Dutoronomi 22 - Ạḍinya Iigbia

¹ “Eru mạar dị nạ ạmiin nạm mꞌoyool-ọga umor ạna, kápogh ạgunom. Tọrobo ịlo ẹrol, sịghe ni ạghiomonaan umor phọ ạna.

² Eru mạar dị umor phọ ạna nyịna útuman, eru mạar dị nạ úlegheri nyọdi, pọ sịghe ạpham agheel kꞌạna, ạrol sịphe kꞌạna tụtu umor phọ ạna ạwa aru ạmiin kụ aḅulemi ạngo nyọdi.

³ Ịduon kẹn kụ ịdi nạ kạtuugh aḍighi ẹnam adool ọdi. Ịduon kẹn kụ ịdi nạ kaḍighi rukpe ọdi rꞌoomo ạraraar umor ạna lọ ephe kụ nạ ạmiin. Káakpuka ọloghonaan ọdi ḍịghaagh.

⁴ “Nạ ạmiin ẹnam adool mꞌạnam umor ạna lọ emeel eten, úpogh ghan bịn ạḅitonaan. Kịa ạloghonaan ḍịghaagh ạpham bịdi ạmeremi.

⁵ “Ạnir-ephoph kúunmenaan ghan ibura alephiri ạnmuny; ḅịle kẹn, olephiri ọony kúunmenaan ghan ibura ạnir-ephoph. Tọrobo ọlo aanmenaan ịphen phọ ạḅaphanya ni esi Ọmoogh-we Ẹnaan phọ anyina.

⁶ “Eru mạar dị eḍighi maazuan kụ nạ ạmiin otu-ẹnun eten, mꞌạnyu oreeny mꞌude, mꞌạnmuny mꞌareghelhe dị onhiin phọ amuphonom, ụ́ḅar ghan onhiin phọ rꞌạnmuny phọ kụ ạsighe.

⁷ Bịle onhiin phọ, ạsighe nmụny phọ bịn, ọbo ẹnighenom nyịna ọbo nạ ạrol abia.

⁸ “Mem lọ nạ ạlogh omoom otu, akori ghan ạḅiir iikpe ẹpe eekuna ạnyu otu phọ aphune, ọbo nạ kạsighe ghan bọ apum ịḅaal ạlogh kꞌạna, eru dị oye ạḍua ẹpe ạnyu phọ ameel.

⁹ “Kạ́ḅaram ịnon ịizupha kụ ạzuph sịphe ozo avain phọ ạna, ọbo oomo phọ iimuma phọ ịsiphe ozo avain phọ ạna kẹpuphogh ghan bọ.

¹⁰ “Kạ́ḅar ghan nạm rꞌẹnam adool ạkpooghi egina esi.

¹¹ “Kámuuna ghan ukpe kịrokiro. Kạ́ḅar ghan iziri rꞌạlu amuuna egina amem.

¹² “Kori ạkan inya ariisi ịlo nạ kạkomoghi ghan rukpe phọ ịpe nạ razua ghan bọ.

Iilogh ịlo iiḍighi umugholoor

¹³ “Eru mạar dị oye ạsighe ạnir arughom, kụ ịyal phọ ạbidi mọrolan esi, kụ ạlogh ạnir phọ ḍien,

¹⁴ kụ rạḅeni yogh ghan ạnir phọ ọdo kịrokiro ạraraar umugholoor, ạphue ḍien ọnyani phọ kụ rạḅem ghan mọ, ‘Tọrobo amem lọ ọdi rꞌạmi ọrolan esi, mị ụ́miin eḍeenaan arisina loor ọdi, késina,’

¹⁵ pọ ọde esina ọnyani phọ rꞌonhiin ọnyani phọ ọsighe rụsuoma ọnyani phọ ạbidi ọghiomonaan ikumoor awe ẹmha phọ ạbidi sịphe eḍighom ẹmha phọ.

¹⁶ Kụ ọde ọnyani phọ ạḅeni ikumoor awe ẹmha phọ mọ, ‘Mị ụsighe ọnyani phọ ạmi ọphon ạnughenyan oye phọ ọphon, kụ ọdi ạlogh ḍien ọnyani phọ ạmi.

