Dutoronomi 21 - Ạḍinya Iigbia

Ọko enu dị úlegheri oye phọ ọko bọ

¹ “Eru mạar dị nyina ẹmiin oye dị oghiigh sịphe ade phọ Ọmoogh-we Ẹnaan phọ anyina ịngo bọ inyina, dị ạmina ẹpe eḍum mọ, kụ úlegheri oye phọ aghiigh bọ,

² pọ ikumoor awe phọ rꞌabuugboom ịiruen anyina omite ọghi ẹpe eḍum mọ ọtooghi ịdi ẹman emiigh sịphe oye phọ oghiigh bọ ameel bọ ọghi osiemi rạmha phọ ịpe ekoom bọ oye phọ oghiigh bọ.

³ Ịdi koḍighi, ikumoor awe ẹmha phọ ẹpe etuman bọ esi phọ ẹpe oghiigh bọ oye phọ ọsighe ḍịbam ạḍiya ạnam lọ kọ̋sighe ghan oḍighinom oḍighi ozo, ḅịle kẹn, kọ̋sighe ghan oḍigh ọlogh orum,

⁴ ọghi oseere okol lọ ạmuum rakil lọ kőḅeph ghan ozo, kụ osoph orum ạnam mọ.

⁵ Kụ ariil ạrikia phọ, ạnmuny aLivait phọ, ọghi omite ọmeregha, ịdi eḍighi bọ Ọmoogh-we Ẹnaan phọ anyina kụ azua bịdi mọ bịdi oḍighinaan nyịno oḍighi phọ ọdi, ọsighe ghan ḍien phọ Ọmoogh-we phọ ọsephom. Kụ esi ikpo ọnhu phọ ạbidi kụ keḍighi ịdi ọruonu rꞌelebiri kesophoghian.

⁶ Kụ ikumoor awe ịsiphe ẹmha phọ etuman bọ esi phọ oghiigh bọ oye phọ ootola rạghaagh ạbidi ọḅam ẹmhu ạḍiya ạnam mọ oghiigh bọ sịphe okol phọ,

⁷ kụ bịdi ọphagharanaan ọlhel ịphalaḅaal kụ ọḅem mọ, ‘Yoor kụ úkiigh bọ oye phọ ọphon; ḅịle kẹn, yoor ụ́miin aani mem mọ rokiigh bọ oye phọ ọphon.

⁸ Ọmoogh-we, nmạ Ịzirel awe phọ ạna ighirigiir, bụphe nạ ạtagharan bọ, ụ́sighe ghan elegheri ịḅaal phọ ịphen phọ ạḅam rụmhu Ịzirel awe phọ ạna. Bịlenaan bịdi apum ịḅaal phọ.’

⁹ Ịduon kụ ịdi nyina keḍighi kụ kekunughi apum elegheri ịḅaal sịphe ogbo phọ anyina, mem dị nyina eḍighi ịlo eseleman ghisigh Ọmoogh-we phọ.

Ịlo ạnmariir dị osiphi mem ẹgham

¹⁰ “Mem lọ nyina ẹghi ee ẹgham rꞌạbumulogh-ḍien phọ anyina kụ Ọmoogh-we Ẹnaan phọ anyina arorori bịdi ạlogh rạghaagh anyina kụ nyina esiphi bịdi,

¹¹ kụ nạ ạmiin sịphe aḍita ạnmariir phọ nyina esiphi bọ ạnir dị ạnighe kụ ạḅeeraan nyịna, pọ sịghe nyọdi aḍighi ạnir ạna.

¹² Pạm nyọdi asiom otu. Ọdi aghula sịlaal ẹmhu phọ ọdi, ạḅepha rạraaph phọ ọdi.

