Dutoronomi 7 - Ạḍinya Iigbia

Aweye Ọmoogh-we phọ

¹ “Mem mọ Ọmoogh-we Ẹnaan phọ anyina kịsighe bọ inyina asiemi ịlo nyina kẹmoogh bọ de phọ, kụ kạboor bọ ịminighan areelhe ạsighiogh egbodo anyina, bụo ạHitait rꞌaGirgasait rꞌẠmorait rꞌaKenanait rꞌạPerezait rꞌaHivait rꞌaJebusait, oḍual areelhe dị ẹbugh ẹmoogh ịikpo ipu inyina;

² mem mọ Ọmoogh-we Ẹnaan phọ anyina kạḅogh bọ bịdi ịngo inyina, ịze bịdi, ephiemi bịdi eegulemi. Bịdi rꞌanyina kékiran ịyo. Ị́nma ghan bịdi ighirigiir.

³ Bịdi rꞌanyina íḍighi rọgo, ị́ngo ghan nmạnyaan anyina nmụny ạbidi mọ ophin. Ạnmuny anyina kúpinogh nmạnyaan ạbidi,

⁴ ịdi eḍighi bọ keḍighi ni ịdi ọony phọ ạna kạgbatanaan ạbile ọdaph ạmi, aaseeny ghan ịnon ạrumugh, bịn eḍighi ịdi Ọmoogh-we phọ kịghagham inyina ọghagh ologhi dị ạbugh bịn iphiemi inyina egina amem.

⁵ Ịduon kụ ịdi nyina keḍighi bịdi. Inyuughi oomo phọ arenmeny ạrikia phọ ạbidi elereghi, enyuughi sịghom mọ ạbidi elereghi, eḅomoghi oomo igbudu um-ạke Asera, ẹsighe nịan eguom,

⁶ ịdi eḍighi bọ nyina awe iigbia esi Ọmoogh-we Ẹnaan phọ anyina. Mị mịsaḅar inyina ạsighe esi oomo awe phọ ạbuen odi bọ sịen aḅirini phọ aḍighi kịro ọdo awe esi ọdi.

⁷ “Ọmoogh-we phọ ọ́tuan ịdi nyina kụ ẹbugh epu bụnon awe kụ ịphomoghian bọ inyina, ịsaḅar inyina ạsighe: nyina kụ ighom epu oomo awe.

⁸ Ịdi eḍighi bọ Ọmoogh-we phọ ịphomoghian inyina kụ ạtu bọ raako ghan ịyo phọ ịpe ạburude phọ anyina rꞌọdi oghiran bọ, kụ Ọmoogh-we phọ ạtu bọ ạsighe ḍịghaagh iphelegbe phọ ọdi ịsighenom inyina ạḍuanam, ịtagharan inyina ạsighe esi ạdol ạrebene phọ ḍịghaagh ọdaam eelhe phọ Ijipt.

⁹ Kụ ilegheri mọ Ọmoogh-we Ẹnaan phọ anyina, ọdi kụ Ẹnaan oḍuom ologhi dị raako ghan ịyo phọ rꞌọnma ighirigiir esi ạbuphe ọphomoghian bọ nyọdi, kụ rooko ghan bọ iilogh phọ ọdi, esi oniin ọonir oghiil.

¹⁰ Ọdi rạ́akpukian ghan ophiemi ạbuphe ọlogh bọ nyọdi ḍien, raḅulemian ghan kạkpiom bịdi risigh ạbidi.

¹¹ Ịmaar egona siloor anyina, ẹtuugh ghan ịpe iilogh phọ ẹḅem bọ kụ eḍighi ghan, ịtooghi phọ rꞌịiruen phọ ịpe mị ạlogh bọ ịḅeni inyina rodon.

Ạḍiseph ạbulo rọnaghan ghan ḍụghum

¹² “Eru mạar dị nyina ẹnaghanam ni kụ eeko kụ ẹdaph reḍighinom, pọ Ọmoogh-we Ẹnaan phọ anyina kạpamanam ni ịyo phọ rꞌọnma ighirigiir phọ dị aghunya bọ ạngo bụrude phọ anyina.

