Elegh ạJon 13 - Ạḍinya Iigbia

ẠJizos aatol ruwol ạbumatuan phọ ọdi

¹ Tụtu kẹteeny bọ mem olhe ẹyaal ọphel otene phọ, ạJizos alegheri ni mọ amem mọ mẹteeny dị ọno kạḍua sịen aḅirini phọ akeel kꞌỌde phọ. Ọdi ạpomoghian ni bụphe oḍighi bọ bụo ọdi sịen aḅirini phọ asiemi eekuna.

² ẠJizos rꞌạbumatuan phọ ule ghan eḍien adulhe. Eru meḍigh ni ologhi aJudas Ịskariot ọony phọ aSaimon, etene igbaany rẹkpaariom ghan mọ ọdi aal Jịzos.

³ ẠJizos malhegheri mọ Ọde phọ mạsighe oomo ạraraar ạlogh rạghaagh ọno, ḅịle mọ ọno ạḍua kꞌẸnaan kụ aru, kụ kakeel kꞌẸnaan.

⁴ Kụ ọdi ạwile eḍien phọ aḅetenu, kụ ạkporonaan ạsuoma phọ ọdi kụ ạsighe ukpe-ạmuum akuugha esin ọdi

⁵ kụ ạsagharan mụum ologhi ạgbagba, kụ amiigh ootol aruwol ạbumatuan phọ ọdi, kụ ạsighe ukpe-ạmuum mọ ọdi akuugha bọ esin phọ agbuuroghom bịdi.

⁶ Kụ ọdi ạteeny Saimon Pita, kụ aPita ạḅeni nyọdi mọ, “Ọmoogh-we, nạ kụ ụḅile raatol ruwol ạmi?”

⁷ Kụ ạJizos ạḅeni nyọdi mọ, “Nyịidipho nạ ólhegheri ẹmhu ịphen phọ mị raḍighi bọ, kụ mem dị retu nạ kalegheri ni.”

⁸ Kụ aPita mọ, “Ọmoogh-we, mị úmeera rꞌamem rꞌamem mọ nạ kụ kạḅile aatol ruwol ạmi.” Kụ ạJizos mọ, “Eḍighi ịyaar dị mị nyịna úutol, nạ rꞌạmi kọ́ḅoph mun oghuugh.”

⁹ Kụ aSaimon Pita mọ, “Ọmoogh-we, eḍighi ịduon phọ, pọ káruwol ạmi bịn, ḅạram ni rạghaagh ạmi rꞌẹmhu ạmi.”

¹⁰ Kụ ạJizos ạḅeni mọ, “Ọpo mootol bọ mạḅaal li ạman. Kọḅile ootol ruwol phọ ọdi bịn. Kụ nyina ẹḅaal li, emuton nyoniin.”

¹¹ ẠJizos malhegheri ni nyọpo kabool bọ nyọdi atene igbaany, kụ ạtu bọ ạloghom mọ, “Oomo phọ anyina ẹḅaal li, omuton nyoniin.”

¹² Rootologh bọ ruwol phọ ạbidi rọman, kụ ạJizos ạsighe ạsuoma phọ ọdi ạkpologhian, kụ ạḅile ạrol ude, kụ apuru bịdi mọ, “Nyina melhegheri ẹmhu ịphen phọ mị iḍighi bọ inyina ḍụghum?

¹³ Nyina rịmagh ghan ni ịmi mọ Ọtughemia rꞌỌmoogh-we, kụ ẹkpianaan ni ịduon phọ, ịdi eḍighi bọ mị ạman ni.

¹⁴ Mị kụ Ọmoogh-we phọ rꞌỌtughemia phọ anyina ni kụ mị maatol ruwol anyina, ẹkpianaan ni dị tọrobo ọnyo anyina kaatol aani ghan ruwol ọphori phọ.

¹⁵ Mị mịngo inyina ịyaar ọmaam ghan mọ iḍighi ghan ịphen mị iḍighi bọ inyina.

¹⁶ Mị ạkar rịḅeni ghan inyina mọ ẹbene rápu ghan ọde-otu phọ ọdi, ḅịle kẹn ọokpaany rápu ghan uwo adom mọ.

¹⁷ Sịen nyina melhegheri bọ rạraar phọ ịphen, iboh kꞌẸnaan kịrolonaan ni inyina eḍighi ịyaar dị nyina keḍighi ni.

¹⁸ “Ịphen phọ mị rạ́kaaphaan oomo phọ anyina. Mị alegheri ni bụphe mị mạsaḅar bọ. Kụ ọlo ịpe ọge bọ pạ ạḍinya iigbia phọ kemite ni emuneen mọ, ‘Oye phọ ale ni eḍien phọ ạmi ạayom ẹkpa phọ.’

¹⁹ Mị rịḅeni ni inyina ịphen phọ nyịidipho kụ egbi omite, pịdi mem lọ emite, nyina emeeraam mọ ‘Mị odi ni ịdipho mị odi bọ.’

