Elegh ạJon 5 - Ạḍinya Iigbia

ẠJizos aakonom oye dị úmoon ọgbal ebaraph

¹ Ịphen phọ reten, kụ ẹteeny ẹyaal ạbuo aJu phọ, kụ ạJizos ạghi Jeruselem.

² Ẹpe Jeruselem, sịphe amatuman “Ọnhu-Aḍibuo Iyool-ịga phọ,” ebaraph owura ạmuum ịrol li dị oogh ịisua otu eko ekitonom. Ọnhu aHibru, esi phọ ẹphen ughol mọ aBetzata.

³ Aḍiboom aḍita awe ạreezegh, bụo ikpom ariḍien, rꞌạbuo ạraagha, rꞌạbudi aruwol rꞌạraghaagh emuughu, ụde ni okoom ịisua phọ ịphen phọ. [Bịdi ukori ghan mọ ạmuum mọ akil.

⁴ Mem etum mem ọokpaany Ẹnaan ạghi ghan ni sịphe atukemi mụum mọ. Ọḅel oye phọ ọpo kasoor bọ, mem lọ oḅunyon mụum mọ ọman, bịn aḍum ghan ni tọrobo eephina lọ eḍighi nyọdi.]

⁵ Oye ạrol aani ni sịphe dị mạrol rẹezegh ịraardi rꞌọphaanya ạsia.

⁶ Kụ ạJizos ạmiin ni dị ọdi ạmina sịphe phọ, kụ ọdi alegheri ni mọ oye phọ ọpo phọ mạrolom ni eephina phọ kꞌekpo amem dị mẹkel li, kụ ọdi apuru nyọdi mọ, “Nạ rạwa ni oḍum ḍụghum?”

⁷ Kụ oye ẹzegh phọ ạḅeni nyọdi mọ, “Oye phọ, mị ụ́moogh aani sịen oye dị kụsighe ịmi asoore sịphe ạmuum mọ, mem lọ oḅunyon. Mị ạaghophonu rạki osoor, ọnon oye mạarom ịmi asoor.”

⁸ Kụ ạJizos ạḅeni nyọdi mọ, “Ḅetenu, sịghe eetere phọ ạna arelhe!”

⁹ Egina amem bịn oye phọ aḍum, ạsighe eetere phọ ọdi arelhe. Aḍio phọ ạḍiphe phọ aḍio ophooghian.

¹⁰ Kụ ạbuo aJu phọ ọḅeni oye phọ ọpo ookonom bọ mọ, “Arodon phọ aḍio ophooghian, kụ eḍighi ni ologh orool eetere phọ ạna.”

¹¹ Kụ ọdi ạphagharanaan bịdi mọ, “Ọpo uukonom bọ ịmi kụ ụḅeni bọ ịmi mọ, ‘Sịghe eetere phọ ạna arelhe.’”

¹² Kụ bịdi opuru nyọdi mọ, “Ạnhian kụ ạḅeni bọ nyịna mọ, ‘Sịghe eetere phọ ạna arelhe’ phọ?”

¹³ Kụ ọpo ookonom bọ ólhegheri oye phọ, ịdi eḍighi bọ ạJizos maḍighi lẹeph ạḍua, loor aḍita awe phọ momuza bọ.

¹⁴ Onyebel aten kụ ạJizos ạmiin nyọdi pạ Otu Ịiḅereghi phọ, kụ ạḅeni nyọdi mọ, “Sịen mookonom bọ nyịna, ịkaraph káḍighi ghan mun, ọbo ịnon igbogh ịminimiin dị epu ịḅel phọ kesoorom ghan bọ nyịna.”

¹⁵ Kụ oye phọ ạḍua kụ ạghi ạḅeni bụo aJu phọ mọ ạJizos kụ oye phọ aakonom bọ nyịno.

¹⁶ Ọdo phọ arookonoma aḍio ophooghian phọ ịphen phọ kụ iḍighi dị ạbuo aJu phọ omiigh bọ ọgbiphoghom ạJizos.

