Ẹḍua 25 - Ạḍinya Iigbia

Inmo ịlo Ogbogo Iigbia

¹ Ọmoogh-we phọ ạḅeni Mozis mọ,

² “Ḅẹni we phọ Ịzirel mọ ụngo ịmi ruunmo. Bọor ghan tọrotoro ịyaar lọ oye ameeraam ọngo.

³ Ịphen kụ ạraraar phọ bịdi kọngo ghan bọ: agol, asilva rꞌenaba;

⁴ ọyegheyeghe ukpe; ạbiloogh, oodor rꞌọtogh-tọgh ogbidagbida ukpe; ukpe lọ oloom suphuugh ạrutu-ịga;

⁵ ozu odughuna dị ọtoghomi; ọyegheyeghe ozu ạtu-ọga, oreeny ạkasia;

⁶ mụnum ọsuom ịtozi phọ; rạraar lọ kẹnighemi mụnum-ịko phọ ẹḅile ẹnighemi eḍu ịnsens phọ;

⁷ ikpo ẹbe ḅịle rꞌịnon ọdo ịkuta dị kọkpoghi onyoraam, ọḅile ọsuaram ekpologhi ogbogh oyil ạrikia phọ.

⁸ Awe phọ ụlhoghonaan ịmi ogbogo iigbia pịdi mị ạtol ghan rꞌạbidi.

⁹ Ịtuugh ịpe mị kiḍeenaan bọ inyina kụ ẹlhogh.

Igbe Ịyo phọ

¹⁰ “Ịsighe oreeny ạkasia kụ ẹkaam igbe; 110 ẹkulom ạḍighaagh ḍịdoony, 66 ẹkulom ạḍighaagh ḍịregh, 66 ẹkulom ạḍighaagh ạnyu.

¹¹ Iḍighinom ologhi phọ rꞌạnyu phọ ogey agol, kụ ẹḅile ẹghoor gol phọ ekitonom.

¹² Ịlogh inya ịkoro dị oḍighinom gol etulom inya phọ aruwol phọ ọdi, ịyal ịne agha ịyal ịne agha.

¹³ Ịsighe rọkolom ạkasia dị oḍighinom gol kụ eḅughe sịphe ịkoro phọ

¹⁴ eḅughe sịphe ịkoro ịigaany phọ.

¹⁵ Rọkolom mọ kọkporori bịn sịphe ịkoro phọ ọbilenom.

¹⁶ Lọgh sịphe igbe phọ ịyal ipoḍi asighiigh phọ ịpe ọge bọ iilogh phọ mị kịngo bọ nyịna.

¹⁷ “Ịsighe ogey agol ẹkaam ekpereghi, 110 ẹkulom ạḍighaagh ḍịdoony, 66 ẹkulom ạḍighaagh ḍịregh.

¹⁸ Ịsighe gol ẹgurogh ẹpeḅeremi kụ ẹlemom ịyal ạruukpaany aghuḍuul dị ẹmoogh raphaaph,

¹⁹ oniin ạrol eniin eekuna ekpereghi phọ. Ịka bịdi ẹḅaraghiom ekpereghi phọ.

²⁰ Ạruukpaany aghuḍuul phọ ẹmoogh bọ raphaaph phọ eesomanan, ḅịle araphaaph phọ ạbidi ẹetaranu eghoph igbe phọ.

²¹ Lọgh ịyal phọ asighiigh phọ ologhi igbe phọ kụ akpereghi.

²² Mị kạteeny nyịna sịphe, ḅịle sịphe ạnyu eekpereghi phọ igbo ịyal ạruukpaany aghuḍuul phọ ẹmoogh bọ raphaaph phọ kụ ẹdi mị kạngo nyịna iilogh phọ awe phọ Ịzirel kọtolom bọ.

Ịdaabili ọḅam ghan ạbred dị kọngo Ẹnaan

²³ “Ịsighe oreeny ạkasia kụ ẹkaam ịdaabili; 88 ẹkulom ạḍighaagh ḍịdoony, 66 ẹkulom ạḍighaagh ḍịregh, 66 ẹkulom ạḍighaagh ạnyu.

²⁴ Igbul oomo phọ ọdi gol, ẹḅile ẹsighe gol eghoorom iigboom mọ ekitonom.

²⁵ Sịghe gol kụ ạḅagham ruukuna phọ ekitonom oḍual rꞌegbem ẹkulom ạḍighaagh ḍịregh.

²⁶ Sịghe gol kụ ạlhemom inya ịkoro kụ ẹlhogh inya phọ aruukuna phọ ẹpe aruwol phọ edi bọ.

²⁷ Ịkoro phọ ịpe kẹpam bọ rọkolom mọ kopoophiom ghan bọ ịdaabili phọ ẹrol etuman ẹpe ọḅagh bọ.

²⁸ Sịghe rọkolom ạkasia kụ ẹkaam ireeny phọ kụ egbul gol.

²⁹ Sịghe ogey agol kụ ạlhemom rụkpa rꞌizoki ọphugholom ḅịle rꞌiigboghom ạsigbagba lọ koḍighinom ghan mem ạrikia-amiim.

³⁰ Seere ghan ịdaabili phọ risigh Igbe Ịyo phọ, ḅịle ạnyu ịdaabili phọ ạbred iigbia phọ ạmi ạrol ghan oomo amem.

Ọmeremiom ọtozi

³¹ “Sịghe ogey agol kụ ạlhemom ọmeremiom ọtozi. Ẹpe ade phọ ḅịle rꞌẹpe ạnyu phọ ḍighinom gol dị ọgurogh ọpeḅeremi; ịnme phọ ọdi ẹḅaram ịizughum rꞌipoola eḍighi ni pạkiri ọdi.

³² Odiiny ịla ẹrol sịagaany phọ, ịraar ịne pạkiri.

³³ Tọrotoro ọla esi odiiny phọ ạmoogh ịnme dị ẹghigh ipoola ọmir-ighool rꞌịzughum.

³⁴ Ẹpe ạnyu phọ sịphe ọmeremiom ọtozi phọ ẹmoogh inya ịnme dị ẹghigh ipoola ọmir-ighool rꞌịzughum.

³⁵ Oniin ọzughum ạrol ghan eeḍian ạtorotoro ọla.

³⁶ Ịizughum mọ, ịla phọ ḅịle rꞌọmeremiom ọtozi phọ eḍighi eniin ịyaar dị ọlemom gol dị ọgurogh ọpeḅeremi.

³⁷ Ịlem oḍual ịtozi ẹḅamaghi ạnyu ọmeremiom ọtozi phọ, pịdi eemor ghan esoor risigh.

³⁸ Sịghe ogey agol kụ ạlhemom ịkpapham mọ ḅịle rꞌịteleleeny ạrukpa phọ ọdi.

³⁹ Ịraardi rꞌoogh igbogh ịtoom ẹemor agol kụ ẹdi nạ kạsighe bọ kụ ạlemom ọmeremiom ọtozi phọ ḅịle rꞌoomo ịpheri phọ ạraraar phọ.

⁴⁰ Mạar ạtuugh ịpe mị aḍeenaan bọ nyịna ạnyu eegum mọ kụ ạlhem.