Ẹḍua 32 - Ạḍinya Iigbia

Ọony ạnam dị ọlemom gol

¹ Mem dị awe phọ ọmiin mọ aMozis mabia ọḍua ạnyu eegum mọ osoor, bịdi uukpomoghan ni okoom Eeron kụ ọḅeni nyọdi mọ, “Yoor úlegheri ịlo memitenaan Mozis, ọpo ụsighe bọ iyoor ẹpe Ijipt ạpham amitenom. Loor ịduon phọ, ụkaanaan iyoor ẹmugh lọ kiḍiemiom iyoor.”

² Eeron ạḅeni bịdi mọ, “Ịki ẹsighiogh reḅeri-sụa agol ạnmariir rꞌạnmuny ḅịle rꞌạnmanyaan phọ anyina odoghoḍian bọ, kụ iruom ịmi oomo phọ ịdi.”

³ Kụ oomo awe phọ ọkporonaan reḅeri-sụa agol phọ ạbidi oruomonaan Eeron.

⁴ Kụ ọdi aakoroghi reḅeri-sụa agol phọ ạazaghami kụ ạsagharan ologhi opokoro ọoke bịn kụ ạlemom ọony aḍilephiri ạnam. Kụ awe phọ ọḅem mọ, “Weye phọ Ịzirel, ạnam mọ ạḍien kụ ẹmugh phọ ayira, ọdi kụ ịsighe bọ iyira emitiom ẹpe ade Ijipt.”

⁵ Eeron rọlem bọ rọmadan kụ ọlem enmeny ạrikia risigh aḍilephiri ạnam agol phọ kụ agbeel mọ, “Kopegh iḍue ephegh oghueniom Ọmoogh-we phọ.”

⁶ Kụ eḅon ạḍiroor kụ bịdi ọsighe ịnam oḍighinom rạraar aghuḍum oguom ạnian rꞌạraraar aghuḍum ẹepho kụ awe phọ ọrologhu ude malhe dị ạḅile akiton aḍighi ịpughol rꞌịminian.

⁷ Ọmoogh-we phọ ạḅeni Mozis mọ, “Soor aḅula egina amem, ịdi eḍighi bọ awe phọ nạ ạsighe bọ ẹpe Ijipt amitenom mọpioghom kụ ughel ịmi.

⁸ Bịdi mọwile ọdaph eten phọ mị ạto bọ ạngo bịdi. Bịdi mọlhem nạm agol kụ rọoḅereghi ghan, roḍighi yogh ghan rạraar aghuḍum kọngo, kụ rọḅem ghan mọ ẹphen kụ ẹmugh phọ ạbuno ọdi kụ ạsighe bọ bụno amitiom ẹpe ade phọ Ijipt.”

⁹ Ọmoogh-we phọ ạḅeni Mozis mọ, “Mị alegheri ni ịdi awe phọ ạbuen rọḅaar ghan ẹmhu.

¹⁰ Kụ iḍighi, nyịidipho kúkikima ịmi. Bịdi ophin ologhi ạmi kụ mị kapiemi bịdi. Kụ mị aḍume nyịna, ạbughe ọophi ạna aḍighi egbogh eelhe.”

¹¹ Kụ aMozis ạaḅereghiom Ọmoogh-we Ẹnaan phọ ọdi kụ ạḅeni mọ, “Ọmoogh-we, eeghe kụ nạ rạkagh ologhi kꞌịphen kꞌịphen we phọ ạna bụen nạ ạsighe bọ igbogh ịikpo ạḍighaagh iphelegbe phọ ạna kụ amitiom ẹpe Ijipt?

¹² Eeghe kụ awe phọ Ijipt kọḅem bọ mọ nạ aḍiemiom we phọ ạna ạḍuanam Ijipt ragbiighi ghan ọze ạbidi ẹpe aruugum mọ, rꞌophiemi ạbidi sịen aḅirini phọ? Nme ologhi ạna, kạ́kagham mun bịdi ologhi, bịlenaan we phọ ạna ịkaraph phọ ạbidi.

¹³ Tụutughian Ebraham rꞌẠizik rꞌỊzirel, abutelhedom mọ ạna, bụphe nạ ạtuan bọ kụ aghunya rꞌaloor, kụ ạḅeni bịdi mọ, ‘Mị kạbughe ni ọophi anyina ịdipho ạraanaan phọ edi bọ ẹpe okuaḍio; kụ oomo phọ ade phọ ạḍien mị aguanaan bọ ọngo oghiil anyina kẹtol ḍịo anyina kꞌagee-pọ.’”

¹⁴ Kụ Ọmoogh-we phọ anme ologhi ọdi, kụ ạwilenaan we phọ ọdi ịpe ọdi ạwa bọ oḍighi phọ.

¹⁵ AMozis ạḍua sịphe ạnyu eegum mọ asoor ude, rꞌịyal phọ ịdaabili iilogh ọghiom ologhi phọ, dị ạpham ḍịghaagh; ịdaabili dị ọge ịyal phọ ọman phọ.

¹⁶ Ẹnaan rꞌaloor kụ iigbo ni sighiigh phọ ọge bọ iilogh phọ oseere.

¹⁷ AJosua ạnaghan ni dị awe phọ rọlooghi, kụ ạḅeni Mozis mọ, “Rọyugh ni ẹpe arugbogo phọ dịadi robe ghan ẹgham.”