¹⁷ Kụ ạJizos ạphagharanaan bịdi mọ, “Ọde phọ ạmi rápooghian ghan oḍighi, kụ mị raḍighi aani ghan bọ.”

¹⁸ Ịyaar phọ bịdi ọkparami bọ ḍịghaagh ọwa ghan oghiigh ọdi ịduon: mọ ọdi mạka ḍio ophooghian phọ, ạḅile kẹn rạḅem ghan mọ Ẹnaan Ọde ọno. Ịduon phọ, pọ mạsighe loor ọdi ạtomaam Ẹnaan.

Ịikpo ọtooghiom mọ Ọony phọ ạmoogh bọ

¹⁹ Kụ ạJizos ạphagharanaan bịdi mọ, “Mị ạkar rịḅeni ghan inyina mọ Ọony phọ rátue ghan kạda rꞌẹmhu ọdi bịn aḍighi ịyaar. Ịyaar dị ọdi raḍighi ghan ílho, emuton ịpe ọdi ạmiin bọ dị Ọde phọ ọdi raḍighi. Ịpe Ọde phọ raḍighi ghan bọ kụ ịdi Ọony phọ ạtuugh raḍighi aani ghan,

²⁰ ịdi eḍighi bọ Ọde phọ ạpomoghian ni Mọony phọ ọdi kụ raḍeenaan ghan nyọdi oomo phọ ịpe ọdi raḍighi ghan bọ. Ọde phọ kaḍeenaan ni nyọdi rạraar dị epu ịphen phọ mọ aḍighi, kụ oomo phọ anyina keekia ni.

²¹ Ịdipho Ọde phọ raḅerion ghan bọ ni bụlo momuughu kạngooghi ghuḍum, kụ ẹdi Ọony phọ kạngo ghuḍum bụlo ẹḅeeraan nyọdi ọngo.

²² Ọde phọ oye ọoruen rásophonaan ghan. Ọdi mạngo Mọony phọ ọdi oomo ịikpo oogboom ịiruen,

²³ pịdi oomo awe phọ ọlogh eghuan Mọony phọ, ịdipho bịdi ọlogh bọ Ọde phọ. Kụ oye lọ ụ́logh eghuan Mọony phọ, pọ mamuton eephoogh Ọde phọ ọpo arom bọ Mọony phọ.

²⁴ “Mị ạkar rịḅeni ghan inyina mọ ọpo ụnaghanan bọ ịmi kụ ameeraam nyọpo urom bọ ịmi, pọ mạmoogh ghuḍum kꞌagee-pọ, kụ kósoph ịiruen opume nyọdi. Ọdi mạḅeeny ẹku aḍuugh aḍigh ẹku aghuḍum.

²⁵ Mị ạkar rịḅeni ghan inyina mọ amem retu ni, kụ mẹteeny ni, dị bụphe momuughu bọ kọnaghanan ni ẹḍogh Ọony phọ Ẹnaan, kụ bụphe ọnaghanan bọ kọmoogh ni ghuḍum.

²⁶ Ịdipho Ọde phọ rꞌaloor ọdi kụ aḍighi bọ zin aghuḍum mọ kụ ịdi ọdi maḍighi aani Mọony phọ Ọdi zin aghuḍum rꞌaloor ọdi.

²⁷ Ạḅile kẹn ạngo nyọdi ịikpo oogboom ịiruen, ịdi eḍighi bọ ọdi kụ Ọony phọ Oye.

²⁸ Ịphen phọ kíḍighi iikia: amem retu ni, dị bụphe odi bọ pạ ariiḍi phọ kọnaghanan ni ẹḍogh ọdi

²⁹ kụ ọḍua sịphe ariiḍi phọ ạbidi omiteghu. Bụlo oḍighi ghan igey koḅerion ni ọmoogh ghuḍum, kụ bụphe oḍighi ghan bọ ịkaraph phọ, koḅerion ni kụ osoph ịiruen opume.”

