Ẹḍua 29 - Ạḍinya Iigbia

Ịpe kodeneghi bọ Eeron rꞌạnmuny ọdi oḍighi riil ạrikia

¹ “Ịphen kụ ịdi nạ kaḍighi Eeron rꞌạnmuny phọ ọdi kụ atene bịdi riil ạrikia ạmi. Sịghe ḍiniin onyugheel aḍilephiri ạnam rꞌịyal idughuna dị kẹ̋epuan loor.

² Sịghe ịgbieneen ịbiakpa, kạ́logh yist, aḍighinom ạbred ạlogh mụnum-ọliv, iniin kạ́logh, ḅịle iniin ḍighinom ạkikia agbul mụnum.

³ Sịghe ịphen phọ ạlogh egunum kụ ụngo ịmi mem lọ nạ ạsighe nạm mọ rꞌịyal idughuna phọ rạpighironom ẹkia.

⁴ “Sịghe Eeron rꞌạnmuny phọ ọdi aru sịphe ọnhu-aḍibuo Ogbogo Ạdol Iigbia phọ ạmi, ạḅeni bịdi owura mụum ịko.

⁵ Kụ ạsighe ibura ariil ạrikia phọ awur Eeron — ạsuoma phọ, oguragura ạsuoma phọ odi bọ ạnyu ạsuoma iikpera ạraghaagh phọ, iikpera ạraghaagh phọ, ọsuaram phọ, rꞌokuughaam mọ.

⁶ Zu nyọdi eghoony phọ kụ ạsighe elegh iigbia phọ ẹḅem bọ mọ ‘Mọḅogh Ọngo Ọmoogh-we phọ’ ạkagh sịphe eghoony phọ.

⁷ Kụ ạsighe mụnum iigbia phọ ạsagharan ẹmhu ọdi, kụ adeneghi nyọdi.

⁸ “Sịghe nmụny phọ ọdi aru ạkpologhi ibura;

⁹ sịghe inyoraam anyoroghi yogh bịdi ạḅile azu bịdi ịbam aroghoony. Ọpo kụ ịdi nạ kadeneghi bọ Eeron rꞌạnmuny phọ ọdi. Bịdi rꞌẹemara ẹemara ạbidi koḍighi riil ạrikia ạmi kꞌagee-pọ.

¹⁰ “Sịghe ḍilephiri ạnam mọ aru ẹphen esomanan Ogbogo Ạdol Iigbia phọ ạmi kụ ạḅeni Eeron rꞌạnmuny phọ ọdi mọ ọḅamaghi rạghaagh ạbidi ẹmhu ạnam mọ.

¹¹ Mẹegh nạm mọ sịphe Ạdol Iigbia phọ ạmi sịphe ọnhu-aḍibuo Ogbogo Iigbia phọ.

¹² Sịghe ghụnugh ạna atiom ịḅaal phọ agbul sịogho enmeny phọ kụ azu ịḅaal phọ ịpe esugha bọ sịphe azin enmeny ạrikia phọ.

¹³ Sịghe nụun oomo ẹnuum mọ eekpereghiom bọ ịkpana ariisi phọ, rꞌạni phọ ḅịle rꞌịyal phọ ikpo-ịnyoom mọ ạḅaram ẹnuum lọ ẹdaphan kụ aguom nịan sịphe enmeny phọ eḍighi ẹkia ạmi.

¹⁴ Kụ ọlo guom nịan iphulupul aḍilephiri ạnam mọ, rꞌozu phọ, ḅịle rꞌịlha phọ ẹpe erugh arugbogo phọ. Ẹphen ẹkia owophom ịkaraph ariil ạrikia phọ.

¹⁵ “Sịghe oniin odughuna phọ kụ ạḅeni Eeron rꞌạnmuny phọ ọdi mọ ọḅamaghi rạghaagh ạbidi ẹmhu ọga phọ.

¹⁶ Mẹegh odughuna phọ ạsighe ịḅaal phọ agbul inya phọ ạraghaagh enmeny phọ.

