Elegh ạJon 12 - Ạḍinya Iigbia

Oniin ạnir asugh elo Jịzos ẹpe Betani

¹ Odiiny aḍughul-otu kụ isugha, ọbo mẹteeny ẹyaal ọphel otene phọ, kụ ạJizos ạghi Betani, ẹmha ạLazaros phọ ọpo ọdi aḅeton bọ sịphe aḍuugh phọ.

² Ụsaanaan ni nyọdi eḍien ẹpe phọ, kụ ạMata ạḅamaghinaan nyọdi eḍien phọ. ẠLazaros aḍighi ni oniin ọnyo ạbuphe ọrologhu bọ olhe aani eḍien phọ.

³ Kụ aMeri ạsighe koto elo eeḅi eḍu, dị ẹman iboom ikpoki, kụ asugh rạda aruwol phọ ạJizos, kụ ạsighe sịlaal ọdi agbuuroghom. Kụ eeḅi eḍu elo phọ ẹghugh otu phọ.

⁴ Kụ oniin ọnyo ạbumatuan phọ ạJizos, dị oghol mọ aJudas Ịskariot, ọpo kabool bọ ni nyọdi, apuru mọ,

⁵ “Uḍighi ika kụ úbool bọ elo phọ ẹphen ịraar okuron ipoḍi asilva ụsighe uḍighinom iiḅi rukulom?”

⁶ Ọdi ọ́tuan dị ọdi ạmaghami ịyaar rukulom mọ kụ ạghaaph bọ ịphen phọ, ạtuan ịdipho ọdi aḍighi bọ ọḅa phọ, kụ rạpam ghan bọ okuru ikpoki phọ kamiighi ghan iniin.

⁷ Kụ ạJizos ạḅem mọ, “Kpọrion ạnir phọ ọphon rạghaagh. Ọdi aḍighi ịphen phọ ookolobian okoriom aḍio phọ kuḍi bọ ịmi.

⁸ Nyina rꞌarukulom mọ edianaan ghan ni oomo amem, kụ mị rꞌanyina kẹ́tolan oomo amem.”

Omitenom Lạzaros ẹkaraph ezue

⁹ Aḍiboom aḍita ạbuo aJu phọ ụnaghan ni mọ ạJizos odi ẹpe phọ, kụ bịdi ụ́tuan nyọdi bịn kụ ọghi bọ, ụwa ghan ọmiin aani ạLazaros phọ ọpo ạJizos aḅeton bọ sịphe aḍuugh phọ.

¹⁰ Loor ịphen phọ, ạbuo ạrumhu ariil ạrikia phọ uusophoghian ni Lạzaros oghiigh aani,

¹¹ ịdi eḍighi bọ ịbadi ạbuo aJu phọ mọtuan nyọdi ọḍuaghu rọki omeeraam aani ạJizos.

Ọsaram Jịzos osiemi Jeruselem

¹² Ḍịeri phọ aḍio phọ, aḍita awe phọ oru bọ Jeruselem olhe ẹyaal phọ ụnaghan ni mọ ạJizos ratu.

¹³ Kụ ọsighe ịghiriki ịriir ọghimom ozuan ọdi, kụ ọlooghi mọ, “Iboom ni Ẹnaan. Ẹnaan ẹseph ni nyọon phọ ratumom bọ ḍien Ọmoogh-we phọ! Ẹnaan ẹseph ni ọdaam ẹmha phọ Ịzirel!”

¹⁴ Kụ ạJizos ạmiin ẹnam adool kụ aḍigh, ịdipho ạḍinya iigbia phọ ẹḅem bọ mọ,

¹⁵ “We phọ ạZayon, kékiilaan. Ọdaam ẹmha phọ anyina maḍigh ẹnam adool asi sịen ratu kꞌanyina.”

¹⁶ Mem mọ ạmuen ạbumatuan phọ ọdi úlegheri ẹmhu ịphen phọ, kụ mem mọ mophophe bọ Jịzos oghueni, bịdi ụutughian ni mọ ọge ni ịphen phọ ịlo ọdi, kụ mọ ạbuno moḍighinaan nyọdi ịphen phọ.

¹⁷ Awe phọ ọrolan bọ rꞌạJizos mem mọ ọpo ọdi ạmagh bọ Lạzaros amitiom pạ oḍi phọ kụ aḅeton bọ nyọdi sịphe aḍuugh phọ ụghaaph ghan ni ịlo ọdi.

