Elegh aLuk 5 - Ạḍinya Iigbia

ẠJizos ạmagh bụḅel ạbumatuan phọ

¹ Eniin aḍio, ạJizos ạmeera ni sịphe oogbom Ọphiiny ạGenesaret kụ aḍita awe onyughian ịlo ọteeny ọdi ọnaghan ọghaaph phọ Ẹnaan.

² Kụ ọdi ạmiin ịyal arughuugh dị edi ọgbal ọphiiny phọ. Ạbuo ạkoni kụ ụwile rughuugh phọ osoroghu rootologh ghan ịzuguru ạbidi.

³ Kụ ọdi ạghi aḍigh nyọpo aSaimon, kụ ạḅeni mọ ọdi amitiom ogbo ẹphurukpu. Romitiom bọ, kụ ọdi ạrol ude kụ ạtughemi ḍita awe phọ.

⁴ Rọghaaph bọ rọman, kụ ạḅeni Saimon mọ, “Nyu oghuugh phọ amitiom ogbo ọphiiny, ọbo nyina ezuom ina!”

⁵ Kụ aSaimon mọ, “Ọtughemia, oomo aḍughul phọ yoor ozuughi bọ, yoor ịyaar úkiigh. Kụ nạ mạḅem bọ, pọ mị kạḅile ni apu azuughi.”

⁶ Kụ ozuom iboom ina dị ịzuguru phọ ạbidi ẹwa ni ọphanyu.

⁷ Kụ bịdi ọyapha bụphe ọphori phọ oghuugh phọ mọ oru ọloghonaan bụno ḍịghaagh. Kụ bịdi oru kụ ina phọ emuza ịyal phọ arughuugh phọ dị tụtu ẹwa ni oḅiighi.

⁸ Kụ aSaimon Pita ạmiin bọ ịphen phọ, akpuḍian ni ruwol ạJizos kụ ạḅem mọ, “Ọmoogh-we, ụwile ịmi, ịdi eḍighi bọ mị oḍighinom ịkaraph.”

⁹ Ina phọ bịdi ozuom bọ iḍighi ni ruugu esi aSaimon rꞌoomo ạbueri phọ ọrol aani bọ.

¹⁰ Iḍighi aani kẹn ni ruugu esi aJems rꞌạJon ạnmuny phọ aZebidi, bụo ooḍikuan phọ aSaimon. Kụ ạJizos ạḅeni Saimon mọ, “Kákiilaan! Emiigh kꞌạnyiidipho nạ kạkoni ghan ạkoni awe.”

¹¹ Kụ bịdi rosul rughuugh phọ, bịn ụwile ni oomo ạraraar phọ ạbidi kụ ọdaph Jịzos.

ẠJizos aakonom oye ẹzegh ọku ufe

¹² Eniin amem ạJizos ạrol li eniin ẹmha. Oniin oye dị ẹzegh ọku ufe mẹphughan loor phọ ạmiin ni nyọdi, kụ aḅololo ghisigh ọdi ạaḅereghian mọ, “Oye phọ, seseeny, lọ nạ kameera ni, pọ uukonom aani ịmi.”

¹³ Kụ ạJizos asele ḍịghaagh ạḅogh nyọdi kụ ạḅem mọ, “Mị ameera ni. Ḍum.” Kụ ẹzegh ọku ufe phọ ẹḍua loor ọdi.

¹⁴ Kụ ọdi ạto ạḅeni oye phọ mọ, “Nyeene agheel, ụ́kaaph ghan ụḅeni oye. Kịa aḍeenaan loor phọ ạna-oyil ạrikia phọ. Kịa aḍighi ịyaar aghuḍum ootolonu phọ ịdipho aMozis ạtooghi bọ, ịlo oḍeenaan awe mọ nạ mamoon.”

¹⁵ Kụ ọdu phọ ạJizos alegheri ghụn bịn aaleghaan, kụ ịbadi awe oru ookpomoghan ọnaghanan ọdi, ọwaam ghan mọ ọdi aḍume bụphe úmoonogh bọ.

¹⁶ Kụ ọdi amian ghan ạghi rạdala phọ kụ ạaḅereghi ghan Ẹnaan.

ẠJizos aakonom oye dị ạḍighaagh rꞌaḍuwol emugh

¹⁷ Eniin aḍio ạJizos odi rạtughemi ghan we phọ, kụ buniin aFarisi phọ rꞌạbutughemia iilogh dị ọḍua Jeruselem rꞌoomo ạramha phọ aGalili rꞌaJudia kụ oru ụrol aani ni sịphe phọ. Kụ ịikpo Ọmoogh-we phọ ịrolonaan ni Jịzos oḍume yogh ạbuphe úmoonogh bọ.

¹⁸ Kụ ụmuneen ni ẹmina oye dị ạḍighaagh rꞌaḍuwol emugh ọsighe oruom Jịzos. Bịdi ụwa ghan oḍighom ọdi oseere aghisigh ạJizos,

¹⁹ kụ eepoogh ụ́miin loor esi aḍita awe phọ, kụ ọsiiny ạnyu otu phọ, ogborion eniin esi ọkpaaghi ẹmina phọ rꞌoye phọ ạmina bọ oseere ghisigh ạJizos sịphe ogbo awe phọ.

