Ẹḍua 23 - Ạḍinya Iigbia

Iiḅi ịiruen

¹ “Kạ́kaaph aleenye ụḅem-mọ dị aḍighi ọkpe, ḅịle kạ́gba sịagba ọkpe ọphelom oye dị ạmoogh apum.

² Kạ́daph ḍita awe aḍighi ịkaraph mụghumo ọgba ịlo kẹgoghoghomi iiḅi ịiruen.

³ Kạ́pel aḍighan pạkiri, esi aḍighiton uwekulom.

⁴ “Eḍighi mạar dị nạ ạmiin nạm mụghumo ẹnam adool ẹpomoghian ạna dị ẹkatanu, sịghe ạghiomonaan nyọdi.

⁵ Eḍighi mạar dị adool mewiririom ude ẹnam adool ọdi, lọghonaan nyọdi ḍịghaagh ẹḅile ẹmeremi ẹnam mọ. Kátelhe bịn aten.

⁶ “Kạ́goghoghomi iiḅi ịiruen esi aḍighiton uwekulom.

⁷ Kạ́gbaanaan oye ọkpe, ḅịle kákiigh oye dị ụ́piom, loor esi dị mị kạ́bile ọliom oye lọ aḍighi ọdo ịkaraph phọ ịphen.

⁸ Kále ịgara loor esi dị ịgara reḍighi ghan ịdi awe kọ́miin mun ịpe eru bọ elhiom ḅịle rẹpuenaan ghan rạghaaph awe lọ ụ́piom.

⁹ “Kạ́gbiphoghom ooruen; nạ alegheri ni ịdi ạdol iiruen edi ghan loor esi dị nyina mẹrol ghan ni iiruen ẹpe Ijipt.

Omuneniom oḍual ạlha ḅịle rꞌomuneniom oḍual aḍio

¹⁰ “Esi odiiny ạsia iḅeph ni iizo anyina ẹḅile ebugha ịlo emite.

¹¹ Kụ ọlo omuneniom oḍual ạlha phọ ịbile ade phọ ephooghian, ḅịle kébugha tọro ịyaar lọ esi pạ ade phọ. Arukulom ole aani ịpe esi bọ, ḅịle ilhom ịnam ele ịlo esugha. Iḍighi kẹn ni ịduon phọ iizo avain phọ rꞌiizo ọliv phọ anyina.

¹² “Ikumuan ghan odiiny aḍio wiki phọ, kụ ọlo kékumuan omuneniom oḍual aḍio phọ, pịdi ạrebene phọ ạna ḅịle aruuruen lọ rokumunaan nyịna ḅịle ghạlamo ịnam mọ ạna epooghian.

¹³ “Ịnaghanan oomo ịpe mị Ọmoogh-we phọ mịḅeni bọ inyina. Kẹ́eḅereghi ịnon ạrumugh; kékol ghan roghol siḍien ạbidi.

Ịraar igbogh ạrayaal phọ

¹⁴ “Ile ghan ịraar ọdo ẹyaal ḍiniin ạlha ighueniom ịmi.

¹⁵ Ụnwanyu Abib, ụnwanyu phọ ọpo nyina ẹḍua bọ Ijipt emite, ile ghan Ẹyaal ạbred phọ yist ụ́logh bọ ịdipho mị ạto bọ ịngo inyina. Kéle ghan ạbred lọ ọlogh yist oḍual phọ aḍio phọ ẹyaal phọ kẹtol bọ. Kẹ́ḅaph ghan ọgbo bịn etu ọoḅereghi ạmi.

¹⁶ “Ile ghan Ẹyaal Ibugha mem lọ nyina emiigh ibugha. “Ile ghan Ẹyaal Arophoghoghoony mem osoor, mem lọ nyina emiigh ọku eemuma esi ịpe nyina ẹzuph bọ.

¹⁷ Tọrotoro ạlha mem lọ ịraar ọdo igbogh ạrayaal phọ ịphen ẹteeny, oomo alephiri phọ anyina ọmoogh oru ghan ooseeny ạmi, Ọmoogh-we Ẹnaan phọ anyina.

