Ẹḍua 12 - Ạḍinya Iigbia

Ọphel otene phọ

¹ Ọmoogh-we phọ ạḅeni Mozis rꞌEeron pạ ade phọ Ijipt mọ,

² “Ụnwanyu phọ ọphon kụ kaḍighi ọḅel ụnwanyu ạlha phọ esi anyina.

³ Kạaph ạḅeni ookpomoghan oomo awe phọ Ịzirel mọ, ‘Ḍio phọ kemuneniom bọ ḍioph aḍughul-otu ụnwanyu phọ ọphon, oye ye kạsaḅar ghan ọony oyool-ọga mꞌọony ạtu-ọga ẹlo eghunotu ọdi.

⁴ Eru mạar dị ọto kꞌọdi oghom dị kótue ọba ekpom ẹnam ọman, pọ odi rꞌamatuman ọdi otue ni odian eniin ẹnam dị keeleeny rꞌọnhu awe phọ lọ bịdi kọba ọman.

⁵ Nyina etue ni ẹsaḅar odughuna mꞌekpe lọ ẹman lhạ kụ íḍigh egha.

⁶ Kụ dulhe aḍio phọ kemuneniom bọ ḍioph rꞌinya aḍughul-otu ụnwanyu phọ aḍita ookpomoghan oomo awe phọ Ịzirel kọzeeghi ịnam mọ.

⁷ Kụ awe phọ ọsighe ịnum ịḅaal phọ ogbulogh rụnhu-aḍibuo phọ rꞌạnyu arughuugh aruutu phọ bịdi kọtol bọ ọba ịnam mọ.

⁸ Ḍughul phọ ạḍiphe ịpophoghi ni ịnam mọ kụ elhiom ịikiripha eghiḍim, rꞌạbred dị yist ụ́logh.

⁹ Kẹ́ba imoom ḅịle kẹ́sa, ịba ịphophoghineen oomo phọ ọdi ẹḅaram ẹmhu phọ rꞌaruwol phọ rꞌịlo ọkuruḅaka phọ.

¹⁰ Késugheeny rꞌọpherepe tụtu ẹḅaal ḍịroor; eḍighi ịyaar dị esugha ẹnum, pọ ịlogh nịan.

¹¹ Ile elhom elhom. Ịkparamian rukpe anyina, edoghoḍian rokoro ruwol anyina, ẹpham ịkpara phọ anyina ḍịghaagh ẹnyia ọghi erelhe. Ẹphen phọ ẹyaal ọphel otene ọngo ạmi Ọmoogh-we phọ rughuenian.

¹² “‘Ḍughul phọ ạḍiphe mị katelhe ạḅeeny Ijipt, ạzeeghi oomo ịkpana ạnmuny phọ Ijipt, we rꞌịnam. Mị kasophonaan oomo ạrumugh phọ Ijipt ọoruen. Mị kụ Ọmoogh-we phọ.

¹³ Ịḅaal phọ ogbulogh bọ rụnhu-aḍibuo phọ keḍighi elegh dị keḍeenaan ruutu phọ ịpe nyina erughogh bọ. Mem lọ mị ạmiin ịḅaal phọ, mị kitenom ni inyina. Mị inyina ịyaar kíḍighi mem dị mị rạliom we phọ Ijipt.

¹⁴ Ịitughian ghan ịphen mị Ọmoogh-we phọ maḍighi bọ, eeko ghan ḍio phọ ạḍien eḍighi ẹyaal ọotughianam oghiil atum oghiil kꞌagee-pọ.’”

Ẹyaal ạbred dị yist ụ́logh

¹⁵ Ọmoogh-we phọ ạḅem mọ, “Esi oḍual aḍughul-otu nyina ạbred dị oḍighinom yist kéle. Ile ghan ọlo yist úḍighinom bịn. Ḍịḅel aḍughul-otu phọ, ịsighiogh yist sịphe aruutu phọ anyina. Oye lọ ale ạbred dị ọlogh yist emiigh kꞌạḍiḅel aḍughul-otu phọ kụ esiemi oḍual aḍughul-otu phọ, pọ itoph nyọdi ogbeph emutonaan nyọdi esi awe Ịzirel.

¹⁶ Ḍịḅel aḍio phọ rꞌạḍiphe emuneniom bọ oḍual phọ ịpam ghan ookpomoghan iigbia. Riiḍio phọ ịpe phọ oḍighi kụ́tol emuton ọsa eḍien.

