Ẹḍua 21 - Ạḍinya Iigbia

Ịdi kọpam ghan rẹbene

¹ “Ịphen kụ iilogh dị nạ kạloghoḍinaan we Ịzirel:

² Eḍighi ịyaar lọ nạ agho ẹbene ọlo aHibru, pọ ọdi akumu nyịna odiiny ạsia. Kụ rẹman oḍual ạsia, bịle nyọdi dị ạḍua ạmoogha loor.

³ Eru mạar dị ạnir úpin mem mọ ọdi asi bọ kꞌạna, pọ ọdi kạ́pam ạnir kụ ạḍuanam; kụ aphin ni ạnir kụ arumom, pọ ọdi kạpam ni ạnir phọ ọdi akeelom.

⁴ Kụ eru mạar dị ọde-otu phọ ọdi kụ aphinanaan nyọdi ạnir kụ ạmaraghinaan nyọdi nmụny, mꞌalephiri mꞌạnmanyaan, kụ ọdi rạḍua, pọ ạnir phọ rꞌạnmuny phọ ạbuo ọde-otu phọ ọdi. Ogina ọdi bịn ạḍua.

⁵ Eru mạar dị ẹbene phọ ạḅem amitiom mọ ọno ạpomoghian ni ọde-otu phọ ọdi, ạnir phọ ọdi, rꞌạnmuny phọ ọdi kụ ọ́wa mọ oseere nyịno,

⁶ pọ ọde-otu phọ ọdi kạsighe nyọdi ạkimom otu ịiḅereghi. Sịphe kụ ẹdi koḍighi ịdi ọdi kạmeera asoman ọnhu-aḍibuo phọ kụ opuur aḅeri phọ bịn ọdi kaḍighi ẹbene oye phọ oomo asuḍughul-otu aghuḍum mọ ọdi.

⁷ “Oye lọ ạsighe ọnyani ọdi kụ aal ịdipho ẹbene, pọ ẹbene-ọnyani phọ kőseere mọ agheel ịdipho olephiri.

⁸ Eḍighi lọ oye phọ rꞌọnyani phọ ọdi ameeraam bọ ni mọ ọno kapin kụ ọnyani phọ ụ́ḅeeraan mun nyọdi, pọ kọḅile kụ oboola ọnyani phọ ọkar ọde phọ ọdi. Oye phọ káboola nyọdi ooruen ịdi eḍighi bọ ọdi maḍighi ọnyani phọ ịdi ị́nighe.

⁹ Eḍighi lọ oye agho ạnir ẹbene ọngo ọony ọdi, oye phọ kạpam ọnyani phọ mụdi ọdi kụ ạmar.

¹⁰ Eḍighi lọ oye aphin ọnon ạnir, pọ erughotu phọ ọdi kínmia. Oye phọ kạngo ghan ni ọḅel ạnir phọ eḍien rꞌarukpe rꞌoomo ariliom ịpe ạdol olhom rꞌạnir.

¹¹ Mọ ọdi ịduon óḍighi, pọ ọdi kaḍighi ịdi ạnir phọ kakeel kụ ikpoki kạ́boor.

Iilogh ịlo osiphom ạkom-sereghi

¹² “Oye lọ akuph oye kụ oye phọ amugh, pọ kokiigh ni nyọdi.

¹³ Kụ eḍighi ekperenom eḍighinom kụ aḍuugh emite, dị oye phọ ụ́utughian ologhi oghiigh, ọdi kasuma ni ạki ekpisi dị mị kạsaḅar aseere kụ ịyaar nyọdi kẹteeny.

¹⁴ Kụ mem dị oye ophin ologhi ạko enu, kokiigh ni nyọdi ghạlamo asuma kụ aḍigh ḍibuo enmeny ạrikia phọ mị ạsaḅar bọ aseere.

¹⁵ “Oye lọ ạgiph ọde mꞌonhiin ọdi, pọ kokiigh ni.

¹⁶ “Oye lọ asiph ọnon oye mꞌaal mꞌoseere ẹbene, pọ kokiigh ni.

¹⁷ “Oye lọ alhomaan ọde mꞌonhiin ọdi, pọ kokiigh ni.

^18-19 “Eru mạar lọ elephiri emite kụ oniin oye ạsighe ẹkpigba mụghumo aḅugh ḍịghaagh kụ agiphom ọnon oye kụ oye phọ ómugh, pọ kọ́liom nyọdi. Eḍighi ịyaar lọ oye phọ ạmina ẹmina émoon kụ ạakpeleghu ạpham ọkolhom ratelhiom, oye phọ aḍighi bọ kạkpe ni ikpoki ophiemi amem mọ, ạḅile apogh ghan tụtu oye phọ amoon.

