Dutoronomi 29 - Ạḍinya Iigbia

Ịyo phọ Ọmoogh-we aghiran bọ rꞌawe Ịzirel sịphe ade phọ ạMoab

¹ Ịphen kụ ikpo ọnhu ịyo phọ ịpe Ọmoogh-we phọ ạlogh bọ ologh ạngo Mozis, ịpe ọno rꞌawe Ịzirel oghiran bọ ẹpe ade phọ ạMoab. Ịphen kị́pe bịdi rꞌọno oghiran bọ ẹpe Eegum aSainai.

² AMozis aakpomoghi oomo Ịzirel kụ ạḅeni mọ, “Nyina ịmiin ni oomo phọ ịpe Ọmoogh-we phọ aḍighi bọ ọdaam mọ Ijipt rꞌoomo ạrebene phọ ọdi rꞌade phọ ọdi,

³ oboom mọ ọdegh-ophogh phọ ọpo nyina ẹmiin bọ ni rꞌareḍeenaan phọ rꞌiboom mọ ịiḍaany phọ.

⁴ Kꞌarodon Ọmoogh-we phọ inyina ị́ngo ologhi ọnaghan ạḍughum rꞌariḍien ọmiinom ghan eten rꞌạsururu ọnaghanan ghan.

⁵ Mị irelhiom bọ inyina inyadi ạsia ẹpe ẹdala phọ, arukpe phọ anyina inyina íḅu ị́gharam, arokoro phọ anyina edi ni sịphe aruwol phọ anyina íḅu.

⁶ Nyina eḍien íle, miim ịya nyina ị́pughol, zịni nyina ị́pughol, ọsighe olegheriom mọ mị kụ Ọmoogh-we Ẹnaan phọ anyina.

⁷ Kụ mem mọ yira oru bọ sịen kụ aSihon ọdaam mọ aHesbon rꞌạOg ọdaam mọ ạBasan aru bọ uzuom iyira ẹgham, yira kụ ụkpar opu bịdi,

⁸ kụ yira ọsighe de phọ ạbidi ọngo eghun aRuben, eghun ạGad, rꞌạpakiri eghun ạManase.

⁹ Kụ iḍighi, igona siloor anyina ẹdaph ghan ikpo ọnhu ịyo phọ ịphen, ọbo ịnighenom inyina esi oomo arukumuan phọ anyina.

¹⁰ “Rodon phọ ạḍien oomo phọ anyina ẹmeera sịen egbodo Ọmoogh-we Ẹnaan phọ anyina, bụo ạrumhu arughunughun phọ anyina, ikumoor awe phọ anyina, bụo ịtooghi phọ, rꞌoomo awe phọ Ịzirel,

¹¹ ịbam ạnmuny rꞌạnmariir phọ anyina, rꞌaruuruen lọ orugh sịphe arugbogo phọ anyina, emiigh bụlo rịsoonaan ghan inyina ịpe rꞌạbulo rịkpaaghinaan ghan inyina mụum.

¹² Oomo phọ anyina rꞌỌmoogh-we phọ kụ kekiran bọ ni ịyo phọ Ọmoogh-we Ẹnaan phọ anyina rꞌanyina rekiran bọ rodon,

¹³ ọbo ọdi igananami inyina rodon mọ nyina awe ọno, ọbo ọdi aḍighi Ẹnaan anyina, ịdipho ọdi aghunya bọ esi ạburude phọ anyina, Ebraham rꞌẠizik rꞌạJekob.

¹⁴ Nyina rꞌạmi bịn kụ rókiran bọ ịyo phọ ịphen, rꞌiikunya phọ ịphen mị aghunya bọ.

¹⁵ Ọḅaram ni rꞌạbulo sịen úlho rꞌayira ḍio phọ arodon egbodo Ọmoogh-we Ẹnaan phọ ayira.

¹⁶ “Nyina elegheri ni dọl phọ ạḍiphe yira ọrol bọ ẹpe eelhe phọ Ijipt rꞌạramha phọ ịpe yira oteneghom bọ.

¹⁷ Nyina ịmiin ni sịḅaphanya phọ ạbidi, igbudu phọ ạbidi, ịpe ireeny phọ rꞌịpe ạrana phọ, silva rꞌagol phọ eko bọ bịdi ekitonom.

