Elegh aLuk 12 - Ạḍinya Iigbia

ẠJizos ạpur rụru ịlo eḍighinom ịyaar aFarisi phọ

¹ Mem mọ ọpo phọ, ạsimuunir awe mookpomoghan ḍita dị tụtu ọḅile rọozeghian, kụ ạJizos ạphur ạḅeni bụmatuan phọ ọdi mọ, “Igona ni loor esi ayist aFarisi phọ, ịduon phọ kụ aghuḍum ọkpe phọ ạbidi.

² Ịyaar dị eekpereghian dị kékpegherenu ílho ghan. Ịyaar dị ạaghian dị kéganana ílho ghan.

³ Tọrobo ịlo nyina ẹrol ufiri kụ ẹghaaph kọnaghan ni esi ẹphalaḅaal. Ịlo nyina ẹrol osoph kụ eephola kemite ni ogbotu.”

Ọpo ạkpe bọ oghiilaan phọ

⁴ “Mị rịḅeni inyina ạrighiri phọ ạmi mọ kékiilaan bụphe kokiigh bọ ḍizu ạnyu phọ bịn kụ kótue mun bọ oḍighi ịdi epu pạ.

⁵ Mị kiḍeenaan ni inyina nyọpo ạkpe bọ oghiilaan phọ. Ikiilaan ghan ghụn ni nyọpo ạmoogh bọ ịikpo osumeeny ạbidi ooni ạnian phọ. Mị rịḅeni ni inyina, ọdi ạkpe ni oghiilaan ghan.

⁶ “Ịkiom ologhi ịdipho robool ghan bọ oogh ạsimighor kọbo phọ, kụ Ẹnaan íbula rꞌoniin ọnyo ạbidi.

⁷ Ẹnaan ẹkar ri ẹbal elegheri ọnhu ạsilaal dị edi rụmhu anyina. Esi ịphen phọ, kẹ́moogh mun oghiilaan. Nyina ẹman ni mạar epu ịbadi ạsimighor.”

Ịlo oghol aKraist ogananami mụghumo ọpharanaan ọdi

⁸ “Mị rịḅeni ghan inyina mọ tọrobo oye lọ ughol ịmi aganana esi ogbo awe, Ọony phọ Oye kạtuugh ni ịdipho aḍighi aani nyọdi ghisigh ạruukpaany phọ Ẹnaan.

⁹ Oye lọ ụpharanaan ịmi esi ogbo awe, kọtuugh ni ịdipho oḍighi aani nyọdi ghisigh ạruukpaany phọ Ẹnaan.

¹⁰ “Tọrobo oye lọ ạghaaph ịkaraph ịlo Ọony phọ Oye kọsar ri ọbilenaan nyọdi, kụ oye lọ ạapu Uwaloor Iigbia phọ kọ́sar ọbilenaan.

¹¹ “Mem lọ ịmagh inyina rubughotu, ịsighe inyina ọghi ọmeremi ghisigh abuugboom ịiruen rꞌạraalha, kékaphian ghan oomiigh ịlo nyina kẹgba ọphelaam ạrumhu phọ anyina,

¹² ịdi eḍighi bọ Uwaloor Iigbia phọ kụ kịtughemi inyina ịlo nyina kẹgba mem mọ ọpo phọ.”

Aḍidogh dị ọsighe uwelologhi ọolha kụ odoghom

¹³ Oniin oye sịphe ogbo aḍita awe phọ ạḅeni ni Jịzos mọ, “Ọtughemia, ḅẹni umor phọ ạmi mọ adi rạraar erua ọde phọ ayoor mị ụsighe bin ạmi.”

¹⁴ Kụ ạJizos mọ, “Ye phọ, ạnhian kụ ụlogh ịmi ọolha odianaan anyina erua?”

¹⁵ Kụ ọdi ạḅeni oomo phọ ạbidi mọ, “Igona loor ẹkporion rạghaagh oomo ạruuphua ikpoki. Aghuḍum oye ólhoonaan ọmoogh ịyaar etum ịyaar.”

