Elegh ạJon 7 - Ạḍinya Iigbia

ẠJizos rꞌabumor phọ ọdi

¹ Ịphen phọ reten kụ ạJizos arelhe yogh ghan eelhe aGalili. Ọdi ọ́wa mun orelhe yogh eelhe aJudia, loor esi dị ạbuo aJu phọ rọwa ghan nyọdi oghiigh.

² Ẹyaal arugbogo ạbuo aJu phọ retu ọteeny,

³ kụ abumor phọ ạJizos ọḅeni nyọdi mọ, “Ḍụa ẹphen ạghi ẹpe Judia, pịdi ạbumatuan phọ ạna ọmiin ghan iiḍighi phọ nạ raḍighi yogh bọ.

⁴ Oye lọ rạwa mọ aḍien phọ ọdi eeleghaan ráḍighi ghan iiḍighi esi ịbooghian. Ịdipho nạ raḍighi yogh bọ ịphen phọ, ḍeenaan loor ạna aḅirini phọ.”

⁵ (Rꞌabumor phọ ọdi bịn nyọdi úmeeraam.)

⁶ Kụ ạJizos ạḅeni bịdi mọ, “Amem mụo ạmi kẹ̋teeny. Tọrobo amem ịkasian ni inyina.

⁷ Aḅirini phọ kátue ịlogh inyina ḍien, kụ mị ghụn kụ ẹdi ạlogh ḍien, ịdi eḍighi bọ mị rạḅeni ghan ni mọ iiḍighi phọ ọdi ị́nighe.

⁸ Iḍia ghan olhe ẹyaal phọ. Mị rạ́ki aani olhe ẹyaal phọ kụ, ịdi eḍighi bọ amem mụo ạmi kẹ̋teeny.”

⁹ Rọghaaph ịphen phọ, kụ ạrolom ni ẹpe Galili ẹphurukpu amem.

ẠJizos ạki aani olhe ẹyaal arugbogo phọ

¹⁰ Mem dị abumor phọ ọdi moten ẹpe ẹyaal phọ, kụ ọdi agbi nụun ọghi aani ịlo ịbooghian.

¹¹ Ạbuo aJu phọ ụwa ni nyọdi ẹpe ẹyaal phọ, kụ oopuruan ghan mọ, “Ọdi phọ odi ẹghen?”

¹² Kụ awe phọ ogum iboom ịlo ọdi; buniin mọ, “Ọdi phọ ogey oye ni,” buniin mọ, “Eeye, ọdi raakeleghi ghan we.”

¹³ Ghạlamo ịduon phọ bịn oye ómighirom ọghaaph ịlo ọdi omitiom loor eegu ạbuo aJu phọ.

¹⁴ Molhe ẹyaal phọ oolemi rodi, kụ ạJizos ạghi pạ Otu Ịiḅereghi phọ kụ amiigh ọtughemi.

¹⁵ Iḍigh ni iikia esi ạbuo aJu phọ kụ opuru mọ, “Oye phọ ọphon kꞌekulha otu ịtuugha ụ́ki bọ ạmaar ri ika ḍịnya phọ ạḍien phọ?”

¹⁶ Kụ ạJizos mọ, “Ịphen mị rạtughemi bọ kị́lo ạmi, ịḍua esi Ẹnaan phọ irom bọ ịmi kụ eru.

¹⁷ Tọrobo oye lọ aseere ologhi oḍighi ịpe Ẹnaan rẹwa bọ kalegheri ni mụghumo ịtughemi phọ ạmi ịḍua kꞌẸnaan kụ eru, ḅịle mọ mị rạkaaphom ghan ịitughian ologhi ạmi bịn.

¹⁸ Oye lọ rạkaaphom ghan ịitughian ologhi ọdi bịn rạwa ghan rughuenian. Kụ ọlo rạwaanaan eghuan ọpo arom bọ nyọdi, pọ ọgbaam igey dị iguegue ụ́ḅaram.

¹⁹ AMozis ḍịen kụ inyina ị́ngo bọ iilogh phọ? Kụ rꞌoniin ọnyo anyina maako ghan ni. Uḍighi ika kụ nyina rẹwa bọ oghiigh ạmi?”

