Dutoronomi 32 - Ạḍinya Iigbia

¹ “Kẹ, ler rụru, mị kạkaaph ni ịyaar; de, nạghan ịphen mị kạkaaph bọ.

² Ịtughemi ạmi kẹteph ghan ịdipho ọlophia, ikpo ọnhu ạmi kesoor ịdipho ooto, mụdi oyiririiny loor ạtugbiir ạroogho, mụdi ooto loor ịizupha.

³ Mị kạseph ni ḍien Ọmoogh-we phọ kụ awe ọdi ọkaaph ịlo igbogh ọdi.

⁴ “Ọmoogh-we phọ kụ ogbogh ọsuaram anyina; oomo areten phọ ọdi eeleeny ni, Ẹnaan anyina oye rébi ghan, ịkaraph réḍighi ghan, eseleman ni kụ aaleeny.

⁵ Nyina ị́kpianaan mun oghol mọ awe ọdi loor esi ịkaraph phọ anyina, we oghiil dị úseleman.

⁶ Ịduon kụ ịdi nyina keḍighi Ọmoogh-we phọ, nyina ạbuo elologhi, we dị ologhi úsu? Ọdi kọ́de phọ anyina, ọpo ịlhem bọ inyina? Ọdi kụ iikpomoghi inyina aḍighi we eniin eelhe.

⁷ “Ịitughian ghan siḍughul-otu ịpe aḍiodiidi phọ, ẹetughian ghan sịa phọ meten bọ. Ipuru bụrude anyina ịḅeni inyina ịpe emite bọ; epuru ikumoor awe phọ anyina, bịdi kịḅeni ni inyina.

⁸ Mem mọ Ọkaraghi Egbogh Ẹnaan phọ adiighi bọ rere phọ, ọdi kụ ạtooghi riisi lọ areelhe kẹtologhu, ọdi kụ aseenaan eelhe kịrokiro ọokpaany.

⁹ Abin mụo Ọmoogh-we phọ, pọ awe phọ ọdi. ẠJekob kụ abin erua ẹlo ọdi.

¹⁰ “Ọdi ạmiin nyọdi ẹpe aḍiguuleeny ade phọ, de dị ị́moogh ịyaar oḍighinom, kụ ọdi aghurughi nyọdi ạsighe aloghoma, kụ aphogh ghan nyọdi ịdipho ọony aḍien phọ ọdi.

¹¹ Ịdipho uga dị rạtughemi nmụny ịlo ọpheeph kạatarion ghan raphaaph ọdi amuphonom bịdi, kụ ịdi Ọmoogh-we phọ ạmaar ri aphogh Ịzirel ịdi kómeel.

¹² Ọmoogh-we phọ bịn kụ aḍiemiom we ọdi, dị eeruen ẹmugh ḍịghaagh ị́logh.

¹³ “Ọdi aḍighi ịdi bịdi kụ ọda ghan oomo iiphopha ariisi ịsien aḅirini phọ, kụ ole ghan rạraar lọ ẹḍua sịphe ade phọ kụ emite kụ ọlaay ghan ẹnuum aḍiowo lọ ẹḍua ghan loor aḍighiigh emite, ọḅile kẹn ọlaay ghan mụnum lọ ạḍua ghan loor ạḍiikpara aḍighiigh kụ amite.

¹⁴ Eḍien ạbidi ạmamaam ạsinam dị aniirogh, rꞌạmamaam iyool-ịga dị aniirogh, rꞌẹnuum ạnmuny ịga rꞌidughuna rꞌạrutu-ịga ẹpe Bạsan, ọḅaram rꞌipoola igey ịbiakpa, rꞌịser-sẹr iimuma avain.

¹⁵ “AJesurun mạnuum ạpataghan, aruwol ekpulughan, tụ nạ maphoph ạmoogh ịnyaam, tụ nạ mạnuum, ẹnuum eekpereghiom nyịna. Ọdi maghel Ẹnaan phọ ẹpe ẹlhem bọ nyọdi, ạḅitonaan ḍighiigh phọ ạḍiphe ẹphel bọ nyọdi.

¹⁶ Bịdi ọsighe ịnon ạrumugh oḍighinom ịdi ẹghagh ologhi Ọmoogh-we phọ, ọsighe sịḅaphanya oḍighinom ịdi ẹghagh ologhi ọdi.

¹⁷ Bịdi ọphinyon yogh ghan rịkia ọngo rụmugh dị kạ́rumugh, rụmugh dị bịdi úlegheri, imoom ạrumugh dị pụruku emite, rụmugh dị ạburude ạbidi kőmeeraam ghan kꞌekulha.

¹⁸ Nyina ị́logh mun elegh ḍighiigh phọ ạḍiphe ịmar bọ inyina. Nyina mewula Ẹnaan phọ ịlhem bọ inyina.