¹⁷ Kạnyan odughuna phọ, aatol ịpe ọkuruḅaka phọ rꞌaruwol ọman phọ, kụ ạsighe ạḅamaghiom ẹmhu phọ rꞌịpheri phọ ariisi ẹnam mọ.

¹⁸ Guom nịan oomo phọ odughuna phọ ạnyu enmeny phọ eḍighi ẹkia eḍien. Eḍu ẹkia phọ ẹphen ịḅeeraan ni ịmi.

¹⁹ “Sịghe nyọori phọ odughuna phọ — ọpo ọsighe odeneghiom mọ — kụ ạḅeni Eeron rꞌạnmuny phọ ọdi mọ ọḅam rạghaagh ạbidi ẹmhu ọga phọ.

²⁰ Mẹegh odughuna phọ ati ịḅaal phọ agbul reḅeri elhiom mọ Eeron rꞌạnmuny phọ ọdi, ḅịle rꞌạnyu akugbogh ạghunugh ạrada aruwol elhiom ạbidi. Sịghe ịḅaal phọ ịpe esugha bọ azuom inya phọ ạraghaagh enmeny phọ.

²¹ Sịghe iniin ịḅaal sịphe ạnyu enmeny phọ rꞌamuniin ạmunum mọ ạsaraghiom Eeron rꞌạnmuny phọ ọdi rꞌibura phọ ạbidi. Mọḅogh nyọdi rꞌạnmuny phọ ọdi ḅịle rꞌạrusuoma phọ ạbidi ụngo ịmi.

²² “Sịghe ẹnuum odughuna phọ, ẹnuum ẹsoph phọ, ẹnuum lọ eekpereghiom ịlo ọkuruḅaka phọ, nị phọ, ịyal phọ ikpo-ịnyoom mọ rꞌẹnuum lọ ẹdaphan, ḅịle rꞌọgbo elhiom mọ.

²³ Sịphe egunum ạbred phọ mọḅogh bọ ụngo ịmi, sịghe eniin eeḅoghoḍi ạtorotoro ạbred: eniin eeḅoghoḍi lọ ọlogh mụnum-ọliv, ḅịle rꞌeniin ẹlo ụ́logh, ḅịle rꞌoniin ạkikia.

²⁴ Lọgh oomo phọ ariiḍien phọ ịphen rạghaagh Eeron rꞌạnmuny phọ ọdi ạḅeni bịdi ọḅogh ụngo ịmi eḍighi iikia inmo.

²⁵ Kụ ạar bịdi aguom nịan sịphe enmeny phọ ạnyu ẹkia oguom ạnian phọ eḍighi ẹkia eḍien ạmi. Eḍu ẹkia phọ ẹphen ịḅeeraan ni ịmi.

²⁶ “Sịghe mạmaam odughuna phọ ọphon ạḅogh ụngo ịmi eḍighi eekia inmo. Ạpakiri ẹnam mọ ẹphen keḍighi ẹlo ạna.

²⁷ “Mem lọ odeneghi ariil ạrikia, ạmamaam rꞌọgbo odughuna lọ oḍighinom bọ kọḅogh ghan ụngo ịmi eḍighi eekia inmo, ọḅile ọsaḅar oseenaan riil ạrikia phọ.

²⁸ Ịphen phọ igbiighi ạmi dị rénmia ghan mọ mem lọ awe phọ ạmi ọphighiron ẹkia ẹepho, ạmamaam mọ rꞌọgbo ẹnam mọ ịlo ariil ạrikia phọ. Ịphen aruunmo dị awe phọ ụngo ịmi Ọmoogh-we phọ.

²⁹ “Ibura ariil ạrikia phọ Eeron eḍighi ịlo ạnmuny phọ ọdi mem lọ ọdi amugh, ẹrol dị bịdi obura ghan ibura mem lọ modeneghi bịdi.

³⁰ Ọony Eeron lọ ạsighe esi phọ ọdi aḍighi oyil ạrikia kụ ạḅile raḍigh Ogbogo Ạdol Iigbia phọ ạmi okumu ịsiphe Ạdol Iigbia phọ, pọ awura ghan ibura phọ ịphen oḍual aḍio.