²⁰ “Oye lọ ạsighe ịkpara kụ ạguroghom ẹbene ọdi, mꞌolephiri mꞌạnir, kụ ẹbene phọ amugh esi phọ, ọpo aḍighi bọ kọliom ni.

²¹ Kụ eru mạar dị ẹbene phọ úmugh kụ aḍio eten kụ ịyal aḍio eten, ọde-otu phọ kọ́liom. Aruphua ọdi lọ ephe pọ ẹgbanyaan ni.

²² “Eru mạar dị awe robeeghi kụ oḍighi ịyaar ạnir eghun-aḍien kụ ọkuruḅaka phọ ạḍua kụ úḍighinom ẹnon ịyaar, pọ oye phọ aḍighi bọ kạkpe ni ịikpia tọro ọnhu ikpoki lọ olhom mọ amuul dị ẹmeeraam ịlo bụo ịiruen phọ osoph.

²³ Kụ eru mạar dị oḍighi ịyaar ạnir phọ rꞌaloor, pọ ịikpia keḍighi ghuḍum rꞌaghuḍum,

²⁴ ekpeḍien rꞌekpeḍien, ọlaay rꞌọlaay, ạḍighaagh rꞌạḍighaagh, owol rꞌowol,

²⁵ ạnian ẹsu pọ ạnian ẹsu, ẹgha rꞌẹgha, ọkpoghoron rꞌọkpoghoron.

²⁶ “Eḍighi ịyaar lọ oye aḍighi mạar ẹbene mꞌolephiri mꞌạnir ịdi ekpeḍien keḅomaan, ọdi kaseere ẹbene phọ agheel loor esi dị ekpeḍien phọ ọdi moḅom bọ.

²⁷ Eḍighi ịyaar lọ oye aḅoghoron ọlaay, ọdi kaseere ẹbene phọ mọ agheel.

Iiḍighi uwo ẹmoogh

²⁸ “Eḍighi ịyaar lọ aḍilephiri ạnam kụ akul oye aghiigh, mꞌolephiri mꞌạnir, pọ kotoḅol ikpo nạm mọ ạḍiphe okiigh, iphulupul phọ oye kụ́ba. Uwo ạnam mọ mạar ọ́piom; kọ́liom nyọdi.

²⁹ Eḍighi ịyaar lọ ạnam rekulogh we kedoghoḍi rạagha kụ ọphur rụru uwo ạnam mọ kụ ọ́lhogh oghoony, kụ ạnam mọ ekul oye eghiigh, mꞌạnir mꞌolephiri, pọ itoḅol ikpo nạm mọ eghiigh, kụ eghiigh aani uwo ạnam mọ.

³⁰ Eḍighi ịyaar lọ omeera mọ uwo ạnam mọ ạkpe ịikpia ọphelaam ẹmhu ọdi, pọ ọdi kạkpe ni oomo ịlo ọḅem.

³¹ Eḍighi ịyaar lọ ạnam mọ ekul mọony oye mꞌọnyani oye eghiigh, pọ ịtuugh ịdipho phọ eḍighi.

³² Eḍighi ịyaar lọ ạnam mọ ekul ẹbene ọnon oye eghiigh, mꞌạnir mꞌolephiri, pọ uwo ạnam mọ ạkpe nyọpo ạmoogh bọ ẹbene phọ ịraardi ipoḍi asilva, eroḅol ikpo nạm mọ eghiigh.

³³ “Eḍighi ịyaar lọ oye kụ akpegheron ekpereghiom ooni bịn ạwile, mụghumo aguph ooni kụ ókpereghi ologhi kụ ạnam mꞌẹnam adool ọnon oye esuma ologhi phọ,

³⁴ pọ oye phọ aguph bọ ooni phọ kạkpe ni ikpoki uwo ẹnam mọ, ạsighe ẹnam mọ emugh bọ.

³⁵ Eḍighi ịyaar lọ ạnam oniin oye kụ eghiigh nạm ọnon oye, ịyal phọ awe phọ kobool nạm mọ odi bọ kụ odian ikpoki phọ; bịdi kọḅile kẹn odian iphulupul ẹnam mọ emugh bọ.

³⁶ Kụ eru mạar dị olegheri mọ ạnam mọ ịmoogh ni ẹeghara ophorogh ghan awe kụ uwo ạnam mọ ọ́sighe ọlogh oghoony, pọ uwo ạnam mọ kạkpiom nạm dị amoon nyọori phọ oye phọ, kụ ạpam ḍịphe emugh bọ.