Ẹḍua 20 - Ạḍinya Iigbia

Ḍioph iilogh phọ

¹ Ẹnaan ẹghaaph oomo ịphen kụ ẹḅem mọ,

² “Mị kụ Ọmoogh-we Ẹnaan phọ anyina ọpo ịsighe bọ inyina ạḍuanam ẹpe ade phọ Ijipt sịphe nyina eḍighi ghan bọ rẹbene.

³ “Emuton ịmi ẹnon ẹmugh kạ́aḅereghi.

⁴ “Kạ́kaanaan loor ạna ịyaar tọrobo ịlo ẹrol, ẹpe kꞌạke mꞌịsien ade phọ mꞌologhi ạrumuum mọ edi bọ eeḍian ude phọ.

⁵ Kákpuḍian ạngo ịyaar lọ ọka, ḅịle mꞌooseeny ọngo, ịdi eḍighi bọ mị kụ Ọmoogh-we Ẹnaan phọ ạna. Mị Ẹnaan útiran aroḅopha. Mị kạliom ni bụlo ụlogh ịmi ḍien asiemi oghiil ạnmuny ạnmuny ạbidi dị omuneniom ịraar mụghumo inya.

⁶ Kụ ọnma ighirigiir kạtolonaan ni sịmuunir ạbulo ụphomoghian ịmi kụ ooko ghan iilogh phọ ạmi.

⁷ “Kạ́sighe ghan ḍien Ọmoogh-we Ẹnaan phọ ạna apeghom ephegh, ịdi eḍighi bọ mị Ọmoogh-we phọ kạ́sar ạ́bilenaan oye lọ apeghom ephegh ḍien phọ ạmi.

⁸ “Mạar aako ḍio ophooghian phọ kụ aseere dọl iigbia.

⁹ Odiiny aḍio kụ ịdi nạ kakumuan oomo arukumuan phọ ạna.

¹⁰ Kụ ḍịphe emuneniom bọ oḍual phọ, aḍio ophooghian dị museenaan ịmi Ọmoogh-we Ẹnaan phọ ạna. Ḍio phọ ạḍiphe oye oḍighi kúḍighi, mꞌạna, ọony ạna, ọnyani ạna, ọony-otu ạna, ọnyani-otu ạna, ạnam ạna, ẹnam adool ạna, ịnam ạna, ghạlamo aruuruen lọ odi eelhe ạna.

¹¹ Ịsiphe odiiny aḍio phọ kụ ẹdi mị Ọmoogh-we phọ ạlhem bọ kẹ phọ rꞌade phọ, rꞌọphiiny phọ, rꞌoomo ạraraar lọ edimom, kụ aphooghian ḍịphe emuneniom bọ oḍual aḍio phọ. Ịduon kụ ẹdi mị Ọmoogh-we phọ ạseph bọ ḍio ophooghian phọ aseere ḍio iigbia.

¹² “Lọgh eegu ọde ạna rꞌonhiin ạna, ịdipho Ọmoogh-we Ẹnaan phọ ạna mạto bọ ạngo nyịna, ọbo ariiḍio ạna ẹdoony, ẹnighenom nyịna, sịen aḅirini phọ Ọmoogh-we phọ Ẹnaan phọ ạna rạngo bọ nyịna.

¹³ “Oye kákiigh.

¹⁴ “Ẹmha kále.

¹⁵ “Imi kámi.

¹⁶ “Kạ́pu ọkpe bịn ạgba ạḅam ẹmhu oye.

¹⁷ “Káseph otu ọnon oye ạsighenom, káseph ạnir ọdi ạsighenom, mꞌọony otu ọdi, mꞌọnyani otu ọdi, mꞌạnam ọdi, mꞌẹnam adool ọdi, mꞌạtorobo ịyaar lọ ọdi ạmoogh.”

Aruugu asiph we phọ

¹⁸ Mem dị bịdi ọnaghan bọ ọraphan aḍio phọ rꞌọkuodu phọ kụ ọmiin bọ mụghi phọ aakpereghiom bọ eegum mọ, rꞌọmepheghian phọ, oomo awe phọ uphiigha ni rꞌaḍiigu kụ ọmeregha kꞌekpisi dị ẹkel.

¹⁹ Kụ bịdi ọḅeni Mozis mọ, “Nạ kụ kạaph ghan ụḅeni iyoor, yoor kọnaghanan ni nyịna. Eḍighi mạar dị Ẹnaan kụ ịḅaanaan iyoor, yoor komuughu ni.”

²⁰ AMozis ạḅeni we phọ mọ, “Kékiilaan. Ẹnaan meru ọoḅeghion anyina ophogh ḅịle rꞌoḍighi ịdi nyina kẹnaghanan ghan nyọdi, ọbo nyina kẹpioghom ghan bọ.”

²¹ Kụ awe phọ ọmeregha kꞌẹpe egher. AMozis aḍuraan aḍigh ologhi ọkikiph ufiri phọ ẹpe Ẹnaan ẹrol bọ.

Iilogh arenmeny ẹkia

²² Ọmoogh-we phọ ạḅeni Mozis mọ, “Kạaph ịphen phọ ạḅeni we phọ Ịzirel mọ, ‘Nyina mẹmiin ni mọ mị odi ẹphen ạnyu ạke phọ, kụ nyina rꞌạmi rọkaaph ghan bọ.

²³ Kẹ́kaaghi ghan rụmugh asilva rꞌạrumugh agol ẹ́ḅaram ooseeny ạmi.

²⁴ Ịkananaan ịmi enmeny ọogha kụ ạnyu ịsiphe phọ ẹze iyool-ịga, rụtu-ịga anyina, rꞌạsinam anyina, ẹphighironom ghan ẹkia ạnian rꞌẹkia ẹboroph. Tọrobo esi lọ mị amitiom aseere mọ iiseeny ghan ịmi, mị katu ni ịngo inyina ḍịseph.

²⁵ Eru mạar dị nyina ẹsighe ḍighiigh rịkananaan ịmi enmeny ạrikia, pọ kéekoroghi ghan sighiigh lọ moogbo, ḅịle mꞌịlo mọparion, kụ ẹkanam. Aḍighiigh lọ elhool ẹḅoghom meeph oḍighinom.

²⁶ Kíḍighinaan ịmi enmeny dị kọoda kụ ọsiiny, ọbo kọmiin ghan bọ ẹdaḅa phọ anyina mem lọ nyina rẹsiiny kẹghi.’