Elegh aLuk 21 - Ạḍinya Iigbia

Ịlo inmo dị ekpukele ạnir ạlogh ologhi eekoom ikpoki phọ

¹ ẠJizos aphogh ni akitonom Otu Ịiḅereghi phọ kụ ạmiin ịdi ạraalha phọ rọloghoḍi ikpoki ologhi eekoom mọ.

² Kụ ọdi ạmiin oniin uwekulom ekpukele ạnir dị ạlhogh ịyal ịkpirikpiri ikpoki dị ẹman egbem ạkobo.

³ Kụ ọdi mọ, “Mị ạkar rịḅeni ghan inyina mọ ịphen ạnir phọ ọphon ạlhogh bọ ologhi eekoom ikpoki phọ ẹbugh ni epu dị ọḅophoghi oomo ịpe ạbueri phọ,

⁴ ịdi eḍighi bọ oomo ạbueri phọ ọlogh ịdi mepeel sịphe ẹelha phọ ạbidi, kụ ạnir phọ ọphon ạlogh ni oomo phọ ịpe ọdi ạmoogh bọ bịn ạmadan.”

ẠJizos ạkaaph mọ kolereghi ni Otu Ịiḅereghi phọ

⁵ Buniin ạbumatuan ụghaaph ghan ịlo Otu Ịiḅereghi phọ ịdi ạnighe rꞌịma asighiigh dị ọloghom rꞌinmo phọ ọngo bọ Ẹnaan.

⁶ Kụ ạJizos ạḅem mọ, “Oomo phọ ạraraar phọ ịphen nyina rẹmiin bọ, amem ketu ni dị rꞌaḍiniin aḍighiigh ạnyu ạḍinon kọbile dị kőlhereghi.”

Ịiḅaghami rꞌịgbiphoghom

⁷ Kụ bịdi opuru mọ, “Ọtughemia, pụr amem kụ ẹdi ịphen phọ kemite bọ? Eeghe kụ keḍighi eḍeenaan amem mọ ịphen phọ kemiteghu bọ?”

⁸ Kụ ọdi mọ, “Igona loor anyina, ọbo kiikeleghi ghan bọ inyina, ịdi eḍighi bọ ịbadi kotu ni kụ okophora ḍien phọ ạmi kụ ọḅem ghan mọ ạbuno kụ aMesaya phọ, ḅịle kẹn mọ, ‘Amem mọ mesi sịen ẹda ạḍighaagh!’ Kẹ́daph bịdi.

⁹ Mem lọ nyina ẹnaghan oghur ạraagham rꞌịgbaragbara, oḅio anyina kúkaph. Ạraraar phọ ịphen kẹpur ri emiteghu kụ eekuna phọ kẹ̋teeny ni.”

¹⁰ Kụ ọdi ạḅile ạḅem ạloghom mọ, “Eelhe kotuphiom ni eelhe ẹgham, ẹmha otuphiom ẹmha,

¹¹ kụ ade phọ kepiigha ni iboom, ịgbakuro kẹtol li, ạreezegh ogogo kemuza ni ịminighan arikpisi. Ạraraar aruugu rꞌiboom areḍeenaan kẹḍua ni kꞌạke emiteghu.

¹² Tụtu oomo phọ ạraraar phọ ịphen kemiteghu, kisiphi ni inyina ọgbiphoghom. Kirorori ni inyina osoorom erugh ẹpe arubughotu phọ, ịloghoḍi inyina ikoli. Aruwo ẹmha rꞌạbudaam eelhe kịmagh ni inyina ọgba ạsiagba loor ẹmhu aḍien phọ ạmi,

¹³ kụ nyina ẹmooghom ghụn eepoogh ọghaaph ooḅi ọghaaph phọ ọḅeni ạbidi.

¹⁴ Ịpur ịkpuku, kékaphian ghan oomiigh ịlo nyina kẹgba ọphelaam ạrumhu phọ anyina,

¹⁵ ịdi eḍighi bọ mị kịngo ghan ni inyina ikpo ọnhu rꞌolegheri ịyaar dị rꞌoniin ẹpomoghian anyina kátue ạmerenyan mụghumo ọpharanaan.

¹⁶ Ạburude rꞌaburunhiin anyina, rꞌabumor anyina rꞌasiya anyina rꞌạrighiri anyina kụ kirorori ni inyina, ọlogh buniin esi aḍuugh.

¹⁷ Oomo awe kịlogh ni inyina ḍien loor ẹmhu phọ ạmi.

¹⁸ Kụ rꞌaḍiniin ạḍilaal ạrumhu phọ anyina képe.

¹⁹ Esi ọkparam kụ ẹdi nyina kẹmoogh ghuḍum mọ anyina.”

