Elegh aLuk 7 - Ạḍinya Iigbia

ẠJizos aakonom mọony-otu uw-ẹmhu ẹgham ọlo aRom

¹ ẠJizos rọghaaph oomo ạraraar phọ ịphen rọḅeni we phọ kụ ạḍua ạghi Kạpaniom.

² Oniin uwo ẹmhu ạbuo ẹgham ọlo aRom ạrol li ẹpe phọ dị ẹbene ọdi ạrol emoon dị ropogh ẹpughol ạmuum. Oye phọ ọphon ạmaghami ni ẹbene phọ ọdi ịyaar,

³ kụ rọnaghan bọ ịlo ạJizos, kụ arom buniin ikumoor awe ạbuo aJu phọ mọ ọghi ọoḅereghian mọ ọdi aru aḍume ẹbene phọ ọno.

⁴ Kụ bịdi oru bọ ọteeny Jịzos ụuḅereghian ni nyọdi iboom mọ, “Oye phọ ọphon ạkpe ni dị nạ kạloghonaan ḍịghaagh.

⁵ Ọdi ạpomoghian ni we phọ ayira, kụ mụlhoghonaan iyoor obughotu.”

⁶ ẠJizos ạdaph ni bịdi, kụ ọtol ropogh otu phọ bịn uwo ẹmhu phọ arom rịghiri ọdi mọ ọghi ọḅeni nyọdi mọ, “Oye phọ, kạ́aḅaghamian loor. Mị ụ́kpe dị nạ kaḍigh kꞌạmi.

⁷ Ị́kpe kẹn dị mị karu ạteeny nyịna rꞌaloor. Ḅẹm ọnhu bịn ẹbene phọ ạmi kaḍum ni.

⁸ Mị ạmoogh ni bụdi upu ịmi rꞌạbuo ẹgham dị mị apu. Mị arom nyọon mọ kịa, bịn rạki ghan ni. Mị ạḅeni ọnon mọ tue, bịn ratu ghan ni. Ịlo mị ạḅeni ẹbene ạmi mọ aḍighi, bịn raḍighi ghan ni.”

⁹ Mem dị ạJizos ạnaghan bọ ịphen phọ, omeeraam mọ uwo ẹmhu phọ ạmoogh bọ aḍighi ni iikia esi ọdi, kụ akiton ạḅeni ḍita awe phọ rọdaph bọ nyọdi mọ, “Mị ạkar rịḅeni ghan inyina mọ mị kọ̋miin ghan oye dị umeeraam ịmi omeeraam dị aleeny ịduon, ghạlamo rꞌọnyo Ịzirel li!”

¹⁰ Kụ bụphe orom bọ dom mọ ọḍua oḅula otu phọ kụ ọmiin dị ẹbene phọ mamoon.

ẠJizos aḅeton mọony ekpukele ạnir esi aḍuugh

¹¹ Íbia bịn ạJizos ạghi aḍigh ẹmha dị oghol mọ aNen, kụ ạbumatuan phọ ọdi rꞌaḍiboom aḍita awe ụdaph ni nyọdi.

¹² Ọdi atu atuman ọnhu-aḍibuo ẹmha phọ, kụ aazuanan oye dị orool rọki ọdi. Onhiin phọ ekpukele ạnir, dị ạmar ogina ọony phọ ọphon bịn. Kụ aḍita awe ẹmha phọ ụdaph aani ni ạnir phọ.

¹³ Mem dị Ọmoogh-we phọ ạmiin bọ ạnir phọ, ạmoogh ni igbiririph kụ ạḅeni mọ, “Kámoghi mun wo.”

¹⁴ Kụ ọdi ạghi ạḅogh igbe phọ, kụ ạnmuny oḍi phọ ọmeera. Kụ ọdi ạḅeni nyọpo amugh bọ mọ, “Mọony phọ, mị rạḅeni nyịna mọ ḅetenu.”

¹⁵ Kụ ọdi aḅetenu ạrol ude, kụ amiigh ọḅa. Kụ ạJizos ạḅogh nyọdi ạngo onhiin phọ.

¹⁶ Kụ aḍiigu isiph ni oomo awe phọ, kụ oboom Ẹnaan mọ, “Ogbogh oyil kꞌẸnaan mamite sịen ogbo phọ ayira,” ḅịle kẹn mọ, “Ẹnaan meru ọnma ighirigiir we phọ ọdi.”

¹⁷ Kụ ọdu ạraraar phọ ịphen ạJizos aḍighi bọ aaleghaan oomo eelhe phọ aJudia rꞌạramha phọ etuman bọ pạ.

Awe dị ạJon oburogh mụum mọ arom dom

¹⁸ Kụ ạbumatuan phọ ạJon ụghaaph ni oomo ạraraar phọ ịphen ọḅeni nyọdi.