¹⁹ “Mem dị Ọmoogh-we phọ ạmiin bọ ịphen, iphin ologhi ọdi, kụ aghel lephiri rꞌạnmanyaan phọ ọdi.

²⁰ Kụ ọdi ạḅem mọ, ‘Mị kạbooghinaan bịdi risigh ạmi kụ mị ạmiin ịpe eekuna phọ ạbidi kẹtol bọ, ịdi eḍighi bọ bịdi oghiil ạsipioghom, ạnmuny dị ologhi úḍuom.

²¹ Bịdi mọsighe rụmugh phọ ạbidi oḍighinom ịdi repin ologhi ạmi. Bịdi mọsighe oomo oopho ạraraar phọ ạbidi ụngoom ịmi ọghagh ologhi; kụ mị kạsighe we dị ụ́man oghola mọ eelhe aḍighi ịdi kẹkagh iloghi ạbidi; mị kaḍighi ni dị eelhe ạbuo arolologhi kepin ghan iloghi ạbidi.

²² Mọkpooni nịan otumeriom ọghagh ologhi phọ ạmi, nịan dị keemor esi kꞌẹpe ude ooni ạnian phọ, dị keemor ele epiemi aḅirini phọ rꞌaruphua phọ ọdi, kụ mị ạsighe nịan ạlogh ude aruugum mọ.

²³ “‘Kụ mị ạsighe ịkaraph akpolom rụmhu ạbidi, kụ mị ạsighe ịkpina phọ ạmi ạtaḅal bịdi.

²⁴ Ọkoony kụ kạze bịdi; ẹghologhol epiemi bịdi, rꞌẹepoph dị reeteneghian ghan; kụ mị atom ilhom ịnam kụ elomi bịdi, rꞌạrakaraph ạraraar phọ rekuura bọ sịen ude phọ.

²⁵ Elhool ẹgham mọ kékpetenaan ni bịdi kụ bịdi omeleghu reten kụ aruugu ẹtol sịphe iloghi iisoph phọ ạbidi, kụ epiemi ugheel ạnmuny rꞌarisina, nmụny asipugh rꞌikumoor awe ạsuol.

²⁶ Mị ụḅem mọ “Mị kạwalami ni bịdi ạsighe ạkele, kụ mị aḍighi ịdi awe bịdi kọ́otughian ghan mun,”

²⁷ mụghumo mị rákiilaan bọ ịgilaam ạbumulogh-ḍien phọ, ọbo bịdi kootuma ghan bọ, ọbo bịdi kọḅem ghan bọ mọ ạḍighaagh ạbuno edi ạnyu, kụ Ọmoogh-we phọ kụ óḍighi bọ oomo ịphen phọ.’

²⁸ “Ịzirel eelhe dị ologhi úsu; eelhe dị rọ́naghan ghan ḍụghum.

²⁹ Bịdi ọwile ọmiin ịpe eḍighi bọ kụ bịdi omeel bọ; bịdi ụ́naghan ịpe emite bọ.

³⁰ Oniin oye kaḍighi ika kụ atue bọ aporogh oniin ọonir awe? Ịyal awe koḍighi ika kụ otue oporogh ḍioph ọonir awe, omuton dị Aḍighiigh phọ kụ ẹḅitonaan bịdi, dị Ọmoogh-we phọ kụ ạḅogh ạngo bịdi?

³¹ Ạbumulogh-ḍien ạbidi olegheri mọ aruru ạbuno ị́moogh ịnyaam, ị́kigh ịdipho Ẹnaan Ịzirel phọ ẹpe ẹmoogh bọ ịikpo.

³² Ạbumulogh-ḍien phọ ạbidi ọmoogh ẹkaraph eḍighinom ịyaar, ọkighogh Sọdom rꞌaGomora; ọtol ịdipho iizin dị emuum iimuma avain eghiḍim kụ kekiigh oye.

³³ Amiim mụo ạbidi rạze ghan we, dịadi ẹkaraph-ịyaar kụ ilom.

³⁴ “Ịphen phọ Ọmoogh-we phọ úsereghinaan ḍụghum, ụ́kasiom sịphe ọdi rasereghi ghan bọ ruphua phọ ọdi ḍụghum?

³⁵ Ạghelhe ạkuo ọdi, oḅulemian ọlo ọdi mem lọ owol ạbidi ạghorom, loor esi dị amem ạḍikaraph ạdol ạbidi mạabeeph, odi ẹda ạḍighaagh.

³⁶ Ọmoogh-we phọ kasophonaan ni we phọ ọdi ọoruen akeel, kụ ạnma butelhedom mọ ọdi ighirigiir mem mọ ọdi ạmiin bọ mọ ịnyaam bịdi ílho mun, mọ oye ólho dị katue ạloghonaan bịdi ḍịghaagh.