²⁰ Kụ aḍita awe phọ mọ, “Eru eghola ni nyịna. Oye nyịna rạ́wa oghiigh.”

²¹ Kụ ạJizos mọ, “Mị uḍighi ni nyeniin eboom eḍighieen dị ịngo inyina iikia.

²² AMozis ạto ịngo inyina mọ iḍun ghan nmụny anyina. (Kụ ạri ạburude ạburude anyina kụ umiigh ni eḍighinom ịyaar phọ ẹphen, káMozis.) Kụ nyina reḍun ghan ni nmụny ḍio ophooghian.

²³ Nyina rekiilaan ghan ni ọkaraghi iilogh phọ aMozis keḍunogh nmụny ḍio ophooghian phọ. Nyina ighol eeghe nụun kụ rịghagham bọ ịmi iloghi mọ mị aakonom oye aḍume ḍio ophooghian phọ?

²⁴ Kẹ́sighe ghan riḍien bịn esophom ọoruen. Ịnaghan ghan ọnhu aḍighiton phọ kụ.”

Ọdi kụ aMesaya phọ ḍịen ni?

²⁵ Buniin ạbuo aJeruselem ụḅem ni mọ, “Ọphon ḍịen kóye phọ bịdi rọwa ghan bọ oghiigh phọ?

²⁶ Ịmiin aani. Ọdi amite ni egaan rạkaaphogh rạraar kụ oye ósoph ọnhu ọdi. Ạbuo ịtooghi phọ ọkaraghi nụun ni olegheri mọ ọphon kụ aMesaya phọ?

²⁷ Ọbo yira olegheri ni esi phọ oye phọ ọphon ạḍua bọ kụ aru; kụ mem dị aMesaya katu, oye dị kalegheri esi phọ ọdi ạḍua bọ kụ aru ólho.”

²⁸ Kụ ạJizos ạtughemi sịphe Otu Ịiḅereghi phọ ạlho ạghiom ạnyu mọ, “Nyina ẹkaraghi nụun ni ilegheri ịmi rꞌesi phọ mị ạḍua bọ kụ aru. Mị ụ́nya rꞌẹmhu ạmi bịn utu. Ọpo urom bọ ịmi kụ ọkaraghi ọno phọ, kụ nyina nyọdi ílegheri.

²⁹ Mị alegheri ni nyọdi, ịdi eḍighi bọ ọdi kụ urom bọ ịmi, kụ mị ụḍua loor ọdi kụ aru bọ.”

³⁰ Kụ bịdi ọwa osiph ọdi, kụ oye nyọdi óḅol, loor esi dị amem mọ ọdi kẹ̋teeny.

³¹ Kụ ịbadi awe sịphe aḍita awe phọ umeeraam ni nyọdi kụ ọḅem mọ, “Mem dị aMesaya phọ aru, ọdi kạḅile ni aḍighi yogh ịnon ịiḍaany dị epu ịphen oye phọ ọphon ḍụghum?”

Otom bukoriom ogiga mọ ọghi osiph Jịzos

³² Kụ aFarisi phọ ọnaghan dị aḍita awe phọ rọgumom ghan nyọdi ịlo ịphen phọ, kụ bịdi rꞌạbuo ạrumhu ariil ạrikia phọ orom bukoriom ogiga phọ mọ ọghi osiph nyọdi.

³³ Kụ ạJizos ạḅeni bịdi mọ, “Mị rꞌanyina kọḅile ni ọtolan mọony amem bịn kụ mị agbi ogheel kꞌọpo urom bọ ịmi.

³⁴ Nyina kịwa ni ịmi, kụ kẹ́miin, ịdi eḍighi bọ ẹpe mị kạtol bọ nyina kétue esi.”

³⁵ Kụ ạbuo aJu phọ mọ, “Ọdi rạwa ghan ọghi ẹghen, dị yira nyọdi kọ́miin mun bọ? Ọdi kạkiighi rạmha phọ ịpe ạbuo aGris odi bọ sịphe ogbo ạbuo aJu phọ ọtughemi ghan ạbuo aGris phọ ḍụghum?