³¹ “Sịghe ẹnam odughuna phọ ọpo odeneghiom bọ Eeron rꞌạnmuny phọ ọdi ạsa esi iigbia.

³² Sịphe ọnhu-aḍibuo Ogbogo Ạdol Iigbia phọ ạmi kụ ẹdi bịdi kọba ẹnam mọ ọḅaram ạbred phọ asugha bọ sịphe egunum mọ.

³³ Bịdi olhe ni rạraar phọ ịpe ọphighironom bọ ẹkia ọsar ọwilenaan phọ mem mọ ọpo odeneghi bọ bịdi. Ariil ạrikia bịn kụ olhe ghan eḍien phọ ẹphen loor esi dị eḍighi ni ugbini ugbini.

³⁴ Eḍighi mạar lọ ẹnam mọ mụghumo ạbred phọ kụ asugha ạḅaal ḍịroor, iguom ghan nịan; kúle ghan, eḍighi ni ugbini ugbini.

³⁵ “Ịinua odeneghiom Eeron rꞌạnmuny phọ ọdi ẹrol ghan oḍual aḍio kpạy ịduon mị mạto bọ ạngo nyịna.

³⁶ Tọrotoro aḍio sịghe ghan ḍilephiri ạnam ạphighironom ẹkia, pịdi ọsar ghan ịkaraph ọbilenaan. Ịphen kụ keselemi ghan enmeny phọ. Kụ aadu nụun mụnum-ọliv enmeny phọ esi oseere enmeny phọ dọl iigbia.

³⁷ Iḍighi ghan ịphen phọ tọrotoro aḍio tụtu ẹman oḍual aḍio. Kụ enmeny phọ egbi nụun oḍighi ọkar ịyaar iigbia, ḅịle oye mụghumo ịyaar kụ ẹḅogh, pọ mọ erelhian.

Ạrikia aḍio etum ḍio

³⁸ “Tọrotoro aḍio tụtu kꞌagee-pọ, ịpighironom ghan ẹkia ịyal ạnmuny iyool-ịga dị mẹman lhạ.

³⁹ Ịpighironom ghan nyoniin ḍịroor nyoniin dulhe.

⁴⁰ Ọḅel ọony oyool-ọga phọ ịḅaram ghan oniin ogbogh ọtoom ẹemor ịbiakpa lọ ọgbe kụ ekironom eniin eeku ạmunum-ọliv. Izu eniin eeku amiim eḍighi ẹkia.

⁴¹ Ịpighironom ọphori phọ ọony oyool-ọga phọ dulhe; ịḅaram kẹn ni ịbiakpa phọ ọgbe bọ, mụnum-ọliv, ḅịle rꞌamiim mọ ịdipho ạḍiroor phọ. Ẹphen phọ ẹkia eḍien ạmi Ọmoogh-we phọ, ḅịle eḍu phọ ịḅeeraan ni ịmi.

⁴² Kọpighiron ghan ni ẹkia phọ ẹphen sịphe risigh ạmi ọnhu-aḍibuo Ogbogo Ạdol Iigbia phọ ạmi kꞌagee-pọ. Ịsiphe kụ esi dị mị kạmiin ghan weye phọ ạmi ạḅile ạḅaanaan ghan nyịna.

⁴³ Ịsiphe kụ ẹdi mị kạmiin ghan weye phọ Ịzirel, kụ ạḍinmananmana ạḍiḅaal egbodo phọ ạmi keseere ni esi phọ dọl iigbia.

⁴⁴ Mị kaseere ni Ogbogo phọ rꞌenmeny phọ dọl iigbia, kụ mị ạmeremi Eeron rꞌạnmuny phọ ọdi mọ oḍighi riil ạrikia okumuan ghan ịmi.

⁴⁵ Mị katugh igbo awe phọ Ịzirel, kụ mị aḍighi Ẹnaan ạbidi.

⁴⁶ Bịdi kolegheri ni mọ mị kụ Ọmoogh-we Ẹnaan phọ ạbidi ọpo arorori bọ bịdi amitiom Ijipt pịdi mị atughan rꞌạbidi. Mị kụ Ọmoogh-we Ẹnaan phọ ạbidi.