Elegh aLuk 6 - Ạḍinya Iigbia

Aḍipuru ịlo aḍio ophooghian phọ

¹ Ḍiniin aḍio ophooghian dị ạJizos rꞌạbumatuan phọ ọdi orelhe roten ozo ịbiakpa, ạbumatuan phọ ụkuughi ni ịbiakpa phọ ọponyon ole.

² Kụ buniin aFarisi phọ ụḅeni ni nyọdi mọ, “Nyina reḍighi ghan ugbini ugbini ḍio ophooghian phọ.”

³ Kụ ạJizos mọ, “Nyina kạ̋al ghan ịpe aDevid aḍighi bọ mem mọ ọkoony asiph bọ nyọdi rꞌạbuphe ọdaph bọ nyọdi, kụ bịdi ịyaar olhe phọ ụ́moogh bọ?

⁴ Ịdi ọdi aḍigh otu Ẹnaan kụ alhe eḍien phọ oseere bọ sịphe ạdol iigbia phọ, kụ ạngaani bụphe ọdaph bọ nyọdi, nyẹpe emuton bụpinyon rịkia phọ ị́kpe bọ dị ọnon oye kale.”

⁵ Kụ ạJizos ạḅem aseeriom mọ, “Ọony phọ Oye kụ ạmooghom ni ḍio ophooghian phọ.”

Ịlo oye dị ạḍighaagh ẹḅoonian

⁶ Ẹnon aḍio ophooghian, kụ ạJizos ạḅile aḍigh obughotu phọ ạtughemi we phọ, kụ oniin oye dị ạḍighaagh elhiom mọ ẹḅoonian ạrol aani ni pạ phọ.

⁷ Kụ ạbutughemia iilogh phọ rꞌaFarisi phọ ukori ghan ni ọmiin mọ ạJizos kaakonom ni oye ḍio ophooghian phọ, ọbo bịdi osoorom nyọdi erugh.

⁸ Kụ ọdi alegheri ni ịitughian phọ ạbidi, kụ ạḅeni oye phọ ạḍighaagh phọ ẹḅoonian bọ mọ, “Ḅetenu amite sịen ogbo phọ.” Kụ ọdi aḅetenu amite.

⁹ Kụ ạJizos ạḅeni bịdi mọ, “Mị ạmoogh ni ḍipuru opuru anyina. Iilogh phọ ayira ẹḅem mọ yira oḍighi ghan ika ḍio ophooghian phọ? Oḍighi ghan iiḅi ḍụghum, kụ oḍighi ghan ịkaraph? Ẹkpe oḍume oye, kụ ẹkpe ophiemi ḍụghum?”

¹⁰ Kụ ọdi aphogh oomo phọ ạbidi akitonom kụ ạḅeni oye phọ mọ asele ḍịghaagh phọ ọdi. Kụ oye phọ ạtuugh ịdipho aḍighi, kụ ạḍighaagh phọ emoon.

¹¹ Kụ ịghagh ni iloghi phọ ạbidi kụ omite ezue oopuruan ịlo bịdi koḍighi Jịzos.

ẠJizos ạma ḍioph rꞌịyal awe

¹² Riiḍio phọ ịpe, ạJizos ạghi ni ạsiiny ẹeḅaraph ọoḅereghi Ẹnaan, kụ ạrol ịiḅereghi oomo aḍughul phọ.

¹³ Rẹteeny ḍịroor kụ ọdi ạmagh bụmatuan phọ ọdi aakpomoghi kụ ạsaḅar ḍioph rꞌịyal awe aghol mọ abutelhedom.

¹⁴ ASaimon ọpo ọdi ạta bọ mọ aPita, rꞌẠndru umor ọdi, rꞌaJems, rꞌạJon, rꞌaFilip, rꞌaBatolomiu,

¹⁵ rꞌaMatiu, rꞌạTomos, rꞌaJems ọony phọ Ạlfios, rꞌaSaimon Zelotis, rꞌaJudas ọony aJems,

¹⁶ rꞌaJudas Ịskariot ọpo aal bọ nyọdi.

ẠJizos ạtughemi ghan we, ạḅile aakonom bụdi úmoonogh

¹⁷ ẠJizos rꞌạbidi ọḍua ạnyu ẹeḅaraph phọ rotu osoor, kụ ọdi ạmeera esi dị eeleeny. Aḍiboom aḍita awe dị ọḍua oomo eelhe aJudia rꞌẹmha aJeruselem rꞌạramha aTaya rꞌaSaidon ẹpe iigbom ọphiiny-ạbazi phọ kụ oru,

¹⁸ ụrol aani ni ịlo ọnaghan ọghaaph phọ ọdi rꞌookonoma asiloor phọ ạbidi. Bụdi ịkaraph aruwaloor eghola yogh uru kẹn ni ookonoma aani siloor phọ ạbidi.

