Ẹḍua 39 - Ạḍinya Iigbia

Ịdi ọkol ibura ariil ạrikia phọ

¹ Bịdi ụsighe abiloogh, oodor, ḅịle rꞌọtogh-tọgh ogbidagbida ukpe kụ ọkolom bọ ibura ariil ạrikia phọ konmenaan ghan bọ mem lọ bịdi rokumu sịphe Ạdol Iigbia Ọmoogh-we phọ. Bịdi ụkolonaan Eeron ibura oyil abiil phọ ịdipho Ọmoogh-we phọ mạto bọ ạngo Mozis.

² Bịdi ụkolom ạsuoma iikpera ạraghaagh phọ ịma ọyegheyeghe ukpe; abiloogh, oodor, ḅịle rꞌọtogh-tọgh ogbidagbida ukpe; ḅịle rꞌiri agol.

³ Bịdi ụsighe gol kụ ọgurogh ọpeḅeremi kụ ọkonyon ịikoronu kụ oodoghoḍiom ọyegheyeghe ukpe phọ ḅịle rꞌabiloogh, oodor, rꞌọtogh-tọgh ogbidagbida ukpe phọ.

⁴ Bịdi ụkol ịyal ịkpapham ọpha kụ ọlogh ịigaany ạsuoma iikpera ạraghaagh phọ, pịdi otue ghan ọlogh okuughaam.

⁵ Ịma okuughaam mọ ọpo oloom bọ oniin phọ ukpe phọ kụ ẹdi ọkolom ạsuoma iikpera ạraghaagh phọ ịdipho Ọmoogh-we phọ ạto bọ ạngo Mozis.

⁶ Bịdi ụsighe ikpo ẹbe phọ kụ ọdamaghi ạnyu agol; kụ ọmaar ọgeeghiom siḍien aḍioph rꞌịyal ạnmuny phọ ạJekob.

⁷ Kụ bịdi ọsighe ọkpaghaghi rụpha ạsuoma iikpera ạraghaagh phọ mọ ẹmeera enye aḍioph rꞌịyal arughunughun phọ Ịzirel, ọtuugh ịdipho Ọmoogh-we phọ mạto bọ ạngo Mozis.

Ịlo ọkol ọsuaram ekpologhi

⁸ Bịdi ụsighe iniin phọ arukpe phọ ọkolom bọ ạsuoma iikpera ạraghaagh phọ kụ ọkolom aani bọ ọsuaram ekpologhi phọ, ọḅile olho eniin phọ elhoom mọ.

⁹ Inya phọ aruukuna phọ iileeny ni kụ okpo ịyal amem, 22 ẹkulom ạḍighaagh ḍịdoony ḅịle 22 ẹkulom ạḍighaagh ḍịregh.

¹⁰ Bịdi ọkool inya ạsikool ịikia ạrana ạnyu phọ; ḍịḅel ạḍikool phọ bịdi ụḅam rubi, topaz rꞌaganet;

¹¹ ḍịkool dị emuneniom ịyal iḍighi ẹmerald, sạfair rꞌạdayamon;

¹² ḍịkool dị emuneniom ịraar eḍighi tọkuos, ạget rꞌametist;

¹³ ḍịkool dị emuneniom inya eḍighi bẹril, ikpo ẹbe rꞌạjaspa. Ịphen phọ ụdamaghiom ghan ạnyu agol.

¹⁴ Ạnyu ạtorotoro eekia ẹna phọ esi aḍioph rꞌịyal phọ ụge ghan ḍien oniin ọony phọ ạJekob, pịdi ẹmeera enye aḍioph rꞌịyal arughunughun phọ Ịzirel.

¹⁵ Bịdi ụsighe ogey agol kụ ọkpa ịdipho oḍigh kụ oḍighinaan ọsuaram ekpologhi phọ.

¹⁶ Bịdi ọsighe gol kụ ọlemom ịyal aradama rꞌịyal ịkomom kụ ọsighe ịyal phọ ịkomom mọ ọkpo ẹpe aruukuna ạnyu ọsuaram ekpologhi phọ

¹⁷ kụ ọkpoom ịyal phọ iḍigh agol phọ ịyal phọ ịkomom mọ.

¹⁸ Kụ ọsighe ịpheri phọ ịyal aruukuna oḍigh phọ ọkpoom ịyal aradama phọ kụ ọkolom bịdi risigh ạrupha ạsuoma iikpera ạraghaagh phọ.

¹⁹ Bịdi ọsighe gol ọlhemom ịyal ịkomom dị ọkpoom ruukuna ude phọ eekuna ọpo ologhi phọ rotenom bịn ọteeny bọ ạsuoma iikpera ạraghaagh phọ.

²⁰ Bịdi ọsighe gol ọlemom ịnon ịyal ịkomom ọkpoom ude arisigh ịyal ạrupha ạsuoma iikpera ạraghaagh phọ otumeniom ḍịmaam ḅịle ịma phọ olhoneen epelom okuughaam mọ.