³⁶ Rạḅem ghan mọ, ‘Nyina kịwa ni ịmi kụ kẹ́miin; ẹpe mị kạtol bọ nyina kétue esi.’ Ẹmhu ịphen phọ pọ ika?”

Ạmuum aghuḍum kakilogh amiteghu ịdipho ạriphiiny

³⁷ Ḍigbogh aḍio ẹyaal phọ kemuneen bọ, ạJizos aḅetenu ạmeera kụ ạlooghi mọ, “Ọlo ạmuum rạpu aru ụteeny ịmi ạphughol!

³⁸ Ịdipho ọge bọ pạ ạḍinya iigbia phọ, ‘Ạmuum aghuḍum kạḍua ologhi oye phọ ọpo umeeraam bọ ịmi kụ akilogh amiteghu ịdipho ạriphiiny.’”

³⁹ ẠJizos ạghaaph ịphen phọ ịlo Uwaloor Iigbia phọ ọpo bụphe omeeraam bọ nyọdi kọmoogh bọ. Mem mọ ạmuphe phọ kọ̋ngo Uwaloor Iigbia phọ, ịdi eḍighi bọ kőgananami eghuan phọ ạJizos.

Awe phọ odia

⁴⁰ Ịbadi sịphe aḍita awe phọ ụnaghan ni ikpo ọnhu phọ ịphen kụ ọḅem mọ, “Igey ni, ọphon kụ ọkaraghi oyil phọ ni!”

⁴¹ Buniin mọ, “Ọphon kụ aMesaya phọ!” Kụ buniin ọḅile kẹn ọḅem mọ, “AMesaya phọ kạ́ḍua Galili kụ atu.

⁴² Ạḍinya iigbia phọ rẹḅem ghan mọ aMesaya phọ kaḍighi ọnyo ẹemara aDevid ọdaam mọ. Kọmar nyọdi Bẹtilihem, ẹmha phọ aDevid arugh ghan bọ.”

⁴³ Kụ awe phọ ọtuan ẹmhu ọdi odia.

⁴⁴ Buniin ạbidi ọwa osiph ọdi, kụ oye nyọdi óḅol.

Emeeraam ạbuo ạrumhu aJu phọ

⁴⁵ Kụ abukoriom ogiga phọ oḅula esi ạbuo ạrumhu ariil ạrikia phọ rꞌaFarisi phọ, dị opuru bịdi mọ, “Uḍighi ika kụ nyina nyọdi ísiph bọ itumom?”

⁴⁶ Kụ abukoriom ogiga phọ mọ, “Oye kọ̋ghaaph ghan ẹghaaphom-ịyaar dị oye phọ ọphon rạkaaph ghan.”

⁴⁷ Kụ aFarisi phọ mọ, “Inyina phọ kẹn kụ ọdi ạḅaram aani ni aakeleghi?

⁴⁸ Nyina ẹmiin ni rꞌoniin ọnyo ịtooghi mụghumo ọnyo aFarisi dị ameeraam nyọdi ḍụghum?

⁴⁹ Ẹnaan meronyon ḍita ighiil awe phọ ạbuen iilogh phọ aMozis úlegheri bọ.”

⁵⁰ ANikodimos phọ ọpo ạghi bọ ophogh ạJizos ạrol aani ni kụ ạḅeni bịdi mọ,

⁵¹ “Eḍighi ni ologh ayira osophonaan ghan ọoruen oye dị ḍụghum ọnhu ụ́naghan, ụ́ḅile ụuḅeghion upogh ịyaar phọ ọdi aḍighi bọ.”

⁵² Kụ bịdi ọphagharanaan nyọdi mọ, “Nạ phọ kẹn ọlo aGalili ḍụghum? Ḅịle aḅiligha Ḍịnya Iigbia phọ aphogh. Nạ kạmiin ni mọ oyil rámite ghan Galili.” [

⁵³ Kụ oye oye aten agheel kꞌọdi.