Elegh aLuk 4 - Ạḍinya Iigbia

Ịdi ọdegh Jịzos ophogh

¹ Kụ ạJizos, rꞌịikpo Uwaloor Iigbia phọ dị emuza loor, ạḍua Jọdan ratigheel, kụ Uwaloor Iigbia phọ ạpham ni nyọdi ạghimom ẹpe ẹdala phọ,

² kụ Eru phọ ẹdeghogh nyọdi ephogh inyadi aḍughul-otu, kụ ọdi eḍien ólhe ghan. Ariiḍio phọ remunughan, kụ ọkoony asiph nyọdi.

³ Kụ Eru phọ ẹḅeni nyọdi mọ, “Nạ kụ Ọony phọ Ẹnaan ni, pọ ḅẹni ḍighiigh phọ ạḍien mọ eten eeḅoghoḍi ạbred.”

⁴ Kụ ạJizos mọ, “Ọge ni sịphe ạḍinya iigbia phọ mọ, ‘Oye kạ́tolom eḍien bịn.’”

⁵ Kụ Eru phọ ẹsighe nyọdi ẹsiinye ạnyu kụ únyam ụḅatan bịn eḍeenaan nyọdi oomo areelhe aḅirini phọ.

⁶ Kụ Eru phọ ẹḅeni nyọdi mọ, “Mị kạngo ni nyịna ịikpo ọdaam oomo phọ ịphen ạḅaram igbogh phọ ạbidi. Oomo ịphen phọ mọḅogh ni ụngo ịmi, kụ mị kạngo ni oye lọ ụḅeeraan ịmi.

⁷ Esi ịduon phọ, nạ ameera akpuḍian ụngo ịmi eghuan, oomo ạraraar phọ ịphen ketu ni ịlo ạna.”

⁸ Kụ ạJizos ạphagharanaan mọ, “Ọge ni sịphe ạḍinya iigbia phọ mọ, ‘Nạ kakpuḍian ghan ạngo eghuan Ọmoogh-we Ẹnaan phọ ạna, kụ aaseeny ghan nyọdi bịn.’”

⁹ Kụ Eru phọ ẹsighe Jịzos esiemi ẹpe Jeruselem ẹsiinye eekuna ạnyu Otu Ịiḅereghi phọ, kụ ẹḅeni nyọdi mọ, “Mọ ạna kụ Ọony phọ Ẹnaan ni, pọ pel sịen phọ akuruph. Ọge ni sịphe ạḍinya iigbia phọ mọ,

^10-11 ‘Ẹnaan kẹḅeni ni rụukpaany phọ ọdi mọ okori okoph nyịna, ọbo nạ kạnmighima ghan bọ owol loor aḍighiigh.’”

¹² Kụ ạJizos ạphagharanaan nyọdi mọ, “Ọge ni sịphe ạḍinya iigbia phọ mọ, ‘Kạ́degh Ọmoogh-we Ẹmugh phọ ạna apogh.’”

¹³ Kụ Eru phọ rẹdeghogh bọ Jịzos rephogh rẹman, bịn ẹwile nyọdi ẹḍua ekoriom ghan ẹnon eepoogh.

ẠJizos amiigh oḍighi phọ ọdi ẹpe Galili

¹⁴ Kụ ạJizos ạḍua arigheel Galili kụ ịikpo Uwaloor Iigbia phọ ịrolan ni nyọdi. Bịn ọdu phọ ọdi aaleghaan oomo areelhe phọ etuman bọ.

¹⁵ Kụ ọdi ạtughemi ghan rubughotu phọ ạbidi, kụ oomo awe oboom ghan nyọdi.

Okel Jịzos ẹpe Nạzeret

¹⁶ Kụ ạJizos aru ni asi Nạzeret, ẹmha phọ ookonom bọ nyọdi. Kụ ḍio ophooghian phọ, esi eḍighinom ịyaar phọ ọdi, ạghi ni aḍigh obughotu phọ, kụ ạmeera ạal ạḍinya iigbia phọ.

