Ẹḍua 31 - Ạḍinya Iigbia

Bụo ẹmaar-iiḍighi ạraghaagh kịrokiro sịphe Ogbogo Ạdol Ọmoogh-we phọ

¹ Ọmoogh-we phọ ạḅeni Mozis mọ,

² “Mị mạsaḅar Bẹzalel, ọony aUri ḅịle ọony-oko aHur, ọlo eghun aJuda,

³ kụ mị mamuzeḍinaan nyọdi ịikpo phọ ạmi, ạḅile ạngo nyọdi olegheri-ịyaar, ẹmaar ḅịle rꞌepul oḍighinom ạtorotoro ọkal oḍighi —

⁴ ọsighe agol, silva rꞌenaba ogbiighiom ologhi rꞌoḍighinom ịlo kẹnighe;

⁵ okulugh ịnme dị kọlogh esi; ọsighe oreeny ọkaam ịyaar; ḅịle rꞌạtorotoro oḍighi dị koḍighinom ẹmaar ạḍighaagh.

⁶ Mị mạsaḅar kẹn ni Oholiab ọony Ahisamak, ọlo eghun ạDan, mọ ạḅophoghan nyọdi aḍighi. Mị mạngo kẹn ni egbogh ẹmaar oomo awe ẹmaar-iiḍighi ạraghaagh phọ, pịdi bịdi otue ọlem ịyaar lọ mị ạḅeni bịdi:

⁷ Ogbogo Ạdol phọ ạmi, Igbe Ịyo phọ rꞌekpereghi phọ, oomo ạraraar Ogbogo phọ,

⁸ ịdaabili phọ rꞌoomo ạraraar phọ kọḅamaghi bọ, ọmeremiom ọtozi phọ oḍighinom bọ ogey agol rꞌoomo ịnme phọ ọdi, enmeny ọsu ghan ịnsens phọ,

⁹ enmeny ọsu ghan ẹkia rꞌoomo ịnme phọ ọdi, ogbogh ạbafu ootolaam ạraghaagh phọ,

¹⁰ ịikia ibura ariil ạrikia phọ, ịpe Eeron rꞌạnmuny phọ ọdi konmenaan ghan bọ mem lọ bịdi rọpinyon rịkia,

¹¹ mụnum iigbia phọ kooduom ghan bọ oye, ḅịle rꞌịnsens eeḅi eḍu phọ ẹpe Ạdol Iigbia phọ. Esi oḍighi ạraraar phọ ịphen phọ, bịdi ọtuugh ịpe mị ạto bọ ạḅeni nyịna kụ oḍighi ghan.”

Aḍio ophooghian phọ

¹² Ọmoogh-we phọ ạto ni ạngo Mozis

¹³ mọ ạḅeni weye phọ Ịzirel mọ, “Iiko ghan ḍio ophooghian phọ ạmi, loor esi dị ẹpe kụ elegh igbo anyina rꞌạmi kꞌagee-pọ oḍeenaan ghan mọ mị Ọmoogh-we phọ miḍighi inyina weye ạmi.

¹⁴ Iiko ghan ḍio ophooghian phọ loor esi dị eḍighi ni ḍio iigbia. Tọrotoro oye lọ úuko kụ akumuan ḍio phọ ạḍien, pọ kokiigh ni.

¹⁵ Nyina ẹmoogh odiiny aḍio okumuan, kụ ọlo omuneniom oḍual aḍio phọ pọ aḍio ophooghian dị mọḅogh ụngo ịmi. Oye lọ akumuan ḍio phọ ạḍiphe kokiigh ghan ni.

¹⁶ Awe phọ Ịzirel ooko ghan ḍio phọ ạḍien eḍighi elegh ịyo phọ.

¹⁷ Eḍighi elegh dị edi ghan bịn igbo awe phọ Ịzirel rꞌạmi, loor esi dị mị Ọmoogh-we phọ ụlhem kẹ phọ rꞌade phọ esi odiiny aḍio, kụ omuneniom oḍual aḍio phọ bịn mị akureri rukumuan kụ aphooghian.”

¹⁸ Mem dị Ẹnaan mẹghaaphan bọ Mozis ẹmadan sịphe Eegum aSainai, ọdi ạngo ni nyọdi ịyal ịdaabili aḍighiigh phọ Ẹnaan rꞌaloor kụ ạge bọ iilogh phọ.