Dutoronomi 5 - Ạḍinya Iigbia

Aḍioph iilogh phọ

¹ AMozis ạmagh oomo phọ Ịzirel aakpomoghi, kụ ạḅeni bịdi mọ, “Weye Ịzirel, ịnaghan ịtooghi phọ rꞌịiruen phọ ịpe mị ạghaaph bọ rịḅeni inyina rodon, ọbo nyina ẹmaar eeko, ẹtuugh ẹdaph eḍighi.

² Ẹpe Eegum aSainai, Ọmoogh-we Ẹnaan phọ ayira amitiom ịyo,

³ óghiran rꞌạburude ạburude bịn, aghiran rꞌoomo phọ ayira bụen odi bọ rodon.

⁴ Ọmoogh-we phọ ạghaaph ni ịḅeni inyina risigh rꞌarisigh ẹpe eegum mọ, sịphe ologhi ạnian phọ.

⁵ Kụ mị ụmeera igbo Ọmoogh-we phọ rꞌanyina mem mọ ạmuphe phọ, ọḅeni ghan anyina ịpe Ọmoogh-we phọ rạkaaph bọ, ịdi eḍighi bọ nyina ighiilaan ni nịan phọ, nyina ị́siiny aani ẹpe ạnyu eegum mọ. “Ọdi ạḅem mọ,

⁶ ‘Mị kụ Ọmoogh-we Ẹnaan phọ anyina ọpo ịsighe bọ inyina ạḍuanam ẹpe ade phọ Ijipt sịphe nyina eḍighi ghan bọ rẹbene phọ.

⁷ “‘Imuton ịmi ẹnon ẹmugh kạ́aḅereghi.

⁸ “‘Kạ́kaanaan loor ạna ịyaar tọrobo ịlo ẹrol ẹpe kꞌạke mꞌịsien ade phọ mꞌologhi ạrumuum mọ edi bọ eeḍian ude phọ.

⁹ Kákpuḍian ạngo ịyaar lọ ọka, ḅịle mꞌooseeny ọngo ịdi eḍighi bọ mị kụ Ọmoogh-we Ẹnaan phọ ạna. Mị Ẹnaan útiran aroḅopha. Mị kạliom ni bụlo ụlogh ịmi ḍien asiemi oghiil ạnmuny ạnmuny ạbidi dị omuneniom ịraar mụghumo inya.

¹⁰ Kụ ọnma ighirigiir kạtolonaan ni sịmuunir ạbulo ụphomoghian ịmi kụ ooko ghan iilogh phọ ạmi.

¹¹ “‘Kạ́sighe ghan ḍien Ọmoogh-we Ẹnaan phọ ạna apeghom ephegh, ịdi eḍighi bọ mị Ọmoogh-we phọ kạ́sar ạ́bilenaan oye lọ apeghom ephegh ḍien phọ ạmi.

¹² “‘Mạar aako ḍio ophooghian phọ kụ aseere dọl iigbia, ịdipho Ọmoogh-we Ẹnaan phọ ạna mạto bọ ạḅeni nyịna.

¹³ Odiiny aḍio kụ ịdi nạ kakumuan oomo arukumuan phọ ạna;

¹⁴ kụ ḍịphe emuneniom bọ oḍual phọ, aḍio ophooghian dị museenaan ịmi Ọmoogh-we Ẹnaan phọ ạna. Ḍio phọ ạḍiphe oye oḍighi kúḍighi, mꞌạna, ọony ạna, ọnyani ạna, ọony-otu ạna, ọnyani-otu ạna, ạnam ạna, ẹnam adool ạna, ịnam ạna, ghạlamo aruuruen lọ odi eelhe ạna. Ạrebene ạna ophooghian ni ịdipho ạna.

¹⁵ Ịitughian ghan mọ nyina iḍighi ni rẹbene ẹpe ade phọ Ijipt kụ Ọmoogh-we Ẹnaan phọ anyina ẹsighe ḍilhom ạḍighaagh phọ ọdi rꞌigbogh ịikpo ịsighenom inyina ạḍuanam. Kụ iḍighi kụ Ọmoogh-we Ẹnaan phọ anyina ạlogh bọ ologh ịḅeni inyina mọ iiko ghan ḍio ophooghian phọ.

¹⁶ “‘Lọgh eegu ọde ạna rꞌonhiin ạna, ịdipho Ọmoogh-we phọ Ẹnaan phọ ạna mạto bọ ạngo nyịna, ọbo ariiḍio ạna ẹdoony, ẹnighenom nyịna, sịen aḅirini phọ Ọmoogh-we Ẹnaan phọ ạna rạngo bọ nyịna.

¹⁷ “‘Oye kákiigh.

