Ẹḍua 28 - Ạḍinya Iigbia

Ibura ariil ạrikia

¹ “Mạgh umor phọ ạna Eeron ḅịle rꞌạnmuny phọ ọdi, Nạdab, Abihu, Ẹliazar rꞌItamar bịdi osi. Gbạtan bịdi rꞌawe phọ Ịzirel pịdi bịdi oḍighi riil ạrikia ạmi.

² Kọlonaan ibura ariil ạrikia ạngo umor phọ ạna Eeron esi ọngo ọdi rughuenian rꞌẹnighe.

³ Mạgh oomo awe lọ mị mạsephom ẹmaar-iiḍighi ạḍighaagh ạḅeni bịdi okol ibura phọ Eeron, pịdi ọmeremi nyọdi aḍighi oyil ạrikia ạmi.

⁴ Ḅẹni bịdi ọkol ọsuaram ekpologhi, ạsuoma iikpera ạraghaagh, oguragura rꞌolhooneen ạrusuoma, eghoony ḅịle rꞌonyoraam. Bịdi ọkol ibura ariil ạrikia phọ ọngo umor phọ ạna Eeron rꞌạnmuny phọ ọdi, pịdi bịdi oḍighi riil ạrikia ạmi.

⁵ Awe ẹmaar-iiḍighi ạḍighaagh phọ ọsighe abiloogh, oodor, ḅịle rꞌọtogh-tọgh ogbidagbida ukpe, iri agol, ḅịle rꞌọyegheyeghe ukpe kụ ọkolom.

⁶ “Bịdi ọkolom ạsuoma iikpera ạraghaagh phọ abiloogh, oodor, ḅịle rꞌọtogh-tọgh ogbidagbida ukpe, iri agol, ḅịle rꞌọyegheyeghe ukpe dị olho ịnme.

⁷ Ẹlogh ịyal ịkpapham sịphe ọogaany phọ.

⁸ Itulom sịphe ạsuoma iikpera ạraghaagh phọ okuughaam dị ọmaar olho.

⁹ Sịghe ịyal ạrana ọniks kụ ạge ạnyu ạrana phọ siḍien aḍioph rꞌịyal ạnmuny phọ ạJekob,

¹⁰ dạph ikumoor kụ ạge odiiny ạbuno esi ḅịle odiiny ạbueri phọ esi.

¹¹ Tom oye ẹmaar lọ rạlem ghan gol kụ ọdi ạge ạnyu ạrana phọ siḍien ạnmuny phọ ạJekob, kụ ạḅam rạna phọ edama agol.

¹² Ọdaphari ạnyu ọpha ạsuoma iikpera ạraghaagh ẹmeera enye aḍioph rꞌịyal arughunughun phọ Ịzirel. Ịduon phọ pọ Eeron katool siḍien phọ ạbidi ạnyu ọpha ạsuoma iikpera ạraghaagh ọdi, pịdi mị Ọmoogh-we phọ ạatughian ghan weye phọ ạmi.

¹³ Sịghe gol ạlemom ịyal aradama,

¹⁴ rꞌịyal ikoli dị ọlemom ogey agol dị ọphur kụ ạkpoom radama phọ.

Ọsuaram ekpologhi phọ

¹⁵ “Kọl ọsuaram ekpologhi lọ ogbogh oyil ạrikia phọ kalegheriom ghan igbiighi phọ Ẹnaan. Kọlom iniin phọ arukpe phọ ọkolom bọ iikpera ạrusuoma phọ ạḅile alho eniin phọ elhoom mọ.

¹⁶ Inya phọ aruukuna phọ eeleeny kụ okpo ịyal amem, 22 ẹkulom ạḍighaagh ḍịdoony ḅịle 22 ẹkulom ạḍighaagh ḍịregh.

¹⁷ Kọol inya ạsikool ịikia ikpo ạrana ạnyu phọ; ạḍiḅel ạḍikool phọ eḍighi rubi, topaz rꞌaganet;

¹⁸ ḍịkool dị emuneniom ịyal eḍighi ẹmerald, sạfair rꞌạdayamon;

¹⁹ ḍịkool dị emuneniom ịraar eḍighi tọkuos, ạget rꞌametist;

²⁰ ḍịkool dị emuneniom inya eḍighi bẹril, ikpo ẹbe rꞌạjaspa. Ịphen phọ kọḅam ạnyu edama agol.

²¹ Tọrotoro ẹna esi aḍioph rꞌịyal phọ ẹmoogh ghan ḍien oniin ọony phọ ạJekob dị ọge, ọmeera enye arughunughun phọ Ịzirel.

²² Ịlo ọsuaram ekpologhi phọ, sịghe ogey agol kụ ạkpa ịdipho oḍigh.

²³ Sịghe gol ạlemom ịyal arokoro kụ ạkpo ẹpe aruukuna ạnyu ọsuaram ekpologhi phọ

²⁴ kụ ạkpoom ịyal phọ iḍigh agol phọ ịyal phọ ariigida phọ.

