Dutoronomi 18 - Ạḍinya Iigbia

Abin mụo ariil ạrikia phọ

¹ “Ariil ạrikia phọ, bụo eghun phọ aLivai, kụ́ḅaran bin ẹmoogh rꞌawe Ịzirel, erua kúle. Bịdi kole ghan rạraar aghuḍum oguom nịan phọ ịpe rọpighiron ghan bọ kọngo Ọmoogh-we phọ.

² Bịdi kọ́ḅaran bin rꞌabumor phọ ạbidi. Ọmoogh-we phọ kụ abin ẹmoogh ẹlo ạbidi, ịdipho ọdi ạḅeni bọ bịdi.

³ “Mụen kụ abin mụo ariil ạrikia phọ dị kopin ghan esi awe phọ ạbuphe koḍighi ghan bọ rạraar aghuḍum mọ, mꞌạnam mꞌoyool-ọga. Ịngo ghan riil phọ ḍikpe phọ, ịyal phọ arukpo phọ rꞌịpe ọkuruḅaka phọ,

⁴ ịḅel iimuma ịbiakpa phọ, rꞌamiim avain phọ, rꞌạmunum mọ anyina, rꞌozu oyool-ọga phọ anyina kụ ịdi nyina kẹngo bịdi,

⁵ ịdi eḍighi bọ Ọmoogh-we Ẹnaan phọ anyina mạsaḅar eghun aLivai ạsighe sịphe oomo arughughun phọ mọ ạnmuny phọ ọdi oḍighi riil kụ ọmeera ghisigh ọno okumu nyịno kꞌagee-pọ.

⁶ “Eru mạar dị ọlo kꞌaLivai ọlo eniin ẹmha sịphe Ịzirel ạḍua ekpisi phọ dị arugh bọ kụ aru ạteeny esi phọ ẹpe Ọmoogh-we phọ ạsaḅar bọ,

⁷ pọ ọdi ạghi ni sịphe phọ aghol ḍien Ọmoogh-we Ẹnaan phọ ọdi, aḍighi aani oḍighi phọ, ịdipho ạbueri phọ abumor ọdi aLivait phọ ọmeera bọ ghisigh phọ Ọmoogh-we phọ roḍighi bọ.

⁸ Abin phọ ạmuphe aru bọ bin ạbidi kụ ạmudi ọdi kale; úgbiom oomo phọ ạraraar phọ ọde phọ ọdi oologhi bọ.

Ọpur rụru mọ ọwile eḍighinom ịyaar aruru

⁹ “Mem lọ nyina ẹghi esi ẹpe ade phọ Ọmoogh-we Ẹnaan phọ anyina rịngo bọ inyina, ị́daph ghan sịḅaphanya phọ ịpe areelhe phọ ạbidi roḍighi bọ eḍighi aani.

¹⁰ Kụ́miin sịphe ogbo phọ anyina oye dị kạsighe mọony mꞌọnyani ọdi kụ ạphighironom ẹkia ạnian, mꞌoḍighi oyil-uḍien, mꞌọlo raako ghan riiḍio, mꞌọlo aaḍikuan rꞌịkaraph aruwaloor,

¹¹ mꞌọlo idike, mꞌọoḅaghama, mꞌọlo rạkaaph ghan ịlo ạbulo úlho.

¹² Oomo ạbulo roḍighi yogh ghan ịphen phọ ạḅaphanya ni esi Ọmoogh-we phọ. Loor ẹmhu ạsiḅaphanya phọ ịphen kụ ẹdi Ọmoogh-we Ẹnaan phọ anyina ạtu bọ raporogh bịdi kạsighiogh esomanan anyina.

¹³ Ikori eseleman esi Ọmoogh-we Ẹnaan phọ anyina.”

Oguanaan mọ Ọmoogh-we phọ kamitiom oyil

¹⁴ Kụ aMozis ạḅem mọ, “Awe areelhe phọ ịpe nyina rẹki bọ ọmoogh phọ ụnaghanan ghan bụphe ogbi bọ riiḍio rꞌạbuo ịiḍaany phọ. Kụ Ọmoogh-we Ẹnaan phọ anyina ómeera mọ nyina iḍighi yogh aani ịphen phọ.

¹⁵ Kụ Ọmoogh-we Ẹnaan phọ anyina kamitiom ni oyil sịphe ogbo abumor phọ anyina, dị kụghigh ịmi. Ọdi kụ oye dị nyina kẹnaghanan ghan.

¹⁶ “Ḍio phọ ạḍiphe nyina eekpomoghan bọ ẹpe Eegum aSainai, nyina ẹeḅereghi bọ Ọmoogh-we Ẹnaan phọ anyina ẹḅem ghan mọ, ‘Seseeny, yoor kụ́naghan mun ẹḍogh phọ ạna, yoor kụ́miin mun ḍiboom mọ ạnian phọ ạḍien ọbo yoor komugh ghan bọ.’

¹⁷ Ọmoogh-we phọ mạnaghan ịpe nyina ẹlhom bọ, kụ ụḅeni ịmi mọ, ‘Ịpe bịdi ọghaaph bọ, igey ịdi eru ịne.

¹⁸ Mị kamitiom ni oyil sịphe ogbo abumor phọ ạbidi, ịdipho ạna, kụ mị ạḅogh oomo ọghaaph ạmi ạngo nyọdi, kụ dị ạkaaph ghan ạḅeni bịdi oomo ịpe mị kạto bọ ạḅeni nyọdi.

¹⁹ Kụ oye lọ ụ́naghanan ịpe ọdi aghol bọ ḍien phọ ạmi kụ rạkaaph bọ, mị kạliom ni nyọdi.

²⁰ Kụ oyil lọ aghol ḍien phọ ạmi kụ ạghaaphom ịlo mị kụ nyọdi ụ́ḅeni mọ ạghaaph; mꞌọlo aghol ḍien ịnon ạrumugh kụ ạghaaph, pọ oyil phọ ọpo phọ kamugh ni.’

²¹ “Kụ nyịna ẹḅem sịphe iloghi phọ anyina mọ, ‘Yoor koḍighi ika kụ olegheri ịpe Ọmoogh-we phọ kụ ụ́kaaph bọ?’

²² Mem lọ oyil dị aghol ḍien Ọmoogh-we phọ kụ ạghaaph kụ eru mạar dị ịpe ọdi ạghaaph bọ ímite, ḅịle kẹn ítu ịne, pọ ịpe phọ Ọmoogh-we phọ kụ ọ́ghaaph, pọ oyil phọ ọpo phọ ạpu ni bịn ạghaaph aani. Kékiilaan nyọdi.