Ẹḍua 14 - Ạḍinya Iigbia

Ọḅeeny Ọphiiny Igbilha phọ

¹ Ọmoogh-we phọ ạḅeni Mozis mọ,

² “Ḅẹni we Ịzirel mọ bịdi oḅula ọman sịphe emitenom aPi Hahirot odoghoḍi rugbogo igbo aMigdol rꞌỌphiiny Igbilha phọ esi dị etuman Baal Zefon.

³ Ọdaam eelhe phọ kagbi mọ awe phọ Ịzirel royeela ni bịn ẹpe eelhe phọ kụ mọ ẹdala phọ mesophoghom bịdi.

⁴ Mị kạkparami ologhi ọdaam eelhe phọ kụ ọdi aporogh bịdi, kụ ọkpar opu phọ ạmi esi ọdaam eelhe phọ rꞌoomo awe ẹgham mọ ọdi kụngo ni ịmi rughuenian. Kụ awe phọ Ijipt kolegheri ni mọ mị kụ Ọmoogh-we phọ.” Kụ bịdi ọtuugh ịdipho phọ oḍighi.

⁵ Kụ mem dị ọḅeni bọ ọdaam eelhe phọ Ijipt mọ awe phọ mosuma, ologhi ọdaam eelhe phọ rꞌabutelhedom mọ ọdi anmia, kụ ọḅem mọ, “Ịphen yira oḍighi bọ ịghen? Yira mọwile we phọ Ịzirel mọ ogheel bịn iyira rókumu mun?”

⁶ Kụ ọdi aselemi oghuugh ẹgham mọ ọdi kụ aakpomoghi we ẹgham mọ ọdi ookolobian.

⁷ Kụ ọdi aḅetenu rꞌoomo arughuugh phọ kụ ọḅaram odiiny okuron ọkaraghi abugey ạbuphe rokiilom ghan bọ, ọḅaram buḍiemiom mọ.

⁸ Awe phọ Ịzirel rọḍua rꞌoboom oghur kụ Ọmoogh-we phọ ạkparami ni ologhi ọdaam eelhe phọ Ijipt, kụ ọdi aphorogh ozuom ạbidi.

⁹ Awe phọ Ịzirel uphorogh ni bịdi, rꞌoomo ạrusu phọ rꞌarughuugh-ude phọ, rꞌabukiilom mọ rꞌawe ẹgham mọ ọdi. Osoph bịdi osoor ọghi ọteeny bịdi esi dị bịdi modoghoḍi rugbogo ẹpe ọgbal Ọphiiny Igbilha phọ etuman bọ Pi Hahirot ọtol ropogh Baal Zefon.

¹⁰ Mem dị awe phọ Ịzirel ophogh kụ ọmiin mọ awe phọ Ijipt rotu, aruugu asiph ni bịdi kụ omiigh omoghi ọmagh Ọmoogh-we phọ.

¹¹ Kụ ọḅeni Mozis mọ, “Ịdipho ịdi ariiḍi ílho ẹpe Ijipt kụ nạ ụsighe bọ iyoor arumom ẹphen ẹdala phọ mọ yoor omuughu? Esi ika kụ ẹdi nạ ạtuan bọ kụsighe iyoor ạḍuanam Ijipt?

¹² Yoor nyịna ụ́ḅeni kụ yira oḅetenu bọ mọ ịphen kụ kemite? Yoor ụḅeni nyịna mọ, ‘Ụwile iyoor wororoph yoor ọrol dọl ạrebene phọ ọngo we phọ Ijipt ọghiom ghisigh.’ Mịnighe ghụn dị yoor mụtol ẹpe dọl ạrebene phọ rꞌoru omuughu ẹphen ẹdala phọ?”

¹³ AMozis ạḅeni we Ịzirel mọ, “Kékiilaan, ịpama riḅiom anyina, kụ ẹrol ẹmiin pẹleeny Ọmoogh-we phọ, ịdi ọdi kiḍighinaan inyina rodon. Awe Ijipt phọ ạbuen nyina rẹmiin bọ rodon, nyina bịdi kẹ́miin mun kꞌagee-pọ.

¹⁴ Ịpam oomiigh anyina. Ọmoogh-we phọ kebian ni inyina.”

¹⁵ Ọmoogh-we phọ ạḅeni Mozis mọ, “Nyina rimoghiom ghan ịmi eeghe? Ḅẹni we phọ Ịzirel mọ oḍuraan ọghi risigh.

¹⁶ Poophe ịkpara phọ ạna ạgbuton ḍịghaagh ạna ạnyu ọphiiny phọ. Ạmuum mọ kadia ni bịn awe Ịzirel kotue ni otelhe ạnyu ade ọḅeeny ọphiiny phọ.

¹⁷ Mị kạkparami ni iloghi awe phọ Ijipt, kụ bịdi iḅoon inyina, kụ ọkpar opu ạmi esi ọdaam eelhe phọ rꞌoomo ạrusu phọ rꞌarughuugh-ude phọ ọdi rꞌabukiilom mọ rꞌoomo awe ẹgham mọ ọdi kụngo ni ịmi rughuenian.

