Elegh ạJon 8 - Ạḍinya Iigbia

Oḅolom ạnir dị rale ẹmha

¹ Kụ ạJizos ạghi Eegum Ọlivs kụ ạrol.

² Eḅon ạḍiroor kụ ọdi ạḅile aḅula ẹpe Otu Ịiḅereghi phọ, kụ oomo awe uru ni ọteeny nyọdi, kụ ọdi ạrol ude, kụ amiigh ọtughemi ạbidi.

³ Kụ ạbutughemia iilogh phọ rꞌaFarisi phọ ọsighe oniin ạnir dị ale ẹmha kụ oḅolom oru ọmeremi ghisigh ạJizos,

⁴ kụ ọḅeni nyọdi mọ, “Ọtughemia, usiph ạnir phọ ọphon dị odi rale ẹmha.

⁵ Sịphe iilogh phọ, aMozis ụḅeni iyira mọ oroḅol ghan ikpo ọdo ạnir phọ ọphon oghiigh. Kụ nạ ạḅem aani mọ oḍighi ika nyọdi?”

⁶ Bịdi ụghaaph ịphen phọ ịlo ọnaghan ạḍughum ọnhu ọdi, ọbo bịdi osoorom nyọdi erugh. Kụ ạJizos azuman, kụ ạsighe ghụnugh ọdi ạgeom ghan ude.

⁷ Kụ bịdi opuru bọ rọkpaariom, kụ ọdi ạḅile ạrol aaleeny, kụ ạḅeni bịdi mọ, “Sịphe aḍita phọ anyina ọlo ịkaraph kőḍighi ghan kụ ạphur ạsighe ekpo phọ aroph ạnir phọ ọphon!”

⁸ Kụ ọdi ạḅile kẹn azuman, kụ ạsighe ghụnugh ọdi ạgeom ghan ude phọ.

⁹ Kụ bịdi rọnaghan ịpe ạJizos ạḅem bọ, kụ omiigh omiteghu ekpo amem amem, emiigh kꞌikumoor awe phọ kụ esiemi eekuna. Kụ ogina ạJizos bịn asugha, rꞌạnir phọ dị ạmeera ghisigh ọdi.

¹⁰ Kụ ạJizos ạḅile ạrol aaleeny, kụ apuru mọ, “Nịr phọ, bịdi odiighi ẹghen? Rꞌoniin ọlo asoph ọoruen aphume nyịna ólho?”

¹¹ Kụ ạnir phọ mọ, “Oye phọ, rꞌoniin ólho.” Kụ ạJizos mọ, “Mị kẹn úsoph ọoruen upume nyịna. Keel, kụ ọlo káḍighi mun ịkaraph.”]

ẠJizos kụ ạḍiḅaal aḅirini phọ

¹² Kụ ạJizos ạḅile ạghaaph ạḅeni bịdi mọ, “Mị kụ ạḍiḅaal aḅirini phọ. Ọlo ụdaph ịmi kátelhe mun esi ufiri, kạmoogh ni ḍịḅaal aghuḍum.”

¹³ Kụ aFarisi phọ ọḅeni nyọdi mọ, “Nạ rạkaaph ghan ịlo ẹmhu ạna bịn. Ọghaaph phọ ạna ọkpe ni.”

¹⁴ Kụ ạJizos mọ, “Eeye. Ghạlamo mị rạkaaph ni ịlo ẹmhu ạmi bịn, ọghaaph phọ ạmi kọ́kpe ịdi eḍighi bọ mị alegheri ni esi phọ mị ạḍua bọ kụ aru, rꞌẹpe mị rạki bọ. Nyina ílegheri ẹpe mị ạḍua bọ kụ aru rꞌẹpe mị rạki bọ.

¹⁵ Nyina reegbo ghan ịiruen awe. Mị ọoruen oye kősophonaan ghan.