²⁰ Mị ạkar rịḅeni ghan inyina mọ oye lọ ạloghoma tọrobo oye lọ mị arom, pọ mụloghoma kẹn ni ịmi. Kụ oye lọ ụloghoma ịmi, pọ mạlhoghoma kẹn ni nyọpo urom bọ ịmi.”

ẠJizos ạḅem mọ kọparanaan ni nyịno

²¹ ẠJizos ạghaaph bọ ịphen phọ, ịiḅaghami ni uwaloor ọdi iboom kụ ọdi ạghaaph amitiom mọ, “Mị ạkar rịḅeni ghan inyina mọ oniin ọnyo anyina kaal li ịmi.”

²² Kụ ạbumatuan phọ ọdi ụ́kar ulegheri oye phọ dị ạtu bọ kụ rạḅem ghan bọ ịduon phọ, kụ oniin akiton aphogh nyoniin.

²³ Kụ oniin ọnyo ạbidi ọpo ạJizos ạphomoghian bọ iboom mọ ạrol atuman kụ ạbedenom ekpologhi ọdi.

²⁴ Kụ aSaimon Pita ạyapha nyọdi mọ apuru Jịzos ọkar oye phọ dị rạkaaphaan bọ nyọon phọ.

²⁵ Kụ ạmatuan phọ ọpo aḍuraan ạteeny Jịzos kụ apuru mọ, “Ọmoogh-we, ạnhian kụ ẹdi nạ rạkaaphaan ghan bọ ịphen phọ?”

²⁶ Kụ ạJizos mọ, “Oye lọ mị atiom eḍien mooboph kụ ạngo, pọ ọpo kụ ọdi phọ.” Kụ ọdi ạsighe ọpherepe ạbred atiom kụ ạngo Judas Ịskariot ọony phọ aSaimon.

²⁷ Kụ rạar ạbred phọ, kụ aSetan aḍigh ẹmhu ọdi. Kụ ạJizos ạḅeni nyọdi mọ, “Kem aḍighi ịpe nạ kaḍighi bọ.”

²⁸ Rꞌoniin ọnyo ạbuphe role bọ eḍien phọ dị alegheri ẹmhu ịphen ạJizos ạḅeni bọ nyọdi ọ́rol.

²⁹ Buniin ạbidi ugbi mọ, ịdipho aJudas kụ rạpam ghan bọ okuru ikpoki phọ, mọ pọ ạJizos ạḅeni ghan nyọdi mọ ạghi agho rạraar phọ ịpe bịdi koliom bọ ile ẹyaal phọ, mụghumo ọdi ạghi ạngooghi ikpoki rukulom.

Omoom ologh phọ

³⁰ AJudas rạar bọ ạbred phọ kụ aagborion amite erugh. Aḍughul meghul li.

³¹ Mem dị aJudas mạḍua, kụ ạJizos ạḅem mọ, “Nyịidipho mogananami eghuan Ọony phọ Oye. Nyịidipho Ẹnaan mẹtuan nyọdi egananami eghuan phọ ọdi.

³² Ịdipho Ẹnaan mẹtuan bọ nyọdi egananami eghuan phọ ọdi, Ẹnaan rꞌaloor ọdi kẹn kegananami ni eghuan Ọony phọ Oye, kụ kẹnuun ni eḍighi.

³³ Nmụny ạmi, mị rꞌanyina kẹ́tolan mun ebia. Nyina kịwa ni ịmi. Kụ ịdipho mị ạḅeni bọ bụo aJu phọ kụ ịdi mị rịḅeni aani inyina mọ ẹpe mị rạki bọ nyina kétue ẹki aani.

³⁴ Omoom ologh dị mị ạlogh rịngo inyina: oniin ạphomoghian ghan nyoniin! Ịdipho mị mịphomoghian bọ inyina kụ ịdi tọrobo ọnyo anyina kạpomoghian nyọori phọ.

³⁵ Oniin ạphomoghian ghan nyoniin kụ oomo awe olegheriom mọ nyina kụ ạbumatuan phọ ạmi ni.”

ẠJizos ạḅem mọ aPita kạparanaan ni nyịno

³⁶ Kụ aSaimon Pita apuru nyọdi mọ, “Ọmoogh-we, nạ rạki ẹghen?” Kụ ạJizos mọ, “Ẹpe mị rạki bọ nạ kátue ụdaph ịmi nyịidipho, kụ onyebel aten kụ agbi ọdaph ạmi.”

³⁷ Kụ aPita apuru nyọdi mọ, “Ọmoogh-we, uḍighi ika kụ mị kátue bọ ạdaph nyịna nyịidipho? Mị ạnya ni ọtuan ẹmhu ạna omugh.”

³⁸ Kụ ạJizos apuru nyọdi mọ, “Nạ ạkar ri ạnya ọtuan ẹmhu ạmi omugh? Mị ạkar rạḅeni ghan nyịna mọ tụtu ạkenegh rạlaay, nạ mạpharanaan ịraar amem mọ nạ ịmi úlegheri.”