¹⁸ Igona siloor anyina sịphe ogbo phọ anyina, mꞌolephiri mꞌạnir mꞌọto mꞌeghun ọlo ologhi kakitonu rodon bịn ạḍua esi Ọmoogh-we phọ Ẹnaan phọ ayira ạki aaseeny rụmugh ịnon areelhe phọ, ọbo ạḍini dị kemuum iimuma eghiḍim rꞌaḍuugh kẹtol ghan bọ sịphe ogbo phọ anyina.

¹⁹ Oye lọ ạnaghan iikunya ikpo ọnhu ịyo phọ ịphen kụ ạsephian loor sịphe ologhi phọ ọdi kụ ạḅem mọ, ‘Ịyaar ịmi kíḍighi, ghạlamo ịduon mị ratelhiom bọ ni rꞌoḅom ẹmhu sịphe ologhi phọ ạmi, ạḅaram ịpughol rꞌẹephua ịpughol.’

²⁰ Ọmoogh-we phọ oye phọ ọpo kạ́bilenaan. Ạghelhe phọ Ọmoogh-we phọ rꞌọghagh ologhi phọ ọdi kesoroghuom ni oye phọ ọpo, kụ oomo phọ itulughian phọ ịphen ọge bọ sịen ạḍinya phọ ạḍien esoroghuom oye phọ ọpo, kụ Ọmoogh-we phọ agbuurogh ḍien oye phọ ọpo ạsighe sịen aḅirini phọ.

²¹ Ọmoogh-we phọ kemutonaan ni oye phọ ọpo ẹgbatan ẹsighe sịphe oomo arughunughun phọ Ịzirel, ẹḅogh nyọdi ẹngo ịkaraph, ọdaph oomo itulughian ịpe ịyo phọ ọge bọ sịen ạḍinya iilogh phọ ạḍien.

²² “Oghiil ạnmuny phọ anyina, bụphe kọsighe bọ dọl phọ anyina, rꞌoye lọ ạḍua egher ekpisi kụ aru, kọmiin ni roopoph phọ edi bọ sịphe ade phọ rꞌạreezegh phọ ịpe Ọmoogh-we phọ asereghi bọ.

²³ Oomo ade phọ ạḍiphe phọ, arabana rꞌaboph bịn. Ozo róḅeph ghan, eḍien résoor ghan. Ạroogho rási ghan, ịdipho ade phọ ạSodom rꞌaGomora rꞌAdma rꞌaZeboyim, ḍịphe Ọmoogh-we phọ ạsighe bọ ghẹlhe rꞌọghagh ologhi kụ aphiemiom bọ.

²⁴ Kụ oomo areelhe phọ kopuru ghan mọ, ‘Uḍighi ika kụ Ọmoogh-we phọ ạtu bọ aḍighi de phọ ạḍien ịduon? Eeghe kụ ịkom bọ oboom ọghagh ologhi phọ ọphon?’

²⁵ Kụ awe ọḅem ghan mọ, ‘Bịdi ụphue ịyo phọ Ọmoogh-we Ẹnaan ạburude phọ ạbidi rꞌạbidi oghiran bọ, mem mọ dị ạsighe bọ bịdi amitiom ạḍuanam ẹpe eelhe phọ Ijipt,

²⁶ kụ ọghi ọoḅereghi ghan, ooseeny ghan ịnon ạrumugh, rụmugh dị bịdi úlegheri, ọdi kụ bịdi ọ́ngo.

²⁷ Kụ Ọmoogh-we phọ ạghagham de phọ ologhi, kụ ạsighe oomo phọ itulughian phọ ọge bọ sịen ạḍinya phọ ạḍien azuom de phọ.

²⁸ Ọmoogh-we phọ ạsighe ọghagh ologhi aruphuron bịdi ạsighe sịphe ade phọ ạbidi; rꞌọghagh ologhi kụ ạsighe bịdi ạghi atebeeny ḍịnon ade kꞌarodon.’

²⁹ “Ạraraar phọ ịpe edi bọ esi ịbooghian phọ, ịlo Ọmoogh-we Ẹnaan phọ ayira; kụ ịpe momitiom bọ ogananami, ịlo ayira rꞌạnmuny ayira kꞌagee-pọ, mọ yira oḍighi ghan oomo ịpe iilogh phọ ẹḅem bọ.