¹⁶ Mọ mị ụwa oogbo ịiruen, ọbo ịiruen phọ ạmi miḍighi ni igey, ịdi eḍighi bọ kógina ạmi bịn, Ọde phọ urom bọ ịmi odi ni ọman ạmi.

¹⁷ Ọge kẹn ni pạ iilogh phọ anyina mọ ọnhu ạsiagba ịyal awe kụ ạḅoph, pọ bịdi rọgba ni igey.

¹⁸ Mị rạkaaph ni ịlo ẹmhu ạmi, ḅịle Ọde phọ urom bọ ịmi rụghaaphaan kẹn ni ịmi.”

¹⁹ Kụ bịdi opuru nyọdi mọ, “Ọde phọ ạna odi ẹghen?” Kụ ạJizos mọ, “Nyina ịmi rꞌỌde phọ ạmi ílegheri; nyina ilegheri ni ịmi, ọbo nyina milhegheri kẹn ni Ọde phọ ạmi.”

²⁰ ẠJizos ạghaaph oomo phọ ịphen phọ mem mọ dị rạtughemi bọ sịphe Otu Ịiḅereghi phọ ẹpe osoph eekoom ikpoki phọ; kụ oye ósiph nyọdi, loor esi dị amem mọ ọdi kẹ̋teeny.

Nyina kétue esi ẹpe mị rạki bọ

²¹ Kụ ạJizos ạḅile ạḅeni bịdi mọ, “Mị kạḍua ni. Nyina kịwa ni ịmi, kụ nyina kemughom ni ịkaraph phọ anyina. Ẹpe mị rạki bọ, nyina kétue esi.”

²² Kụ ạbuo aJu phọ ọḅem mọ, “Ẹmhu phọ eeghe kụ ọdi rạḅem ghan bọ mọ nyina kétue esi ẹpe mị rạki bọ? Emeeraam mọ ọdi kakiigha loor ḍụghum?”

²³ Kụ ạJizos mọ, “Nyina ịḍua ạtu-ropoḍi kụ eru, mị ụḍua kꞌạke kụ aru. Nyina ạbuo ịsien aḅirini phọ, mị kọ́lo ịsien aḅirini phọ.

²⁴ Ịduon kụ iḍighi kụ mị ịḅeni bọ inyina mọ nyina kemughom ni ịkaraph phọ anyina. Nyina kemughom ịkaraph phọ anyina dị nyina ímeeraam mọ ‘Mị odi ni ịdipho mị odi bọ’.”

²⁵ Kụ bịdi opuru nyọdi mọ, “Nạ phọ ạnhian?” Kụ ạJizos mọ, “Igina phọ ịpe mị rịḅeni ghan bọ ni inyina kꞌemiighom mọ.

²⁶ Esugha ni ịbadi ạraraar dị mị ạmoogh ọghaaph ḅịle rꞌịiruen oogboonaan anyina. Ọpo urom bọ ịmi ọgbaam igey, kụ mị rạkaaph ghan rạraar phọ ịpe mị ạnaghan bọ esi ọdi kạḅeni aḅirini phọ.”

²⁷ Bịdi ụ́naghan mọ ọdi ạghaaph ghan ịlo Ọde phọ kụ ạḅeni bọ bụno.

²⁸ Kụ ạJizos mọ, “Mem dị nyina ephoophe Mọony phọ Oye ẹghiom ạnyu, nyina kelegheri ni mọ ‘Mị odi ni ịdipho mị odi bọ.’ Pụruku nyina kelegheri mọ mị ụ́da ghan rꞌẹmhu ạmi bịn uḍighi, emuton ọghaaph ghan ịpe Ọde phọ mụtughemi bọ ịmi.

²⁹ Ọpo urom bọ ịmi odianaan ni rꞌạmi. Ọdi ịmi ụ́wile bịn, ịdi eḍighi bọ mị raḍighi ghan ni ịpe ẹḅeeraan bọ nyọdi.”