²⁵ Sịghe ịpheri phọ ịyal aruukuna oḍigh phọ ạkpoom ịyal aradama phọ kụ ạsighe bịdi atulom risigh ạrapha ạsuoma iikpera ạraghaagh phọ.

²⁶ Kụ ạsighe gol ạkaam ịyal ariigida kụ ạsighe ạkpoom ruukuna ẹpe ude ọsuaram ekpologhi phọ eekuna ẹpe ologhi phọ ạsuoma iikpera ạraghaagh phọ.

²⁷ Sịghe gol ạkaam ịnon ịyal ariigida ạkpoom ẹpe ude arisigh ịyal ạrupha ạsuoma iikpera ạraghaagh phọ atumeniom sịphe okpo bọ olho ḅịle epelom okuughaam mọ ọmaar bọ olho.

²⁸ Sịghe oḍigh lọ aḍighi ạbiloogh ạḅar riigida ọsuaram ekpologhi phọ rꞌariigida ạsuoma iikpera ạraghaagh phọ ạkagh, pịdi ọsuaram ekpologhi phọ ạtol ạnyu okuughaam mọ bịn kạ́katanu.

²⁹ “Mem lọ Eeron aḍigh Dọl Iigbia phọ, ọdi kạkpologhian ọsuaram ekpologhi phọ ọphon ọge bọ siḍien arughunughun phọ Ịzirel, pịdi mị Ọmoogh-we phọ ạatughian ghan weye phọ ạmi.

³⁰ Lọgh Urim rꞌaTumim mọ sịphe ọsuaram ekpologhi phọ, pịdi Eeron ạpam ghan mem lọ ọdi ratu egbodo iigbia phọ ạmi. Ọdo amem mọ ạmuen ọdi ạmoogh ọkpologhian ghan ọsuaram ekpologhi phọ ọphon, pịdi ọdi atue ghan alegheri igbiighi phọ ạmi ịlo awe phọ Ịzirel.

Ịnon ibura ariil ạrikia phọ

³¹ “Ọodoony ạsuoma phọ odi bọ ạnyu ạsuoma iikpera ạraghaagh phọ aḍighi ogbidagbida ạbiloogh ukpe bịn.

³² Ạmoogh ni orum lọ ẹmhu oye keḍigh, ḅịle orum ạsuoma ọmaar olho ịlo kẹ́paaru.

^33-34 Oomo aruukuna phọ okitonom ẹpe ade phọ kpọoghi rughuuny ekpetughe dị oḍighinom ọyegheyeghe ukpe ḅịle rꞌạbiloogh, oodor, ḅịle rꞌọtogh-tọgh ogbidagbida ukpe, kụ apelegha ghan ạkpooghi rạraar dị ẹghigh ikpo ịdeneneen agol.

³⁵ Eeron ạkpologhian ghan ạsuoma phọ ọphon mem lọ ọdi rạpinyon rịkia. Mem lọ ọdi ratu egbodo ạmi sịphe Ạdol Iigbia phọ mụghumo ọdi rạḍua sịphe phọ, kọnaghan ghan ni ḍịaḅa ịdeneneen phọ, bịn ọdi kámugh.

³⁶ “Sịghe ogey agol kụ ạlemom ịnme mọ ‘Mọḅogh ọngo Ọmoogh-we phọ.’

³⁷ Sịghe oḍigh ạbiloogh kụ ạkagham ịphen phọ sịphe arisigh eghoony phọ.

³⁸ Eeron azua ghan sịphe elhor phọ ọdi, pịdi mị Ọmoogh-we phọ ạle ghan oomo ạrikia lọ awe phọ Ịzirel ụngo ịmi, ghạlamo awe phọ ụpioman ni esi ẹphighironom mọ.

³⁹ “Sịghe ọyegheyeghe ukpe kụ ạkolonaan ibura Eeron, rꞌeghoony ḅịle rꞌonyoraam dị ọnighemiom ịma elhoom.

⁴⁰ “Kọl ibura, inyoraam rꞌịbam aroghoony ạngo nmụny phọ Eeron, esi ọngo ạbidi ẹnighe rꞌarughuenian.

⁴¹ Bur ibura phọ ịphen umor phọ ạna Eeron rꞌạnmuny phọ ọdi, kụ ạsighe mụnum-ọliv ạsagharan rụmhu ạbidi esi odeneghi ạbidi ọḅogh ọngo, pịdi bịdi oḍighi riil ạrikia ạmi.

⁴² Sịghe ọyegheyeghe ukpe ạkolonaan bịdi sinika dị ẹḍua esin esi rụgbo ọbo bịdi kọtol ghan bọ ẹdaḅa.

⁴³ Eeron rꞌạnmuny phọ ọdi ọmoogh oonmenan ghan ịphen phọ mem lọ bịdi roḍigh Ogbogo Ạdol phọ ạmi mụghumo rotuman enmeny ạrikia phọ sịphe Ạdol Iigbia phọ, ọbo komugh ghan bọ mọ ọtuan eeghe kụ ọdi ẹdaḅa. Ọphon phọ ologh ọnyo Eeron rꞌẹemara ẹemara ọdi kꞌagee-pọ.