²⁰ Mem dị ọdi ạmiin bọ oḍuom ologhi phọ ạbidi ạḅeni ni mọ, “Ye phọ, mọsar ịkaraph ạna ọwilenaan nyịna.”

²¹ Kụ ạbutughemia iilogh phọ rꞌaFarisi phọ omiigh ọotughian mọ, “Ọphon rạapu bọ Ẹnaan ịduon phọ ạnhian? Ạnhian kụ katue ạsar ịkaraph ạbilenaan, emuton Ẹnaan bịn.”

²² Kụ ạJizos aloghoma bọ mọ bịdi rọotughian ghan ịduon phọ kụ apuru mọ, “Iḍighi bọ ika kụ ịitughian phọ ịphen edi bọ iloghi phọ anyina?

²³ Ịghen kụ idugh epu ịlo ọḅeni oye phọ mọ, ‘Mọsar ịkaraph ạna ọwilenaan nyịna,’ rꞌọḅeni mọ, ‘Ḅetenu arelhe.’

²⁴ Ọbo nyina elegheri mọ Ọony phọ Oye ạmoogh ni ịikpo sịen aḅirini phọ ọsar ịkaraph ọwilenaan, kụ mị kạḅeni bọ oye phọ ạḍighaagh rꞌaḍuwol phọ emugh bọ mọ mị rạḅeni ghan nyịna mọ ḅetenu ạsighe ẹmina phọ ạna agheel kꞌạna.”

²⁵ Egina amem bịn ọdi aḅetenu sịphe ogbo phọ ạbidi, kụ ạsighe ẹmina phọ ọdi kụ ạrol li oboom ghan Ẹnaan tụtu asi ologhi otu.

²⁶ Kụ iḍighi ni iikia esi oomo phọ ạbidi, kụ oboom ghan Ẹnaan. Kụ aruugu asiph ni bịdi kụ ọḅem ghan mọ, “Yira mọmiin ịimaany rodon.”

ẠJizos ạmagh Livai

²⁷ Ịphen phọ eten bọ ạJizos ạḍua ni kụ ạmiin ọbonyiom iisogh dị oghol mọ aLivai, dị ạrol ude sịphe otu phọ rọbonyi ghan bọ iisogh phọ, kụ ạḅeni nyọdi mọ, “Ụdaph ịmi.”

²⁸ Kụ ọdi ạwile oomo ạraraar aḅetenu ạdaph Jịzos.

²⁹ Kụ aLivai aakolobian mugbogh amalhe kụ ạmagh Jịzos asiom otu, kụ ịminighan ạbuphe rọbonyi ghan bọ iisogh phọ rꞌạbunon awe oru aani rolian nyọdi.

³⁰ Kụ buniin aFarisi phọ rꞌạbutughemia iilogh ạbuo aFarisi phọ ugum ni opuru bụmatuan phọ ạJizos mọ, “Uḍighi ika kụ nyina rꞌạbubonyiom iisogh rꞌabuḍighinom ịkaraph kụ relian bọ eḍien?”

³¹ Kụ ạJizos mọ, “Bụphe úmoon bọ kụ ropir ghan oyil, kạ́buphe omoon bọ.

³² Mị ụ́tuan ọḅeni abugey mọ okiton esi ịkaraph kụ aru bọ. Mị uru ghụn ni okirion abuḍighinom ịkaraph phọ.”

Aḍipuru ịlo ọtuan ịiḅereghi ọrol ọkoony

³³ Kụ buniin awe ọḅeni Jịzos mọ, “Sey, ạbumatuan phọ ạJon rọtuan ghan ni ịiḅereghi kọrol ọkoony, kụ ạbumatuan aFarisi phọ ọtuugh ni ịphen phọ roḍighi aani ghan, kụ ạbumatuan phọ ạna role ghan ni kọphughol.”

³⁴ Kụ ạJizos mọ, “Nyina regbi mọ kọtolomi ni ọkoony we dị odi kꞌọyogo dị olhom ọnyani phọ odi ni sịphe?

³⁵ Kụ amem retu ni dị kọboor bịdi olhom mọ, kụ bịdi ogbi nụun ọrol aani ọkoony.”

³⁶ Kụ ạJizos ạḅile adoghom ḍidogh phọ ạḍien ạḅeni bịdi mọ, “Oye ólho dị kạpaar ọpherepe omoom ukpe ạgbiom ogbaany ukpe. Ạgbiom, pọ mạphanyi omoom ukpe phọ kụ ạri ogbaany phọ rꞌomoom mọ ị́ḅophan.

³⁷ Oye ólho dị kạsighe igbaany ạsikarama kụ aakoom mumoom amiim ịya. Aḅulughi, pọ amiim mọ kaḅomoghi ni sịkarama phọ, bịn amiim mọ rꞌạsikarama phọ epeeghu.

³⁸ Amumoom amiim rꞌimoom ạsikarama kụ ịḅophan.

³⁹ Oye ólho dị mạphughol ghan mugbaany amiim kụ kạwa ọphughol amumoom, sịen dị ọdi rạḅem ghan mọ, ‘Amugbaany phọ kụ ạdugh.’”