¹⁹ Oomo awe phọ eenan ghan ọteeny aani ọdi ọḅogh, ịdi eḍighi bọ ịikpo ịḍua ghan ni loor ọdi eekonom yogh oomo phọ ạbidi.

Iboh rꞌịminimiin

²⁰ Kụ ạJizos aphogh bụmatuan phọ ọdi kụ ạḅeni mọ, “Iboh kꞌẸnaan ịrolonaan inyina arukulom mọ. Ọmar phọ kꞌẸnaan ọlo anyina ni.

²¹ Iboh kꞌẸnaan ịrolonaan inyina ạbuphe ọkoony phọ rasiph bọ nyịidipho. Nyina kele ni emuzeḍi rụkuruḅaka phọ anyina. Iboh kꞌẸnaan ịrolonaan inyina ạbuphe romoghi bọ nyịidipho. Nyina kẹmilogh ni tugey ạreegh.

²² “Iboh kꞌẸnaan ịrolonaan inyina mem dị awe ịlogh inyina ḍien kụ ighel inyina kụ iituuny inyina kụ isuughi inyina ịnhu loor ẹmhu Ọony phọ Oye.

²³ Ịmoogh iboh rꞌọḍe mem lọ ịphen phọ emite, ịdi eḍighi bọ iseenaan ni inyina igbogh aruunmo ẹpe kꞌạke. Ilegheri mọ ạburude ạburude phọ ạbidi ụkpiloghom ni ịduon riil phọ Ẹnaan.

²⁴ “Pọ eeghe ọdo ịminimiin dị kịrolonaan inyina ạbuphe ẹmoogh bọ ẹelha phọ nyịidipho. Nyina mẹghelom dọl ẹeḍiom mọ anyina ẹman.

²⁵ Pọ eeghe ọdo ịminimiin dị kịrolonaan inyina ạbuphe molhe bọ nyịidipho omuzeḍi rụkuruḅaka phọ. Nyina kẹtol li ọkoony. Pọ eeghe ọdo ịminimiin dị kịrolonaan inyina ạbuphe rẹmilogh bọ nyịidipho, nyina kẹmoogh ni ọto rꞌemoghi.

²⁶ “Pọ eeghe ọdo ịminimiin dị kịrolonaan inyina mem dị oomo awe ọgba igey ịlo anyina. Ilegheri mọ ạburude ạburude phọ ạbidi ụghaaphaan ghan ọdo phọ ịphen riil ọkpe phọ.

Ịpomoghian bụmulogh-ḍien phọ anyina!

²⁷ “Kụ mị rịḅeni ghan inyina phọ rịnaghan bọ ịmi mọ ịpomoghian bụmulogh-ḍien anyina, eḍighi igey ẹngo bụphe ịlogh bọ inyina ḍien phọ.

²⁸ Ịngo ooḅi ọghor bụphe isuughi bọ inyina ịnhu phọ, ẹeḅereghi ẹngo bụphe ịmiine bọ inyina.

²⁹ Oye lọ aḅor nyoniin okpo ạna, ḅịle ni ạngo nyọori phọ dị ạḅile aḅor. Oye lọ ạsighe ạsuoma ạna, kámirighan ukpe lọ nạ ramuuna ghan ologhi.

³⁰ Ngọ ghan ni ịyaar lọ oye ạlom nyịna. Oye lọ ạsighe ịyaar ạna, kápuru mọ ọdi aḅulemi.

³¹ Tụugh ịlo oḍighi nyịna kụ kẹnighe kụ aḍighi ghan bụnon awe.

³² “Nyina ẹphomoghian ghan bụlo ịphomoghian inyina bịn, eeghe aruunmo kụ ẹdi Ẹnaan kiinmo bọ inyina? Rꞌabuḍighinom ịkaraph phọ bịn rọpomoghian ghan ni bụphe ọphomoghian bọ bịdi.

³³ Nyina eḍighi ghan igey bụlo riḍighi ghan inyina igey bịn, eeghe aruunmo kụ ẹdi Ẹnaan kiinmo bọ inyina? Rꞌabuḍighinom ịkaraph phọ bịn roḍighi ghan ni ịphen phọ.

³⁴ Nyina etene ghan ọmugh bụlo nyina eḍuom ologhi mọ kọkpe ni bịn, eeghe aruunmo kụ ẹdi Ẹnaan kiinmo bọ inyina? Rꞌabuḍighinom ịkaraph phọ bịn, oniin ratene ghan ni nyoniin ọmugh, eḍighi mạar dị kọkpe ni ọmugh phọ dị atene bọ.

³⁵ Ịpomoghian ghụn bụmulogh-ḍien anyina eḍighi ghan bịdi iiḅi. Iteneghi ghan ịimugh bịn képuru ghan mọ ọḅile ịkpeeghi inyina. Ịduon kụ ẹdi nyina kẹmoogh iboom aruunmo. Nyina kụ keḍighi nmụny Egbogh Ẹnaan phọ. Ọdi ạnighe ni esi ạbuphe rólegheri ghan bọ iiḅi lọ oḍighi bịdi rꞌabuḍighinom ịkaraph.