²¹ Ọdaphan ịdipho Ọmoogh-we phọ mạto bọ ạngo Mozis, bịdi ụsighe oḍigh dị aḍighi abiloogh ọḅar ịkomom ọsuaram ekpologhi phọ rꞌịkomom ạsuoma iikpera ạraghaagh phọ kụ ọkagh, bịn ọsuaram ekpologhi phọ ạrol ạnyu okuughaam mọ bịn ọ́katanu mun.

Ịlo ọkol ịnon ibura ariil ạrikia phọ

²² Ọodoony ạsuoma phọ ạrol bọ eeḍian ạsuoma iikpera ạraghaagh phọ aḍighi ogbidagbida abiloogh ukpe bịn.

²³ Orum ạsuoma phọ, ụmaar ri olho okitonom ịlo kạ́paaru.

^24-26 Oomo aruukuna phọ okitonom ẹpe ade phọ, bịdi ụkpooghi rughuuny ekpetughe dị oḍighinom ọyegheyeghe ukpe ḅịle rꞌạbiloogh, oodor, ḅịle rꞌọtogh-tọgh ogbidagbida ukpe kụ opelegha ghan ọkpooghi ikpo ịdeneneen agol, ọdaphan ịpe Ọmoogh-we phọ mạto bọ ạngo Mozis.

²⁷ Bịdi ụkolonaan rụsuoma phọ Eeron ḅịle rꞌạnmuny phọ ọdi

²⁸ kụ ọḅaram eghoony, ịbam aroghoony, sinika ọyegheyeghe ukpe,

²⁹ ḅịle rꞌonyoraam ọyegheyeghe ukpe, ḅịle rꞌạbiloogh, oodor, ḅịle rꞌọtogh-tọgh ogbidagbida ukpe dị ọmaar olho, ịdipho Ọmoogh-we phọ mạto bọ ạngo Mozis.

³⁰ Bịdi ụsighe ni ogey agol kụ ọgeom ịnme eḍeenaan iigbia phọ ẹḅem bọ mọ, “Mọḅogh Ọngo Ọmoogh-we phọ.”

³¹ Bịdi ọsighe ạbiloogh oḍigh kụ ọkagh ịphen phọ sịphe arisigh eghoony phọ, ịdipho Ọmoogh-we phọ mạto bọ ạngo Mozis.

Ọmadan oḍighi phọ

³² Ụmadan ni oomo phọ oḍighi phọ sịphe Ogbogo Ạdol Ọmoogh-we phọ. Awe phọ Ịzirel uḍighi ni tọrotoro ịyaar ẹdaphan ịpe Ọmoogh-we phọ mạto bọ ạngo Mozis.

³³ Bịdi ụsighe ni oruom Mozis Ogbogo phọ, rꞌoomo ịpe oselemiom bọ ologhi phọ, ịkomom ọdi, ḅịle ịḅagham mọ, ịpe ogbonoghi bọ ạnyu phọ, ạroko phọ, ịpe ade phọ;

³⁴ ekpereghi phọ ẹpe oḍighinom bọ ozu idughuna kụ ogbul bọ ọtogh-tọgh ạgba phọ; ekpereghi ẹpe oḍighinom bọ ozu ạnam mọ; ukpe ogbo phọ ọkpo bọ.

³⁵ Igbe Ịyo phọ sịphe ọlogh bọ ịdaabili aḍighiigh phọ, ariisi ọpham mọ ọdi, ḅịle rꞌekpereghi phọ;

³⁶ ịdaabili phọ ḅịle rꞌoomo ạraraar phọ ọḅamaghi bọ, ḅịle rꞌạbred iisua phọ Ẹnaan;

³⁷ ọmeremiom ọtozi agol phọ; ḅịle rꞌạmunum odoghoḍi ịtozi phọ;

³⁸ enmeny agol phọ; ạmunum-ịko phọ, ịnsens eeḅi eḍu phọ; ukpe ọkpo ghan ọnhu-aḍibuo Ogbogo phọ;

³⁹ enmeny enaba phọ rꞌeeta enaba phọ ọdi, ạrokolom ọgbanam mọ, ḅịle rꞌoomo ạraraar phọ ọdi; ạgbagba ootolaam ạraghaagh phọ ḅịle rꞌesi ọḅam mọ;

⁴⁰ arukpe ọkpooghi ẹpe osoph phọ, rꞌạroko phọ, ḅịle rꞌịpe ade phọ; ukpe ọkpo ọnhu-aḍibuo osoph phọ rꞌiḍigh phọ; ạsikan Ogbogo phọ;

⁴¹ ḅịle rꞌịikia ibura ariil ạrikia phọ kobura ghan bọ sịphe Ạdol Iigbia phọ — ibura iigbia phọ Eeron oyil ạrikia phọ rꞌạnmuny phọ ọdi.

⁴² Awe phọ Ịzirel ụtuugh ni oomo phọ oḍighi phọ ịdipho Ọmoogh-we phọ mạto bọ ạngo Mozis.

⁴³ AMozis ạaḅeghion ni tọrotoro ịyaar kụ ạmiin mọ bịdi ọtuugh ni ịpe Ọmoogh-we phọ mạto bọ kụ oḍighi. Kụ iḍighi kụ aMozis ạseph bịdi.