¹⁶ Kụ ọdi adogh ḍidogh phọ ạḍien ạḅeni bịdi mọ, “Ade oniin ọolha kụ isoor riiḍien emuzeḍi.

¹⁷ Kụ ọdi ạatughian kụ apuruan mọ, ‘Mị kaḍighi ika kụ ạmoogh otu dị ạmanam osereghi ariiḍien phọ ạmi?’

¹⁸ Kụ ọdi ạḅem mọ, ‘Ịduon kụ ịdi mị kaḍighi. Mị kalereghi otu phọ ạmi ọphon kụ ạlogh ọnon ogbogh kụ ạsighe riiḍien phọ rꞌaruphua phọ ạmi asereghi sịphe.

¹⁹ Kụ mị ạḅenian uwaloor phọ ạmi mọ: Nạ mạmoogh ruphua dị kẹkasian ịbadi ạsia. Tọl aphooghian, alhe, ạphughol ạmoogh iboh!’

²⁰ Kụ Ẹnaan ẹḅeni nyọdi mọ, ‘Nạ uwo elologhi, ḍughul phọ ạḍien mị kạmagh uwaloor phọ ạna ạsighe. Kụ ạraraar phọ nạ aakpomoghi bọ ketu ịlo ạnhian?’

²¹ “Ịduon kụ ịdi rẹtolonaan ghan oye dị aseerian ẹelha loor ọdi, kụ aḍighi uwekulom ghisigh Ẹnaan.”

Iseere Ẹnaan ologhi

²² Kụ ạJizos ạḅeni bụmatuan phọ mọ, “Mị ụtuan ịphen phọ kụ rịḅeni ghan bọ inyina mọ kékol ghan ịyaar olhe rꞌẹlo omuuna ẹeḅaghamian loor anyina,

²³ ịdi eḍighi bọ aghuḍum mọ apu ni eḍien, ḅịle aloor phọ epu ni rukpe.

²⁴ Ipogh aani ni dọl phọ ạreghiligho. Bịdi ozo róḅeph ghan, ịizupha rọ́zuph ghan. Ruutu rꞌiisoph oseere eḍien bịdi ụ́moogh, kụ Ẹnaan rẹngo ghan ni bịdi eḍien. Nyina kụ ị́man mạar ipu bịdi ḍụghum?

²⁵ Ạnhian ọnyo anyina kụ kakol ḍịkpo ạaḅaghamian loor kụ aḍiphooghu ọdi ẹdoonyom ẹphurukpu nụun?

²⁶ Ịdipho nyina kétue bọ ni eḍighi ọony phọ ịphen phọ, nyina ighol eeghe kụ rẹeḅaghamian bọ loor ịlo ịpheri phọ?

²⁷ Ipogh aani ḍimite phọ ạsifalaway. Rukumuan rékumuan ghan, rukpe rélo ghan kemunughian, kụ mị rịḅeni ghan inyina mọ ạSolomon Ọdaam mọ aḍighi ni ọolha kụ óonmenan iinmenan dị ẹnighe ọmaam ạsifalaway phọ.

²⁸ Ẹnaan rẹsighe ghan sịfalaway kụ keenmenemi rọogho elegheḍum mọ, ịpe rodon ọmiin bọ bịn iḍue phọ kẹḅaal bọ koguom bọ ni nịan. Nyina ílegheri mọ ọdi kiinmenemi ni inyina apuemi pạ ḍụghum? Nyina awe dị omeeraam ụ́manam.

²⁹ “Kụ kẹ́etughian ghan ọwa ịlo nyina kele, ẹḅile ẹpughol.

³⁰ Ịphen kụ ạraraar phọ bụphe Ẹnaan úmeeraam bọ roḍulha ghan bọ loor ọwa ọmoogh phọ. Ọde phọ anyina odi bọ kꞌạke phọ alegheri ni mọ ịphen phọ ẹkar ri ikuom inyina.