¹⁸ Mem dị mị mạkpar apu bịdi, bụo Ijipt phọ kolegheri ni mọ mị kụ Ọmoogh-we phọ.”

¹⁹ Kụ ọokpaany kꞌẸnaan phọ ọpo aḍiemiom bọ we ẹgham mọ Ịzirel aḅetenu aten ọman ạbidi, kụ eekpoogh phọ ẹḅile kẹn ẹḍua risigh ạbidi, eru ẹmeera ọman ạbidi,

²⁰ tụtu esi ogbo arugbogo awe phọ Ijipt rꞌarugbogo awe phọ Ịzirel. Kụ ọotu phọ aḍighi ufiri esi awe phọ Ijipt, kụ ạngo we Ịzirel ḍịḅaal. Esi ịduon awe ẹgham ịyal ạga phọ útuman oomo aḍughul phọ.

²¹ AMozis ạgbuton ḍịghaagh phọ ọdi aphoghomiom ạmuum ọphiiny phọ, kụ Ọmoogh-we phọ aḍighi ịdi ọphiiny phọ adia sịphe ogbo phọ, loor oghim dị ạḍua ẹpe erumuḍio phọ remite ghan bọ kụ aghim oomo aḍughul phọ. Kụ ọphiiny phọ adia, kụ aḍighi ịdi ọphiiny phọ ạgharaghar aḍighi de.

²² Kụ awe phọ Ịzirel orelhe ọḅeeny ọphiiny phọ ạnyu ạḍigharaghar ade dị ạmuum mọ ạmeera ịdipho iikpe ḍịghaagh elhiom rꞌạḍighaagh ekeeny ạbidi.

²³ Awe phọ Ijipt ophorogh bịdi tụtu bịdi rꞌoomo ạrusu ọdaam eelhe phọ, rꞌarughuugh ẹgham mọ ọdi, rꞌabukiilom mọ ạbidi, oḍigh ọphiiny phọ.

²⁴ Kụ retu ọḅaal, kụ Ọmoogh-we phọ ạrol sịphe eekpoogh ạnian phọ rꞌeekpoogh ọotu phọ kụ aphogh ḍita awe phọ Ijipt, kụ ạwalawalami ḍita phọ ạbidi.

²⁵ Kụ ọdi aḍighi ịdi idighila arughuugh-ude phọ ẹḅaraghan ude, kụ ẹkparanaan bịdi ịlo oghiilom, kụ awe phọ Ijipt ọḅem mọ, “Ọmoogh-we phọ odianaan rꞌawe phọ Ịzirel rabianaan rꞌayira. Ọḍua sịen phọ.”

²⁶ Ọmoogh-we phọ ạḅeni Mozis mọ, “Gbụton ḍịghaagh ạna aphoghomiom ọphiiny phọ, bịn ạmuum mọ kaḅula ni ạminoghom we phọ Ijipt rꞌarughuugh ẹgham mọ ạbidi, rꞌabukiilom mọ ạbidi.”

²⁷ AMozis asele ḍịghaagh phọ ọdi aphoghomiom ọphiiny phọ kụ, mem dị retu ọḅaal, bịn ọphiiny phọ aḅula ạapheleghian ịdipho ạrol ghan bọ. Kụ awe ẹgham Ijipt phọ ọkururu osuma okpetenaan, kụ Ọmoogh-we phọ aḅiemi bịdi sịphe ogbo ọphiiny phọ.

²⁸ Ạmuum mọ aḅula ạrol ịdipho ạrol ghan bọ, kụ ạminoghom rughuugh ẹgham mọ, rꞌạbuphe rokiilom ghan bọ ịnam ẹgham mọ rꞌoomo aḍita awe ọdaam eelhe phọ, bụphe ophorogh bọ bịdi osiemi pạ ọphiiny phọ; rꞌoniin ọnyo ạbidi ósugha.

²⁹ Kụ awe phọ Ịzirel orelhe ạnyu ạḍigharaghar ade kụ ọḅeeny ọphiiny phọ. Ạmuum mọ ạmeera ịdipho iikpe ḍịghaagh elhiom rꞌạḍighaagh ekeeny ạbidi.

³⁰ Ḍio phọ ạḍiphe kụ ẹdi Ọmoogh-we phọ ạphel we Ịzirel ạsighe ḍịghaagh awe ẹgham mọ Ijipt. Kụ awe phọ Ịzirel ọmiin bịdi dị momuughu sịphe ọgbal ọphiiny phọ.

³¹ Mem dị awe phọ Ịzirel ọmiin bọ igbogh ịikpo dị Ọmoogh-we phọ mạsighe ọmooghom ọkpar opu esi awe Ijipt phọ, ọdi aḍigh ni ḍiigu riḍien ạbidi kụ bịdi ọmoogh omeeraam esi Ọmoogh-we phọ rꞌaMozis otelhedom mọ ọdi.