³⁶ Ịnma ghan ighirigiir ịdipho Ọde phọ anyina rạnma ghan bọ ighirigiir phọ.

Kéegboonaan ịiruen bụnon awe

³⁷ “Nyina íigboonaan ịiruen bụnon, Ẹnaan inyina ịiruen kíigboonaan. Nyina ị́ḍagha bụnon, Ẹnaan inyina kị́ḍagha. Ịsar ghan ẹwilenaan bụnon, Ẹnaan kẹsar ghan ni ịwilenaan inyina.

³⁸ Ịngaani ghan bụnon, Ẹnaan kịngaani ghan ni inyina, kụ kọto ghan ni, oviil, opighemi, kụ ẹmaar emuza ẹbeleghian ẹtoom mọ nyina kẹboor bọ. Ịpe nyina edi bọ ẹngo bụnon kụ ịdi Ẹnaan kedi ni ịngo aani inyina.”

³⁹ Kụ ạJizos ạḅile adoghonaan bịdi ḍidogh phọ ạḍien mọ, “Oye ikpom ariḍien kátue aḍiemiom oye ikpom ariḍien. Aḍiemiom, pọ ịyal phọ ạbidi komeleghu ni osuma ooni.

⁴⁰ Ạmatuan rápu ghan ọtughemia phọ ọdi, kụ tọrobo oye lọ ạtuugha ạmadan kạtol aani ni ịdipho ọtughemia phọ ọdi.

⁴¹ “Iḍighi bọ ika nụun kụ nạ ạmiin bọ ọpherepe ạḍipe phọ ọpo aḍigh bọ ekpeḍien umor phọ ạna, kụ nạ óloghoma bọ mọ aḍiboom ạḍupo edi aani ni ologhi ekpeḍien phọ ạna?

⁴² Nạ katue bọ ạḅeni ika umor ạna mọ, ‘Umor ạmi, mị ạsighe ọpherepe ạḍipe phọ aḍigh bọ ekpeḍien phọ ạna,’ kụ ạri nạ óloghoma ḍiboom ạḍupo phọ edi aani bọ ologhi ekpeḍien phọ ạna? Nạ olegheri-ịlo-ọnon, ịlo-ạna-úlegheri. Pụr ạsighenaan ḍiboom ạḍupo phọ eḍigh bọ ekpeḍien phọ ạna, pịdi nạ ạmaar ạsighe ọpherepe ạḍipe phọ ọpo odi bọ ologhi ekpeḍien umor phọ ạna.

Ireeny rꞌiimuma phọ ạbidi

⁴³ “Ogey oreeny dị ramuum ghan ịkaraph iimuma ólho, ọkaraph oreeny dị ramuum ghan igey iimuma ólho.

⁴⁴ Oreeny oreeny rolegheriom ghan iimuma phọ ọdi. Oḍebe rámuum ghan rughuuny uman, ọoka rámuum ghan rughuuny oogiri.

⁴⁵ Ogey oye rạkaaph ghan igey ạraraar sịphe aḍita igey ạraraar phọ dị aakpomoghi bọ sịphe ologhi phọ ọdi kụ kamitiom, kụ ọkaraph oye rạkaaph ghan ịkaraph ạraraar phọ dị aakpomoghi bọ sịphe ologhi phọ ọdi kụ kamitiom. Ịpe edi bọ ologhi oye phọ kụ ẹdi oye phọ rạkaaph ghan kamitiom.

Ịyal ạbuloghom ruutu

⁴⁶ “Iḍighi bọ ika nụun kụ nyina rịmagh ghan bọ ịmi mọ, ‘Ọmoogh-we, Ọmoogh-we,’ kụ nyina íḍighi bọ ịpe mị ịḅeni bọ inyina mọ iḍighi ghan phọ?

⁴⁷ Tọrobo oye lọ aru ụteeny ịmi kụ ạnaghan ikpo ọnhu phọ ạmi kụ ạtuugh aḍighi, mị kiḍeenaan inyina oye dị ọdi ạghigh.

⁴⁸ Ọdi ạkigh oye dị aguph de phọ ạkele kụ aphighi otu ọdi ạnyu aḍighiigh. Kụ aḍigho eḍigh ẹtophoron kụ otu phọ óphiigha, ịdi eḍighi bọ opighi ạnyu aḍighiigh.

⁴⁹ Kụ tọrobo oye lọ ạnaghan ikpo ọnhu phọ ạmi kụ ụ́tuugh uḍighi, mị kạmaaniom nyọdi oye dị ạlogh otu ọdi ạnyu ịisaar dị úguphogh de phọ ụkele kụ aphighi. Kụ aḍigho eḍigh ẹtophoron, kụ otu phọ ameel. Pọ eeghe ọdo emeleghuom dị otu phọ ọpo ameleghu.”