¹⁸ Ịiḍaany phọ ịphen phọ bịdi mọnaghan bọ mọ ọdi aḍighi bọ kụ ẹmhu ịyaar phọ awe phọ ọtuan bọ ọghi ọsaram nyọdi.

¹⁹ Kụ aFarisi phọ, oniin ạḅeni ghan nyoniin mọ, “Ịmiin, ẹmhu ílho ịphen yira roḍighi bọ. Oomo aḅirini phọ mụwile iyira rọdaph nyọdi.”

Buniin ạbuo aGris ọwa ghan Jịzos

²⁰ Sịphe ạbuphe ọghi bọ Jeruselem ooseeny Ẹnaan mem ẹyaal phọ, buniin ạbuo aGris ụrol aani ni.

²¹ Bụen phọ ụghi ni ọteeny Filip phọ ọpo aBetsaida eelhe phọ aGalili, kụ ọḅeni mọ, “Oye phọ, yoor rọwa ọmiin ạJizos.”

²² Kụ aFilip ạghi ạḅeni Ạndru, kụ ịyal phọ ạbidi ọghi ọḅeni Jịzos.

²³ Kụ ạJizos mọ, “Amem mọ mẹteeny dị kọngo Mọony phọ Oye eboom eghuan.

²⁴ Mị ạkar rịḅeni ghan inyina mọ ekpo ọbiakpa répel ghan nyeniin emuton lọ emeel ude kụ emugh ẹḅor. Kụ remugh rẹḅor kụ egbi omitiom ịnon ịbadi ikpo.

²⁵ Ọpo ạphomoghian bọ ghuḍum mọ ọdi kapiemi ni, kụ ọpo ụmaghami bọ ịyaar ghuḍum mọ ọdi sịen aḅirini phọ ọphon kaseerian ni ọmooghom aghuḍum kꞌagee-pọ phọ.

²⁶ Oye lọ rạwa oḍighi oḍighi ọngo ạmi ụdaph ghan ịmi! Kụ ẹpe mị odi bọ kụ ẹdi ọdi kạtol aani. Oye lọ aḍighi oḍighi ụngo ịmi, Ọde phọ ạmi kakueni ni.”

ẠJizos ạkaaph akol ḍuugh phọ ọdi

²⁷ “Kụ nyịidipho ologhi ạmi rụuḅaghami ni ịmi, kụ mịna kạkaaph eeghe? Mị ụḅem mọ, ‘Ọde, kámeera mọ amem mọ ạmuen ịteeny ịmi’? Kụ mị ụtuan ghụn ọmiinom ịminimiin phọ ịphen kụ aru bọ.

²⁸ Ọde, kueni ni ḍien phọ ạna.” Kụ ẹḍogh ẹḍua kꞌạke kụ ẹḅem mọ, “Mị maghueni ni ḍien phọ ạmi, kụ mị kạḅile kẹn ni akueni.”

²⁹ Kụ awe phọ ọmeregha bọ sịphe phọ ụnaghan ni ẹḍogh phọ kụ ọḅem mọ, “Ọomaany kụ rạtaphan.” Kụ ạbunon ọḅem mọ, “Ọokpaany Ẹnaan kụ ạḅaanaan nyọdi.”

³⁰ Kụ ạJizos mọ, “Ẹḍogh phọ ẹphen phọ ịmi ị́tuan, ịtuan inyina kụ ẹḅa bọ.

³¹ Mụen kụ amem ịiruen aḅirini phọ. Ạnyiidipho kụ ẹdi kọsighe bọ ọdaam aḅirini phọ otoph.

³² Kụ mem mọ kuphoophe bọ ịmi sịen ade phọ, mị kaḍur ri oomo awe asiemi loor ạmi.”

³³ Ọdi ạḅem ịduon oḍeenaan ọdo phọ aḍuugh phọ dị kamugh bọ.

³⁴ Kụ awe phọ ọphagharanaan mọ, “Iilogh phọ ayoor rẹḅem ghan mọ aMesaya phọ kạtol li kꞌagee-pọ. Nạ ụḅile rạḅem ghan ika mọ kopoophe ni Mọony phọ Oye? Ọony phọ Oye phọ ạnhian?”