¹⁷ Ịpamanam olhe ẹyaal ạbred dị yist ụ́logh, ịdi eḍighi bọ aḍio phọ ạḍiphe phọ kụ ẹdi mị ịsighe bọ inyina sịphe ade phọ Ijipt ạḍuanam. Esi ịduon phọ iiko ghan ḍio phọ ạḍiphe oomo oghiil phọ anyina, eḍighi eḍighinom ịyaar esi anyina kꞌagee-pọ.

¹⁸ Emiigh dulhe aḍioph rꞌinya aḍughul-otu tụtu ẹteeny dulhe ịyaldi rꞌoniin aḍughul-otu ọḅel ụnwanyu phọ, kéle ạbred dị oḍighinom yist.

^19-20 Esi oḍual aḍughul-otu yist kụ́miin iloghi aruutu phọ anyina. Tọrobo ọlo ọmiinom mꞌodi ooruen mꞌọlo ọmar sịphe ẹmha phọ dị alhe ịyaar dị ọlogh yist, pọ kotoph nyọdi ogbeph omutonaan nyọdi esi awe Ịzirel.”

Ẹḅel ẹyaal ọphel otene

²¹ AMozis ạmagh oomo ikumoor awe phọ Ịzirel kụ ạḅeni bịdi mọ, “Tọrobo ọnyo anyina kạsaḅar ọony oyool-ọga mꞌạtu-ọga kụ akiigh ẹrol dị arughunotu phọ anyina olhe ẹyaal ọphel otene phọ.

²² Ịsighe ịizughum ạhisop ẹtophori ịḅaal phọ edi bọ sịphe ologhi ạgbagba phọ, kụ egbuloghom rạḅaghaghaam rꞌạnyu eghuugh otu phọ, kụ ẹrol ologhi otu, erugh kémite tụtu ạḍiroor ẹḅaal.

²³ Mem dị Ọmoogh-we phọ arelhe yogh eelhe phọ ọze awe phọ Ijipt, ọdi kạmiin ni ịḅaal phọ sịphe ịḅaghaghaam mọ kụ kámeera mọ ọokpaany aḍuugh phọ aḍigh ruutu phọ anyina ịze inyina.

²⁴ Nyina keeko ghan eḍighinom ịyaar phọ ẹphen phọ, nyina rꞌạnmuny anyina, kꞌagee-pọ.

²⁵ Mem dị nyina eḍigh de phọ Ọmoogh-we phọ maguanaan bọ ọngo anyina, ịtuugh ịphen phọ eeko ghan.

²⁶ Mem lọ ạnmuny anyina ipuru inyina mọ, ‘Ụtuan ika kụ roḍighi ghan bọ ịphen phọ?’

²⁷ ịpagharanaan ghan mọ, ‘Yira rooko ghan ịyaar aghuḍum mọ ẹphen ọotughenam ịpe Ọmoogh-we phọ aḍighi bọ ẹpe Ijipt, mem mọ ọdi ạze bọ we phọ Ijipt kụ atenom bọ ruutu awe Ịzirel.’” Kụ awe phọ ozumeri rụmhu ạbidi kụ ooseeny Ẹnaan.

²⁸ Kụ awe phọ Ịzirel ọghi ọtuugh oḍighi ịdipho Ọmoogh-we phọ ạḅeni bọ Mozis rꞌEeron mọ oḍighi.

Aḍuugh ịkpana ạnmuny phọ

²⁹ Ogbo aḍughul kụ Ọmoogh-we phọ asoor ạze oomo ịkpana ạnmuny Ijipt, emiigh ọkpana ọdaam eelhe phọ, ọpo mụtolom bọ ạgada ọdaam mọ ọdi, kụ ẹteeny esi ọkpana oye dị odi ikoli phọ. Oomo ịḅel ạnmuny ịnam mọ ụze kẹn ni.

³⁰ Ọdaam eelhe phọ aḅetenu ḍughul phọ, ọdi rꞌoomo abutelhedom mọ ọdi rꞌoomo awe phọ Ijipt, kụ eboom emoghi ileeny ni oomo phọ Ijipt, ịdi eḍighi bọ otu ósugha dị aḍuugh ọḅel ọony ị́tol.

³¹ Ḍughul phọ ạḍiphe phọ ọdi arom ạghiom Mozis rꞌEeron kụ ạḅeni bịdi mọ, “Iḅetenu ẹḍua sịen ogbo awe phọ ạmi, nyina rꞌoomo awe Ịzirel, egheel ekumu Ọmoogh-we phọ, ịdipho nyina ẹlhom bọ.

³² Ịpamam iyool-ịga phọ rꞌạrutu-ịga phọ rꞌạsinam mọ anyina egheel, kụ ịsuan ni ịmi ogeny ọghor.”