¹³ Ọdi akori ạkaranaan rukpe phọ ịpe ọdi amunughian bọ mem mọ osiph bọ nyọdi, ạrol sịphe kꞌạna, ạto ghan ọde phọ ọdi rꞌonhiin phọ ọdi oniin ụnwanyu. Kụ remunughan kụ agbi ọghi esi ọdi, kụ dị rꞌạna ẹrolan esi. Pọ nạ maḍighi olhom ọdi; ọdi aḍighi ạnir ạna.

¹⁴ Kụ eru mạar dị ọdi nyịna ụ́ḅeeraan, pọ bịle nyọdi dị agheel ekpisi lọ ẹḅeeraan nyọdi; úbool ghan nyọdi, ụ́miine ghan nyọdi ịlo ạrebene, ịdi eḍighi bọ nạ maafolomi nyọdi.

Ịlo odi ghan erua ọkpana ọony

¹⁵ “Eru mạar dị oye aphin ịyal ạnmariir kụ ạsighe nyoniin aḍighi oophineen, ạsighe nyoniin aḍighi epin; kụ eru mạar dị epin phọ rꞌoophineen phọ mọmaraghinaan nyọdi nmụny; kụ epin phọ kụ ạmaranaan nyọdi ọkpana;

¹⁶ kụ ọdi radiemi ruphua phọ ọdi nmụny phọ ọdi, pọ ọdi kụ́sighe ọḅel olephiri ọony oophineen phọ kụ aḍighi ọkpana ọdi, ạwile ọḅel ọony epin phọ ạmaranaan bọ nyọdi aru bọ ọkpana ọdi.

¹⁷ Ọdi aseenaan ni dọl ịkpana phọ ọḅel olephiri ọony phọ ọpo epin phọ ạmaranaan bọ nyọdi. Ọdi aphin ghan ịyal abin sịphe aruphua phọ ọdi ịlo ịkpana ạnmuny, ịdi eḍighi bọ ịpe phọ kụ ịḅel ịnyaam mọ ọdi, ariliom ịkpana ạnmuny phọ ịlo ọdi.

Ịlo ọony dị rạ́naghan ḍụghum

¹⁸ “Eru mạar dị oye ạmar mọony dị ạmoogh ẹkaraph ẹzo rꞌoḅom ẹmhu kụ rạ́naghanan ghan ịlo ọde phọ ọdi rꞌonhiin phọ ọdi, kụ ọphur nyọdi rụru, kụ rạ́naghanan bịdi ịlo ọḅeni,

¹⁹ pọ ọde phọ ọdi rꞌonhiin phọ ọdi osiph nyọdi ọsighe ọghiomonaan ikumoor awe ịsiphe ẹmha phọ ạbidi ọmeremi sịphe esomanan amarugh phọ ạbidi,

²⁰ ọḅeni ikumoor awe ẹmha phọ ạbidi mọ, ‘Ọony phọ ayoor ọphon ạmoogh ẹkaraph ẹzo rꞌoḅom ẹmhu, rụ́naghanan ghan iyoor. Ọdi ophieneen ọony, ọpughol miim.’

²¹ Oomo awe ẹmha phọ ạbidi ọsighe ikpo oroḅol nyọdi oghiigh, ọbo ẹkaraph ẹghelegheel ekunughian sịphe ogbo phọ anyina, oomo awe phọ Ịzirel ọnaghan kụ oghiilaan.

Ọdo kịrokiro iilogh

²² “Eru mạar dị oye aḍighi ịkaraph dị ẹkpianaan omugh, dị kokiigh nyọdi, kụ nyina ẹsighe nyọdi esin loor oreeny,

²³ pọ ị́bile ghan ḍizu phọ ọdi sịphe oreeny phọ ẹmina ẹḅaal. Tọrobo ịlo ẹrol, ịsighe ni nyọdi ḍio ḍio phọ eḍi, ịdi eḍighi bọ Ẹnaan esu ni oye lọ asina ọkaraph ọnhu. Ị́ipue ghan de phọ anyina, ḍịphe Ọmoogh-we Ẹnaan phọ anyina ịngo bọ inyina ọmoogh phọ.