¹⁷ Kụ oye phọ adi ghan bọ rịnya phọ ạsighe elegh Azaya oyil phọ Ẹnaan ạngo nyọdi. Kụ ọdi ạatarion ḍịnya phọ, kụ ạmiin esi phọ ọge bọ mọ,

¹⁸ “Uwaloor Ọmoogh-we phọ odianaan ni rꞌạmi, ịdi eḍighi bọ ọdi mụma ịmi ọsighe ooḅi ọghaaph oruom arukulom mọ. Ọdi murom ịmi ọghi ọghaaph ọḅeni ạbuo ikoli phọ mọ mosereghi bịdi, rꞌọngo ọmiin eten bụo ikpom ariḍien phọ; rꞌosereghi ạbuphe ọzerom bọ,

¹⁹ rꞌogbeel mọ ḍịen kụ ạlha phọ Ọmoogh-we phọ kạngo bọ we ḍịseph phọ.”

²⁰ ẠJizos rạal rọman kụ akpooghi ḍịnya phọ aḅulemi ạngo nyọpo adi ghan bọ rịnya phọ kụ ạrol ude, kụ oomo ạbuphe ọrol aani bọ sịphe obughotu phọ osomoghi nyọdi ophogh okananaam.

²¹ Kụ ọdi amiigh ọḅeni ạbidi mọ, “Arodon phọ kụ ẹdi ịphen ọge bọ sịphe ạḍinya iigbia phọ meru ịne rụru anyina.”

²² Kụ oomo awe phọ ụghaaph ni ịlo ạJizos, ḅịle ịma ikpo ọnhu phọ ọdi eḍigh iikia esi ạbidi, kụ ọḅem ghan mọ, “Ọphon phọ kọ́ony phọ ạJosef ḍịen?”

²³ Ọdi ạḅeni bịdi mọ, “Mị alegheri ni mọ nyina kidoghonaan ni ịmi mọ, ‘Nạ oyil dị ạnighe ẹmha.’ Nyina kẹḅile kẹn ni ịḅeni ịmi mọ, ‘Ḍighi aani sịen ẹmha phọ ayira ịpe yoor rọnaghan ghan bọ mọ nạ raḍighi yogh ghan ẹpe Kạpaniom.’”

²⁴ Kụ ạJizos ạḅile ạḅem ạloghom mọ, “Mị rịḅeni ghan inyina mọ oyil otu óghuan ghan.

²⁵ “Ịnaghanan ịmi. Ọrugh phọ Ilaija, ọlophia ọ́lhoph esi ịraar ạsia rꞌegbem kụ iboom ịgbakuro isoor ri oomo eelhe phọ. Igey ni, ịbadi arukpukele ạnmariir ạbuo Ịzirel ụrol li mem mọ ọpo.

²⁶ Ghạlamo rꞌịduon phọ ni, bịn Ẹnaan ị́sighe Ilaija ịkiomaan rꞌoniin ọnyo ạbidi, ịḅile ghụn ni ẹsighe ẹghiomonaan nyoniin ekpukele ạnir ọlo ạZarefat eelhe aSaidon.

²⁷ Ḅịle kẹn, ịbadi awe ạbuo Ịzirel dị ẹzegh ọku ufe eḍighi yogh ụrol li ọrugh phọ Ilaisa oyil phọ Ẹnaan. Ịduon phọ kẹn ni, ọnyo ạbidi lọ ookonom ọ́rol. Ụḅile ghụn ni ookonom oniin phọ aNemon ọlo ạSiria phọ kụ oḍume.”

²⁸ Mem dị bịdi ọnaghan bọ ịphen phọ, ịghagh iloghi imuza ni loor oomo ạbuphe ọrol bọ sịphe obughotu phọ.

²⁹ Bịdi uḅerenu ni kụ oonyirogh Jịzos ọḍuanam pạ ẹmha phọ, ọghi ọsiinye ạnyu eegbolom mọ ẹmha phọ ạbidi ẹrol bọ, ịlo onyu ọdi osumeeny ẹpe ekpululu bọ oghiigh.

