Ẹḍua 40 - Ạḍinya Iigbia

Ọmeremi ọḅile odeneghi Ogbogo Ạdol Ọmoogh-we phọ

¹ Ọmoogh-we phọ ạḅeni Mozis mọ,

² “Ḍịḅel aḍio ọḅel ụnwanyu phọ mẹremi Ogbogo Ạdol Ọmoogh-we phọ.

³ Lọgh sịphe Ogbogo phọ Igbe Ịyo phọ ịpe ọlogh bọ ḍioph phọ iilogh phọ kụ ạkpo ukpe phọ ẹpe arisigh phọ.

⁴ Sịghe ịdaabili phọ ạlogh kụ ạḅamaghi rạraar phọ ọdi. Ḅịle kẹn ạlogh ọmeremiom ọtozi phọ kụ ạmeremi yogh ịtozi phọ ọdi.

⁵ Kạn enmeny agol phọ ọḅam ghan ịnsens ẹpe arisigh Igbe Ịyo phọ ạḅile ạkpo ukpe phọ sịphe ọnhu-aḍibuo Ogbogo phọ.

⁶ Kạn enmeny dị kịpighironom ghan ẹkia ạnian phọ ẹpe arisigh Ogbogo phọ.

⁷ Seere gbạgba ootolaam ạraghaagh phọ igbo Ogbogo phọ rꞌenmeny phọ kụ ạlogh mụum amuzeḍi.

⁸ Koony oghoony akitonom kụ ạkpo ukpe sịphe ọnhu-aḍibuo phọ.

⁹ “Sịghe nụun mụnum iigbia phọ adeneghiom. Ogbogo phọ ḅịle rꞌoomo ạraraar phọ, bịn maḍighi esi iigbia.

¹⁰ Sịghe kẹn mụnum mọ aaḍuom adeneghiom enmeny phọ rꞌoomo ạraraar phọ, bịn meten ịyaar iigbia ẹmadan.

¹¹ Deneghi kẹn ni ạgbagba ootolaam ạraghaagh phọ rꞌesi ọḅam mọ iniin phọ eḍighinom mọ.

¹² “Sịghe Eeron rꞌạnmuny phọ ọdi aru sịphe ọnhu-aḍibuo Ogbogo phọ, kụ ạḅeni bịdi mowura mụum ịko phọ.

¹³ Sịghe ibura ariil ạrikia phọ aanmenemi Eeron, aadu nyọdi mụnum, bịn mọgbatan nyọdi ọḅogh ọngo, pịdi ọdi ukumu ghan ịmi ịdipho oyil ạrikia.

¹⁴ Sịghe nmụny phọ ọdi aru ạkpologhi rụsuoma phọ.

¹⁵ Kụ aadu bịdi mụnum mọ ịdipho nạ aadu bọ ọde phọ ạbidi, pịdi bịdi ukumu ịmi ịdipho ariil ạrikia. Eeduom mọ ẹphen ketene bịdi riil ạrikia kꞌagee-pọ.”

¹⁶ AMozis aḍighi ni tọrotoro ịyaar ịdipho Ọmoogh-we phọ mạto bọ.

¹⁷ Kụ iḍighi kụ ḍịḅel aḍio ụnwanyu ạlha dị emuneniom ịyal mem mọ bịdi mọḍua bọ Ijipt, bịdi ọmeremi Ogbogo Ạdol Ọmoogh-we phọ.

¹⁸ AMozis ạmaar asereghi ẹpe ude phọ, ạmeremi yogh ịḅagham mọ, atulughiom igbonoghineen phọ, ạḅile agimi rọko phọ.

¹⁹ Ọdi ạatarion nyọpo ozuom bọ Ogbogo phọ, kụ ạḅile azuom nyọpo ạnyu phọ, ạtuugh ịdipho Ọmoogh-we phọ mạto bọ.