ẠJizos ạkaaph mọ kopiemi ni Jeruselem

²⁰ “Mem dị nyina ẹmiin mọ awe ẹgham mọmeregha rokoom Jeruselem, ilegheri mọ amem amuphe phọ ọdi mẹkpulan.

²¹ Kụ bụlo odi Judia oghiil ogheel ẹpe ạraaḅaraph phọ, kụ bụlo odi ẹmha omite ọḍua, kụ bụlo odi ịphalagbal kụ́ḅile mun uḅula ẹpe ẹmha phọ!

²² Ịphen phọ, ariiḍio oḅulemian, ịlo omuneniom oomo phọ ịpe ọge bọ sịphe Ạḍinya Iigbia phọ.

²³ Kụ pọ eeghe ọdo ịminimiin dị kẹtolonaan nmạriir lọ odi rꞌịyal amem aloor, rꞌạbulo ọpham nmụny dị kőghin mạmaam riiḍio phọ ịpe! Ịiḅaghami dị keḍighi ruugu kẹtol li sịen eelhe phọ ẹphen, kụ ạghelhe phọ Ẹnaan kạkpaariom ni we phọ ạbuen.

²⁴ Elhool ẹgham kụ kẹze bịdi kụ osiphi bịdi ọkasaghiom ọkimom oomo areelhe ịdipho ạbuo ikoli, kụ aruuruen phọ kọozeghi ni oomo aJeruselem, tụtu amem mọ ạbidi emunughan.”

Erumom Ọony phọ Oye

²⁵ “Areḍeenaan kemiteghu ni sịphe erumuḍio phọ rꞌụnwanyu phọ rꞌạraanaan phọ. Iloghi awe oomo areelhe sịen ade phọ kẹpepheghu ni. Aruugu kasiph ni bịdi loor oghur rꞌoologh ọphiiny.

²⁶ Arimiigh awe kekaphagh ni kụ ọkanyanu loor okori ghan ịpe kemiteghu bọ oomo aḅirini phọ, ịdi eḍighi bọ ịikpo phọ ịpe edi bọ kꞌạke kepiigha ni.

²⁷ Kụ kọmiin ni dị Ọony phọ Oye ạḍua ẹpe okuaḍio phọ kụ ratu rꞌiboom ịikpo rꞌigbogh phọ ọdi.

²⁸ Kụ mem dị nyina ẹmiin dị ạraraar phọ ịphen memiigh omiteghu yogh, ịmeremi rụmhu anyina ephogh ạnyu, ịdi eḍighi bọ amem mọ kịphel bọ inyina ọsighe mẹebeeph.”

Ịsighe oreeny dị oghol mọ ạfig ẹtuughaam olegheri-ịyaar

²⁹ Kụ ọdi adogh ḍidogh phọ ạḍien ạḅeni bịdi mọ, “Ịitughian oreeny phọ ọpo oghol bọ mọ ạfig phọ ḅịle rꞌoomo ịpheri phọ ireeny phọ.

³⁰ Mem lọ bịdi retigheel ọnam, nyina elegheri ni mọ osoor mạteeny.

³¹ Ịduon phọ kẹn, mem dị nyina ẹmiin dị ịphen phọ remiteghu, nyina kelegheri ni mọ ọmar phọ kꞌẸnaan mạkpulan.

³² “Mị ạkar rịḅeni ghan inyina mọ oghiil phọ ọphon káten kụ ịphen phọ emiteghu.

³³ Ạke phọ rꞌade phọ kepe ni, ikpo ọnhu phọ ạmi képe aani.”

Ẹkpe ni ogon ghan

³⁴ “Igona loor anyina. Kémeera iloghi phọ anyina ịiḅaghami inyina loor olhe ghan uruur rꞌọoko amiim, rꞌigbiriḅa ịlo ạraraar ịsien aḅirini phọ, ọbo aḍio phọ ạḍiphe kimeelom ghan bọ inyina ekperenom

³⁵ ịdipho aḍiphil, kụ esiph oomo awe aḅirini phọ.

³⁶ Ịtol esi ogon ẹeḅereghi ghan oomo amem, pịdi nyina ẹmoogh ịnyaam ọmerenyan oomo ạraraar phọ ịphen osi eekuna ḅịle rꞌọmeeraam aghisigh Ọony phọ Oye.”

³⁷ Siḍughul-otu phọ ịpe phọ ạJizos ạtughemi ghan sịphe Otu Ịiḅereghi phọ, kụ amite ghan dulhe ạghi ẹpe Eegum Ọlivs kụ ạrol ghan ẹḅaal.

³⁸ Oomo awe phọ ụghi ghan eḅon ạḍiroor sịphe Otu Ịiḅereghi phọ ọnaghanan ịpe ọdi kạkaaph bọ.