¹⁹ Kụ ọdi arom ni ịyal ạbuno mọ ọghi opuru Ọmoogh-we phọ mọ, “Nạ kụ ọdi mị ạḅem bọ mọ katu phọ ḍụghum kụ ọḅile ni okori ọnon oye?”

²⁰ Kụ awe phọ ọghi ọteeny Jịzos kụ ọḅeni mọ, “ẠJon oburogh mụum mọ urom iyoor oru opuru ạna mọ, ‘Nạ kụ ọdi ọno ạḅem bọ ni mọ katu phọ ḍụghum, kụ ọḅile ni okori ọnon oye?’”

²¹ Ọkar amem mọ ọpo phọ ạJizos aakonom ni ịbadi ạbudi omeleghu rẹezegh kịrokiro, kụ aphorogh yogh ịkaraph aruwaloor amiteghom loor ịbadi awe, kụ aḍighi dị ịbadi ạbuo ikpom ariḍien ọmiin aani eten.

²² Kụ ọdi ạḅeni bụmatuan phọ ạJon mọ, “Ikeel ẹghaaph ịphen nyina rẹnaghan bọ ẹḅile bọ rẹmiin, ẹḅeni Jọn. Awe ikpom ariḍien mọmiin aani eten, ạrukugha moḅerenu aani rotelhe yogh, awe ẹzegh ọku ufe moḍumogh aani, ạbuḅaaghaph ḅạaghaph rọnaghan aani ḍụghum, moḅerion bụphe momuughu bọ ọngo ghuḍum, mọghaaph ooḅi ọghaaph ọḅeni aani rukulom.

²³ Iboh kꞌẸnaan kẹtolonaan ni oye lọ ịmi úghel.”

²⁴ Kụ bụen oru bọ dom mọ ạJon rọḍua, kụ ạJizos amiigh ọghaaph ịlo ạJon ọḅeni aḍita awe phọ mọ, “Mem mọ nyina ẹghi bọ ẹpe ẹdala phọ ọmiin ạJon, nyina ịkaraghi ghan egbiom mọ nyina kẹmiin eeghe ịyaar? Ikpu dị ookuugh radeghemi ḍụghum?

²⁵ Nyina ịkaraghi ghan egbiom mọ nyina kẹmiin eeghe ịyaar, oye dị aanmenan iiloghoḍian loologhoḍian iinmenan ḍụghum? Bụo iiloghoḍian loologhoḍian iinmenan rꞌuduru phọ otughogh rigiga ạraalha kẹ́pe ẹdala phọ.

²⁶ Nyina ịkaraghi ghan egbiom mọ nyina kẹmiin eeghe ịyaar, oyil Ẹnaan ḍụghum? Ii, mị rịḅeni ghan inyina mọ ọphon nyina ẹmiin bọ apu oyil.

²⁷ Ọphon kụ ọdi ọge bọ ịlo ọdi mọ, ‘Pogh aani, mị ratom ni ọokpaany ạmi dị kaḍiemi ghan aselemi eten aseenaan nyịna.’

²⁸ Mị rịḅeni ghan inyina mọ sịphe oomo phọ ạbuphe ạnmariir kụ ọmaraghi bọ, oye dị apu Jọn oburogh mụum mọ ólho; kụ ọlo aḍighi ọbam ẹpe ọmar phọ kꞌẸnaan kụ apu ni nyọdi.”

²⁹ Oomo awe phọ rꞌạbubonyiom iisogh phọ ụnaghan ni ịpe ọdi ạghaaph bọ. Bụen phọ uboom ni Ẹnaan, ịdi eḍighi bọ bịdi momeeraam ni ạJon aburogh bịdi mụum.

³⁰ Kụ aFarisi phọ rꞌạbugbaam iilogh phọ, bụphe úmeeraam bọ mọ ạJon awur bịdi mụum mọ, ughel li rigbiom mọ Ẹnaan egbianaan bọ bịdi.

³¹ Kụ ạJizos ạḅile ạḅem mọ, “Mị kạsighe eeghe ọdo ịyaar kụ ạmaaniom we phọ ạnyiidipho? Kọmaaniom bịdi eeghe?

³² Bịdi ọkigh ịbam ạnmuny dị ọrologhu ude ḍighi. Buniin rọmagh ghan buniin kọḅeni mọ, ‘Yoor ophula ruuḍue, nyina ịḅa phọ ị́ker. Yoor ọmoor sụor ẹkaraph ẹmugh, nyina ímoghi.’

³³ ẠJon oburogh mụum mọ atu bọ ạtuan ịiḅereghi rạtol ghan ọkoony, ḅịle kẹn miim rạ́pughol ghan, kụ nyina rẹḅem ghan mọ, ‘Eru ekola ni nyọdi.’