³⁵ Kụ ạJizos mọ, “Esugha mọony amem bịn ạḍiḅaal phọ kẹ́tol mun sịphe ogbo phọ anyina. Ịmaar erelhe sịen nyina ẹmoogh bọ ḍịḅaal phọ, ọbo ufiri phọ kiikpereghiom ghan bọ inyina, ịdi eḍighi bọ oye lọ ratelhe esi ufiri rálegheri ghan ekpisi lọ ọdi rạki.

³⁶ Imeeraam ḍịḅaal phọ sịen nyina ẹmoogh bọ, pịdi nyina eḍighi weye ạḍiḅaal.” ẠJizos rọghaaph rạraar phọ ịphen kụ ạwile we phọ ạghi ạaghian.

Emeeraam ạbuo aJu phọ

³⁷ Ghạlamo ịdipho ọdi maḍighi bọ ni ịbadi ịiḍaany ghisigh ạbidi, bịdi nyọdi úmeeraam ni,

³⁸ pịdi omuneniom ịpe Azaya oyil phọ Ẹnaan ạḅem bọ mọ, “Ọmoogh-we, ạnhian kụ mameeraam dom mọ yoor ọpham bọ orumom? Esi ạnhian kụ ẹdi mogananami oḍeenaan ịikpo Ọmoogh-we phọ?”

³⁹ Ịduon kụ iḍighi kụ bịdi útue umeeraam, ịdipho Azaya ạḅile bọ ni ạḅem, mọ:

⁴⁰ “Ọdi mapuki riḍien ạbidi ọbo bịdi kọmiin ghan bọ eten. Ạḅile akughi iloghi phọ ạbidi ọbo bịdi kolegheri ghan bọ ịyaar, ọḅile okiton usoman ịmi pịdi mị aakonom bịdi.”

⁴¹ Azaya ạghaaph ịduon phọ, ịdi eḍighi bọ ọdi ạmiin ni eghuan phọ ạJizos, kụ ạghaaph bọ ịlo ọdi.

⁴² Epel ịphen phọ, ịbadi ạbuo ạrumhu phọ umeeraam ni nyọdi, kụ ọrol ghan ịisoku, ọbo aFarisi phọ koporogh ghan bọ bịdi sịphe obughotu ịiḅereghi phọ.

⁴³ Bịdi ụphomoghian ḍịseph awe opuemi ḍịphe Ẹnaan kẹngo bọ.

Kọsighe ọghaaph phọ ạJizos kụ osophom ịiruen akeel rꞌapum ọngo we

⁴⁴ Kụ ạJizos ạlho rꞌeboom ẹḍogh kụ ạḅem mọ, “Oye lọ umeeraam ịmi mameeraam aani ni nyọpo urom bọ ịmi.

⁴⁵ Oye lọ ụmiin ịmi pọ mạmiin aani ni nyọpo urom bọ ịmi.

⁴⁶ Mị kụ ạḍiḅaal phọ eru bọ sịen aḅirini phọ, mọ tọrobo oye lọ umeeraam ịmi kútelhe mun esi ufiri.

⁴⁷ Oye lọ ạnaghan ikpo ọnhu phọ ạmi kụ úḍighi ịpe mị ạḅem bọ, mị kásoph ịiruen ạngo nyọdi. Mị útu oogbo ịiruen ọngo aḅirini phọ, mị uru ghụn ọphel aḅirini phọ.

⁴⁸ Oye lọ ughel ịmi kụ ụ́sighe ikpo ọnhu phọ ạmi ụmaghami ịyaar pọ ịyaar dị kesophonaan nyọdi ọoruen edi ni: ọghaaph phọ mị mạghaaph bọ kụ kasoph ọoruen ạngo nyọdi ruukuna phọ.

⁴⁹ Mị kọ̋sighe ghan ịikpo ạmi bịn ọghaaphom. Ọde phọ urom bọ ịmi kụ ạto ụḅeni ịmi ịpe mị kạkaaph bọ.

⁵⁰ Kụ mị alegheri ni mọ aghuḍum kꞌagee-pọ rạdaph ghan ooko ghan ịtooghi phọ ọdi. Kụ ịpe mị rạkaaph bọ kụ ịdi Ọde phọ ụḅeni bọ ịmi mọ kạaph ghan phọ.”