Dutoronomi 8 - Ạḍinya Iigbia

Aḍiiḅi ade dị ẹkpe ọmoogh

¹ “Oomo iilogh phọ ịphen mị ạlogh bọ rịngo inyina rodon, ịmaar ẹpham ẹdaph ghan eḍighi, ọbo ẹrol ẹmar emuzeḍi, ẹghi ẹsighe de phọ ạḍiphe Ọmoogh-we phọ aghunya bọ ạngo bụrude phọ anyina.

² Kụ ẹetughian ghan oomo areten phọ ịpe Ọmoogh-we Ẹnaan phọ anyina irelhiom bọ inyina inyadi ạsia phọ ẹpe ẹdala phọ, isooromi bọ inyina, ịdeghogh bọ inyina ophogh ọmiin ịpe edi bọ iloghi phọ anyina, mụghumo nyina reeko ni iilogh phọ ọdi, mụghumo nyina réeko.

³ Kụ ọdi isooromi inyina ịrolomi inyina ọkoony, kụ ạsighe mạna ịngo inyina kụ nyina elhe (dị nyina ílegheri, ạburude phọ anyina úlegheri aani), ọbo nyina elegheri mọ oye kụ́tolonaan ghan eḍien bịn, mọ oye ạrolonaan ghan oomo ịpe ẹḍua bọ ọnhu phọ Ọmoogh-we phọ kụ emite.

⁴ Arukpe anyina íḅu, aruwol anyina íbuphogh esi inyadi ạsia phọ.

⁵ Ilegheri sịphe iloghi phọ anyina mọ, ịdipho oye ratomoghiom ghan bọ nmụny ọdi kụ ịdi Ọmoogh-we Ẹnaan phọ anyina riromoghiom ghan inyina.

⁶ Kụ iḍighi, kụ iiko ghan iilogh phọ ịpe Ọmoogh-we Ẹnaan phọ anyina, ẹdaph ghan reten phọ ọdi kụ erelhe ghan, ẹnaghanan nyọdi.

⁷ Ọmoogh-we Ẹnaan phọ anyina ịsighe inyina rạki ḍiiḅi ade ḍịo ạruudu ạmuum rꞌasikol ighool dị ạmuum rakilogh, rꞌaroogbolom;

⁸ de ịbiakpa, rꞌabali, rꞌiimuma avain, rꞌạfig rꞌekpetughe; de ọliv rꞌẹnuum aḍiowo;

⁹ de dị eḍien olhe kíkuom ghan inyina, ịyaar inyina kékuom ghan sịphe ade phọ. Asighiigh phọ ạbidi ẹmoogh okuron. Kụ oguph ologhi aroogbolom mọ bịn ọgiata kụ odi.

¹⁰ Mem lọ nyina ele kụ mịpher inyina, ịseph ghan Ọmoogh-we Ẹnaan phọ anyina ịlo aḍiiḅi ade phọ dị ịngo bọ inyina.

Ọpurogh rụru mọ kúbula Ọmoogh-we phọ

¹¹ “Igona siloor anyina, íbula ghan Ọmoogh-we Ẹnaan phọ anyina. Iiko ghan iilogh phọ ọdi, rꞌịiruen phọ ọdi, rꞌịtooghi phọ ọdi, ịphen mị ạlogh bọ rịngo inyina rodon.

¹² Mem dị nyina melhe rịpher inyina, medoghoḍi igeny aruutu etughogh;

¹³ mem dị ạsinam rꞌiyool-ịga phọ anyina mẹmaraghian, agol rꞌasilva phọ anyina mamuza; mem dị oomo phọ ạraraar phọ nyina ẹmoogh bọ meḍiza,

¹⁴ igona siloor anyina, ọbo nyina kebaga ghan bọ ẹkiom ạnyu. Íbula ghan Ọmoogh-we Ẹnaan phọ anyina, ọpo ịsighe bọ inyina ạḍuanam ẹpe ade phọ Ijipt dọl ạrebene phọ,

¹⁵ ọpo irorori bọ inyina ẹpe eboom mọ ẹdala phọ eḍigh bọ ịikia ruugu, ẹpe ịigama ạrakaraph-ịyaar rꞌasiepere phọ edi bọ, ẹpe ạmuum úlho bọ; ọpo amitiom bọ mụum loor aḍighiigh phọ ịngo inyina;

¹⁶ ọpo ịngo bọ inyina mạna ẹpe ẹdala phọ mọ ile (eḍien dị ạburude anyina úlegheri), isooromi bọ inyina, ịdeghogh bọ inyina aphogh rạwa oḍighi anyina igeny ruukuna phọ.

¹⁷ Igona siloor anyina, ọbo nyina kẹḅem ghan bọ sịphe iloghi phọ anyina mọ, ‘Ịikpo ayoor rꞌịnyaam ạraghaagh ayoor kụ ịngo bọ iyoor ẹelha phọ ẹphen.’

¹⁸ Ịitughian ghan Ọmoogh-we Ẹnaan phọ anyina. Ọdi kụ ịngo bọ inyina ịikpo kụ nyina ẹmoogh bọ ẹelha phọ. Ọdi ạtuan ogananami ịyo phọ ọdi, ịpe ọdi aghunya bọ esi ạburude phọ anyina, ịdipho edi bọ kꞌarodon.

¹⁹ Eru mạar dị nyina ewula Ọmoogh-we Ẹnaan phọ anyina bịn ẹdaph eeseeny ịnon ạrumugh, ẹeḅereghi bịdi, mị rạpur sịruru anyina rodon phọ ạḍien, bịn nyina eguul.

²⁰ Ịdipho ạramha phọ ịpe Ọmoogh-we phọ rapiemi bọ egbodo phọ anyina, ịdipho kụ ịdi kiphiemi aani bọ inyina, ịdi eḍighi bọ nyina ị́naghanam ẹḍogh phọ Ọmoogh-we Ẹnaan phọ anyina.