Elegh aLuk 11 - Ạḍinya Iigbia

Ịdi ạJizos ạtughemi mọ ọoḅereghi ghan

¹ Eniin aḍio ạJizos ạrol li eniin esi ạaḅereghi ghan Ẹnaan. Kụ rọoḅereghi rọman, kụ oniin ạmatuan phọ ọdi ạḅeni nyọdi mọ, “Ọmoogh-we, ụtughemi iyoor ịlo ọoḅereghi ghan, ịdipho ạJon ạtughemi bọ bụmatuan phọ ọdi.”

² Kụ ạJizos ạḅeni bịdi mọ, “Mem lọ nyina rẹeḅereghi, ịḅem ghan mọ, “‘Ọde, eegu ẹrolonaan ḍien phọ ạna! Ọmar phọ ạna aru ni!

³ Ụngo ghan iyoor eḍien ẹlo aḍio ḍio ḍio.

⁴ Sạr ịkaraph phọ ayoor ụwilenaan iyoor, ịdipho yoor rọbilenaan ghan bọ tọrobo ọlo uḍighi iyoor ịkaraph. Kámeera yoor omeel oḍighinaan ọdegh ophogh.’”

⁵ Kụ ạJizos ạḅeni bụmatuan phọ ọdi mọ, “Eḍighi mạar dị oniin ọnyo anyina ạghi kꞌọyaghiri ọdi ogbo aḍughul kụ ạlom mọ, ‘Ụngaani ịraar iiḅoghoḍi ạbred.

⁶ Ọyaghiri ạmi dị odi erelhe aḍigh ni ọmiin ạmi, kụ ịyaar ọngo ịmi ílho.’

⁷ Kụ eḍighi mạar dị oye phọ amegheron ẹpe ologhi otu phọ kụ ạḅem mọ, ‘Ịmi kụ́uḅaghami yogh. Mị maghughi otu phọ. Ạnmuny ạmi rꞌạmi mọmina yogh. Mị kátue mun aḅetenu ạngo nyịna ịyaar.’

⁸ Eḍighi ịduon phọ, koḍighi ika? Mị rịḅeni ghan inyina mọ ghạlamo ọdi káḅetenu ni ạngo nyịna ạbred phọ loor esi dị ọdi aḍighi bọ ọyaghiri ạna, kụ ạri ọdi kaḅetenu ni ạngo nyịna oomo phọ ịpe ekuom bọ nyịna loor esi dị umugholoor nyịna rásiph ọlom ghan ọdi.

⁹ “Kụ mị rịḅeni ghan inyina mọ ịlom ghan, kịngo ni inyina. Ịwa ghan, nyina kẹmiin ni. Ikar ghan, kighughuronaan ni inyina.

¹⁰ Tọrobo oye lọ ạlom, kọngo ni nyọdi. Oye lọ ạwa kạmiin ni. Oye lọ akar, kokughuronaan ni nyọdi.

¹¹ Ọghen ọde sịphe ogbo phọ anyina kụ ọdi ọony ọdi kạlom ena kụ kạḅile ạsighe ẹkaraph-ịyaar ạngo nyọdi?

¹² Mọ ọdi ạlhom eghelhe ạkenegh kụ kạsighe ḍikororoph ạnyu ade ạngo nyọdi?

¹³ Ghạlamo nyina ạbukaraph phọ bịn rẹngo ghan ni nmụny anyina igey ạraraar kụ ẹghiom nụun ologhi ịdi Ọde phọ anyina odi bọ kꞌạke phọ kạngo bụphe ọlom bọ nyọdi Uwaloor Iigbia phọ?”

ẠJizos rꞌaBielzebul

¹⁴ Eniin aḍio ạJizos aphorogh ni ọkaraph uwaloor dị ụ́ḅa ghan. Ọdi rophorogh ọkaraph uwaloor phọ, kụ oye ekpom ọka phọ amiigh ọḅa. Iḍighi ni iikia esi aḍita awe phọ,

¹⁵ dị buniin ọḅem ni mọ, “Ọdi ạsighe ịikpo aBielzebul ọkpana aruru phọ kụ raporoghom ghan bọ ruru phọ.”

