Ẹḍua 10 - Ạḍinya Iigbia

Igurubia

¹ Ọmoogh-we phọ ạḅeni Mozis mọ, “Kịa kꞌọdaam eelhe phọ. Mị mạkparami ologhi ọdi rꞌologhi abutelhedom mọ ọdi, ẹrol dị mị amiteghom ịiḍaany phọ ạmi ịphen sịphe ogbo ạbidi.

² Ẹrol dị nạ akori ạkaaph ịdi mị ạgilaam we Ijipt mem dị mị aḍighi ịiḍaany phọ ịphen ogbo ạbidi ạḅeni nmụny ạna rꞌạnmuny ạnmuny. Oomo anyina kelegheriom mọ mị kụ Ọmoogh-we phọ.”

³ AMozis rꞌEeron ọghi kꞌọdaam eelhe phọ kụ ọḅeni nyọdi mọ, “Ọmoogh-we phọ Ẹnaan aHibru apuru mọ, ‘Kꞌạpur amem kụ ẹdi ọḅaar ẹmhu phọ ạna kakunian kụ nạ asooromi loor ạna esi ạmi? Meera awe phọ ạmi ogheel ukumu ịmi.

⁴ Kụ eru mạar dị nạ úmeera mọ awe phọ ạmi ogheel, pọ iḍue mị kaleenye igurubia sịen eelhe phọ anyina.

⁵ Aḍita ạbidi kekpereghi oomo phọ ade phọ ạna, dị oye kátue ạmiin; kụ ẹtaalogh tọrobo ịyaar lọ oghim mọ ụ́pue rꞌireeny lọ esughanaan nyịna.

⁶ Kụ bịdi eḍiku sịphe ogiga ọdaam eelhe phọ emuza rꞌaruutu abutelhedom mọ ạna, rꞌaruutu oomo awe Ijipt. Ọdo ịphen ọde ạna rꞌạburude ạburude ạna kọ̋miin ghan kꞌamem mọ ọmar bọ bịdi ẹteeny kꞌarodon.’” Kụ aMozis aaghiraan ạḍua.

⁷ Kụ awe iiḍighi ọdaam eelhe phọ opuru nyọdi mọ, “Oye phọ ọphon phọ kụ ụngo ghan iyira ịiḅaghami kꞌạpur amem? Meera alephiri Ịzirel phọ ogheel ẹrol dị bịdi ọki okumu Ọmoogh-we phọ, Ẹnaan phọ ạbidi. Nạ kőlhegheri nịiniin mọ Ijipt maphe?”

⁸ Kụ ọsighe Mozis rꞌEeron orumom kꞌọdaam mọ kụ ọdi ạḅeni bịdi mọ, “Ịki ekumu Ọmoogh-we phọ, Ẹnaan phọ anyina.” Kụ apuru bịdi mọ, “Bụanhian kụ rọki bọ?”

⁹ AMozis ạḅem mọ, “Oomo ayoor rꞌugheel phọ rꞌikumoor awe phọ rꞌạnmuny rꞌạnmanyaan, iyool rꞌạrutu-ịga rꞌạsinam ayoor, ịdi eḍighi bọ yoor rọki olhe ẹyaal Ọmoogh-we phọ.”

¹⁰ Kụ ọdi ạḅeni bịdi mọ, “Mị akunya esi aḍien Ọmoogh-we phọ mọ nyina kẹ́ḅaram nmạriir rꞌạnmuny anyina. Eganana ni mọ nyina memite ẹkaraph ezue oruphe ẹgham.

¹¹ Mị úmeera. Alephiri phọ bịn kụ kọki okumu Ọmoogh-we phọ, eḍighi lọ nyina ẹwa ịdipho.” Ạsighe ịphen phọ bịn ophoroghom Mozis rꞌEeron egbodo ọdaam eelhe phọ.

¹² Kụ Ọmoogh-we phọ ạḅeni Mozis mọ, “Poophe ḍịghaagh ạna aphoghomiom de phọ Ijipt ịdi igurubia phọ eru. Bịdi kẹtaal oomo ạraraar lọ edi iizo, oomo ạraraar lọ oghim mọ asugheeny.”

¹³ AMozis aphoophe ịkpara phọ ọdi kụ Ọmoogh-we phọ aḍighi ịdi oghim ạḍua ẹpe erumuḍio phọ remite ghan bọ kụ aghim de phọ Ijipt oomo ootaany phọ rꞌaḍughul phọ. Kụ rẹḅaal bịn ọmiin igurubia dị mesoor oomo ade phọ.