²⁰ Kụ ọdi agbi nụun ọsighe ịyal ịdaabili aḍighiigh phọ ọlogh bọ ịsiphe Igbe Ịyo phọ. Kụ ọdi aḅughe riisi ọpham mọ sịphe ịkoro Igbe Ịyo phọ kụ ạsighe ekpereghi phọ aakpereghiom.

²¹ Kụ ọdi ạsighe Igbe Ịyo phọ ạlogh sịphe Ogbogo phọ kụ ạḅile ạkpo ukpe phọ asophom Igbe Ịyo phọ, ạtuugh ịdipho Ọmoogh-we phọ mạto bọ.

²² Ọdi ạsighe ni ịdaabili phọ ạlogh sịphe Ogbogo phọ, ạga ephunom mọ ẹpe ọkpo bọ ukpe phọ osophom mọ,

²³ kụ ọdi ạḅam sịphe ịdaabili phọ ạbred iisua Ọmoogh-we phọ, ạtuugh ịdipho Ọmoogh-we phọ mạto bọ.

²⁴ Ọdi ạlogh ọmeremiom ọtozi phọ sịphe Ogbogo phọ, ạga esoorom mọ, ẹḅeenyom ịdaabili phọ,

²⁵ kụ sịphe Ogbogo Ạdol Ọmoogh-we phọ ọdi ạsuughi ịtozi phọ, ạtuugh ịdipho Ọmoogh-we phọ mạto bọ.

²⁶ Ọdi ạsighe enmeny agol phọ ạlogh sịphe Ogbogo phọ, ẹpe ọkpo bọ ukpe phọ osophom mọ,

²⁷ kụ ạsu ịnsens eeḅi eḍu phọ, ạtuugh ịdipho Ọmoogh-we phọ mạto bọ.

²⁸ Ọdi ạkpo ukpe sịphe ọnhu-aḍibuo Ogbogo phọ,

²⁹ kụ sịphe ọkpo bọ ukpe phọ osophom mọ ọdi aseere enmeny dị kọpinyon ghan rịkia ạnian phọ. Ịsien kụ ẹdi ọdi ạphighiron ẹkia oguom ạnian ḅịle rꞌẹkia ịbiakpa phọ, ạtuugh ịdipho Ọmoogh-we phọ mạto bọ.

³⁰ Ọdi aseere gbạgba ootolaam ạraghaagh phọ igbo Ogbogo phọ rꞌenmeny phọ kụ amuzeḍi mụum.

³¹ AMozis, Eeron rꞌạnmuny phọ ọdi ootola ghan rạghaagh rꞌaruwol ạbidi sịphe

³² tọrotoro amem lọ bịdi oḍigh Ogbogo phọ mụghumo otuman enmeny phọ, ọtuugh ịdipho Ọmoogh-we phọ mạto bọ.

³³ AMozis aghoony oghoony phọ akitonom Ogbogo phọ rꞌenmeny phọ kụ ạkpo ukpe phọ sịphe ọnhu-aḍibuo oghoony phọ. Bịn ọdi ạmadan oomo oḍighi phọ.

Ọotu aakpereghiom Ogbogo Ạdol Ọmoogh-we phọ

³⁴ Pọ kụ amem dị ọotu aakpereghiom Ogbogo phọ kụ ạḍinmananmana ạḍiḅaal kꞌỌmoogh-we phọ emuza sịphe phọ.

³⁵ Loor esi ịphen phọ aMozis órue óḍigh Ogbogo phọ.

³⁶ Awe phọ Ịzirel uḍur ghan rugbogo amarugh phọ ạbidi ọghi ẹnon esi mem lọ ọotu phọ aphooph ạnyu Ogbogo Ọmoogh-we phọ.

³⁷ Eḍighi mạar lọ ọotu phọ ạrol li ạnyu Ogbogo phọ bịdi únme ghan dọl phọ ạbidi.

³⁸ Esi oomo erelhe phọ ạbidi, bịdi ụmiin ghan ni ọotu kꞌỌmoogh-we phọ ạnyu Ogbogo phọ ootaany ḅịle nịan dị reemor pạ phọ ḍughul.