Ẹḍua 34 - Ạḍinya Iigbia

Omuneniom ịyal ịdaabili aḍighiigh iilogh phọ

¹ Ọmoogh-we phọ ạḅeni Mozis mọ, “Gboogbo ịyal ịdaabili aḍighiigh dị ẹghigh ịḅel phọ. Mị kạge sịphe phọ ikpo ọnhu phọ mị ạge bọ sịphe ịḅel ịpe nạ awunughi bọ.

² Kookolobian ḍịroor iḍue bịn aru sịphe Eegum mọ aSainai, ụteeny ịmi ẹpe ạnyu phọ.

³ Rꞌoniin oye nyịna kụ́daph ụ́siiny ạnyu. Ụ́wa kẹn ọmiin ọnon oye sịphe eegum mọ; ḅịle, oyool-ọga mꞌạnam kụ́ḅal ịḅal zin eegum mọ.”

⁴ Kụ aMozis agbo ịyal phọ ịdaabili aḍighiigh ịdipho ịḅel phọ, kụ eḅon ạḍiroor aḅetenu ạpham ịyal phọ ịdi ạsiinyom ạnyu Eegum mọ aSainai, ịdipho Ọmoogh-we phọ ạḅeni bọ nyọdi.

⁵ Ọmoogh-we phọ ạḍua asoor ologhi ọotu phọ kụ ạmeera rꞌọdi, kụ aghola ḍien iigbia phọ ọdi.

⁶ Ọmoogh-we phọ arelhe aten ghisigh ọdi, kụ agbeel ghan ịduon, “Mị kụ Ọmoogh-we phọ, Ẹnaan ọnma ighirigiir rꞌạghusan. Mị rạ́nuun ghan kạghagh ologhi. Mị kụ Ẹnaan oḍuom ologhi rꞌẹphomoghian dị ẹmanam dị rémuneen ghan.

⁷ Mị ạmoogh ọnma ighirigiir, rꞌọsar ọwilenaan ịkaraph rꞌigborion rꞌạsipioghom esi ạsimuunir oghiil kụ ọlo mị úmeera ootol ịkaraph ạburude phọ rạkpiom ghan nmụny rꞌạnmuny ạnmuny esi ịraar rꞌinya oghiil.”

⁸ AMozis akem azumeri ẹmhu ọdi ude, kụ ạaḅereghi,

⁹ kụ ạḅem mọ, “Obo ụmoogh ịmi, eru mạar dị nạ ạmoogh ni ghụsan esi ạmi, mị rạaḅereghi ni nyịna, ụdaph ni iyoor ạghi aani. Ghạlamo awe phọ ạbuo ịgbagharan, sạr ụwilenaan igborion phọ rꞌạsipioghom mọ rꞌịkaraph phọ ayoor, kụ ụsighe iyoor mọ awe ạna.”

Ọḅile ọosa ịyo phọ

¹⁰ Ọmoogh-we phọ ạḅeni Mozis mọ, “Nyịidipho mị maghiran ịyo rꞌoomo awe phọ Ịzirel. Risigh ạbidi mị kaḍighi ịiḍaany, ịdi kőḍighi ghan sịen aḅirini phọ, kẹn ke̋mite ghan ẹnon eelhe. Oomo awe kọmiin ni ọdo igbogh ạraraar dị mị Ọmoogh-we phọ katue aḍighi loor esi dị mị kaḍighinaan nyịna ịyaar aḍiigu.

¹¹ Mạar ạlogh elegh ịphen mị ạto bọ rạḅeni nyịna rodon. Mị kaporogh ni bụo Ạmorait phọ rꞌạbuo aKenanait phọ rꞌạbuo ạHitait phọ rꞌạbuo ạPerezait phọ rꞌạbuo aHivait phọ rꞌạbuo aJebusait phọ, mem lọ nạ ạkpulan bịdi.

¹² Gona loor ạna, ọbo nạ rꞌạbuphe orugh bọ sịphe areelhe phọ nạ rạki bọ oḍigh phọ kókiran ghan bọ ịyo, bịn bịdi oḍighi ḍiphil dị ọkpaminaan nyịna.

¹³ Lereghi renmeny ạrikia phọ ạbidi, aḅomoghi ịkaaghineen ạrumugh phọ ạbidi, kạ́meremi ghan igbudu Asera, um-ạke phọ ạbidi.

¹⁴ “Kạ́aḅereghi ghan ẹnon ẹmugh, ịdi eḍighi bọ mị (ḍien ạmi ughol mọ Ọmoogh-we phọ) rátiran ghan roḅopha.

¹⁵ Ḅịle kẹn, nạ rꞌạbuphe orugh bọ sịphe areelhe phọ nạ rạki bọ oḍigh kákiran ghan ịyo, loor esi dị mem lọ bịdi rooseeny rụmugh phọ ạbidi, oḍighi yogh rạraar aruru phọ ạbidi kụ oniin ạmagh nyịna, bịn nạ ale aani rạraar ạrikia phọ ạbidi.

¹⁶ Bịn nạ apinoghonaan nmạnyaan ạbidi nmụny ạna, ạnmanyaan ạna ọbalagh nmụny ạbidi; bịn ạnmanyaan phọ ạbidi rooseeny ruru, bịn eḍighi ịdi ạnmuny phọ ạna ọdaph ooseeny aani ruru phọ.

¹⁷ “Kạ́ka ghan ịyaar ạsighe aḍighi ẹmugh.

