Ẹḍua 30 - Ạḍinya Iigbia

Enmeny dị kọsu ghan ịnsens

¹ “Sịghe oreeny ạkasia ạkanam enmeny ọsu ghan ịnsens.

² Inya phọ ạraghaagh phọ eeleeny ni, 45 ẹkulom ạsunugh ḍịdoony, 45 ẹkulom ạsunugh ḍịregh, 90 ẹkulom ạsunugh ḍiphoph. Ạsiogho inya phọ aruukuna phọ ẹḅophan ni rꞌenmeny phọ.

³ Sịghe ogey agol kụ agbul ạnyu phọ rꞌinya phọ ạraghaagh phọ rꞌạsiogho phọ, kụ ạsighe gol ạgoor akitonom ruukuna phọ.

⁴ Sịghe ịyal ariigida agol ạloghom ịkoro eeḍian iigbom mọ ịyal ạga pịdi ẹpam ịkolom mọ ịpe kogbanam ghan bọ.

⁵ Sịghe rọkolom ạkasia kụ ạkaam ịkolom mọ kụ agbul gol.

⁶ Seere enmeny phọ ẹpe erugh ukpe phọ ọkpo bọ osophom risigh Igbe Ịyo phọ. Ịsiphe kụ esi dị mị kạteeny ghan nyịna.

⁷ Tọrotoro ạḍiroor mem lọ Eeron aru ookolobian ịtozi phọ, ọdi ạsu ghan ịnsens ịma eḍu sịphe phọ.

⁸ Ọdi ạmoogh ọtuugh ịduon phọ kẹn kụ oḍighi mem lọ ọdi ạsuughi ịtozi phọ dulhe. Ẹkia ọsu ghan ịnsens phọ ẹrol ghan bịn kꞌagee-pọ.

⁹ Ạnyu enmeny phọ ẹphen kẹ́pighironom ẹkia ịnsens lọ íseleman, ẹnam mụghumo ariiḍien, ḅịle kémor miim.

¹⁰ Mem lhạ Eeron aḍighi ghan ịinua oselemiom enmeny phọ, ọdi agbul ghan inya ạsiogho enmeny phọ ịḅaal ịnam mọ ịpe ọphighironom bọ ẹkia ịkaraph phọ. Iḍighi ghan ịphen phọ tọrotoro ạlha kꞌagee-pọ. Enmeny phọ ẹphen ẹrol ghan dọl iigbia, ẹḅogh ịngo ịmi Ọmoogh-we phọ.”

Osogh ophoghom Ogbogo Ạdol Ọmoogh-we phọ

¹¹ Ọmoogh-we phọ ạḅeni Mozis mọ,

¹² “Mem lọ nạ agbi weye phọ Ịzirel, tọrotoro olephiri ọony kụkpe ghan ni ịmi kụ ạtagharanam ẹmhu ọdi ọbo ịkaraph kesoorom ghan bọ nyọdi ịduon phọ rogbi bọ weye phọ.

¹³ Tọrotoro oye lọ mogbi ạmoogh ọkpe ipoḍi asilva, ọdaph ịpe ipoḍi ịsiphe Ạdol Iigbia ẹman bọ. Tọrotoro oye kạkpe ni eḍighi ẹkia dị rụngo ịmi.

¹⁴ Tọrotoro oye dị mạman ịyaldi ạsia kụ ẹghiom ạnyu dị mogbi, pọ kụkpe ni ịmi ikpoki phọ.

¹⁵ Ọolha kạ́kpe apele ḅịle uwekulom kạ́kpe ákome mem lọ rọkpeeghi ikpoki phọ ịphen ọtagharanam ạrumhu ạbidi.

¹⁶ Bọnyi ikpoki phọ ịphen weye phọ Ịzirel ạsighe aphoghom ghan Ogbogo Ạdol phọ ạmi. Osogh phọ ọphon ọlo ọphelom asighuḍum ạbidi, ḅịle mị kạatughian ni aako ghan bịdi.”

