Dutoronomi 6 - Ạḍinya Iigbia

Ọkar ogbogh ologh phọ

¹ “Ịphen kụ iilogh phọ, ịtooghi phọ rꞌịiruen phọ ịpe Ọmoogh-we Ẹnaan phọ anyina ạlogh bọ ụngo ịmi mọ mị ịtughemi inyina, ẹdaph ghan kụ eḍighi ghan ẹpe ade phọ nyina reḍigh bọ ọrol,

² ọbo nyina ekori eghueni Ọmoogh-we Ẹnaan phọ anyina, eeko ghan ịtooghi phọ ọdi, rꞌiilogh phọ ọdi, ịphen mị ạlogh bọ rịḅeni inyina, nyina rꞌạnmuny anyina rꞌạnmuny ạnmuny anyina, oomo asuḍughul-otu aghuḍum mọ anyina, ọbo asuḍughul-otu phọ anyina ẹdoony.

³ Ịnaghan, nyina awe Ịzirel, igona siloor anyina ẹtuugh ghan ịphen phọ kụ eḍighi ghan, ọbo ịnighenom inyina, ẹmaar emuzeḍi, ịdipho Ọmoogh-we Ẹnaan phọ ạburude phọ iguanaan bọ inyina, ẹpe ade ẹetool rꞌọninom.

⁴ “Ịnaghan, nyina awe Ịzirel, Ọmoogh-we Ẹnaan phọ anyina, oniin Ọmoogh-we.

⁵ Ịpomoghian Ọmoogh-we Ẹnaan phọ anyina rꞌoomo iloghi phọ anyina, rꞌoomo uwaloor phọ anyina, rꞌoomo ịnyaam mọ anyina.

⁶ Ịphen mị ạghaaph bọ ạlogh ologh ịngo inyina rodon, ẹrol sịphe iloghi phọ anyina.

⁷ Kụ emiigha loor ẹsighe ẹtughemi nmụny phọ anyina, kụ ẹghaaph ghan ịphen phọ mem lọ nạ ạrol ude sịphe kꞌạna, rꞌamem lọ nạ ratelhe eten, rꞌamem lọ nạ ạmina, rꞌamem lọ nạ aḅetenu.

⁸ Kụ ạsighe ạkagha ḍịghaagh ạna eḍighi ghan ịyaar ọghiom ologhi, ẹrol ghan sịphe ịbaay ịyal phọ ariḍien phọ ạna.

⁹ Ạsighe ạge loor arughuugh ọnhu-aḍibuo otu phọ ạna, rꞌịsiphe ọnhu-aḍibuo oghoony-otu phọ ạna.

Igona loor ọḅaar ẹmhu

¹⁰ “Mem dị Ọmoogh-we Ẹnaan phọ anyina ịsighe inyina asiemi ẹpe ade phọ dị aghunya bọ ạngo bụrude phọ anyina Ebraham, Ạizik rꞌạJekob, ọngo anyina rạmha phọ ẹbugh bọ kụ ẹnighe, rạmha phọ nyina kụ ị́logh bọ,

¹¹ rꞌaruutu dị oomo igey ạraraar kụ emuza, ịdi nyina kụ ị́moogh, rꞌasighuḍia dị oguphogh, ịdi nyina kụ íguphogh, rꞌiizo avain rꞌireeny ọliv dị nyina kụ ị́zuphogh, mem lọ nyina elhe kụ ịpher inyina,

¹² ịmaar egona siloor anyina ọbo nyina kebula ghan bọ Ọmoogh-we Ẹnaan phọ anyina ọpo ịsighe bọ inyina ạḍuanam ẹpe ade phọ Ijipt dọl ạrebene phọ.

¹³ Ikueni Ọmoogh-we Ẹnaan phọ anyina, eeseeny ghan nyọdi, eghunya ghan ḍien phọ ọdi.

¹⁴ Kẹ́eḅereghi ịnon ạrumugh, rụmugh awe phọ ạbuphe ikoom bọ inyina,

¹⁵ ịdi eḍighi bọ Ọmoogh-we Ẹnaan phọ anyina edi bọ sịphe ogbo phọ anyina, Ẹnaan dị útiran aroḅopha; ọbo ọghagh ologhi phọ ọdi kisoroghuom ghan bọ inyina, bịn dị iphiemi ghan bọ inyina sịen aḅirini phọ.

¹⁶ “Kẹ́degh Ọmoogh-we Ẹnaan phọ anyina epogh ịdipho nyina ẹdegh bọ nyọdi ephogh ẹpe Masa.

¹⁷ Isereghian, ẹmaar eeko iilogh Ọmoogh-we Ẹnaan phọ anyina rꞌạraraar eḍeenaan phọ rꞌịtooghi phọ ịpe ọdi ạlogh bọ.

¹⁸ Iḍighi ghan ịpe eru bọ igey, rꞌịlo ẹnighe risigh Ọmoogh-we phọ, ọbo ịnighenom inyina, ọbo nyina ẹghi ẹsighe ẹmoogh ịma phọ ade phọ, ḍịphe Ọmoogh-we phọ aghunya bọ ạngo bụrude phọ anyina.

¹⁹ Ọdi kaporogh ni oomo ạbumulogh-ḍien phọ anyina ọdi bọ ẹpe risigh phọ anyina ạsighiogh ịdipho Ọmoogh-we phọ aguanaan bọ.

²⁰ “Ḍio-pọ, kụ ạnmuny anyina ipuru inyina mọ, ‘Eeghe kụ ẹmhu ịtooghi phọ, rꞌiilogh phọ, rꞌịiruen phọ, Ọmoogh-we Ẹnaan phọ ayira ạngo bọ?’

²¹ kụ ẹphagharanaan ghan ẹghaaph ẹḅeni nmụny phọ anyina mọ, ‘Yoor uḍighi rẹbene ọdaam eelhe phọ Ijipt, kụ Ọmoogh-we phọ ạsighe ḍilhom ạḍighaagh kụ ụsighenom iyoor ạḍuanam ẹpe Ijipt,

²² kụ Ọmoogh-we phọ amiteghom reḍeenaan rꞌịiḍaany dị ẹbugh, rꞌạraraar aruugu kịrokiro, esoroghuom Ijipt rꞌọdaam eelhe phọ rꞌọto ọdi, dị yoor ọmiin ni.

²³ Kụ ọdi ụsighe iyoor ạḍuanam ẹpe phọ. Ọdi ụsighe iyoor asiemi ẹphen phọ ạngo de phọ, ḍịphe ọdi aghunya bọ ạngo bụrude phọ ayoor.

²⁴ Ọmoogh-we phọ ạlogh ologh ụngo iyira mọ yira ọdaph ghan oḍighi ghan oomo ịtooghi phọ ịphen, oghueni Ọmoogh-we Ẹnaan phọ ayira ọbo ịnighenom iyira oomo amem, ọbo ọdi ạpham ghuḍum mọ ayira ịduon idianaan bọ iyira rodon.

²⁵ Eḍighi ruukuan esi ayira, yira ọmaar ọpham ooko ghan iilogh phọ egbodo Ọmoogh-we Ẹnaan phọ ayira, ịdipho dị ạlogh bọ ụngo iyira.’