¹⁸ “Kooko ghan ẹyaal ạbred dị yist ụ́logh. Mem ụnwanyu Abib esi oḍual aḍughul-otu nạ kale ghan ạbred dị yist ụ́logh ịdipho mị ạḅeni bọ nyịna, ịdi eḍighi bọ ụnwanyu phọ ọpo phọ kụ ẹdi nạ ạḍua bọ ẹpe Ijipt amite.

¹⁹ “Tọrobo ọḅel ọony phọ ọpo aghughuron bọ oghun ẹmaria, pọ ọlo ạmi: oomo ịḅel ạnmuny ịnam alephiri phọ ạna, mꞌạsinam mꞌiyool-ịga, pọ ịlo ạmi,

²⁰ kụ eru mạar dị ẹnam adool ạna ẹmar ọḅel olephiri, pọ sịghe mọony oyool-ọga anmiom. Kụ eru mạar dị nạ únmiom, pọ bun orum ọdi. Oomo ịkpana ạnmuny phọ ạna nạ kaanmenenom ni. “Oye kụ́ḅaph ọgbo bịn aru egbodo ạmi dị ụ́pam ẹkia.

²¹ “Odiiny aḍio kụ ịdi nạ kakumuan oomo arukumuan phọ ạna; ḍịphe emuneniom bọ oḍual aḍughul-otu aḍio ophooghian; mꞌamem iḅeph, mꞌamem ibugha, pọ pooghian.

²² “Kooko ghan riiḍio ẹyaal ịḅel iimuma phọ rꞌẹyaal ibugha eekuna ạlha phọ.

²³ “Ịraar amem lhạ kụ ẹdi awe phọ ạna rꞌạnmuny phọ ạna koḍeenaan ghan loor ooseeny Ọmoogh-we Ẹnaan phọ Ịzirel.

²⁴ Mị rophorogh reelhe phọ rọsighiogh kụ rọbughe rere phọ ạna, oye dị kạaram nyịna de phọ ạna ólho, mem lọ nạ ạghi oḍeenaan aloor phọ ạna Ọmoogh-we Ẹnaan phọ ạna ịraar amem lhạ phọ.

²⁵ “Ụ́sighe ghan ạbred lọ ọlogh yist úbunyonom ịḅaal ịyaar aghuḍum ạmi. Amalhe ẹyaal ịyaar aghuḍum ọphel otene phọ kísugha ghan ẹḅaal ḍịroor.

²⁶ “Ịḅel iimuma ịsiphe ade phọ ạna, sịghe ghan ạghi sịphe otu Ọmoogh-we Ẹnaan phọ ạna. “Úmiim ghan mạmaam onhiin ọga kụ ạsaam mọony ọdi.”

²⁷ Ọmoogh-we phọ ạḅeni Mozis mọ, “Gẹ ikpo ọnhu phọ ịphen aseere. Loor ikpo ọnhu phọ ịphen kụ mị maghiran bọ ịyo rꞌạna rꞌawe phọ Ịzirel.”

²⁸ AMozis ạrolan sịphe phọ rꞌỌmoogh-we phọ inyadi ootaany rꞌinyadi aḍughul, eḍien úle, mụum ụ́pughol. Ọdi ạge sịphe ịdaabili asighiigh phọ ikpo ọnhu aḍioph phọ iilogh phọ ịpe Ọmoogh-we phọ aghiran bọ ịyo phọ.

AMozis ạḍua ạnyu Eegum aSainai rasoor

²⁹ Mem dị aMozis ạḍua bọ ẹpe ạnyu Eegum aSainai rasoor rꞌaḍioph phọ iilogh, ọdi ólhegheri mọ aḍizu aghisigh phọ ọno rẹtaphan, ịdi eḍighi bọ Ọmoogh-we phọ rꞌọdi kụ ụrolan ọghaaphan.

³⁰ Kụ mem dị Eeron rꞌoomo awe phọ Ịzirel ọmiin bọ Mozis dị aḍizu aghisigh phọ ọdi rẹtaphan ni, aruugu asiph bịdi, bịdi ụ́ki útuman nyọdi.

³¹ AMozis ạmagh bịdi, kụ Eeron rꞌoomo ạbuo ạrumhu aḍita phọ ạbidi oḍighom nyọdi, kụ aMozis rꞌạbidi ọghaaphan.

³² Roḍighi pạ, pụruku oomo awe phọ Ịzirel ọghi otuman nyọdi; kụ ọdi ạngo bịdi oomo iilogh phọ ịpe Ọmoogh-we phọ rꞌọdi ọghaaph bọ ẹpe ạnyu Eegum mọ aSainai.

³³ AMozis rọḅaanaan bịdi rọmadan, kụ ạsighe ukpe aakpereghian ghisigh ọdi.

³⁴ Tọro amem lọ aMozis ạghi lọ Ọmoogh-we phọ rꞌọdi kọkaaph ọghaaph, ọdi azughuronaan ukpe phọ tụtu ọdi ạḍua, kụ ọdi aḅula ạkaaph ạḅeni we phọ Ịzirel ịlo Ọmoogh-we phọ ạghaaph bọ ạḅeni nyọdi.

³⁵ Awe phọ Ịzirel ụmiin ghan ni mọ aḍizu aghisigh phọ ọdi raaloghoḍian ni. Kụ aMozis ạḅile kẹn ạsighe ukpe phọ azua ghisigh ọdi tụtu ẹteeny ẹnon amem lọ ọdi kạki kụ Ọmoogh-we phọ rꞌọdi ọkaaph ọghaaph.