua ẹmha ọgba ẹmha ọghaaph ghan ooḅi ọghaaph phọ rꞌookonom ghan awe oḍume yogh.

ẠHerod ólhegheri ịlo oḍighi

⁷ Kụ ạHerod ọdaam mọ ạnaghan ni ịlo oomo phọ ịphen emiteghu bọ, kụ ẹeḅaghami ghan ịitughian ọdi, ịdi eḍighi bọ buniin ụḅem ghan mọ ọphon phọ ạJon kụ maḅetenu sịphe aḍuugh phọ.

⁸ Buniin mọ Ilaija kụ mạḅile amite, kụ buniin mọ oniin ọnyo ariil agediidi phọ Ẹnaan kụ maḅetenu.

⁹ Kụ ạHerod ạḅem mọ, “Jọn mị masoph ni ẹmhu akiigh, kụ ọphon mị ạḅile bọ rạnaghan ghan ịlo ọdi ạnhian?” Kụ ọdi ạwa ghan ọmiin ạJizos.

ẠJizos ạperemi eḍien 5,000 awe

¹⁰ Kụ abutelhedom mọ origheel bọ ụghaaph ni oomo ạraraar phọ bịdi oḍighi bọ ọḅeni nyọdi, kụ ọdi ạtuugh bịdi bịn ạpham ạghimom ẹmha dị oghol mọ aBetsaida.

¹¹ Kụ awe phọ ọwaaghi olegheri kụ ọtuonom nyọdi. Kụ ọdi ạghereghom ni bịdi kụ ạghaaph ịlo ọmar phọ kꞌẸnaan ạḅeni bịdi, kụ aakonom bụdi úmoonogh aḍume yogh.

¹² Retu ọwepheghian, kụ ḍioph rꞌịyal ạbumatuan phọ oru ọḅeni nyọdi mọ, “Ḅẹni mọ awe phọ ọghi rạmha rꞌạsiraaghana phọ etuman bọ sịen ogho eḍien ọwaaghiom riisi ọmina, ịdi eḍighi bọ ẹphen yira odi bọ kẹ́mha.”

¹³ Kụ ọdi ạḅeni bịdi mọ, “Nyina kụ ịngo bịdi ịyaar olhe.” Kụ bịdi mọ, “Ịyaar iyoor ílho sịen, emuton oogh iiḅoghoḍi ạbred rꞌịyal ina. Epel lọ yoor kọki oko eḍien ọngo kꞌạbuen kꞌạbuen phọ.”

¹⁴ Kụ ạri alephiri ạnmuny bịn ụghiom ni oogh ọonir. Kụ ọdi ạḅeni bụmatuan phọ ọdi mọ, “Ịḅeni bịdi odia rụuku ọrologhu ude, ẹku ẹku ooghdi awe.”

¹⁵ Kụ bịdi ọtuugh ịphen phọ oḍighi, kụ ọḅeni oomo phọ ạbidi mọ ọrologhu ude.

¹⁶ Kụ ạJizos ạsighe oogh phọ iiḅoghoḍi ạbred phọ rꞌịyal phọ ina phọ, kụ aphogh ạnyu ạke, kụ ạngo ḍịseph Ẹnaan, kụ ạparion, kụ ạsighe ạngo bụmatuan phọ odiemi aḍita awe phọ.

¹⁷ Kụ oomo phọ ạbidi olhe ẹpherogh. Kụ ạbumatuan phọ ọson ipoḍi phọ ịpe esugha bọ kụ emuza ḍioph rꞌịyal ạrigiel.

APita ạḅem mọ ạJizos kụ aMesaya phọ

¹⁸ Eniin aḍio dị ogina ạJizos bịn ạrol esi rạaḅereghi ghan, ạbumatuan phọ uru ni ọteeny nyọdi. Kụ ọdi apuru bịdi mọ, “Awe rọḅem ghan mọ mị ạnhian?”

