Dutoronomi 27 - Ạḍinya Iigbia

Iilogh phọ ọge ạnyu asighiigh

¹ AMozis rꞌikumoor awe phọ Ịzirel ụto ni ọḅeni we phọ mọ, “Iiko ghan oomo iilogh phọ ịphen mị adoghoḍi bọ ịngo inyina rodon.

² Kụ egbi ọteeny aḍio phọ ạḍiphe nyina kẹḅeeny bọ Jọdan epun ẹki esi ẹpe ade phọ Ọmoogh-we Ẹnaan phọ anyina ịngo bọ inyina, ekori egimogh igbogh asighiigh ẹsighe ạḅay egbulogh,

³ kụ ẹsighe oomo iilogh phọ ịphen ẹge sịphe asighiigh phọ, mem dị nyina mẹḅeeny ephun ẹrol repogh ẹpe ade phọ Ọmoogh-we Ẹnaan phọ anyina ịngo bọ inyina, de ẹetool rꞌọninom, ịdipho Ọmoogh-we Ẹnaan ạburude phọ anyina iguanaan bọ inyina.

⁴ Kụ nyina rẹḅeeny Jọdan repun bịn ekori egimi sighiigh phọ ịphen mị ạlogh bọ ologh ịngo inyina ḍio phọ arodon sịen ạnyu Eegum Ebal, kụ ẹsighe ạḅay egbulogh sighiigh phọ.

⁵ Kụ ẹkananaan sịphe phọ enmeny ạrikia Ọmoogh-we Ẹnaan phọ anyina, enmeny asighiigh. Kẹ́sighe rukuron kụ ẹkanam sighiigh phọ.

⁶ Ịsighe ghan sighiigh lọ eseleman kụ ẹkananaan Ọmoogh-we Ẹnaan phọ anyina enmeny ạrikia phọ; kụ ẹphighironaan ghan sịphe phọ ẹkia ịyaar aghuḍum oguom ạnian ẹngo Ọmoogh-we Ẹnaan phọ anyina.

⁷ Ịpighironaan ghan sịphe phọ ẹkia ẹboroph kụ ẹrol ghan sịphe phọ kụ ele; ẹrol ghan sịphe esomanan egbodo Ọmoogh-we Ẹnaan phọ anyina ẹmoogh ọḅaal ologhi rꞌibo,

⁸ kụ ẹge sịphe asighiigh phọ egananami oomo ikpo ọnhu phọ ịphen.”

⁹ AMozis rꞌariil ạrikia aLivait phọ ọghaaph ọḅeni oomo awe phọ Ịzirel mọ, “Isereghian ẹnaghan rodon, mọ nyina Ịzirel moḍighi we Ọmoogh-we Ẹnaan phọ anyina.

¹⁰ Kụ iḍighi ịnaghanan ghan ẹḍogh Ọmoogh-we Ẹnaan phọ anyina, eeko ghan iilogh phọ ọdi rꞌịtooghi phọ ịpe mị ạlogh bọ ologh ịngo inyina rodon.”

Itulughian ạbulo ọḅaar ẹmhu

¹¹ Kụ aMozis ạlogh ologh ḍiniin phọ aḍio phọ kụ ạḅem mọ,

¹² “Mem lọ nyina ẹḅeeny Jọdan ephun, bụen kụ kọmeera bọ sịphe ạnyu Eegum aGerizim, ọseph ghan awe phọ: ạSimion, Livai, Juda, Ịsaka, Jọsef rꞌạBenjamin.

¹³ Bụen kụ kọmeera sịphe ạnyu Eegum Ebal osuughi ghan ọkaraph ọghor: aRuben, Gạd, Ạser, Zẹbiulon, Dạn rꞌạNaftalai.

¹⁴ Bụo aLivait phọ kọsighe ghan ẹḍogh lọ ẹghi ạnyu kụ ọkaaphom ghan ọḅeni oomo awe phọ Ịzirel mọ,

¹⁵ “‘Itulughian ẹrolonaan oye lọ ạka tọrobo ịyaar mꞌạḅol igbudu, ẹmugh dị ọsighe rạghaagh kụ ọkaam arukumuan ọkaam ạmaka, kụ ạsighe aseere esi ịbooghian. Ạḅaphanya ni esi Ọmoogh-we phọ.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’

¹⁶ “‘Itulughian ẹrolonaan oye lọ ọde ọdi rꞌonhiin ọdi rákueni ghan.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’

¹⁷ “‘Itulughian ẹrolonaan oye lọ aagbonyon ọku ade amatuman ọdi.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’

¹⁸ “‘Itulughian ẹrolonaan oye lọ ạma eten dị ítu nyịne kụ aḍeenaan oye dị ariḍien eḅomoghian.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’

¹⁹ “‘Itulughian ẹrolonaan oye lọ anme akeel ịiruen ooruen, mꞌịlo ọnyigo ọony, mꞌịlo ekpukele ạnir.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’

²⁰ “‘Itulughian ẹrolonaan oye lọ ạnir ọde ọdi rꞌọdi kụ ọrolan esi. Ọdi mạrolomi ẹdaḅa ọde phọ ọdi.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’

²¹ “‘Itulughian ẹrolonaan oye lọ ẹnam rꞌọdi kụ ọrolan esi.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’

²² “‘Itulughian ẹrolonaan oye lọ umor ạnir-ephoph ọdi, mꞌọony ọde ọdi, mꞌọony onhiin ọdi, rꞌọdi kụ ọrolan esi.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’

²³ “‘Itulughian ẹrolonaan oye lọ onhiin ạnir ọdi rꞌọdi ọrolan esi.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’

²⁴ “‘Itulughian ẹrolonaan oye lọ ạko enu ạaghian kụ aghiigh matuman ọdi.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’

²⁵ “‘Itulughian ẹrolonaan oye lọ ọkpe ikpoki mọ aghiigh oye dị mạar ụ́piom.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’

²⁶ “‘Itulughian ẹrolonaan oye lọ úmeeraam ikpo ọnhu iilogh phọ ịphen, kụ ụ́daph raako ghan iilogh phọ.’ “Kụ oomo awe phọ omeeraam ghan kụ ọḅem ghan mọ, ‘Ẹrol li ịdipho.’