Ịdi ẹmeera bọ rẹgbaanaan Jịzos

³⁰ “Mị útue ụda rꞌẹmhu ạmi bịn uḍighi ịyaar. Mị raagbo ghan ịiruen phọ ịpe Ẹnaan ịḅeni bọ ịmi kụ kạngo. Kụ ịiruen phọ ạmi eeleeny ni, ịdi eḍighi bọ mị rạ́wa ghan ịlo ạmi; mị rạwa ghan ghụn ịpe ẹḅeeraan bọ nyọpo urom bọ ịmi.

³¹ “Ịlo mị ạgbaanaan loor ạmi, kómeeraam mọ ịne phọ ni.

³² Ọnon oye odi ni dị ạmeera rụgbaanaan ịmi, kụ mị alegheri ni mọ ịpe ọdi rạkaaph bọ ịlo ạmi igey ni.

³³ Nyina irom ni ẹghiomaan Jọn, kụ ọdi mụgbaanaan ịmi igey phọ.

³⁴ Ọbo ị́kpaariom mọ mị ụ́moogh oye dị kụgbaanaan ịmi pọ íten, kụ mị ụtuan mọ ịmoogh pẹleeny kụ mị rạkaaph bọ ịduon phọ.

³⁵ ẠJon phọ ạghigh ọtozi dị raamor kạngo ḍịḅaal; kụ nyina imeeraam ni ẹrol mọony ẹnum amem eboh iboh sịphe ạḍiḅaal phọ ọdi.

³⁶ Kụ ạraraar edi ni dị ẹmeera rịgbaanaan ịmi kepu ịpe ạJon ạghaaph bọ: iiḍighi phọ Ọde phọ ụḅeni bọ ịmi mọ ḍighi phọ kụ mị raḍighi bọ, rịgbaanaan ni ịmi keḍeenaan mọ Ọde phọ kụ urom ni ịmi.

³⁷ Kụ Ọde phọ urom bọ ịmi rụgbaanaan kẹn ni ịmi. Nyina ẹḍogh ọdi kẹ̋naghan ghan, ḅịle kẹn nyina nyọdi kẹ̋miin ghan ekpeḍien.

³⁸ Nyina íseere ọghaaph phọ ọdi iloghi phọ anyina, ịdi eḍighi bọ nyina ímeeraam nyọpo ọdi arom bọ.

³⁹ Nyina rẹeḅeghion ghan Ḍịnya Iigbia phọ kephogh, ịdi eḍighi bọ nyina regbi ghan mọ ịpa kụ ẹdi nyina kẹmoogh ghuḍum kꞌagee-pọ phọ. Ọkar igey ni, Ạḍinya Iigbia phọ rịgbaanaan ni ịmi.

⁴⁰ Kụ nyina ímeera itu ịteeny ịmi ịlo ọmoogh aghuḍum.

⁴¹ “Mị rạ́wa ghan ḍịseph awe.

⁴² Kụ mị ilegheri ni inyina mọ iloghi phọ anyina Ẹnaan ị́pomoghian.

⁴³ Mị ughol ḍien Ọde phọ ạmi kụ aru bọ, kụ nyina ịmi ị́sighe bọ. Ọnon oye lọ ạda ẹmhu kụ aru kụ ọdi nyina kẹsighe.

⁴⁴ Ịḅeeraan ni inyina dị oniin rakueni ghan ni nyoniin, kụ nyina rẹ́wa ghan ọmoogh eghuan kꞌEgina phọ Ẹnaan. Nyina kemeeraam bọ ika?

⁴⁵ Kégbi mọ mị kụ kạgbaaghi rạraar ạḅam ẹmhu anyina ghisigh Ọde phọ. AMozis phọ nyina eḍuom bọ ologhi phọ kụ kạgbaaghi rạraar ạḅam ẹmhu anyina.

⁴⁶ Mọ nyina ịkar ri emeeraam Mozis, nyina mimeeraam aani ni ịmi, ịdi eḍighi bọ ọdi ạge ni ịlo ạmi.

⁴⁷ Kụ ịdipho nyina ímeeraam bọ ịpe ọdi ạge bọ, nyina kemeeraam bọ ika ọghaaph phọ ạmi?”