¹⁶ Buniin ụwa ghan ịlo ọdegh ọdi ophogh kụ ọḅeni nyọdi mọ ọdi ạsighe eḍeenaan kꞌạke aḍeenaan bụno.

¹⁷ Kụ ạJizos malhegheri bọ ịitughian phọ ạbidi kụ ạḅeni bịdi mọ, “Ọmar lọ ạaya kape ni, kụ eghunotu lọ ạaya kemeel li.

¹⁸ Kụ eḍighi mạar dị aSetan ạwaanaan sighiton loor phọ ọdi kụ ạaya, pọ ọmar phọ ọdi kạ́meera. Ịduon nyina rẹḅem ghan bọ mọ ạmi ụsighe ịikpo aBielzebul kụ raporoghom bọ ruru phọ,

¹⁹ mụdi ịikpo phọ ạbumatuan phọ anyina ọsighe bọ roporoghom ghan ruru phọ ịḍua ẹghen kụ emite? Ạbumatuan phọ anyina kụ ugananami ọkpe phọ anyina.

²⁰ Ịikpo phọ Ẹnaan kụ ẹdi mị ạsighe bọ raporoghom ruru phọ. Kụ ịduon phọ reḍeenaan ghan mọ ọmar phọ kꞌẸnaan maru ni sịen ogbo phọ anyina, kụ nyina ílegheri.

²¹ “Mem dị ọkparam-ịikpo mạnyaaghian ịinya ẹgham kụ rakoriom otu phọ ọdi, oomo ạraraar phọ ọdi mekpetenaan rụḅa.

²² Kụ oye dị ạmoogh ịikpo apu nyọdi kụ azuom nyọdi ạkpar apu, pọ katool li oomo ịinya ẹgham mọ uwotu phọ aḍuom bọ ologhi phọ, ạḍuanam kụ adi rạraar phọ ọdi amiighi bọ aakpomoghi.

²³ “Oye lọ ịmi úḍighan, pọ rueenom ịmi ẹgham; kụ oye lọ ịmi úḍighan ookpomoghi iyool-ịga phọ, pọ rạwalalami ghan bịdi.”

Ọkaraph uwaloor ạḅile aḅula

²⁴ “Mem lọ ọkaraph uwaloor amite loor oye ạḍua, ọdi ratelhe yogh ghan rikpisi lọ ạmuum úlho ọwa amarugh. Kụ eru mạar dị ụ́miin, kụ ạḅem mọ, ‘Mị kạḅile ni aḅula otu phọ ạmi mị ạḍua bọ kụ amite.’

²⁵ Kụ ọdi atu ạmiin dị moḅeer esi phọ oselemi.

²⁶ Kụ ọdi ạki ạsighe oḍual ịnon ịkaraph aruwaloor dị eeph epu nyọdi, kụ etu etugh sịphe phọ kụ ạdol oye phọ ọpo kebeeph epu ḍịḅel phọ.”

Ọkaraghi aḍigey ạḍiseph

²⁷ Mem dị ạJizos ạghaaph bọ ịphen phọ ạmadan, oniin ạnir dị ạrol sịphe ogbo aḍita awe phọ ạḅeni ni nyọdi mọ, “Ạḍiseph edianaan ni ạnir phọ ọpo ạmar bọ nyịna, ạḅile ạngo mạmaam.”

²⁸ Kụ ạJizos mọ, “Ạḍiseph edianaan ghụn ni bụphe rọnaghan ghan bọ ọghaaph phọ Ẹnaan kọḅile ooko.”