³⁴ Ọony phọ Oye atu bọ rale ghan kạphughol, kụ nyina rẹḅem ghan mọ, ‘Ịmiin aani oye ekpooko rꞌọpughol miim, ọyaghiri ạbubonyiom iisogh rꞌabuḍighinom ịkaraph.’

³⁵ Bụphe ọsighe bọ olegheri ịyaar phọ Ẹnaan ọmaghami ịyaar bịn kụ ulegheri mọ igey ni.”

ẠJizos aḍigh kꞌaSaimon ọnyo aFarisi phọ

³⁶ Oniin ọnyo aFarisi phọ ạmagh ni Jịzos mọ aru kꞌọno ạbuno olian eḍien, kụ ạJizos ạghi ni kꞌọdi ạrol ude akulughi ruwol olhe eḍien phọ.

³⁷ Oniin ọnyo ipesi ạnir ạrol li ẹmha phọ ẹpe phọ. Ọdi ạnaghan ni mọ ạJizos odi kꞌọnyo aFarisi phọ rale ghan eḍien, kụ ạsighe eeko elo eeḅi eḍu,

³⁸ kụ aru ạmeeraam ọman ạJizos sịphe aruwol phọ ọdi, kụ amoghi izin aatolom ruwol phọ ạJizos, kụ ạsighe sịlaal ẹmhu phọ ọdi agbuuroghom ghan izin phọ, kụ ạakpunogh ruwol phọ kụ ạsighe elo phọ agbul.

³⁹ Mem dị ọnyo aFarisi phọ ọpo ạmagh bọ Jịzos ạmiin bọ ịphen phọ, ọdi ạḅenian ni loor mọ, “Eḍighi mạar dị oye phọ ọphon kụ ạkar ri aḍighi oyil kꞌẸnaan, ọbo ọdi mulegheri ni ọdo oye dị ạnir phọ rạaḅoghogh bọ nyọdi aru. Ọbo ọdi mulegheri ni ọdo ạdol ipesi dị ạnir phọ ọphon odi ghan.”

⁴⁰ ẠJizos ạghaaph ni amitiom kụ ạḅem mọ, “Saimon, mị ạmoogh ni ịyaar ọḅeni ạna.” Kụ ọdi mọ, “Ọtughemia, kạaph ni.”

⁴¹ Kụ ạJizos mọ, “Ịyal awe ụrol li dị olhe ọmugh ọbologhiom ikpoki. Oniin ale ọmugh 500 ipoḍi asilva, ọphori phọ ale ọmugh 50 ipoḍi asilva.

⁴² Ọnyo ạbidi lọ arue ạkpe ọ́rol, kụ ọdi ạwilenaan ịyal phọ ạbidi. Ọghen sịphe ịyal phọ ạbidi kụ kạpomoghian nyọdi igbogh?”

⁴³ Kụ aSaimon ạphagharanaan mọ, “Mị ragbi mọ ọpo ọwilenaan bọ igbogh ikpoki phọ.” Kụ ạJizos mọ, “Ịduon phọ ni.”

⁴⁴ Pọ kụ amem dị ọdi akiton asoman ạnir phọ kụ apuru Saimon mọ, “Nạ rạmiin ni ạnir phọ ọphon? Mị aru bọ kꞌạna, nạ ịmi mụum ụ́ngo ootola aruwol ạmi, kụ ạnir phọ ọphon mạsighe izin ariḍien phọ ọdi aatolom ruwol phọ ạmi, ạḅile ạsighe sịlaal ẹmhu phọ ọdi agbuuroghom.

⁴⁵ Nạ ịmi ụ́kpun, kụ ọdi ọ́wile ọokpunogh aruwol phọ ạmi kꞌamem mọ mị aru bọ aḍigh sịen.

⁴⁶ Nạ elo ẹmhu ạmi ógbul, kụ ọdi magbul ruwol phọ ạmi elo eeḅi eḍu.

⁴⁷ Mị ạḅeni nyịna mọ eboom ẹphomoghian phọ ẹphen ọdi mụphomoghian bọ ịmi meḍeenaan mọ mọwilenaan nyọdi ịbadi ịkaraph phọ ọdi. Tọrobo oye lọ ọwilenaan ịbam kạtuugh ni ịbam ạpomoghian.”

⁴⁸ Kụ ạJizos ạḅeni ạnir phọ mọ, “Mọsar ịkaraph phọ ạna ọwilenaan nyịna.”

⁴⁹ Bụphe rꞌọdi rolian bọ eḍien phọ upuru ghan ni mọ, “Ọphon phọ ọghen ọdo oye dị ạsar ịkaraph rạbilenaan yogh we?”

⁵⁰ Kụ ạJizos ạḅeni ạnir phọ mọ, “Omeeraam mọ ạna mạphel nyịna atene. Keel rꞌedughom.”