¹⁹ Kụ bịdi ọphagharanaan mọ, “Buniin rọḅem ghan mọ nạ ạJon oburogh mụum mọ, buniin mọ nạ Ilaija, kụ buniin mọ nạ oniin oyil agediidi phọ Ẹnaan kụ maḅetenu sịphe aḍuugh phọ.”

²⁰ Kụ ọdi apuru bịdi mọ, “Nyina rẹḅem aani ghan mọ mị ạnhian?” Kụ aPita mọ, “Nạ kụ aMesaya phọ ọpo Ẹnaan eguanaan bọ mọ katu phọ.”

ẠJizos ạkaaph akol ịminimiin phọ rꞌaḍuugh phọ ọdi

²¹ Kụ ạJizos ạphur bịdi rụru mọ kụ́ḅeni oye mọ ọno kụ aKraist phọ ni,

²² kụ ạloghom mọ, “Ọony phọ Oye kạmiinom ni iboom ịminimiin. Ikumoor awe phọ rꞌạbuo ạrumhu ariil ạrikia phọ rꞌạbutughemia iilogh phọ komutonaan ni nyọdi, kokiigh ni nyọdi, kụ ḍughul otu dị kemuneniom ịraar kụ ọdi aḅetenu esi aḍuugh phọ.”

²³ Kụ ọdi ạḅeni oomo phọ ạbidi mọ, “Oye lọ rạwa ọdaph ạmi asooromi loor ameeraam ḍuugh, kụ aḅeton ghan osuom arusu phọ ọdi ḍio ḍio ḍio arool, kụ ụdapham ghan ịmi!

²⁴ Oye lọ ạmaghami ghuḍum mọ ọdi ịyaar kapiemi ni, kụ oye lọ ghuḍum mọ ọdi ụ́maghami ịyaar loor ẹmhu phọ ạmi kạmoogh ni ghuḍum.

²⁵ Eeghe ạsuo kụ ẹdi oye kạsighe dị ạmoogh ẹelha aḅirini phọ kụ aghin ạḅile aphiemi ghuḍum mọ Ẹnaan ẹngo bọ nyọdi?

²⁶ Oye lọ ughiilom ịmi rꞌikpo ọnhu phọ ạmi umugholoor, pọ Ọony phọ Oye kạḅile ni akiilom aani nyọdi umugholoor mem dị ọdi katu rꞌigbogh phọ ọdi rꞌỌde phọ rꞌạruukpaany phọ Ẹnaan.

²⁷ Mị rịḅeni ni inyina igey phọ mọ buniin ạbuen ọmeregha bọ sịen kọmiin ni ọmar phọ kꞌẸnaan kụ ogbi omugh.”

ẠJizos anmia

²⁸ Emiigh mem mọ ạJizos ạghaaph bọ ịphen phọ, ephu ịyal ariiḍio reten, kụ ọdi ạtuugh Pita rꞌaJems rꞌạJon bịn ạpham ạsiinyom ẹeḅaraph ịlo ọoḅereghi Ẹnaan.

²⁹ Kụ ọdi odi ni rạaḅereghi kụ aghisigh ọdi anmia kụ ibura phọ ọdi ekitonu ẹḅaal rẹtaphan.

³⁰ Ekperenom bịn ịyal awe oru omite kụ ọghaaphan rꞌọdi. Awe phọ aMozis rꞌIlaija,

³¹ dị orumom rꞌeegu kꞌạke phọ kụ ọghaaphan rꞌạJizos ịdi ọdi kạnuun amugh ẹpe Jeruselem ịdipho Ẹnaan egbiighiom bọ.

³² Ọbo ạralha aḅogh Pita rꞌạbuphe ọrol bọ rꞌọdi kụ bịdi ụsuma ni ọmiin Jịzos rꞌeegu phọ ọdi rꞌịyal phọ awe phọ ọmeeraam bọ nyọdi.