¹⁸ Kụ aMozis ạḅem mọ, “Ọyugh phọ kọ́yugh awe dị ọkpar ẹgham, ḅịle kẹn kẹ́ḍogh emoghi dị awe ọkpar opu bịdi; mị rạnaghan ghan ẹḍogh ạsuor.”

¹⁹ Kụ ịphen phọ reten, mem dị ọdi ạkar aru atuman rugbogo phọ ọmiin aḍilephiri ạnam mọ rꞌawe phọ dị rọker ịḅa, iphin ni ologhi aMozis. Sịphe phọ azin eegum mọ, ọdi atebeneghi ude sighiigh phọ bịn ewunughian.

²⁰ Kụ ọdi ạsighe ọony ạnam mọ bịdi ọlhem bọ ạlogh nịan ạazaghami gol, ạgbe atene ọoru kụ akironom mụum kụ ạkpaariom nmụny Ịzirel mọ ọphughologh.

²¹ Kụ aMozis apuru Eeron mọ, “Awe phọ ạbuen ụpiom nyịna eeghe kụ nạ ạsighe bọ ịkaraph dị eleeny ịduon ạḅam rụmhu ạbidi?”

²² Eeron ạḅeni Mozis mọ, “Oye dị ụmoogh ịmi, ạghelhe phọ ạna kụ́pughan. Nạ alegheri ni ịdi iloghi awe phọ ạbuen rạkpar ghan mem oḍighi ịkaraph.

²³ Bịdi kụ ụḅeni ịmi mọ, ‘AMozis phọ ọphon phọ ụsighe bọ iyoor ẹpe Ijipt amitenom, yoor úlegheri ịlo memitenaan nyọdi. Ụlhemenaan iyoor ẹmugh lọ kiḍiemiom iyoor.’

²⁴ Kụ mị ạḅeni bịdi mọ, ‘Tọrobo ọnyo anyina lọ ạmoogh gol pọ ạsighe aru,’ kụ bụlo ọmoogh ọsighe uruomonaan ịmi, kụ mị ạsighe asumughi ologhi ạnian, kụ aḍilephiri ạnam mọ ạḍien phọ emite bọ!”

²⁵ AMozis ạmiin ni mọ Eeron mamuton we phọ eephoogh, órue mun ọphamaghan we phọ, bịn awe phọ oofola ghisigh ạbuo ạmulogh-ḍien phọ ạbidi.

²⁶ Kụ ọdi ạmeera sịphe eḍighom arugbogo phọ, kụ ạḅem mọ, “Tọrobo ọlo aḍighan rꞌỌmoogh-we phọ aru ẹphen mị odi bọ.” Kụ oomo ạbuo aLivai ookpomoghan okoom nyọdi.

²⁷ Kụ ọdi ạḅeni bịdi mọ, “Ọmoogh-we Ẹnaan phọ Ịzirel ạḅem ịduon mọ, ‘Tọrobo oye ạsighe elhool ẹgham ọdi ạḅanam, kụ arelhe akitonom rugbogo phọ ẹḍua eḍighom mọ ẹphen kụ esi nyẹeri phọ, kụ ạze bumor ọdi rꞌạrighiri ọdi rꞌasiya ọdi.’”

²⁸ Kụ ạbuo aLivai ọtuugh ịpe aMozis ạḅeni bọ bịdi oḍighi: kụ bịdi ọze we dị rọkiom ni ịraar ọonir awe ḍio phọ ạḍiphe.

²⁹ AMozis ạḅem mọ, “Ḍio phọ arodon nyina mẹze bọ nmụny rꞌabumor phọ anyina, nyina meselemian siloor anyina ẹngo Ọmoogh-we phọ. Ọdi mịngo inyina ḍịseph mọ iḍighi bụpinyon rịkia kꞌọdi.”

³⁰ Rẹḅaal kụ aMozis ạḅeni we phọ mọ, “Ịkaraph phọ nyina meḍighi yogh bọ ẹpughan. Nyịidipho mị kạḅile kẹn ạsiiny ạnyu eegum mọ ạki ạteeny Ọmoogh-we phọ, iini ọdi kameera ọsar ọwilenaan ịkaraph anyina.”

³¹ AMozis aḅula ạteeny Ọmoogh-we phọ kụ ạḅeni mọ, “Ịkaraph phọ awe phọ moḍighi yogh bọ ẹpughan: bịdi mọsighe gol ọlem bọ ẹmugh bịn rọoḅereghi ghan.

³² Nyịidipho, mị rạaḅereghi ni nyịna mọ bịlenaan ịkaraph phọ ạbidi. Mụghumo nạ ómeera, pọ gbuurogh ḍien ạmi sịphe ạḍinya phọ nạ ạgeeghi bọ siḍien awe phọ ạna.”

³³ Ọmoogh-we phọ ạḅeni Mozis mọ, “Oye lọ ụpioman ịmi kụ aḍighi ịkaraph, pọ ọpo kụ ọdi mị kagbuurogh ḍien ọdi ạsighe sịphe ạḍinya phọ.

³⁴ “Nyịidipho keel, ḍiemiom we phọ asiemi ekpisi phọ ẹpe mị ạghaaph bọ ạḅeni nyịna. Legheri mọ ọokpaany ạmi karelhiom ni nyịna. Kụ ọlo amem mọ retu ni dị mị kạsighe ịkaraph phọ ạbidi ạḅam rụmhu ạbidi.”

³⁵ Kụ iḍighi kụ Ọmoogh-we phọ ạngo ẹzegh we phọ, loor ẹmhu aḍilephiri ạnam agol phọ Eeron ạlhem bọ.