¹⁴ Bịdi isoor ghan ruphuluḅul kụ eleeny oomo ade phọ Ijipt. Ọdo aruphuluḅul igurubia dị melheeny ghan ịduon kẹ̋rol ghan kụ kẹ́tol mun.

¹⁵ Bịdi isoor tụtu ewile oomo ade phọ, kụ ẹraal tọrobo ịyaar lọ oghim mọ asugheeny. Rꞌẹnum ịyaar, mꞌịizupha mꞌiimuma loor ireeny, ísugha ẹpe eelhe phọ Ijipt.

¹⁶ Pọ kụ ẹdi ọdaam eelhe phọ ạmagh Mozis rꞌEeron mọ ọnuun oru, kụ ạḅeni bịdi mọ, “Mị maḍighi ịkaraph esi Ọmoogh-we Ẹnaan phọ anyina, rꞌesi anyina.

¹⁷ Nyịidipho mị rịiḅereghi ni inyina mọ ịsar ịwilenaan ịmi egi phọ ẹphen. Ịiḅereghi Ọmoogh-we Ẹnaan phọ anyina mọ ọdi ạsighe ghẹlhe phọ ạkuen loor ạmi.”

¹⁸ Kụ aMozis ạwile ọdaam eelhe phọ kụ ạaḅereghi Ọmoogh-we phọ.

¹⁹ Kụ Ọmoogh-we phọ akiton olhom oghim mọ ẹpe erumuḍio phọ remite ghan bọ asomoriom ẹpe erumuḍio phọ remeel ghan bọ dị aru kụ aghughom igurubia phọ asumughi ẹpe Ọphiiny Igbilha, kụ rꞌeniin ekpo igurubia ísugha oomo ade phọ Ijipt.

²⁰ Ọmoogh-we phọ ạkparami ni ologhi ọdaam eelhe phọ kụ ọdi ómeera mọ awe phọ Ịzirel ogheel.

Ufiri

²¹ Ọmoogh-we phọ ạḅeni Mozis mọ, “Poophe ḍịghaagh ạna ạghiom ạnyu, kụ ọkiph-kịph ufiri kaḍigh aakpereghiom oomo ade phọ Ijipt.”

²² Kụ aMozis aphoophe ḍịghaagh phọ ọdi ạghiom ạnyu, kụ ọkiph-kịph ufiri aḍigh oomo ade phọ Ijipt ịraar aḍughul-otu.

²³ Awe phọ Ijipt oniin nyoniin ọ́miin kụ oye ómite erugh mem mọ ọpo. Kụ awe phọ Ịzirel ụmoogh ni ḍịḅaal amarugh phọ ạbidi.

²⁴ Ọdaam eelhe phọ ạmagh Mozis ạḅeni mọ, “Nyina etue ni ẹki ẹeḅereghi Ọmoogh-we phọ; ghạlamo rꞌạnmariir rꞌạnmuny anyina otue ni ịdaph inyina. Kụ ọlo iyool rꞌạrutu-ịga rꞌạsinam mọ anyina kẹtol li ẹphen.”

²⁵ AMozis ạḅeni nyọdi mọ, “Pọ nạ kụ ụngo ni iyoor ịnam ịlo ọphinyonom ạrikia, rꞌịlo ọkpuyom ịkpuy phọ ọngo Ọmoogh-we Ẹnaan phọ ayoor.

²⁶ Eeye, ịnam mọ ayoor rẹki aani ni; rꞌeniin ẹphen résugha. Sịphe kụ esi dị yoor kọson ịnam mọ dị kokumuom Ọmoogh-we Ẹnaan phọ ayoor. Yoor úlegheri ịpe yoor kọson bọ tụtu yoor mosi ẹpe phọ.”

²⁷ Ọmoogh-we phọ ạkparami ni ologhi ọdaam eelhe phọ kụ ọdi ómeera bịdi ogheel.

²⁸ Ọdaam eelhe phọ ạḅeni Mozis mọ, “Ḍụa sịen risigh ạmi. Gona loor ạna. Mị ụ́wa mun ọmiin ạna. Nạ ạḅile aru egbodo ạmi, pọ nạ mamugh.”

²⁹ AMozis ạḅem mọ, “Ẹnighe ni-a, nạ ịmi kụ́miin mun.”