³³ Ịdipho awe phọ ọwile bọ Jịzos rọḍua kụ aPita ạḅeni Jịzos mọ, “Ọtughemia, ịduon yira odi bọ sịen ẹnighe ni dị yoor kọlogh ịraar arophoghoghoony, oniin ọlo ạna, oniin ọlo aMozis, oniin ọlo Ilaija.” Ọdi ạḅem ni bịn, ólhegheri ịpe ọdi rạkaaph bọ.

³⁴ Ịdipho ọdi rạḅem ghan bọ ịphen phọ, kụ ọotu asoor akoom bịdi, kụ aruugu asiph ni bịdi ịdipho ọotu phọ maakpereghiom bọ bịdi,

³⁵ kụ ẹḍogh ẹḍua sịphe ọotu phọ kụ ẹḅem mọ, “Ọphon kụ ogina Ọony phọ ạmi mị ạsaḅar bọ. Ịnaghanan nyọdi.”

³⁶ Kụ ẹḍogh phọ reḅoorian kụ ogina ạJizos bịn asugha. Kụ bịdi oḅoroghian kụ ịyaar ịlo ịphen bịdi ọmiin bọ ụ́kaaph ụḅeni rꞌoniin oye riiḍio phọ ịpe phọ.

ẠJizos aakonom mọony dị ọkaraph uwaloor ạaḅaghami

³⁷ Ḍio phọ ạḍiphe etum bọ pạ, bịdi ụḍua ni ẹeḅaraph phọ osoor, kụ aḍiboom aḍita awe ozuan Jịzos.

³⁸ Kụ oniin oye sịphe aḍita awe phọ ạlho ạḅem mọ, “Ọtughemia, seseeny ni, nmạ mọony phọ ạmi ighirigiir. Ọdi phọ bịn kụ ogina ọony ạmi.

³⁹ Nạghan ni. Ọkaraph uwaloor phọ rạsiiny ghan ni mọony phọ bịn ọdi kạlooghi ekperenom, asiphi isughuna tụtu oopha afugh ọnhu phọ. Ọkaraph uwaloor phọ rakirikiriom ghan ni nyọdi dị rạ́wa ghan mun ọwile ọdi ọḍua.

⁴⁰ Kụ mị ạaḅereghian bụmatuan phọ ạna mọ ophorogh ọkaraph uwaloor phọ kụ bịdi útue.”

⁴¹ Kụ ạJizos ạphagharanaan mọ, “Sey, ọphon phọ ọghen ọdo ọkaraph oghiil dị omeeraam ụ́moogh? Mịna rꞌanyina kọḅile ọtolan ika nụun? Mị kạkparam ika esi anyina? Sịghe mọony phọ ạna uruom.”

⁴² Kụ ọony phọ atelhe ratu, kụ ọkaraph uwaloor phọ alher nyọdi rꞌigbagbaar kụ asiphi isughuna. Kụ ạJizos ạḅaam ọkaraph uwaloor phọ, kụ aakonom mọony phọ ạḅogh ạngo ọde phọ.

⁴³ Kụ igbogh phọ Ẹnaan iḍighi ni iikia esi oomo phọ ạbidi. Awe phọ odi ni esi iikia oomo phọ ịphen ạJizos aḍighi bọ, kụ ọdi ạḅeni bụmatuan phọ ọdi mọ,

ẠJizos ạḅile kẹn ạkaaph akol ḍuugh phọ ọdi

⁴⁴ “Iler rụru phọ anyina ẹnaghan ikpo ọnhu phọ ịphen. Kọḅogh ni Mọony phọ Oye ọngo ịikpo awe.”

⁴⁵ Kụ bịdi ụ́naghan ọghaaph phọ ọphon, ịdi eḍighi bọ ạaghi ni ọbo bịdi kolegheri ghan bọ ẹmhu phọ, kụ eepuph ímeera mọ bịdi opuru nyọdi ịyaar.

Ạnhian kụ ọkaraghi ogbogh phọ?

⁴⁶ Kụ ạbumatuan phọ ụugbaghanaan ni ịlo oye lọ ạkaraghi aḍighi ogbogh sịphe ogbo phọ ạbidi.