¹⁸ “‘Ẹmha kále.

¹⁹ “‘Imi kámi.

²⁰ “‘Kạ́pu ọkpe bịn ạgba ạḅam ẹmhu oye.

²¹ “‘Káseph ạnir ọnon oye ạsighenom, káseph otu ọdi ạsighenom, mꞌozo ọdi, mꞌọony otu ọdi, mꞌạnam ọdi, mꞌẹnam adool ọdi, mꞌạtorobo ịyaar lọ ọdi ạmoogh.’

²² “Ọmoogh-we phọ ạghaaph ikpo ọnhu phọ ịphen ạḅeni oomo phọ anyina ookpomoghan bọ sịphe eegum mọ, sịphe ologhi ạnian phọ ẹpe okuaḍio phọ, ologhi ọkikiph ufiri, rꞌeboom ẹḍogh; kụ ọ́ḅaram ịnon, kụ ạge ịphen phọ ạnyu ịyal ịdaabili asighiigh kụ ạsighe ụngo ịmi.

Aruugu eḍiku iloghi awe phọ

²³ “Mem dị ạnian kụ eemor sịphe eegum mọ kụ nyina ẹnaghan bọ ẹḍogh dị ẹḍua ọkikiph ufiri phọ, oomo ạbuo ạrumhu arughunughun phọ anyina rꞌikumoor awe phọ anyina uru ụteeny ịmi,

²⁴ kụ ọḅem mọ, ‘Ọmoogh-we Ẹnaan phọ ayoor muḍeenaan iyoor eegu phọ ọdi rꞌigbogh phọ ọdi. Yoor ụnaghan ni ẹḍogh phọ ọdi sịphe ologhi ạnian phọ. Rodon yoor mọmiin mọ oye katue ni ạtol, ghạlamo Ẹnaan ịḅaanaan ni nyọdi.

²⁵ Nyịidipho esi ika kụ ẹdi yoor kokiilaan bọ ḍuugh? Ạḍiikia phọ ạnian phọ ạḍiphe kilhe iyoor. Eḍighi mạar dị yoor ọḅile kẹn ọnaghan ẹḍogh Ọmoogh-we Ẹnaan phọ ayoor, yoor komugh ni.

²⁶ Ạnhian oye kụ mạnaghan aani ghan ẹḍogh Ẹnaan phọ sịphe ologhi ạnian phọ rạkaaph ghan ịduon ayira kụ ạrol?

²⁷ Kịa aḍuraan Ọmoogh-we Ẹnaan phọ ayoor ạnaghan oomo phọ ịpe ọdi kạkaaph bọ, kụ aru ạghaaph ụḅeni iyoor oomo ịpe Ọmoogh-we phọ Ẹnaan phọ ayoor ạghaaph bọ ạḅeni nyịna, yoor koler rụru ọdaphan.’

²⁸ “Ọmoogh-we phọ ạnaghan ni ọghaaph phọ anyina mem mọ nyina ẹghaaph bọ rịḅeni ịmi, kụ Ọmoogh-we phọ ụḅeni ịmi mọ, ‘Mị ụnaghan ni ọghaaph phọ awe phọ ạbuen, kụ oomo phọ ịpe bịdi ọghaaph bọ eseleman ni.

²⁹ Mụghumo ọphon kụ aru ologhi dị bịdi kọmoogh oomo amem, oghueni ạmi rꞌooko ghan oomo iilogh phọ ạmi, pọ kẹnighenaan ni bịdi rꞌạnmuny ạbidi kꞌagee-pọ.

³⁰ Kịa ạḅeni bịdi mọ iḅula egheel ẹpe arugbogo phọ anyina.

³¹ Kụ nạ, mẹera sịen utuman ịmi. Mị kạḅeni ni nyịna oomo iilogh phọ ạmi rꞌịtooghi phọ ạmi rꞌịiruen phọ ịpe nạ kạtughemi bọ bịdi, ẹrol dị bịdi ọdaphan ghan ẹpe ade phọ mị rạngo bọ bịdi ọmoogh phọ.’

³² “Igona siloor anyina, ẹtuugh ghan ịphen Ọmoogh-we Ẹnaan phọ anyina ạlogh bọ ologh ịngo inyina, kụ ẹtuugh eḍighi ghan. Íighiraan ghan esoman ḍịghaagh elhiom anyina mꞌạḍighaagh ekeeny anyina.

³³ Ịdaph ghan oomo areten phọ ịpe Ọmoogh-we Ẹnaan phọ anyina mạto bọ ịngo inyina kụ erelhe ghan, ọbo ịnighenom inyina, ẹrol ebia sịphe ade phọ nyina rẹki bọ oḍigh phọ.