Ẹḍua 13 - Ạḍinya Iigbia

Ọḅogh ịkpana ạnmuny ọngo Ẹnaan

¹ Ọmoogh-we phọ ạḅeni Mozis mọ,

² “Ḅọgh oomo ịkpana ạnmuny alephiri phọ oghunyon bọ rughun ẹmaria sịphe awe phọ Ịzirel rꞌịnam mọ ụngo ịmi, loor esi dị tọro ẹḅel ẹmaria awe Ịzirel rꞌịnam ịlo ạmi.”

Ẹyaal ạbred dị yist ụ́logh

³ AMozis ạḅeni we phọ Ịzirel mọ, “Ịitughian ghan ḍio phọ arodon. Arodon kụ ẹdi nyina ẹḍua bọ ẹpe Ijipt emite, esi phọ nyina eḍighi bọ rẹbene; ạḍiikpara ạḍighaagh ọdi kụ ẹdi Ọmoogh-we phọ ịsighe bọ inyina amitiom. Íle ghan ạbred lọ ọlogh yist.

⁴ Aḍio phọ arodon ụnwanyu phọ ọphon, ọḅel ụnwanyu phọ Abib, kụ ẹdi nyina rẹḍua kemite Ijipt.

⁵ Ọmoogh-we phọ aguanaan bụrude phọ anyina ọngo anyina rere aKenanait rꞌạHitait rꞌẠmorait rꞌaHivait rꞌaJebusait phọ. Mem dị ọdi mịsighe inyina asiemi de phọ ạḍiphe ẹetool bọ, de dị ạmamaam ạnam rꞌẹnuum aḍiowo kụ rekil, tọrobo ạlha nyina kele ghan ẹyaal phọ ẹphen phọ ụnwanyu phọ ọphon.

⁶ Esi oḍual aḍughul-otu ile ghan ạbred dị yist ụ́logh kụ ḍịphe emuneniom bọ oḍual aḍughul-otu phọ nyina kele ghan ẹyaal oghueniom Ọmoogh-we phọ.

⁷ Esi oḍual aḍughul-otu phọ nyina kéle ghan ạbred dị ọlogh yist. Ayist kụ́tol ḅịle ạbred dị ọlogh yist kụ́tol tọro esi sịphe ade phọ.

⁸ Mem lọ ẹyaal phọ emiigh, ịkaaph ẹḅeni nmụny phọ anyina mọ nyina reḍighi ghan oomo phọ ịphen ḍio phọ ạḍiphe ịlo ọotughianam ịpe Ọmoogh-we phọ iḍighinaan bọ inyina mem mọ nyina ẹḍua bọ ẹpe Ijipt emite.

⁹ Ịphen phọ eḍighi dịadi ịyaar lọ ọkagh ḍịghaagh mꞌelhor anyina, dị kịghiom ghan inyina ologhi ọgbaam ghan rꞌọtuughaam ghan Ologh Ọmoogh-we phọ, ịdi eḍighi bọ rꞌạḍiikpara ạḍighaagh kụ ẹdi Ọmoogh-we phọ ịsighe bọ inyina ạḍuanam ẹpe Ijipt.

¹⁰ Ịtuugh ghan mem mọ ạmuen eeleghan ẹyaal phọ ẹphen ạlha etum lhạ.

Bụlo oghughuron oghun ẹmaria

¹¹ “Mem dị Ọmoogh-we phọ mịsighe inyina asiemi ẹpe ade phọ aKenan, ịdipho ọdi aghunya bọ esi anyina rꞌạburude phọ anyina kụ kịngo bọ ni inyina,

¹² nyina kẹgbatan ghan oomo ạbuphe oghunyon bọ oghun ẹmaria ẹngo Ọmoogh-we phọ. Tọro ẹḅel ẹmaria ịnam anyina lọ eḍighi elephiri, pọ ẹlo Ọmoogh-we phọ.

¹³ Tọro ẹḅel ẹmaria lọ ẹnam adool anyina ẹmar, pọ ịsighe enmeneniom ọony oyool-ọga. Kụ eru dị nyina kéenmeneniom, pọ ibun orum mọ. Oomo ịkpana ạnmuny phọ anyina, ịtagharan ghan.

¹⁴ Ḍio dị ọony ạna apuru nyịna mọ, ‘Ẹmhu ịphen phọ pọ ika?’ ḅẹni nyọdi mọ, ‘Esi ạḍighaagh iphelegbe phọ ọdi kụ ẹdi Ọmoogh-we phọ ụsighe bọ iyira amitiom ẹpe Ijipt, ẹpe ạdol ạrebene.

¹⁵ Mem dị ọdaam eelhe phọ Ijipt ạḅaar ẹmhu kụ úmeera mọ yira ogheel, Ọmoogh-we phọ ạze tọrobo ẹḅel ẹmaria dị ọmar de phọ Ijipt, mꞌoye mꞌẹnam. Ịdipho kụ ẹdi yira roḍighinom ghan bọ ịyaar aghuḍum ẹkpana ẹnam kọngo Ọmoogh-we phọ, kụ ọḅile rọtagharan ghan bọ ịkpana ạnmuny phọ ayira.

¹⁶ Eḍighinom mọ ẹphen kẹtol ghan dịadi ịyaar lọ ọkpoom ḍịghaagh mꞌelhor ayira, dị kịghiom ghan iyira ologhi mọ rꞌạḍiikpara ạḍighaagh kụ ẹdi Ọmoogh-we phọ ụsighe bọ iyira amitiom ẹpe Ijipt.’”

Eekpoogh ọotu rꞌeekpoogh ạnian

¹⁷ Mem dị ọdaam eelhe phọ Ijipt ameera mọ awe phọ ogheel, Ẹnaan íkitonom bịdi eten phọ ọgbal ọphiiny kụ esi Filistia, ọbo ẹpe kụ iisulom. Ẹnaan ịitughian, “Mị ụ́wa mọ awe phọ onme iloghi phọ ạbidi mem dị bịdi ozuan ẹgham bịn ọḅile oḅula Ijipt.”

¹⁸ Kpạripe, Ẹnaan ikitonom we phọ eten ẹdala phọ ẹpe rẹki bọ Ọphiiny Igbilha phọ. Awe Ịzirel phọ ụnyaaghian ni ẹgham.

¹⁹ AMozis ạphamam ni ịḅarara phọ ạJosef, ịdipho awe phọ Ịzirel oguan bọ nyọdi kụ oseere sịa dị eten, ạJosef ạḅem mọ, “Mem dị Ẹnaan kịtagharan bọ inyina emitiom, nyina kẹpamam ni iphorobo phọ ạmi ẹḍuanam esi phọ ịsien.”

²⁰ Kụ bịdi ọḍua Sukot omiigh erelhe, kụ osi Etam ẹpe eekuna ẹdala phọ kụ odoghoḍi rugbogo ophoghan.

²¹ Ootaany Ọmoogh-we phọ aḍiemiom ghan bịdi rꞌeekpoogh ọotu oḍeenaan ạbidi eten, kụ ḍughul ọdi aḍiemiom ghan bịdi rꞌeekpoogh ạnian ọngo ạbidi ḍịḅaal, ẹrol dị bịdi otue otelhe ḍughul rꞌootaany.

²² Eekpoogh ọotu ịrol ghan oomo amem risigh awe phọ ootaany, kụ eekpoogh ạnian phọ ẹrol ghan ḍughul.