¹⁸ “Kẹ́ḅaram ghan ạbred lọ ọlogh yist mem lọ nyina ẹsighe ẹnam ẹphighironom ẹkia rịngo ịmi. Ẹnuum ịnam lọ ọphighironom ẹkia ụngo ịmi mem ẹyaal kị́tol ghan ẹḅaal ḍịroor.

¹⁹ “Tọrotoro ạlha ịsighe ghan ọḅel ọbiakpa lọ nyina ẹku eru sịphe otu Ọmoogh-we Ẹnaan phọ anyina. “Kémiim ghan mạmaam onhiin ọga phọ kụ ẹsaam mọony oyool-ọga mꞌạtu-ọga phọ.

Aruguan rꞌoroma

²⁰ “Mị katom ni ọokpaany mọ aḍia ghan akori iiko inyina ịduon nyina rẹki bọ ạḅile ịsighe inyina asiemi sịphe mị maakolobian bọ.

²¹ Ịnaghanan ghan ẹḅile eḍighi ghan ịlo ọdi ạḅem. Kẹ́gbagharan ịlo ọdi ạḅem, loor esi dị mị kụ urom ni nyọdi, ḅịle ọdi kápogh ạbile we lọ ọgbagharan.

²² Kụ ọlo eḍighi mạar lọ nyina ẹnaghanan nyọdi ẹḅile eḍighi tọrotoro ịlo mị ạto, mị katuphiom ghan oomo ẹpomoghian phọ anyina.

²³ Ọokpaany phọ ạmi kiḍiemiom ni inyina ạḅile ịsighe inyina asiemi rạmha Ạmorait rꞌạHitait rꞌạPerezait rꞌaKenanait rꞌaHivait rꞌaJebusait phọ, ḅịle mị kaagulemi ni bịdi.

²⁴ Kẹ́eḅereghi mụghumo ooseeny ạrumugh phọ ạbidi, ḅịle kẹ́daph reten ịiḅereghi phọ ạbidi. Iigulemi ịkaaneen ạrumugh rꞌạraphan phọ ạbidi.

²⁵ Eḍighi ịyaar lọ nyina iiseeny ịmi Ọmoogh-we Ẹnaan phọ anyina, mị kịsephom ni inyina eḍien rꞌạmuum ạḅile aporogh rẹezegh phọ anyina.

²⁶ Sịen ade phọ anyina ẹ́mar ạnir kạ́tol ḅịle ọkuruḅaka ạnir kạ́ḍua egbakoogh. Mị kịngo inyina kụudoony aghuḍum.

²⁷ “Mị kaḍighi ịdi aruugu ạmi kasiph ẹpomoghian phọ anyina; mị kạlogh ọgbaragbara igbo ạbuphe rꞌanyina robe bọ, kụ oomo ẹpomoghian phọ anyina osumughu.

²⁸ Mị kaakperemi ni ẹpomoghian phọ anyina; mị kaporogh ni ạkele Hivait phọ rꞌaKenanait phọ rꞌạHitait phọ ịduon nyina rẹki bọ.

²⁹ Mị káporogh bịdi ạkele ḍiniin ạlha bịn; mị aḍighi ịdipho, ade phọ keḍighi ẹekpua, ḅịle ilhom ịnam kẹpughan ni.

³⁰ Kpạripe, mị kaporogh ghan bịdi ẹnum ẹnum tụtu nyina eḍiza ẹkasian ọmoogh ade phọ.

³¹ Mị kaḍighi ịdi ạruuku ade phọ anyina kemiigh ẹpe Ọphiiny Akaba kụ ẹghi esi Ọphiiny aYufratis, ḅịle emiigh Meditarenian kụ ẹghi ẹteeny ẹdala ịisaar phọ. Mị kịngo ni inyina ịikpo apuemi bụo ade phọ kụ nyina eporogh bịdi ịduon nyina rẹki bọ.

³² Kékiran ịyo rꞌạbidi ḅịle rꞌạrumugh phọ ạbidi.

³³ Kémeera awe phọ ạbuphe orugh ẹmha anyina; nyina emeera, bịdi koḍighi ịdi nyina kịpioman ịmi. Eḍighi ịyaar dị nyina ẹeḅereghi rụmugh phọ ạbidi, keḍighi ni ḍiphil aḍuugh-aḍuugh ịngo inyina.”