Opuru ọmiin aani eḍeenaan

²⁹ Mem dị aḍita phọ okoom bọ Jịzos rẹbugh, ọdi ạḅem ni mọ, “Uḍighi ika kụ awe ạnyiidipho eeph bọ ịduon phọ! Bịdi rọwa ghan eḍeenaan kꞌạke, kụ eḍeenaan dị kọngo bịdi ílho emuton eḍeenaan phọ aJona oyil phọ Ẹnaan.

³⁰ Ịdipho aJona oyil phọ Ẹnaan kụ aḍighi bọ eḍeenaan dị Ẹnaan ẹngo weye phọ aNineve kụ ịdi Ọony phọ Oye kaḍighi aani eḍeenaan dị ẹngo we phọ ạnyiidipho.

³¹ Ḍio ịiruen phọ, ukueni-ạnir phọ ọpo ạda bọ Siba kaḅetenu ni kụ ạgba iphume inyina, ịdi eḍighi bọ ọdi ạḍua kꞌegher ekpisi kụ aru ọnaghan ọghaaph olegheri-ịyaar phọ ạSolomon, kụ ịnaghan, ịyaar dị ẹman ịyaar epu Sọlomon edi ni sịen.

³² Ḍio ịiruen phọ, aweye aNineve koḅetenu aani ni kụ ọgba iphume inyina, ịdi eḍighi bọ bịdi ụnaghanan ni ọghaaph phọ aJona kụ okiton esi ịkaraph phọ ạbidi, kụ ịnaghan, ịyaar dị ẹman ịyaar epu Jona edi ni sịen.”

Ọtozi aloor oye

³³ “Oye ólho dị kạsu ọtozi kụ ạbooghi, ḅịle kẹn ạsighe ịyaar aakpereghiom. Kạḅam ghan ghụn ạnyu igbogh ịkasi pịdi awe lọ oḍigh otu phọ ọmiin ghan eten.

³⁴ Ariḍien phọ ạna kụ ọtozi aloor phọ ạna. Eḍighi mạar dị nạ ạmoogh eeḅi ekpeḍien, pọ ạḍiḅaal kụ imuza oomo aloor phọ ạna. Kụ eḍighi mạar dị nạ ạmoogh ẹkaraph ekpeḍien, pọ ufiri maḍigh loor phọ ạna amuza.

³⁵ Loor ịphen phọ, imiigha loor ọbo ekpeḍien phọ rẹngo ghan bọ ọmiin eten loor phọ ạna keḍighi ghan bọ ufiri.

³⁶ Eḍighi mạar dị ạḍiḅaal kụ emuza oomo aloor phọ ạna kụ ufiri úloom, pọ kẹmu ni ekitonom nyịna, ịdipho ọtozi rasoorom ghan bọ oye kạngo ḍịḅaal.”

ẠJizos ạpur rụru ịlo otul aFarisi phọ ḅịle rꞌạbutughemia iilogh phọ

³⁷ Mem dị ạJizos ạghaaph bọ ạmadan, kụ oniin ọnyo aFarisi ạmagh nyọdi mọ aru kꞌọno olian eḍien. Kụ ọdi ạghi ạrol ude olian eḍien phọ.

³⁸ Ịpher ri ọnyo aFarisi phọ mem dị ạmiin bọ mọ ạJizos amiigh ni olhe eḍien phọ rꞌịipuan pụupuan ạraghaagh.

³⁹ Kụ Ọmoogh-we phọ ạḅeni nyọdi mọ, “Nyina ạbuo aFarisi phọ reetologh ghan sịgbagba rꞌạrukpa kẹḅaalami ẹphen ạnyu phọ, kụ ekpooko rꞌịkaraph kụ imuza sịphe iloghi phọ anyina.

⁴⁰ Rolologhi, Ẹnaan phọ ẹlhem bọ ạnyu phọ kụ ị́lem aani bọ ologhi phọ ḍụghum?

⁴¹ Ịsighe ịpe edi bọ sịgbagba rꞌạrukpa phọ anyina ẹngo rukulom, bịn oomo ạraraar mịḅaalanaan inyina.

