Dutoronomi 25 - Ạḍinya Iigbia

¹ “Eru mạar dị awe ọmoogh ịikonoghian kụ ọsighe ọghi sịphe otu ịiruen phọ, pọ abuugboom ịiruen phọ ọtuugh elhiom kúsoph ogheelemi nyọpo ụ́pioman bọ, ophume nyọpo ạpioman bọ.

² Kụ eru mạar dị ọpo ạpioman bọ ạkpianaan ọgurogh, pọ ọdi ạmina aḅololo. Ịgurogh nyọdi esomanan ạbueri phọ awe phọ, eghol ọnhu amem mọ kọgurogh bọ nyọdi ịpe ẹkasian bọ rꞌọpioman phọ ọdi.

³ Ịgurogh nyọdi inyadi amem kípel pạ, kụ eru mạar dị oye ạgurogh nyọdi apeelhe, pọ ọdi maphogh umor phọ ạna asooromi.

⁴ “Kẹ́kasaghi ghan ọnhu ạnam mem lọ nyina rẹgbe ịbiakpa.

Ịdi ẹkpe oḍighi ghan mem lọ umor oye amugh

⁵ “Eru mạar dị aḍita abumor orugh egina esi kụ oniin ọnyo ạbidi amugh kụ mọony ụ́mar, pọ kẹ́sighe ạnir phọ ọdi sịphe eghun umor phọ ọpo amugh bọ ẹ́ngo ooruen mọ aphin. Umor ọpo amugh bọ kụ ạsighe ạnir phọ aphin, kụ aḍighi ghan ịpe olhom raḍighi ghan bọ ạnir.

⁶ Ọḅel olephiri ọony lọ ạnir phọ ạmar, pọ ọony ạsighe dọl aḍien umor phọ ọdi ọpo amugh bọ, ọbo aḍien ọpo mamugh bọ kepe ghan bọ Ịzirel.

⁷ “Eru mạar dị umor oye phọ ọpo amugh bọ úmeera olhe erua, ophin ạnir phọ, pọ ạnir phọ ạghi ạteeny ikumoor awe ịsiphe ẹmha phọ ạḅeni mọ, ‘Umor olhom mọ ạmi ómeera ophin ạmi omitiom aḍien umor phọ ọdi sịen Ịzirel. Ọdi ómeera oḍighi ịdi ẹrol dịadi dị umor olhom ạmi ni.’

⁸ Ikumoor awe ẹmha phọ ọmagh oye phọ ọghaaph ọḅeni. Eru mạar dị oye phọ úmeera ni ophin ạnir phọ kụ ạḅem mọ, ‘Mị rápin nyọdi,’

⁹ pọ ạnir umor phọ ọdi ạghi sịphe arisigh ikumoor awe phọ ạkporonaan okoro ọdi, ạsinom ịghor risigh umor olhom mọ ọdi, kụ ạphagharanaan ạḅem mọ, ‘Ẹtuugh aani ịphen phọ emitenaan oye phọ ọpo rapiemi bọ ḍibuo otu umor phọ ọdi!’

¹⁰ Kụ aḍien dị kokol otu oye phọ ọpo sịen Ịzirel, kokol mọ ‘otu ophiemi ịlo ọnon, otu oye dị mọkporion okoro ọdi.’

Ịnon iilogh

¹¹ “Mem dị ịyal awe robe kụ ạnir ọpo rokuphogh bọ kụ ạghi ọogbarion ọsighe olhom mọ ọdi rokuphogh bọ, kụ ạsighe ḍịghaagh ọdi kụ asiphom ipholophool ọphori phọ oye,

¹² pọ isoph ḍịghaagh ạnir phọ, kẹ́nma nyọdi ighirigiir.

^13-14 “Kẹ́moogh ghan ọtoom kịrokiro kꞌanyina, ọbam rꞌogbogh, ịlo oogbegheḍiom awe.

¹⁵ Ịmoogh ghan ọtoom dị ẹemor phọ eeleeny aḍighi oniin, amunughan aḍighi ogey ọtoom, ọbo asuḍughul-otu phọ anyina ẹdoony ẹrol ebia sịphe ade phọ Ọmoogh-we Ẹnaan phọ anyina ịngo bọ inyina.

¹⁶ Oomo ạbuphe roḍighi yogh ghan bọ ọdo kịrokiro phọ ịphen, rꞌạbuo iigbegheḍiom mọ, ạḅaphanya ni esi Ọmoogh-we Ẹnaan phọ anyina.

Ọḅeni ọkpaariom mọ ọze ni weye Ạmalek

¹⁷ “Ịitughian ghan ịpe Ạmalek iḍighi bọ inyina ẹpe eten phọ, mem mọ nyina ẹḍua bọ ẹpe Ijipt;

¹⁸ ịdipho dị izuom bọ inyina ẹpe eten phọ, mem mọ ịnyaam inyina ílho bọ nyina medughogh bọ, kụ akuphogh bọ bụphe ọrol bọ ọman anyina, dị Ẹnaan óghiilaan.

¹⁹ Kụ ẹteeny mem dị Ọmoogh-we Ẹnaan phọ anyina keḍighi ịdi nyina kekpetenaan bụmulogh-ḍien phọ anyina iko bọ inyina ekitonom, ịngo inyina ophooghian ẹpe ade phọ Ọmoogh-we Ẹnaan phọ anyina ịngo bọ inyina ọmoogh phọ, nyina kegbuurogh ni ẹsighe sịphe iloghi phọ anyina ọotughian ghan Ạmalek. Kébula ghan.