³¹ Ịwa ghan ghụn ni ọmar phọ kꞌẸnaan bịn oomo phọ ạraraar phọ ịphen Ẹnaan kipumughinaan ni inyina.”

Ẹelha dị edi kꞌạke

³² “Ḍịbam aḍita, oḅio anyina kúkaph. Ẹḅeeraan ni Ọde phọ anyina ọngo anyina ọmar phọ ọdi.

³³ Ibologhi oomo ạraraar anyina ẹsighe ikpoki phọ ẹngo rukulom. Ịkologh rukuru ikpoki lọ kéḅu mun. Iseere ẹelha phọ anyina kꞌạke, ẹpe késoorom bọ, ọḅa kámi bọ, ḅịle kẹn ịphelepheel kégbo bọ.

³⁴ Esi lọ ẹelha anyina edi, pọ kụ esi dị iloghi anyina kẹtol.”

Ịmaar ẹrol egon!

³⁵ “Ịnyaaghian ni, ẹkagh ịkpuku rukpe phọ anyina, ẹsuughi ịtozi phọ anyina,

³⁶ ẹghigh ịdipho ạnmuny-otu dị odi rokori ghan erigheel ọde-otu ạbidi dị ạghi kꞌọyogo, ọbo ọdi aru asi akar eghuugh phọ bịdi okughuronaan nyọdi egina amem.

³⁷ Ạḍiseph edianaan ni nmụny-otu phọ ạbuphe dị ọde-otu phọ aru asi kụ ạmiin dị bịdi odi ni rokori ghan nyọdi. Mị ạkar rịḅeni ghan inyina mọ ọdi kạkparami ni okuughaam esin ọdi, kụ ạḅeni bịdi mọ ọrologhu ude kụ ọdi ghụn kụ ạḅile ạngo bịdi eḍien.

³⁸ Ạḍiseph edianaan ni bịdi, dị ọde-otu phọ aru ogbo aḍughul mụghumo ọḅel ạkenegh kụ ạmiin dị bịdi odi ni rokori ghan nyọdi.

³⁹ Ilegheri mọ uwotu phọ kụ alegheri mem mọ ọḅa phọ katu bọ, ọbo ọdi múmeera mọ ọḅa phọ ạka otu phọ ọdi aḍigh awum rạraar ạḍuanam.

⁴⁰ Igon aani ghan. Amem mọ nyina ígbiom bọ ologhi kụ ẹdi Ọony phọ Oye katu bọ.”

Ịyal ọdo ạrebene

⁴¹ Kụ aPita apuru Jịzos mọ, “Ọmoogh-we, ḍidogh phọ ạḍien nạ udoghonaan iyoor bịn kụ oomo awe phọ ni ḍụghum?”

⁴² Kụ Ọmoogh-we phọ mọ, “Ạnhian nụun kụ ogey ẹbene phọ alegheri bọ mạar? Pọ ọpo ọde-otu phọ ọdi kạḅogh bọ otu phọ ạlogh ḍịghaagh mọ ạngo ghan bụeri phọ ạrebene phọ sibin eḍien phọ ạbidi mem lọ ẹkpe ọngo.

⁴³ Ạḍiseph edianaan ni ẹbene phọ ọpo, dị ọde-otu phọ ọdi aru asi otu kụ ạmiin dị ọdi raḍighi ni ịphen phọ.

⁴⁴ Mị ạkar rịḅeni ghan inyina mọ ọdi kạsighe nyọdi ạdaami mọ aphogh oomo aruphua phọ ọno.

⁴⁵ Kụ eḍighi mạar dị ẹbene phọ ọpo kạḅemom ni ologhi mọ, ‘Ọde-otu phọ ạmi raabinya ni oru’ kụ amiigh okuphogh ạbueri phọ ạrebene phọ, nmạriir rꞌalephiri, rꞌolhe ọphughol amiim dị kakiigh nyọdi,

⁴⁶ pọ ọde-otu phọ katu ḍio rꞌamem dị ẹbene phọ ọpo ụ́kiom ologhi. Kụ ọde-otu phọ kạkiriph ni nyọdi kụ aseere nyọdi dọl abuḅom ẹmhu phọ.