⁴⁷ Kụ mem dị ạJizos alegheri bọ ịitughian phọ ạbidi, ọdi ạmagh ni ọbumoony ạmeremi ịigaany phọ ọdi,

⁴⁸ kụ ạḅeni bịdi mọ, “Oye lọ ạloghoma ọbumoony phọ ọphon loor ẹmhu phọ ạmi, pọ mụloghoma aani ịmi; kụ ọlo ụloghoma ịmi, pọ ạloghomaam ni nyọpo urom bọ ịmi. Kụ oye lọ ụ́man ịyaar sịen ogbo phọ anyina kụ kaḍighi ogbogh.”

Ọlo inyina úkeel, pọ iḍighan ni inyina

⁴⁹ Kụ ạJon ạḅeni mọ, “Ọtughemia, yoor ụmiin ni oniin oye dị aghol ḍien phọ ạna kụ raporogh ruru, kụ yoor ọḅeni mọ ịdipho kúḍighi, ịdi eḍighi bọ ọdi rꞌayira ụ́ḅoph oghuugh.”

⁵⁰ Kụ ạJizos ạḅeni nyọdi rꞌạbueri phọ abutelhedom mọ mọ, “Kékikima nyọdi; ọpo rꞌanyina rébeeghi bọ, pọ iḍighan ni inyina.”

Eniin ẹmha aSameria okel Jịzos

⁵¹ Mem dị ariiḍio phọ rekpekian bọ dị kọsighe Jịzos ọki kꞌạke, ọdi ạzoghori mọ ọno ọ́ghi Jeruselem íten.

⁵² Kụ ọdi ạlogh we dị oḍiemi ghan ọghi osi eniin ẹmha aSameria ookolobian oomo ạraraar oseenaan nyọdi.

⁵³ Kụ aweye ẹmha phọ ọḅem mọ, “Ọdi aru asi yira nyọdi rọ́sighe, ịdi eḍighi bọ iganana ni mọ ọdi aten rạki Jeruselem.”

⁵⁴ Mem dị aJems rꞌạJon ạbumatuan phọ ọdi ọmiin bọ ịduon phọ, upuru ni mọ, “Ọmoogh-we, nạ rạwa ni mọ yoor ọmagh nịan kꞌạke osoore ophiemiom bịdi ḍụghum?”

⁵⁵ Kụ ạJizos akiton ạḅaam bịdi.

⁵⁶ Kụ bịdi ọḍua onyeene ẹnon ẹmha.

Bụphe rọwa bọ ọdaph ạJizos

⁵⁷ Bịdi oten rọki, kụ oniin oye ạḅeni Jịzos mọ, “Mị kạdaph ni nyịna tọrobo ekpisi lọ nạ rạki.”

⁵⁸ Kụ ạJizos ạḅeni nyọdi mọ, “Ạruukpa-ako bịn ẹmoogh ni ropogh, ịnun bịn ẹmoogh ni ruutu, kụ Ọony phọ Oye ọ́moogh esi oḅetenom ẹmhu ọdi.”

⁵⁹ Kụ ọdi ạḅeni ọnon oye mọ, “Ụdaph ịmi.” Kụ oye phọ mọ, “Oye phọ, meera ni mị ukeel uḍi ọde ạmi kụ.”

⁶⁰ Kụ ạJizos mọ, “Bịle bụphe momuughu bọ oḍiighi iḍim ạbidi, kịa ghụn ạghaaph ghan ịlo ọmar phọ kꞌẸnaan aleenye eleeny.”

⁶¹ Kụ ọnon oye ạḅile kẹn ạḅeni nyọdi mọ, “Oye phọ, mị kạdaph ni nyịna kụ bịle ni mị ụki ụḅeni kꞌạmi mọ ọmaar ọrol.”

⁶² Kụ ạJizos ạḅeni nyọdi mọ, “Oye lọ mạpham ẹsua oḍighinom oḍighi kụ ạḅile ghan rapogh ọman ọ́kpe oḍigh ọmar phọ kꞌẸnaan.”