Dutoronomi 33 - Ạḍinya Iigbia

AMozis ạngo ooḅi ọghor rughunughun phọ Ịzirel

¹ Ḍịen kụ ạḍiseph phọ aMozis oye phọ Ẹnaan ạngo bọ we phọ Ịzirel, kụ agbi omugh.

² Ọdi ạḅem: “Ọmoogh-we phọ ạḍua ẹpe Eegum aSainai kụ aru ụteeny iyira; eegu ọdi imite ịdipho erumuḍio ạḍiroor ẹmuom Idom, kụ ẹḍua Eegum ạParan esoorom we phọ ọdi. Ạsimuunir ạruukpaany ọrolan ni rꞌọdi, kụ ạnian dị reemor ẹrol ḍịghaagh elhiom ọdi.

³ Ọmoogh-we phọ ạpomoghian ni we phọ ọdi, kụ rạmaar kạpham bụphe oḍighi bọ bụo ọdi. Kụ yoor okpuḍian sịphe aruwol phọ ạna, kụ ọdaphan ịtooghi phọ ạna,

⁴ Yoor rooko ghan iilogh phọ aMozis ạlhogh bọ ụngo iyira, kụ ookpomoghan phọ ạJekob ạmoogh bọ.

⁵ Ọmoogh-we phọ kụ aḍighi ọdaam awe phọ ọdi Ịzirel, mem mọ arughunughun rꞌạbuo ạrumhu phọ ạbidi ookpomoghan bọ egina esi phọ.”

⁶ Ịlo eghun aRuben ọdi ạḅem ịduon: “ARuben ạrol kúmugh, Ghạlamo ịduon awe phọ ọdi oghom bọ!”

⁷ Ịlo eghun aJuda ọdi ạḅem ịduon: “Ọmoogh-we, nạghan ẹḍogh ạbidi. Sịghe bịdi, ạḅophoghiom ịpheri phọ arughunughun. Ạraghaagh phọ ạna ẹgbaanyan ni bịdi. Pẹl bịdi ạsighe esi ạbumulogh-ḍien phọ ạbidi.”

⁸ Kụ ịlo eghun aLivai ọdi ạḅem ịduon: “Nạ, Ọmoogh-we, gananami igbiighi phọ ạna esi aYurim rꞌaTumim; Gananami olegheri ịyaar phọ ạna ạngo bugey abutelhedom mọ ạna, Bụphe nạ ạdegh bọ aphogh ẹpe Masa, Kụ ạmiin mọ bịdi igey awe ẹpe ạrumuum aMeriba.

⁹ Bịdi oḍeenaan osooromi aloor dị ạmanam esi ạna Kụ apu ọlo ọde rꞌonhiin, ọlo abumor mꞌạnmuny. Bịdi ọpamanam ikpo ọnhu phọ ạna Kụ ooko ịyo phọ ạna.

¹⁰ Bịdi kọtughemi Jẹkob ịiruen phọ ạna, ọtughemi Ịzirel Ologh phọ ạna, Ọpighiron rịkia oguom ạnian sịphe enmeny ạrikia mọ ạna.

¹¹ Ọmoogh-we, lọgh ḍịghaagh eghun phọ ạbidi oḍume. Mọogh ḍịḅeeraan tọrobo ịlo bịdi oḍighi; Piemi oomo ạbumulogh-ḍien ạbidi bịdi kúḅetenu mun!”

¹² Kụ ịlo eghun ạBenjamin ọdi ạḅem ịduon: “Phẹn kụ eghun dị Ọmoogh-we phọ ạphomoghian kụ ạmaar ạpham. Ọdi aḍighi okoriom ạbidi oomo aḍio, Kụ ọdi ạrolan ghan igbo ạbidi.”

¹³ Ịlo eghun ạJosef ọdi ạḅem ịduon: “Eḍighi ịdi Ọmoogh-we phọ kạsephom de phọ ạbidi ọlophia, Rꞌạmuum dị ạḍua ọlha-ude amite.

¹⁴ Eḍighi ịdi ogogo kasoorom de ạbidi ạḅaalami iimuma ạḍiḅeeraan, Ọkaraghi igey iimuma ịlo amem rꞌamem.

¹⁵ Eḍighi ịdi aroogbolom ageedi phọ ạbidi kookpereghiom igey ariḍien.

¹⁶ Eḍighi ịdi ẹeḍiom igey ạraraar kụ kẹtol sịphe ade phọ ạbidi. Ạḍiseph kꞌỌmoogh-we phọ ạrol bọ ẹpe eḍum mọ reemor bọ kụ ạḅa. Ạḍiseph phọ ạḍien phọ ẹrol sịphe ẹmhu phọ ạJosef, Ẹrol sịphe ẹmhu ọpo ọsaḅar bọ ọsighe sịphe abumor phọ ọdi!