⁴⁷ “Ẹbene phọ ọpo alegheri bọ ịpe ọde-otu phọ ọdi ạwa bọ mọ aḍighi phọ kụ úukolobian bọ uḍighi ịpe ọde-otu phọ ạwa bọ, kọliomom nyọdi iboom ịgurogh.

⁴⁸ Kụ ẹbene phọ ọpo úlegheri bọ ịyaar lọ ọde-otu phọ ạwa mọ aḍighi kụ aḍighi ịyaar lọ ẹkpe ọgurogh, kọliomom nyọdi ịyegheyeghe ịgurogh. Tọrobo oye lọ ọngo igbogh kụ ọdi ropuru ghan igbogh ḍịghaagh ọdi. Tọrobo oye lọ ọngo opuemi kopuru ni ḍịghaagh ọdi opeele.”

ẠJizos ạkom-sereghi

⁴⁹ “Mị uru ọsu aḅirini phọ nịan. Ḅẹm loon mọ mị mạsu ni etu eten.

⁵⁰ Mị rakori ni mem ịminimiin. Ḅẹm loon mọ muwur ri ịmi mụum ịminimiin etu eten.

⁵¹ Kégbi mọ mị uru oseere ẹepho sịen aḅirini phọ. Mị rịḅeni ghan inyina mọ mị útu oseere ẹepho, mị uru ghụn ni ọgbaragbarami awe.

⁵² Emiigh kꞌạnyiidipho, ẹkpigh-otu oogh awe kodi ni ịyal abin, ịraar oḍigh ẹku, ịyal ẹku.

⁵³ Ạburude kọlogh ni ḍien nmụny ạbidi, kụ ạnmuny phọ kọlogh ni ḍien bụrude phọ ạbidi; aburunhiin kọlogh ni ḍien nmạnyaan ạbidi, kụ ạnmanyaan phọ kọlogh ni ḍien burunhiin phọ ạbidi; aburunhiin ilhom kọlogh ni ḍien rọno-oyil ạbidi, kụ ạrono-oyil phọ kọlogh ni ḍien burunhiin ilom mọ ạbidi.”

Areḍeenaan olegheriom ịlo kemite

⁵⁴ Kụ ạJizos ạḅeni kẹn ni we phọ mọ, “Mem lọ nyina ẹmiin mọ aḍio phọ ekire ḍịghaagh phọ ạḍiphe erumuḍio phọ remeel ghan bọ, nyina rẹḅem ghan mọ ọlophia kạloph ni, bịn kạtuugh ạloph.

⁵⁵ Nyina ephogh eghughom ookuugh phọ, nyina rẹḅem ghan mọ ọgbagara ogogo kụ kạmu, bịn kạtuugh ạmu.

⁵⁶ Nyina abulegheri ịlo ạbunon, ịlo-anyina-ílegheri. Nyina etue ghan ni repogh ude rꞌokuaḍio phọ, bịn kelegheri ịlo kemite. Kụ iḍighi ika nụun kụ nyina ítue bọ ipogh reḍeenaan ariiḍio phọ ịphen bịn ílegheri ịlo kemite?”

Ịkaaph ẹphomoghian ọlo ịwa inyina sighiton

⁵⁷ “Iḍighi ika kụ nyina ímitenom bọ iloghi anyina ezue bịn ílegheri ịlo ẹkpianaan oḍighi?

⁵⁸ Eru mạar dị oye rạwa osoorom ạna erugh, kpạragha ịlo ọgba ọphomoghian, ọbo osi sịagba phọ oogboom ịiruen phọ kasoph ghan bọ mọ ọsighe nyịna ọghi ọlogh ikoli.

⁵⁹ Mị rạḅeni ghan nyịna mọ nyịna rómitiom, tụtu nạ ạkpeeghi oomo phọ ịpe osophonaan nyịna ḅeer ạmadan.”