⁴² “Pọ eeghe ọdo ịminimiin dị kịrolonaan inyina aFarisi phọ! Nyina redi ghan ghạlamo rꞌịikiripha amooboph ḍioph abin kẹsighe muniin ẹngo Ẹnaan, kụ meghel asiph rꞌakeel rꞌẹphomoghian phọ Ẹnaan. Iḍighi ghan ịphen phọ kụ egbi ghan ọḅaram ịpheri phọ.

⁴³ “Pọ eeghe ọdo ịminimiin dị kịrolonaan inyina aFarisi phọ, ịdi eḍighi bọ ọrologhu ghan ariisi eghuan ẹpe arubughotu phọ, rꞌịimaghaghan eghuan ẹpe asiḍighi phọ kụ ịḅeeraan inyina!

⁴⁴ Pọ eeghe ọdo ịminimiin dị kịrolonaan inyina. Nyina ẹkigh iiḍi dị úlegheri mun kụ aweye rọozeghi ghan koten bịn ọopuan loor!”

⁴⁵ Oniin ọgbaam iilogh phọ ạḅeni ni nyọdi mọ, “Ọtughemia, ịphen nạ ạḅem bọ nạ ruufolomiom aani ni iyoor.”

⁴⁶ Kụ ọdi mọ, “Pọ eeghe ọdo ịminimiin dị kịrolonaan aani inyina ạbugbaam iilogh phọ! Nyina rẹgban ghan sidool dị kótue otool kelereghi bụnon aweye, kụ ạri rꞌạghunugh anyina rạ́ḅogh aani ni rꞌaḍiniin adool phọ.

⁴⁷ Pọ eeghe ọdo ịminimiin dị kịrolonaan inyina! Nyina ẹsimenti yogh ạnyu iiḍi ariil phọ Ẹnaan ạburude ạburude phọ anyina ọzeeghi bọ.

⁴⁸ Loor ịphen phọ nyina mẹgba emitiom rꞌaloor anyina, mọ ịpe ạburude phọ anyina oḍighi yogh bọ ịḅeeraan ni inyina, ịdipho nyina mẹsimenti yogh bọ iiḍi ạbuphe ạburude ạburude phọ anyina ọzeeghi bọ.

⁴⁹ Esi ịduon phọ, Ẹnaan ẹḅem ni sịphe ạḍinya olegheri-ịyaar phọ ọdi mọ, ‘Mị katom ni riil rꞌabutelhedom ạkiom bịdi, kụ bịdi kọze ni buniin, ọgbiphoghom buniin.’

⁵⁰ Ịduon kụ iḍighi kụ kọsighe ghẹlhe ọzeeghi oomo ariil phọ kꞌẹḅel egbiom aḅirini phọ ọḅam rụmhu aweye oghiil phọ ọphon,

⁵¹ emiigh kꞌEbel kụ ẹteeny Zẹkaraya, ọpo oghiigh bọ sịphe ogbo ọgbanaghi ịyaar aghuḍum mọ rꞌẠdol Iigbia Otu Ịiḅereghi phọ. Mị ạkar rịḅeni ghan inyina mọ ạghelhe oomo ạraraar phọ ịphen kạtolonaan ni weye oghiil phọ ọphon.

⁵² “Pọ eeghe ọdo ịminimiin dị kịrolonaan inyina ạbugbaam iilogh phọ! Nyina mẹsighe ịsabi otu olegheri-ịyaar phọ ẹḍuanam. Nyina rꞌaloor anyina ímeera ni iḍigh, kụ imirighan ni bụphe ọwa ghan bọ oḍigh phọ.”

⁵³ Mem dị ạJizos amite bọ sịphe phọ ạḍua, ạbutughemia iilogh phọ rꞌaFarisi phọ ụḍagha ni nyọdi iboom, ọbo eḍigh ọnhu ọdi ọghaaphogh ịbadi ạraraar.

⁵⁴ Bịdi ugon ghan ni ọnaghan ạḍughum ọnhu ọdi kụ ọsighe osiphom ọdi.