Ạbafu dị ọlemom enaba

¹⁷ Ọmoogh-we phọ ạḅeni Mozis mọ,

¹⁸ “Sịghe enaba ạlemom oogboghom ạbafu. Seere bạfu phọ igbo Ogbogo phọ rꞌenmeny phọ, kụ ạlogh mụum ologhi phọ.

¹⁹ Eeron rꞌạnmuny phọ ọdi ootola ghan rạghaagh rꞌaruwol ạbidi

²⁰ kụ ogbi nụun oḍigh Ogbogo phọ, mụghumo otuman enmeny phọ ọphighiron ẹkia eḍien. Bịn bịdi rꞌighuḍum.

²¹ Bịdi ootola ghan rạghaagh rꞌaruwol phọ ạbidi, ọbo bịdi komugh ghan bọ. Ọphon phọ ologh dị bịdi rꞌẹemara ẹemara ạbidi kọpam kꞌagee-pọ.”

Ạmunum-ịko

²² Ọmoogh-we phọ ạḅeni Mozis mọ,

²³ “Sịghe rạraar ịma eḍu — odiiny igbogh ịtoom ẹemor amaa, ịraar igbogh ịtoom ẹemor asinamon, ịraar igbogh ịtoom ẹemor ụguo,

²⁴ odiiny igbogh ịtoom ẹemor akasia (oomo phọ ịdi eḍighi ghan ogey ọtoom). Lọghom inya aruuku ạmunum-ọliv,

²⁵ kụ ạsighe aḍighinom mụnum iigbia dị kooduom ghan oye.

²⁶ Sịghe mụnum mọ aadu Ogbogo Ạdol phọ ạmi, Igbe Ịyo phọ,

²⁷ ịdaabili phọ rꞌoomo ạraraar phọ ọdi, ọmeremiom ọtozi phọ rꞌạraraar phọ ọdi,

²⁸ enmeny ọsuughi ịnsens phọ rꞌoomo ạraraar phọ ạḅamaghi bọ ạnyu, ḅịle rꞌạbafu owuraam ạmuum mọ rꞌaruwol phọ ọdi,

²⁹ Tụugh ịduon kụ ạgbatan rạraar phọ bịn bịdi mẹkaraghi eten rạraar iigbia, ḅịle tọrotoro oye mụghumo ịyaar lọ etir bịdi, pọ kạgua ni ika.

³⁰ Kụ ạsagharan nụun mụnum Eeron rꞌạnmuny phọ ọdi, adeneghi bịdi oḍighi bụpinyon rịkia esi iiḍighi phọ ạmi.

³¹ Ḅẹni weye phọ Ịzirel, ‘Ạmunum-ịko phọ ạmuen kụ ẹdi koḍighinom ghan iiḍighi phọ ạmi kꞌagee-pọ.

³² Kéeduom ghan oopho awe, ḅịle kékirion mụnon lọ ạghigh mụen phọ. Mụen phọ ạmunum iigbia.

³³ Tọrotoro oye lọ akirion mụlo ạghigh mụen phọ mụghumo ooduom oye lọ úḍighi oyil ạrikia, pọ moroph ogbeph.’”

Ịnsens phọ

³⁴ Ọmoogh-we phọ ạḅeni Mozis mọ, “Sịghe rạraar ịma eḍu phọ ịphen, sitakt, onisa, galbanum rꞌogey ạfrankinsens — eniin nyeniin kúpu.

³⁵ Sịghe rạraar phọ ịphen aḍighinom ịnsens, akirion ịdipho asimeri. Lọgh boph ọbo ạtol abia ạḅile aseleman.

³⁶ Kuur iniin, ạsighe ạghi sịphe Ogbogo Ạdol phọ ạmi, kụ aadu risigh Igbe Ịyo phọ. Ịmiin ịnsens phọ ịphen mọ ịyaar iigbia.

³⁷ Kẹ́tuugh ịduon kụ eḍighi aani ịnon ịnsens ịlo anyina. Ilegheri mọ ịphen phọ ịyaar iigbia dị mọḅogh ụngo ịmi.

³⁸ Eḍighi mạar dị oye ạtuugh ịduon phọ kụ aḍighi asimeri ọlo ọdi, pọ moroph nyọdi ogbeph.”