³⁷ Kụ Ọmoogh-we phọ apuru we phọ ọdi mọ, ‘Ạrumugh phọ ạbidi edi ẹghen, aḍighiigh phọ ạbidi ḍịphe nyina eḍuom bọ ologhi?

³⁸ Nyina ịzooghiom bịdi ẹnuum ạrikia phọ anyina, kụ ẹngo bịdi miim mọ ọphughol. Bịdi eḅetenu ịloghonaan inyina ḍịghaagh; bịdi eghiil eru ịtagharan inyina!

³⁹ “‘Mị, ogina ạmi kụ Ẹnaan; umuton ịmi, ẹnon ẹmugh ílho. Mị akiigh kụ ạḅile ạngo ghuḍum. Mị amitiom esi kụ ạḅile aakonom. Kụ oye dị katue ạtagharan ạsighe sịphe ạḍighaagh phọ ạmi ólho.

⁴⁰ Ịdipho mị kụ aḍighi bọ Ọpo odi ghan bọ kꞌagee-pọ phọ, mị apoophe ḍịghaagh ạmi apoghomiom ạnyu kụ ạḅem mọ

⁴¹ mị kakola elhool ẹgham mọ ạmi rẹmepheghian bọ kụ aagbo ịiruen. Mị kaḅulemian ẹpomoghian phọ ạmi, kụ ạliom bụphe ụlogh bọ ịmi ḍien.

⁴² Ịkpina phọ ạmi kẹtephom ịḅaal, kụ elhool ẹgham mọ ạmi ẹze bụphe ụ́wa bọ ọmiin ạmi. Mị rásugheeny rꞌoniin ọlo ueenan ịmi ghạlamo ạbulo oḍighima yogh rạraar rꞌạbulo osiphi yogh ologhi ikoli komuughu ni.’

⁴³ “Nyina ịpheri phọ areelhe phọ ẹmoogh ọseph awe phọ ọdi, ịdi eḍighi bọ dị kạle ni ghẹlhe ịḅaal abutelhedom mọ ọdi. Ọdi kaḅulemian bụphe ọlogh bọ nyọdi ḍien kụ ạsar ạbilenaan ịkaraph awe ọdi.”

⁴⁴ AMozis ạghaaph oomo ikpo ọnhu ạḍuor phọ ạḍien adoghoḍi sụruru awe phọ, ọdi rꞌaJosua ọony phọ ạNon.

Ịlo okureriom dị aMozis ạḅeni bịdi

⁴⁵ Mem dị aMozis ạghaaph bọ oomo ịtughemi phọ Ẹnaan ạmadan,

⁴⁶ kụ ạḅeni oomo awe phọ Ịzirel mọ, “Ịsighe oomo phọ ịphen mị mạghaaph bọ sịen ogbo phọ anyina rodon ẹlhogh iloghi anyina, ẹḅile ẹḅeni nmụny phọ anyina, ọbo bịdi ọkuami ooko ghan oomo ịpe Ẹnaan ẹtughemi bọ.

⁴⁷ Ịtughemi phọ ịphen kóopho ikpo ọnhu, eḍighi aghuḍum mọ anyina. Ịdaphan kụ nyina kẹmoogh kụudoony aghuḍum ẹpe ade phọ edi bọ ẹḅeenyom ạJodan ẹpe nyina keḍigh bọ etugh.”

⁴⁸ Ọmoogh-we phọ ạḅeni Mozis egina phọ aḍio phọ ạḍiphe mọ,

⁴⁹ “Kịa ẹpe Aruugum Abarim sịphe ade phọ ạMoab ḍịeri ạḍighaagh dị rapogh Jeriko. Sịiny ạnyu Eegum aNebo kụ aphogh de phọ aKenan akananaam. Ḍịphe kụ ade phọ mị rạwa bọ ọngo awe phọ Ịzirel.

⁵⁰ Nạ kamugh sịphe ạnyu eegum mọ, ịdipho Eeron umor phọ ạna amugh bọ ẹpe ạnyu Eegum aHor kụ ọsighe bọ nyọdi ọḅophoghiom rꞌawe phọ ọdi,

⁵¹ ịdi eḍighi bọ ịyal anyina ịmi ímeeraam sịphe ogbo awe phọ Ịzirel. Mem mọ nạ ạrol bọ ọogaany ạrumuum mọ aMeriba-Kades ẹpe ẹdala phọ aZin, nạ ịmi ụ́sighenom dịadi mị oye iigbia ni ogbo awe phọ Ịzirel.

⁵² Loor esi ịphen phọ nạ kạtol li kꞌegher kụ ạmiin aani de phọ. Nạ káḍigh de phọ mị rạngo bọ we phọ Ịzirel.”