¹³ Ọdi kịphomoghian ni inyina ịseph inyina, ịbughe inyina, ạḅile ạbughe ọophi anyina, ạbughe eḍien ịsiphe ade phọ, ịizupha phọ anyina, avain phọ anyina rꞌạmunum mọ, ạbughe sịnam rꞌiyool-ịga phọ anyina ẹpe ade phọ dị aghunya bọ ạngo bụrude phọ anyina, ọngo anyina.

¹⁴ Ọdi kịseph inyina apuemi we ạbunon areelhe. Sịphe ogbo phọ anyina, oye ólho, mꞌolephiri mꞌạnir, dị kạtol ẹ́mar; ẹnam ílho kẹn dị kẹtol ẹ́mar.

¹⁵ Ọmoogh-we phọ kaporogh ni oomo ạreezegh loor anyina ạsighe, kụ rꞌeniin ịkaraph ạreezegh phọ Ijipt ịpe nyina elegheri bọ ni dị kiḍighi inyina ílho. Ọdi kạsighe aseenaan bụphe ịlogh bọ inyina ḍien.

¹⁶ Kụ nyina epiemi oomo awe phọ ạbuphe Ọmoogh-we Ẹnaan phọ anyina katorori bọ ạlogh ḍịghaagh anyina. Bịdi kúḍigh ighirigiir esi anyina.

¹⁷ “Eru mạar dị nyina ẹḅem sịphe iloghi phọ anyina mọ ạramha phọ ịphen kụ ịbugh ipu iyoor, mọ yoor kótue oporogh bịdi,

¹⁸ pọ kékiilaan bịdi, ịitughian ghan ịpe Ọmoogh-we Ẹnaan phọ anyina eḍighi bọ ọdaam eelhe phọ rꞌoomo awe phọ Ijipt:

¹⁹ oboom mọ ọdegh ophogh phọ ọpo ariḍien phọ anyina ẹmiin bọ, rꞌareḍeenaan phọ, rꞌịiḍaany phọ, rꞌạḍighaagh iphelegbe phọ ọdi azin bọ, ḍịphe Ọmoogh-we Ẹnaan phọ anyina ạsighe bọ kụ ịsighenom inyina ạḍuanam. Ịdipho kụ ịdi Ọmoogh-we Ẹnaan phọ anyina kaḍighi oomo awe phọ ạbuphe nyina rekiilaan bọ.

²⁰ Ịdi keḍighi ịduon, Ọmoogh-we Ẹnaan phọ anyina katom ạgay ạkiomonaan ogbo ạbidi, bụphe osugha bọ rꞌạbuphe ạaghian bọ, apiemi ạman.

²¹ Kẹ́tuan bịdi ekpereghaan, loor esi dị Ọmoogh-we Ẹnaan phọ anyina odi ni rꞌanyina. Ẹnaan phọ anyina ẹpughan, eḍigh ruugu.

²² Ọmoogh-we Ẹnaan phọ anyina kaporogh ni rạmha phọ edi bọ risigh anyina ẹnum, ẹnum ạsighiogh. Képiemi ghan bịdi egina amem, ọbo ịnam eḍum mọ ketu ghan bọ bịn emuza.

²³ Ọmoogh-we Ẹnaan phọ anyina katorori ni bịdi ịngo inyina, kụ ạsighe oboom ọgbaragbara ạlogh sịphe ogbo phọ ạbidi, tụtu bịdi ope omuneen;

²⁴ kụ atorori rạalha ạramha phọ ạbidi ạlogh ḍịghaagh anyina kụ nyina ephiemi siḍien phọ ạbidi sịen aḅirini phọ. Oye dị kạmeera egbodo anyina ólho, tụtu nyina ephiemi bịdi ẹman.

²⁵ Ịsighe ịkaaghineen ạrumugh phọ ạbidi eguom nịan. Kẹ́maghami ghan ịyaar silva phọ rꞌagol phọ ọdamaghi bọ. Kẹ́sighiogh ghan, ọbo nyina kemeel ghan bọ eḍighanaan, ịdi eḍighi bọ ạḅaphanya ni esi Ọmoogh-we Ẹnaan phọ anyina.

²⁶ Kẹ́pam ghan ḅạphanya erighelom kꞌanyina, ọbo nyina kẹghigh ịyaar dị moruule. Ikel ḅạphanya, ẹmaghami ịyaar dị mẹphuph, ịyaar dị moruule.