³⁰ Kụ ịbadi dị ọnaghan bọ ọghaaph phọ ọphon umeeraam ni Jịzos.

Ạbuo ade ḅịle rꞌạrebene

³¹ Kụ ạJizos ạḅeni bụo aJu phọ momeeraam bọ nyọdi mọ, “Nyina ẹdaph ọnhu phọ ạmi, pọ nyina kụ ọkaraghi ạbumatuan phọ ạmi.

³² Nyina kelegheri ni ịpe eru bọ igey phọ, kụ ẹtuan igey phọ ekpetenaan.”

³³ Kụ bịdi mọ, “Yoor ạbuo ẹemara Ebraham. Yoor kőḍighi ghan rẹbene ọngo oye. Ẹmhu ika nụun kụ nạ ạḅem bọ mọ, ‘Nyina kekpetenaan’ phọ?”

³⁴ Kụ ạJizos ạḅeni bịdi mọ, “Mị ạkar rịḅeni ghan inyina mọ tọrobo oye lọ raḍighi ghan ịkaraph, pọ ẹbene ịkaraph.

³⁵ Ẹbene rạ́tolan ghan bụo otu phọ oomo amem. Ọony phọ kụ ọlo otu phọ kꞌagee-pọ.

³⁶ Eḍighi ịyaar dị Ọony phọ kụ aḍighi dị nyina ekpetenaan, pọ nyina kẹkaraghi ni ekpetenaan.

³⁷ Mị alegheri ni mọ nyina ạbuo ẹemara Ebraham, kụ nyina rẹwa ghan bọ ni oghiigh ạmi, ịdi eḍighi bọ eepoogh ísugha mun sịphe iloghi phọ anyina dị ọghaaph phọ ạmi kaḍigh aani.

³⁸ Mị rạkaaph ghan ịpe mị ạmiin bọ kꞌỌde phọ ạmi, kụ nyina reḍighi ghan ịpe nyina ẹnaghan bọ kꞌọde phọ anyina.”

³⁹ Kụ bịdi mọ, “Ebraham kụ ọde ayoor.” Kụ ạJizos ạḅeni bịdi mọ, “Eḍighi ịyaar dị nyina eḍighi bụo ẹemara Ebraham, nyina mịtuugh ni iiḍighi phọ Ebraham kụ eḍighi aani.

⁴⁰ Kꞌaḍio phọ mị rịḅeni ghan inyina igey phọ mị ạnaghan bọ esi Ẹnaan, kụ nyina rẹwa ghan bọ ni oghiigh ạmi. Ebraham óḍighi ịyaar dị ẹrol ịduon.

⁴¹ Nyina reḍighi ịpe ọde phọ anyina aḍighi ghan bọ.” Kụ bịdi mọ, “Ẹnaan bịn kụ ogina Ọde phọ ayoor. Ụ́gaanyogh burunhiin ayoor kụ ụmaraghi bọ iyoor.”

⁴² Kụ ạJizos ạḅeni bịdi mọ, “Eḍighi ịyaar dị Ẹnaan kụ eru ọde phọ anyina, ọbo nyina mịphomoghian ni ịmi, loor esi dị mị ụḍua kꞌẸnaan kụ aru bọ odi sịen. Mị ụ́daanaan ẹmhu bịn utu. Ọdi kụ urom ni ịmi.

⁴³ Uḍighi ika kụ nyina ịmi ị́naghanan bọ? Nyina ịmi ị́naghanan ịdi eḍighi bọ nyina ítue ịkparam ịnaghan ọghaaph phọ ạmi.

⁴⁴ Nyina ạnmuny Eru ọde phọ anyina, kụ nyina rẹwa ghan ọdaph areten ọdi. Kꞌemiighom mọ, ọdi ọokom-enu. Ọdi kọ̋rolan ghan ẹku igey, ịdi eḍighi bọ igey loor ọdi ílho. Mem lọ ọdi ạgba ọkpe, pọ ịdipho kụ ọlem ọdi ni, ịdi eḍighi bọ ọdi ọgbaam ọkpe ḅịle rꞌọde oomo ọkpe.

