Dutoronomi 34 - Ạḍinya Iigbia

Aḍuugh phọ aMozis

¹ AMozis ạḍua sịphe ẹdala phọ ạMoab, ạghi ạsiiny Eegum aNebo asi ạnyu Eegum aPisga, ọtol ropogh Jeriko, kụ Ọmoogh-we phọ aḍeenaan nyọdi oomo phọ ade phọ, ẹḍua Gịliad, ẹghi esi Dạn:

² oomo phọ ade phọ ạNaftalai; rꞌạḍiphe Ifraim, rꞌạḍiphe ạManase; rꞌạḍiphe aJuda, ẹḍua ẹpe erumuḍio phọ remeel ghan bọ esiemi Ọphiiny aMeditarenian;

³ rꞌẹpe ạḍighaagh esoorom mọ, ẹghi kꞌaḍiyaghaghaany ade phọ aJeriko, ẹmha asikol, esiemi Zoar.

⁴ Kụ Ọmoogh-we phọ ạḅeni Mozis mọ, “Ḍịen phọ kụ ade phọ mị aghunya bọ ọngo Ebraham, Ạizik rꞌạJekob, kụ ạḅem bọ mọ mị kạngo ni nmụny ạbidi. Mị uḍighi ni ịdi nạ ạsighe riḍien ạna ạmiin, nạ kátenom sịen phọ ạki risigh.”

⁵ Kụ aMozis otelhedom mọ Ọmoogh-we phọ, amugh sịphe ade phọ ạMoab, ịdipho Ọmoogh-we phọ ạḅem bọ.

⁶ Kụ oḍi Mozis ẹpe aḍikol ighool ade phọ ạMoab, ọtol ropogh Bẹt Pior, kụ kꞌarodon oye lọ alegheri oḍi phọ ọdi ólho.

⁷ AMozis ạman bọ oniin okuron rꞌịyaldi ạsia, mem mọ dị amugh bọ. Ariḍien ọdi keḍighi tuum. Ịnyaam edi ni nyọdi.

⁸ Kụ awe Ịzirel ọrol sịphe ẹdala phọ ạMoab ịraardi aḍughul-otu omoghi Mozis, tụtu ariiḍio emoghi phọ rꞌọto phọ aMozis emunughan.

⁹ Kụ uwaloor olegheri ịyaar amuza loor aJosua ọony phọ ạNon, loor esi dị aMozis ạsighe rạghaagh ọdi ạḅam ẹmhu ọdi, kụ awe Ịzirel ọnaghanan ghan nyọdi, kụ oḍighi ghan ịpe Ọmoogh-we phọ ạlogh bọ ologh ạngo Mozis.

¹⁰ Ẹsighe kꞌaḍio phọ ạḍiphe sịphe Ịzirel ọnon oyil dị ạḅile ạrol ịdipho aMozis ólho, ọpo Ọmoogh-we phọ alegheri bọ risigh rꞌarisigh.

¹¹ Ọnon oyil ólho dị aḍighi ịdo areḍeenaan rꞌịiḍaany phọ ịpe Ọmoogh-we phọ arom bọ Mozis mọ aḍighi yogh ẹpe ade phọ Ijipt, aḍeenaan ọdaam eelhe phọ rꞌoomo abutelhedom mọ ọdi rꞌoomo ade phọ ọdi.

¹² Ọnon oyil ólho dị ạsighe ḍịghaagh iphelegbe ọdi kụ aḍighinom ịdo ạraraar aruugu phọ ịpe aMozis aḍighi bọ esomanan Ịzirel.