Dutoronomi 17 - Ạḍinya Iigbia

¹ “Ị́sighe ghan ẹnam lọ eḍigh ẹgha, mꞌạnam mꞌoyool-ọga, eḍighinom ịyaar aghuḍum ẹngo ghan Ọmoogh-we Ẹnaan phọ anyina. Ẹpe mẹphuph bọ ạḅaphanya ni esi Ọmoogh-we Ẹnaan phọ anyina.

² “Eru mạar dị oniin oye, mꞌolephiri mꞌạnir, sịphe ogbo phọ anyina rꞌịsiphe oomo ạramha phọ ịpe Ọmoogh-we Ẹnaan phọ anyina ịngo bọ inyina raḍighi ghan ịpe ekia bọ Ọmoogh-we Ẹnaan phọ anyina, pọ ọdi mạapu ịyo phọ Ẹnaan.

³ Eru mạar dị ọdi ạghi raaseeny ghan ịnon ạrumugh kụ rạaḅereghi ghan bịdi: mꞌerumuḍio mꞌụnwanyu mꞌoomo ịpe edi bọ ẹpe okuaḍio phọ, ịpe mị ụ́ḅem bọ,

⁴ kụ ọḅeni nyịna kụ nạ ạnaghan, pọ miigha loor ạwa alegheri mụghumo igey ni; kụ eru ni ịdi oḍighi ni ḅạphanya phọ ạmuen sịphe Ịzirel,

⁵ pọ ịsighe oye phọ ọpo mꞌolephiri mꞌạnir phọ ạpioghom bọ sịpioghom mọ ịphen emitiom sịphe eḍighom ẹmha phọ, ẹsighe ikpo eroḅol nyọdi tụtu dị amugh.

⁶ Ịnaghan sịagba ịyal mꞌịraar awe dị ọgba ịpe eru bọ ịne kụ egbi oghiigh ọdi; ị́sighe ghan sịagba oniin oye bịn eghiigh nyọdi.

⁷ Kụ awe phọ ạbuphe ọmiin bọ kụ ọgba bọ kụ ọphur ọsighe rạghaagh ạbidi ọsighe ikpo oroph oye phọ ọpo kokiigh bọ, kụ aḍita ạbueri phọ awe phọ ogbi ozuom oroḅol aani ikpo. Ịphen kụ keḍighi ịdi ạsipioghom kekunughian ogbo anyina.

⁸ “Eru mạar dị aḍighiton lọ ịkparanaan inyina osoph ọoruen emite: ḍighiton enu, mꞌaḍighiton ịikonoghian, mꞌaḍighiton elebiri, tọrobo ọdo asighiton phọ ịphen kụ emite sịphe ạramha phọ anyina, pọ iḅetenuom ẹsighe ẹghi esi phọ ẹpe Ọmoogh-we Ẹnaan phọ anyina ạsaḅar bọ,

⁹ ẹghi ẹteeny riil ạbuo aLivait rꞌoogboom ịiruen phọ amem mọ ạmuphe, kụ epuru bịdi. Bịdi kiḍeenaan ni inyina ịpe kosoph bọ ọoruen phọ.

¹⁰ Ịdaph ịpe bụphe odi bọ esi phọ ịpa Ọmoogh-we phọ ạsaḅar bọ kiḍeenaan bọ inyina. Oomo phọ ịpe bịdi kịḅeni bọ inyina kụ ẹtuugh ịpe phọ kụ eḍighi.

¹¹ Ọoruen phọ ọpo bịdi kịtughemi bọ inyina kụ ẹtuugh esoph ghan. Ị́bile ghan ịpe bịdi kiḍeenaan bọ inyina enme ịnon kụ esoph. Ị́ki ghan elhiom. Ị́ki ghan ekeeny.

¹² Oye iituma phọ ọpo úmeeraam bọ kụ ụ́naghanan bọ oyil ạrikia phọ ọpo odi sịphe egbodo Ọmoogh-we Ẹnaan phọ anyina raḍighi oḍighi phọ mꞌoogboom ịiruen phọ, oye phọ ọpo kamugh ni, ọbo ọdo ịkaraph phọ ịpe phọ ekunughian sịphe Ịzirel,

¹³ ọbo oomo aweye phọ ọnaghan oghiilaan ọwile iituma rꞌịgbagharan.

Oromoghiom ịlo ạbulo kọdaaghi reelhe

¹⁴ “Mem lọ nyina ẹghi esi ẹpe ade phọ Ọmoogh-we Ẹnaan phọ anyina ịngo bọ inyina kụ nyina kẹmoogh bọ kụ etugh, kụ ẹḅem mọ, ‘Yoor komitiom ọdaam dị kaḍighi ọdaam ayoor ịdipho ịpheri phọ areelhe phọ orugh bọ ukoom iyoor,’

¹⁵ ịma ghan oye phọ ọpo Ọmoogh-we Ẹnaan phọ anyina ạsaḅar bọ mọ aḍighi ọdaam. Oniin oye sịphe aḍita abumor phọ anyina kụ aḍighi ọdaam dị kịda inyina. Ị́ma ghan ooruen mọ aḍighi ọdaam dị kạda ẹmha phọ anyina, dị útu umor anyina.

¹⁶ Ọdi kụ́moogh rụsu dị kẹmaraghi emuzeḍi, kẹn kúḍighi ịdi awe phọ kọḅile oḅula Ijipt ogho ạrusu dị kẹmaraghi emuzeḍi eḍiza. Ọmoogh-we phọ mịḅeni inyina mọ kẹ́ḅile mun eḅula eten phọ ẹpe.

¹⁷ Ọdaam mọ kúpinogh iboom ạnmariir, ọbo ologhi ọdi kanmia ghan bọ. Ḅịle kẹn ọdi kụ́moogh iboom asilva rꞌagol.

¹⁸ Kụ ọdi ạrolom ạgada ọdaam ẹmha phọ, pọ ọdi ạtuugh iilogh phọ Ẹnaan ịpe ẹḍua bọ esi ariil ạrikia phọ rꞌạbuo aLivait kụ emite ạge loor ạḍinya.

¹⁹ Ạḍinya phọ ẹrolan ghan rꞌọdi, dị akori ghan ạal ghan oomo asuḍughul-otu aghuḍum mọ ọdi, ạtuugha oghueni Ọmoogh-we Ẹnaan phọ ọdi, aako ghan oomo iilogh rꞌịtooghi phọ ịphen, kụ ạtuugh ghan aḍighinom.

²⁰ Ọdi kúpoophe loor upuemi bumor ọdi we phọ Ịzirel; ḅịle kẹn, ọdi kụ́gunom iilogh phọ, anme akiton ạghi ḍịghaagh elhiom mꞌạḍighaagh ekeeny, ọbo ọdi ạrol abia sịphe ạgada ọdaam ẹmha phọ, ọdi rꞌạnmuny phọ ọdi sịphe Ịzirel.