Ẹḍua 33 - Ạḍinya Iigbia

Ọmoogh-we phọ ạḅeni we phọ Ịzirel mọ ọḍua Eegum aSainai

¹ Ọmoogh-we phọ ạḅeni Mozis mọ, “Ḍụa esi phọ ịsien, nạ rꞌawe phọ ạbuphe nạ ạsighe bọ ẹpe Ijipt amitiom, asiemi ẹpe ade phọ mị aguanaan bọ Ebraham rꞌẠizik rꞌạJekob kụ ạḅeni mọ ọto anyina kụ ẹdi mị kạngo bọ de phọ ạḍien.

² Mị katom ni oniin ọokpaany ạmi kụ ịiḅaki inyina kụ mị kaporogh ni weye aKenanait rꞌẠmorait phọ rꞌạHitait phọ rꞌạPerezait phọ rꞌaHivait rꞌaJebusait phọ ạsighiogh.

³ Nyina rekeel ẹpe ade ẹetool rꞌọninom mọ kụ ọlo mị kị́daph inyina rꞌaloor, ịdi eḍighi bọ nyina aweye ọḅaar ẹmhu, ọbo mị kiphiemi ghan bọ inyina ẹpe eten.”

⁴ Mem dị awe phọ Ịzirel ọnaghan bọ ịphen phọ, bịdi umeelom ni ọto bịn ụ́logha ghan mun gulu reḅerisuoya rꞌikoli orum,

⁵ ịdi eḍighi bọ Ọmoogh-we phọ mạḅeni Mozis mọ ạḅeni nmụny Ịzirel mọ, “Nyina awe ọḅaar ẹmhu. Mị katu ni ogbo anyina ekperenom iphiemi inyina. Nyịidipho ịkaranaan ịma iinmenan phọ anyina, kụ mị kạatughian ni ịlo ẹkpe oḍighi anyina.”

⁶ Kụ ịdi rọḍua bọ Eegum aSainai, bịn awe phọ Ịzirel ụ́logha ghan mun rạraar aḅeri rꞌorum.

Ogbogo Ạdol Ọmoogh-we phọ

⁷ Tọro amem lọ awe phọ Ịzirel osi esi ophooghian, aMozis ạmeremi ghan ogbogo iigbia esi lọ ẹkelan rugbogo phọ ạbidi. Ughol ghan mọ Ogbogo Ạdol Ọmoogh-we phọ. Kụ tọrobo oye lọ rạwa ọḅaanaan Ọmoogh-we phọ, pọ kạki sịphe phọ.

⁸ Tọro mem lọ aMozis amite rạki ẹpe Ogbogo phọ odi bọ, oomo awe phọ oḅerenu ọmeregha ọnhu-aḍibuo arugbogo ạbidi, opogh ghan tụtu ọdi aḍigh.

⁹ Mem dị aMozis roḍigh ologhi Ogbogo phọ, bịn eekpoogh ọotu mesoor ekpereghi ọnhu-aḍibuo Ogbogo phọ, bịn Ọmoogh-we phọ rꞌaMozis rọkaaph.

¹⁰ Kụ oomo awe phọ ọmiin eekpoogh ọotu phọ ẹmeera bọ sịphe ọnhu-aḍibuo Ogbogo phọ, kụ bịdi ọmeregha rọoḅereghi, oye ye ạtol ọnhu-aḍibuo ogbogo ọdi.

¹¹ Ọmoogh-we phọ rꞌaMozis oosomanan kụ rọkaaphan, ịdipho ạrighiri rọkaaphan. Mem lọ aMozis aḅula, aJosua ọnyo ugheel ọony phọ ạNon otelhedom mọ ọdi, kụ ạrol ghan sịphe Ogbogo phọ.

Ọmoogh-we phọ aguanaan ọrolan awe phọ ọdi

¹² AMozis ạḅeni Ọmoogh-we phọ mọ, “Nạ mụḅeni ni ịmi oḍiemiom awe phọ ạbuen osiemi ade phọ ạḍiphe phọ, kụ nạ ịmi ụ́ḅeni oye lọ kụdaphan aani ịmi. Nạ ụḅem mọ nạ ulegheri ni ịmi agey kụ ẹrolom ạmi ẹḅeeraan ni nyịna.

¹³ Kụ eru ịdipho, pọ ụḅeni ịmi ịghiighi phọ ạna, pịdi mị akumu ghan ạngo nyịna ạkiom risigh; tụutughian kẹn ni mọ nạ mạsaḅar we phọ ạbuen ạsighe mọ bịdi bụo ạna.”

¹⁴ Kụ Ọmoogh-we phọ ạḅeni nyọdi mọ, “Mị rꞌạna kụ kẹki ni. Mị kạngo ni nyịna ọkpar opu.”

¹⁵ AMozis ạḅeni nyọdi mọ, “Eru mạar dị nạ iyoor rụ́daph kạghi, pọ kámeera yoor ọḍua esi phọ ịsien.

¹⁶ Keḍighi ika kụ olegheri bọ mọ awe phọ ạna rꞌạmi ọḅeeraan ni nyịna eḍighi ịyaar dị nạ iyoor ụ́daph? Ọrolan phọ ạna rꞌayoor kụgbatan ni iyoor rꞌạbunon awe ịsien aḅirini phọ.”

¹⁷ Ọmoogh-we phọ ạḅeni Mozis mọ, “Mị kạtuugh ni aḍighi ịdipho nạ mạlhom bọ. Mị alegheri ni nyịna akuphom owol kụ nạ ụḅeeraan ni ịmi.”

¹⁸ AMozis ạḅem mọ, “Seseeny, mị rạaḅereghi ni nyịna, uḍeenaan ịmi ḍịnmananmana ạḍiḅaal esi ạdol phọ ạna.”

¹⁹ Ọmoogh-we phọ ạphagharanaan mọ, “Mị kaḍighi ni ịdi oomo eegu phọ ạmi ketu eten ghisigh ạna. Mị Ọmoogh-we phọ kakola ni ḍien iigbia phọ ạmi ghisigh ạna. Mị raḍeenaan ghan ghụsan rꞌọnma ighirigiir esi ạbulo mị ạsaḅar.

²⁰ Mị kámeera nạ ạmiin ghisigh ạmi, ịdi eḍighi bọ oye ólho dị kạmiin ghisigh ạmi kụ ạtol.

²¹ Kụ ọlo nạ kạmeera utuman ịmi sịen aḍighiigh phọ.

²² Kụ ẹteeny mem dị ạḍinmananmana ạḍiḅaal esi ạdol phọ ạmi retu oten kụ mị asumeeny nyịna ologhi epogh sịphe aḍighiigh phọ, kụ mị apukiom nyịna ḍịghaagh ạmi tụtu mị aten.

²³ Kụ mị agbi nụun ọsighe ạḍighaagh phọ ạmi, kụ nạ ạmiin ẹgum ọman ạmi, ẹrol dị nạ kạ́miin ghisigh ạmi.”