¹⁷ Kụ ọdi rạḅeni yogh ghan ọnyani phọ ọdo kịrokiro ịlo umugholoor, kụ rụḅeni ghan ịmi mọ ọno ạwa bọ ạmiin mọ eḍeenaan esina ọnyani ílho loor ọnyani phọ, kụ ạri ịphen phọ kụ eḍeenaan esina ọnyani phọ ạmi.’ Kụ bịdi ọsighe rụsuoma ọnyani phọ ọde esomanan ikumoor awe ẹmha phọ.

¹⁸ Kụ ikumoor awe ẹmha phọ ọsighe oye phọ ọliom.

¹⁹ Bịdi ọfani nyọdi ạpue ḍien oniin okuron ipoḍi asilva. Bịdi ọsighe fạni phọ ọngo ọde phọ, ịdi eḍighi bọ oye phọ ạpue ḍien esina ọnyani Ịzirel. Ọnyani phọ ạnir ọdi ni. Ọdi kúporogh ọnyani phọ oomo asuḍughul-otu aghuḍum ọnyani phọ.

²⁰ “Kụ eru mạar dị eru ni igey dị ọwa ọmiin mọ eḍeenaan esina ọnyani ílho loor ạnir phọ,

²¹ pọ bịdi ọsighe ọnyani phọ omitiom, ọsighe ọghi sịphe esomanan otu ọde ọnyani phọ awe ẹmha phọ oroḅol nyọdi ikpo oghiigh, ịdi eḍighi bọ ọdi mạphue Ịzirel, ạtol kꞌọde ọdi ale ẹmha. Iḍighi ghan ịduon ọbo ịkaraph ekunughian sịphe ogbo phọ anyina.

²² “Kụ eru mạar dị nyina esiphom oye dị rꞌạnir ọnon oye ọrolan esi, pọ bịdi molian ẹmha. Pọ isiph ịyal phọ ạbidi ẹze, ạnir phọ rꞌolephiri phọ ọrolan bọ esi; ọbo ịkaraph ekunughian sịphe Ịzirel.

²³ “Eru mạar dị esina ọnyani dị motebeeny ḍịkala kụ oye azuan nyọdi sịphe ẹmha phọ, kụ ịyal phọ ạbidi ọrolan esi,

²⁴ pọ isiph ịyal phọ ạbidi ẹpham ẹsighe ẹghi ẹpe eḍighom ẹmha phọ eroḅol bịdi ikpo eghiigh, loor esi dị ọnyani phọ ọ́lhooghi pạ ẹmha phọ, oye phọ maafolomi ạnir amatuman ọdi, ọbo nyina ekori ekunughi ịkaraph sịphe ogbo anyina.

²⁵ “Eru mạar dị oye azuan ọnyani dị motebeeny ḍịkala kụ asiph ọnyani phọ abiighi, pọ oye phọ ọpo abiighi bọ ọnyani phọ bịn kụ ọdi kokiigh.

²⁶ Íḍighi ghan ọnyani phọ ịyaar, ịdi eḍighi bọ ọnyani phọ óḍighi ịyaar dị ẹkpianaan oghiigh. Ịphen phọ ẹkigh ịdipho oye aḅetenu bọ bịn ạghi aghiigh matuman ọdi,

²⁷ ịdi eḍighi bọ oye phọ asiph bọ ọnyani phọ ẹpe elegheḍum mọ. Ọnyani phọ ạlooghi ni, kụ ọnon oye ọ́rol ẹpe eḍum mọ dị ạphel ọnyani phọ.

²⁸ “Eru mạar dị oye azuan esina ọnyani lọ oye rꞌọnyani phọ esi kọ̋rolan ghan kụ ḍịkala kőtebeeny, kụ asiph ọnyani phọ abiighi kụ osiphom ịyal phọ ạbidi,

²⁹ pọ oye phọ ọpo abiighi bọ ọnyani phọ ạkpe ọde ọnyani phọ ooghdi ipoḍi asilva, ạsighe ọnyani phọ aḍighi ạnir ọdi, ịdi eḍighi bọ dị maafolomi ọnyani phọ. Ọdi kúporogh ọnyani phọ oomo asiḍughul-otu phọ ọdi.

³⁰ “Oye kụ́sighe ạnir ọde phọ ọdi; ḅịle kẹn, oye kụ́katan ukpe ạnir ọdi ạrolomi ẹdaḅa.