³⁰ Kụ ọdi arelhe ni bịn ạḅeeny sịphe ogbo awe phọ ạḍua.

Ịlo oye dị eru eghola

³¹ Kụ ạJizos ạghi ni asi Kạpaniom eniin ẹmha sịphe eelhe phọ aGalili, kụ aḍigh obughotu ạtughemi we phọ ḍio ophooghian.

³² Kụ ịtughemi phọ ọdi iḍighi ni iikia esi ạbidi, ịdi eḍighi bọ ọdi ạghaaphom rꞌịikpo.

³³ Kụ oye dị eru eghola aru aḍigh aani obughotu phọ kụ ạlooghi mọ,

³⁴ “Jịzos ọnyo ạNazeret, nạ rụwa ghan iyoor eeghe ịyaar? Nạ uru ophiemi ayoor ḍụghum? Mị alegheri ni oye dị nạ aru. Nạ kụ oye aghuḍuul phọ kꞌẸnaan.”

³⁵ Kụ ạJizos amooghaam nyọdi mọ, “Ḅoorian amite loor ọdi ạḍua!” Kụ eru phọ eler oye phọ sịphe ogbo phọ ạbidi kụ emite, wọor ẹḍua.

³⁶ Kụ oomo phọ ạbidi omaghagha yogh, kụ oniin apuru ghan nyoniin mọ, “Ịphen phọ, ịghen ọdo ikpo ọnhu? Rꞌiboom ịikpo kụ ạtooghi ghan rạraar rạngo ruru, bịn kụ aruru phọ remiteghu ghan kẹḍua.”

³⁷ Bịn ọdu phọ ọdi aaleghaan oomo areelhe phọ etuman bọ.

ẠJizos aakonom ịbadi ạbudi úmoonogh aḍume yogh

³⁸ Kụ ạJizos rọḍua sịphe obughotu phọ, kụ ạghi aḍigh kꞌaSaimon. Osipheeny ạrol li iboom loor onhiin ạnir aSaimon, kụ bịdi ọoḅereghian Jịzos mọ ạloghonaan ḍịghaagh.

³⁹ Kụ ọdi aru ạmeera ịigaany ạnir phọ, kụ ạḅeni osipheeny phọ mọ amite. Kụ osipheeny phọ amite, kụ egina amem bịn ạnir phọ aḅetenu ạko bịdi igoni.

⁴⁰ Dulhe mem dị ẹnam-aḍio remeel ighool, ụsighe ni oomo ạbudi omeelom rẹezegh kịrokiro oruom nyọdi. Kụ ọdi ạzuughiom rạghaagh ọdi rụmhu oomo phọ ạbidi, kụ aakonom bịdi.

⁴¹ Kụ ọdi aphorogh yogh ịbadi aruru dị ẹlooghi ghan mọ, “Nạ kụ Ọony phọ Ẹnaan”, amiteghom loor ịbadi awe. Kụ ạJizos ómeera mọ aruru phọ ẹtagharan ọnhu, ịdi eḍighi bọ bịdi ilegheri ni mọ ọdi kụ aKraist phọ.

ẠJizos ạkaaph ọghaaph ẹpe Judia

⁴² Ạḍiroor rekpoghoronu, kụ ạJizos ạḍua ẹmha phọ ẹpe ạghi ekpisi dị enamian. Kụ awe phọ ọwa nyọdi, kụ rọmiin, kụ ọoḅereghian mọ ọdi kụ́bile bụno.

⁴³ Kụ ọdi ạḅeni bịdi mọ, “Mị kạḅile ni ạkaaph aani ooḅi ọghaaph ịlo ọmar phọ kꞌẸnaan ạḅeni aani bụo ịpheri ạramha phọ. Ịduon kụ ịdi Ẹnaan irom bọ ịmi oḍighi phọ.”

⁴⁴ Kụ ọdi aḍiku ghan rubughotu phọ aJudia ạghaaph ooḅi ọghaaph phọ ạḅeni we.