Dutoronomi 26 - Ạḍinya Iigbia

Inmo ibugha phọ

¹ “Mem dị nyina ẹghi esi ẹpe ade phọ Ọmoogh-we Ẹnaan phọ anyina rịngo bọ inyina ọmoogh phọ, kụ nyina rẹmoogh rerughogh sịphe phọ,

² ịsighe ghan iniin sịphe oomo ịḅel iimuma phọ anyina, ịpe nyina ebugha bọ sịphe ade phọ Ọmoogh-we Ẹnaan phọ anyina rịngo bọ inyina, ịsighe ghan ẹlhogh ọkpa ẹsighe ẹghi esi phọ ẹpe Ọmoogh-we Ẹnaan phọ anyina ạsaḅar bọ aseenaan ḍien phọ ọdi.

³ Ịki ẹteeny oyil ạrikia ọpo odi bọ mem mọ ạmuphe, kụ ẹḅeni nyọdi mọ, ‘Yoor uru ọghaaph omitiom ọḅeni ạna rodon, ọḅeni Ọmoogh-we Ẹnaan phọ ayoor mọ yoor mosi ẹpe ade Ọmoogh-we phọ aghunya bọ ạngo bụrude phọ ayoor ọngo ayoor.’

⁴ “Kụ oyil ạrikia phọ kiseere ni inyina ọkpa phọ sịphe ẹmha phọ ạna, kụ ạsighe ạḅam ạnyu enmeny ạrikia phọ Ọmoogh-we Ẹnaan phọ ạna.

⁵ Kạaph ạḅeni Ọmoogh-we Ẹnaan phọ ạna mọ, ‘Ọde phọ ạmi ọlo ạSiria dị ịlo ọrol úlegheri kụ asuma agheel Ijipt kụ arugh ẹpe, ịyal-ikpo ạbidi kụ ugheel bọ ẹpe phọ, kụ ọdi aḍighi eboom eelhe oḍiza ọbugh omitiom ḍien.

⁶ Kụ bụo Ijipt phọ ụmiine iyoor, ụkpiloghom iyoor, ụsighe iyoor oḍighi rẹbene.

⁷ Kụ yoor omoghi osumeriom Ọmoogh-we Ẹnaan ạburude phọ ayoor, kụ Ọmoogh-we phọ ạnaghan ẹḍogh phọ ayoor, kụ akiton aphogh ịminimiin phọ ayoor rꞌarukumuan phọ ayoor rꞌạdol ạrebene phọ.

⁸ Kụ Ọmoogh-we phọ ụsighe iyoor amitiom ạsighe ạḍuanam ẹpe Ijipt rꞌạḍiikpara ạḍighaagh, asele ḍilhom ạḍighaagh phọ ọdi, aḍighi iiḍighi okpereghaan rꞌareḍeenaan rꞌịiḍaany.

⁹ Kụ ọdi ụsighe iyoor asiemi ẹphen phọ, kụ ụngo iyoor de phọ ạḍien, de ẹetool rꞌọninom.

¹⁰ Kụ iḍighi kụ mị mạsighe ịḅel iimuma ịsiphe ade phọ nạ Ọmoogh-we phọ ụngo bọ ịmi atumom.’ “Sịghe ọkpa phọ aseere ude esomanan Ọmoogh-we Ẹnaan phọ ạna, kụ ạaḅereghi sịphe egbodo Ọmoogh-we Ẹnaan phọ ạna,

¹¹ kụ ạmoogh ọḅaal ologhi, aboom oomo igey ạraraar phọ ịpe Ọmoogh-we Ẹnaan phọ ạna ạngo bọ nyịna, nạ rꞌọto kꞌạna rꞌaLivait phọ, rꞌaruuruen phọ rꞌạna erughan bọ.

¹² “Mem lọ nạ mạkpeeghi ạmadan muniin abin esi aḍioph asibin phọ; esi oomo ịpe ariḍien phọ ạna esoor bọ esi ịraar ạsia, (ḍịphe kụ ạlha phọ nyina kẹkpe ghan bọ muniin abin sịphe aḍioph asibin phọ), sịghe ghan ạngo bụo aLivait phọ rꞌaruuruen phọ rꞌịnyigo ạnmuny phọ rꞌarukpukele ạnmariir phọ, bịdi ọrol ghan sịphe ạramha phọ anyina olhe ghan ẹpher.

¹³ Kụ ạghi egbodo Ọmoogh-we Ẹnaan phọ ạna ạḅeni mọ, ‘Mị mạsighe bin iigbia phọ sịphe kꞌạmi ạsighe ạngo kꞌạbuo aLivait phọ rꞌaruuruen phọ rꞌịnyigo ạnmuny phọ rꞌarukpekele ạnmariir phọ. Mị ạdaph ni oomo iilogh phọ ịpe nạ ạlogh bọ ụngo iyoor. Mị ụ́ka rꞌoniin ologh sịphe iilogh phọ, ḅịle kẹn mị úbula iilogh phọ.

¹⁴ Mị kọ̋ḅaram ghan muniin abin mọ ạmuphe esi aḍioph asibin phọ óliom, mem lọ mị odi esi ọto. Mị kọ̋sighe ghan kẹn muniin abin mem lọ mị ụ́ḅaal, mị kọ̋sighe ghan kẹn muniin abin ạphighoronaan ạngo bụlo úlho. Mị ạnaghanan ni ẹḍogh Ọmoogh-we Ẹnaan phọ ayoor, kụ mị ạdaph ni oomo iilogh phọ ịpe ọdi ạlogh bọ ụngo iyoor kụ raḍighi ghan.

¹⁵ Tọl sịphe ạdol iigbia phọ ạna ẹpe kꞌạke aphogh ude, ạseph we phọ ạna Ịzirel rꞌade phọ ạḍiphe nạ ụngo bọ iyoor, ḍịphe nạ aghunya bọ ạngo bụrude phọ ayoor, de ẹetool rꞌọninom.’

Aweye Ọmoogh-we phọ

¹⁶ “Rodon Ọmoogh-we Ẹnaan phọ anyina ạto rịḅeni inyina mọ ịdaph ghan ịtooghi phọ rꞌịiruen phọ ọdi kụ eḍighinom ghan; kụ iḍighi kụ ịpamanam oomo phọ ịdi, ẹsighe eseerian sịphe iloghi phọ anyina rꞌaruwaloor phọ anyina.

¹⁷ Rodon nyina meghunya bọ ẹngo Ọmoogh-we phọ, ẹḅem mọ ọdi kụ Ẹnaan anyina, mọ nyina kẹdaph ni reten phọ ọdi etelhe ghan, eeko ghan ịtooghi phọ ọdi rꞌiilogh phọ ọdi rꞌịiruen phọ ọdi, ẹnaghanan ghan ẹḍogh phọ ọdi.

¹⁸ Kụ Ọmoogh-we phọ mạḅem ịlo anyina rodon amitiom mọ nyina awe ọno, abin ọno, ịdipho dị iguanaan bọ inyina, nyina iiko ghan iilogh phọ ọdi.

¹⁹ Kụ ọdi iphoophe inyina ạbughe apuemi oomo ịpheri phọ areelhe phọ ịpe ọdi ạlhem bọ, nyina emitiom ḍien ạḍiseph rꞌarughuenian, kụ nyina iḍighi we aghuḍuul, we iigbia esi Ọmoogh-we Ẹnaan phọ anyina, ịdipho ọdi ạghaaph bọ ịḅeni inyina.”