³³ Awe ạbuo Ijipt phọ ọkpaariom we phọ Ịzirel mọ bịdi oogborion ọḍuaghu sịphe eelhe phọ ạbuno; kụ bịdi ọḅem ghan mọ, “Oomo ayoor komuughu ni eḍighi ịyaar lọ nyina íkeel.”

³⁴ Awe phọ Ịzirel ọḅologh ạbred dị yist ụ́logh kụ ọloghoḍi iloghi arokpolokpasi kụ ọsighiogh rukpe ophurughiom yogh, kụ oroologh rụpha ạbidi.

³⁵ Kụ bịdi ọtuugh oḍighi ịpe aMozis ạḅeni bọ bịdi; bịdi ọghi ọlomian rạghaagh awe Ijipt iinmenan rꞌạraraar inme dị ọsighe silva rꞌagol kụ oḍighinom.

³⁶ Ọmoogh-we phọ aḍighi ni ịdi awe phọ Ijipt ọlogh bịdi eghuan, kụ ọngaani yogh bịdi rạraar phọ ịpe bịdi ọlom bọ. Ịdipho kụ ẹdi awe phọ Ịzirel ạanyi ruphua awe phọ Ijipt ọḍuanam.

Awe phọ Ịzirel moḅetenu ọḍua Ijipt

³⁷ Awe Ịzirel umiigh ni erelhe owol ade ọḍua Rameses osi Sukot. Alephiri bịn ọkiom ni 600,000, nmụny rꞌạnmariir ụ́loghom.

³⁸ Aḍita ạbunon awe rꞌiyool rꞌạrutu-ịga rꞌạsinam ịdapham ni.

³⁹ Kụ bịdi ọgbaghaḍi iiḅoghoḍi ạbred phọ yist ụ́logh bọ ịdi eḍighi bọ uphorogh bịdi mọ ọḍua Ijipt ekperenom. Bịdi ụḍua rꞌephirighan, úukoroghian rạraar olhe.

⁴⁰ Awe Ịzirel ọrol bọ Ijipt 430 ạsia.

⁴¹ Ḍio phọ ekureri bọ 430 ạsia phọ kụ ẹdi oomo arughunughun awe phọ Ịzirel, awe phọ Ọmoogh-we phọ, ọḍua phọ sịphe ade phọ Ijipt.

⁴² Ḍughul phọ ạḍiphe Ọmoogh-we phọ ạrol okori ọsighe ạbidi omitiom ẹpe ade phọ Ijipt. Kụ ọdi ạto ạḅeni bịdi mọ ḍiniin phọ aḍughul phọ ạḍiphe phọ bịdi kọtol ghan ẹ́naani ịlo ọotughianam ịphen phọ oghiil atum oghiil.

Ịinua ọphel otene phọ

⁴³ Ọmoogh-we phọ ạḅeni Mozis rꞌEeron mọ, “Ịphen kụ ịinua dị mị ạlogh ịlo eḍien ọphel otene phọ ẹphen. Ooruen kúle ẹyaal phọ ẹphen.

⁴⁴ Tọrobo ẹbene lọ nyina ẹsighe ikpoki kụ eghoom kụ nạ maḍun, pọ ọdi ale ni.

⁴⁵ Ooruen dị kạ́tol abia ḅịle oye lọ ophir oḍighi, kúle.

⁴⁶ Ịtol ologhi otu ọsa bọ kụ ele, ị́pam ghan rꞌẹnum ephulupul emitenom erugh; íḅomoghi ghan ịḅarara phọ.

⁴⁷ Oomo ookpomoghan awe phọ Ịzirel kụ olhe ghan ẹyaal phọ ẹphen.

⁴⁸ Eru mạar dị ooruen dị mạrolan rꞌanyina kụ ạwa olhe aani ọphel otene Ọmoogh-we phọ, pọ oomo alephiri ạnmuny ọdi oḍuna yogh kụ agbi oru otuman anyina ooko aani ẹyaal ọphel otene phọ, pọ ọdi maḍighi ọlo ọmar sịphe ade phọ; ọlo úḍuna kúle.

⁴⁹ Ịinua phọ ịphen idianaan inyina ạbuo ẹmha phọ rꞌooruen lọ arughan rꞌanyina.”

⁵⁰ Kụ oomo awe phọ Ịzirel ọtuugh ọdaph ịpe Ọmoogh-we phọ ạḅeni bọ Mozis rꞌEeron oḍighi.

⁵¹ Ọkaraghi aḍio phọ ạḍiphe kụ ạḍidi Ọmoogh-we phọ ạsighe bọ we phọ Ịzirel amitiom sịphe ade phọ Ijipt.