⁴⁵ Ịdi mị rạgba ghan bọ igey phọ kụ nyina ịmi ímeeraam bọ.

⁴⁶ Ạnhian ọnyo anyina kụ katue ạgba ịkaraph ạmi amitiom? Kụ eḍighi ịyaar dị mị rạkaaph ghan igey kịḅeni inyina, uḍighi ika kụ nyina ịmi ímeeraam bọ?

⁴⁷ Ọpo ạḍua bọ kꞌẸnaan kụ aru rạnaghan ghan ni ọghaaph phọ Ẹnaan. Nyina rẹ́naghanan ghan, loor esi dị nyina ị́ḍua esi Ẹnaan kụ eru.”

ẠJizos rꞌEbraham

⁴⁸ Ạbuo aJu phọ ọphagharanaan mọ, “Anem ayoor oopho esi ípe ọḅem ghan mọ nạ ọlo aSameria ni dị eru eghola.”

⁴⁹ Kụ ạJizos mọ, “Mị eru ráḍigh ghan, mị rakueni ghan Ọde phọ ạmi, kụ nyina risooromi ghan ịmi.

⁵⁰ Mị rạ́wa ghan oghuenian aloor. Oye dị rụwaanaan ịmi eghuan phọ odi ni. Ọdi kugheelemi ni ịmi ịiruen phọ.

⁵¹ Mị ạkar rịḅeni ghan inyina mọ oye lọ ạnaghanan ọghaaph phọ ạmi ḍuugh kạ́miin.”

⁵² Ạbuo aJu phọ ọḅeni nyọdi mọ, “Pụruku yoor molegheri mọ eru eghola ni nyịna. Ebraham bịn amugh ni. Ariil phọ kẹn omuughu ni. Kụ nạ rạkaaph ghan mọ, ‘Oye lọ ạnaghanan ọghaaph phọ ạmi ḍuugh kạ́miin.’

⁵³ Nạ ragbi mọ nạ kụ upu Ebraham ọde phọ ayoor amugh bọ ni ḍụghum? Nạ ragbi mọ nạ kụ upu riil phọ omuughu bọ ni ḍụghum? Nạ phọ ạnhian nụun?”

⁵⁴ Kụ ạJizos mọ, “Mị kụ aghuenian loor, pọ arughuenian phọ ạmi ịyaar ị́man. Ọde phọ ạmi, ọpo nyina rẹḅem ghan bọ mọ Ẹnaan anyina phọ kụ ughueni bọ ịmi.

⁵⁵ Kụ nyina nyọdi ke̋lhegheri. Mị alegheri ni nyọdi, kụ mị ạḅem mọ mị nyọdi úlegheri, pọ mị maḍighi aani ọgbaam ọkpe ịdipho anyina. Kụ mị alegheri ni nyọdi rạnaghanan ghan kẹn ịpe ọdi ạḅem bọ.

⁵⁶ Ịḅaal li ologhi Ebraham ọde phọ anyina ọmiin aani aḍio phọ ạmi. Kụ ọdi ạmiin ni, kụ ạmoogh iboh.”

⁵⁷ Ạbuo aJu phọ ọḅeni nyọdi mọ, “Nạ ooghdi ạsia kọ̋man, kụ nạ mạmiin ghụn ni Ebraham?”

⁵⁸ Kụ ạJizos mọ, “Mị ạkar rịḅeni ghan inyina mọ tụtu kọmar bọ Ebraham, mị odi ni.”

⁵⁹ Kụ bịdi ọsighiogh ikpo oroḅol ọdi, kụ ạJizos ạaghian amite pạ Otu Ịiḅereghi phọ ạḍua.