¹⁷ ẠJosef ạmoogh ịnyaam ịdipho ọḅel olephiri ọony lọ ạnam ạmar; Ạraphaal phọ ọdi ẹtol ịdipho ạraphaal ạnam eḍum; Ạraphaal phọ ịphen, pọ ạsimuunir awe ẹgham ạbuo eghun phọ ạManase; Ọḅaram bịdi sịmuunir ạsimuunir ạbuo eghun phọ Ifraim. Ọdi kạkuloghom ghan reelhe phọ rꞌạraphaal phọ ạbidi Anyuughi ạkpaariom ruukuna ade phọ.”

¹⁸ Ịlo arughunughun ạZebiulon rꞌỊsaka ọdi ạḅem ịduon: “Eḍighi ịdi arukumuan ạZebiulon ọphiiny kẹmoogh edughom; Kụ ẹelha Ịsaka eepaany sịphe arugbogo phọ ạbidi.

¹⁹ Bịdi ọmagh ruuruen ọghimom ẹpe eegum mọ ạbidi, Kụ oyil ạrikia dị ẹkpe sịphe. Bịdi ọmoogh ẹelha ạbidi sịphe ọphiiny phọ, Rꞌịsiphe ạraraar ịbooghian dị edi ude ịisaar phọ.”

²⁰ Ịlo eghun ạGad ọdi ạḅem ịduon: “Ạḍiseph ẹrolonaan nyọpo ạbughe bọ eelhe phọ ạbidi. ẠGad ạḅona ghan ịdipho ạnam-dịka, Akori ọphaar oroph ạḍighaagh mꞌaḍizu ẹmhu.

²¹ Bịdi ụsaḅar egeny ẹkpigh ade ạsighe; Abin oḍiemiom kụ ẹdi oseenaan bịdi. Bịdi ụdaph ịtooghi rꞌariiliom iilogh phọ Ọmoogh-we phọ, Mem dị abuḍiemiom Ịzirel ookpomoghan eniin esi.”

²² Ịlo eghun ạDan ọdi ạḅem mọ: “ẠDan ọony ạnam-dịka Dị apel amite sịphe Bạsan.”

²³ Ịlo eghun ạNaftalai ọdi ạḅem ịduon: “ẠNaftalai oye dị Ọmoogh-we ạkar ạsephom ẹelha rꞌạḍiḅeeraan. Ade ạbidi ẹḍua Ọphiiny aGalili esi kꞌẹpe esoorom mọ.”

²⁴ Ịlo eghun Ạser ọdi ạḅem ịduon: “Ạser kụ ạmoogh ḍịseph apu bụeri phọ arughunughun phọ. Eḍighi ịdi abumor phọ ọdi kologhoma ni nyọdi. Ireeny ọliv ọdi eepaany de phọ ọdi.

²⁵ Eḍighi ịdi ạramha phọ ọdi kopukiom okuron rꞌenaba; Ịdi kꞌọrugh kꞌọrugh phọ ịyaar bịdi kẹ́ḅogh.”

²⁶ “We Ịzirel, egeny ịyaar ílho dị ẹnighe eeleeny Ẹnaan phọ anyina; dị rakiil ẹpe kꞌạke oru ọloghonaan anyina ḍịghaagh, rꞌigbogh phọ ọdi.

²⁷ Ẹnaan kꞌagee-pọ kụ amarugh anyina, kụ ạraghaagh kꞌamem kꞌamem mọ ọdi kụ iḅeghom anyina. Ọdi aphorogh bụmulogh-ḍien phọ anyina ạsighe esomanan anyina, kụ ạḅem mọ ipiemi bịdi.

²⁸ Ịduon kụ ẹdi ẹemara ẹemara ạJekob ọrol rꞌẹepho, ọmaar ọrol de dị ịbiakpa rꞌamiim kụ emuza, esi dị ooto kꞌạke phọ kụ asoorom de phọ.

²⁹ Ịzirel, ọḅaal ologhi ọlo ạna ni. Ạnhian kụ ạghigh nyịna? Nyina awe dị Ọmoogh-we phọ ạphel. Ọdi kụ ọsuaram mọ ạloghonaan bọ nyịna ḍịghaagh; ọdi kụ elhool ẹgham iphelegbe phọ ạna. Ạbumulogh-ḍien phọ ạna kotumom rꞌịlom ọsar ọwilenaan kụ nạ ạze bịdi.”