Dutoronomi 16 - Ạḍinya Iigbia

Ẹyaal ọphel otene phọ

¹ “Ịpamanam ụnwanyu Abib ekori ghan elianaan Ọmoogh-we Ẹnaan phọ anyina ẹyaal ọphel otene phọ, ịdi eḍighi bọ ụnwanyu Abib kụ ẹdi Ọmoogh-we Ẹnaan phọ anyina ịsighe bọ inyina ḍughul ạḍuanam ẹpe Ijipt.

² Ịki pạ phọ Ọmoogh-we phọ ạsaḅar bọ aseenaan ḍien phọ ọdi, ẹsighe oyool-ọga mꞌạnam, ẹphighironaan ghan ẹkia ẹyaal ọphel otene phọ ẹngo Ọmoogh-we Ẹnaan phọ anyina.

³ Ị́ḅaram ghan ạbred lọ awila kụ ele, ile ghan ạbred lọ úbilha oḍual aḍughul-otu, ạbred ịminimiin, ịdi eḍighi bọ nyina ịḍua ẹpe ade phọ Ijipt rꞌephirighan. Kụ iḍighi, ịitughian ghan ḍio phọ nyina ẹḍua bọ ẹpe ade phọ Ijipt oomo asuḍughul-otu aghuḍum mọ anyina.

⁴ Kụ́miin yist rạghaagh anyina rꞌịsiphe ịiku ạramha phọ anyina oḍual aḍughul-otu. Sịphe ịnam mọ ịpe nyina ẹphighironom bọ ẹkia phọ dulhe ạḍiḅel aḍio phọ kísugha ịḅaal ḍịroor.

⁵ “Kẹ́pighironaan ghan ẹkia ẹyaal ọphel otene phọ ẹpe ạramha phọ ịpe Ọmoogh-we Ẹnaan phọ anyina rịngo bọ inyina.

⁶ Esi phọ ịsiphe Ọmoogh-we Ẹnaan phọ anyina ạsaḅar bọ aseenaan ḍien phọ ọdi, ịpa kụ esi phọ nyina kẹpighironaan ghan bọ rịkia ẹyaal ọphel otene phọ anyina dulhe. Mem dị ẹnam-aḍio remeel ighool, pọ kụ amem mọ nyina ẹḍua bọ ẹpe ade phọ Ijipt.

⁷ Ịtol ghan sịphe esi phọ ẹpe Ọmoogh-we Ẹnaan phọ anyina ezua bọ kụ ẹphophoghi ghan kụ elhe, kụ rẹḅaal bịn egheel ẹpe arugbogo phọ anyina.

⁸ Íle ghan ạbred lọ úbilha odiiny aḍughul-otu. Oḍual aḍughul-otu pọ aḍio ookpomoghan iigbia phọ Ọmoogh-we Ẹnaan phọ anyina. Íkumuan ghan rukumuan ḍio phọ ạḍiphe.

Ẹyaal ibugha phọ

⁹ “Igbi ghan oḍual ariiḍio ẹphamanam. Imiigh ạal ghan oḍual ariiḍio phọ kꞌaḍio phọ ạḍiphe arepeke resoor bọ ude,

¹⁰ kụ eeko ghan ẹyaal ariiḍio phọ Ọmoogh-we Ẹnaan phọ anyina, ẹḅaram ghan rꞌạrikia ịyaar aghuḍum ophooph ologhi phọ ịpe ẹḍua bọ rạghaagh anyina kụ emite kụ ịdi nyina kẹngo, ịpe Ọmoogh-we Ẹnaan phọ anyina ịseph inyina.

¹¹ Kụ ẹrol ghan egbodo Ọmoogh-we Ẹnaan phọ anyina ẹmoogh iboh, nạ rꞌạnmuny ạna rꞌạnmanyaan ạna rꞌạrebene ạna, alephiri rꞌạnmariir, rꞌạbuo aLivait phọ odi bọ sịphe ạramha phọ anyina, ruuruen phọ, ịnyigo ạnmuny phọ rꞌarukpukele ạnmariir phọ, bụphe rꞌanyina edi bọ sịphe Ọmoogh-we Ẹnaan phọ anyina ạsaḅar bọ aseenaan ḍien phọ ọdi.

¹² Kụ ẹetughian ghan mọ nyina iḍighi ni rẹbene ẹpe Ijipt, kụ eeko ghan iilogh phọ ịphen, kụ ẹdaph ghan eḍighinom.

Ẹyaal arubughotu phọ

¹³ “Iikpomoghi ghan ịbiakpa phọ rꞌiimuma phọ anyina kụ egbi ooko ghan ẹyaal arubughotu phọ oḍual aḍughul-otu,

¹⁴ kụ ẹmoogh iboh, nạ rꞌạnmuny ạna rꞌạnmanyaan ạna rꞌạrebene ạna, alephiri rꞌạnmariir, rꞌạbuo aLivait phọ, ruuruen phọ, ịnyigo ạnmuny phọ rꞌarukpukele ạnmariir phọ, bụphe rꞌanyina edi bọ sịphe ạramha phọ anyina.

¹⁵ Oḍual aḍughul-otu kụ ịdi nyina kelianaan Ọmoogh-we Ẹnaan phọ anyina ẹyaal arughuenian, sịphe esi phọ Ọmoogh-we phọ kạsaḅar bọ. Ịdi eḍighi bọ Ọmoogh-we Ẹnaan phọ anyina kịseph ni inyina rꞌoomo iḅeph phọ anyina rꞌoomo iiḍighi ạraghaagh phọ anyina kụ eḍighi ịdi nyina kẹmoogh iboh rꞌọḅaal ologhi.

¹⁶ “Ịraar amem lhạ oomo alephiri phọ anyina koḍeenaan ghan loor ạbidi egbodo Ọmoogh-we Ẹnaan phọ anyina sịphe esi phọ dị ạsaḅar bọ: mem ẹyaal ạbred phọ úbilha bọ, ẹyaal ariiḍio phọ rꞌẹyaal arubughotu phọ. Bịdi kụ́ḅaph ọgbo bịn kụ ọghi egbodo Ọmoogh-we phọ.

¹⁷ Tọrobo oye ạngo ghan ịpe ọdi katue bọ ạngo, ọdaph ịpe Ọmoogh-we Ẹnaan phọ anyina ịseph bọ inyina ịpe ọdi ịngo bọ inyina.

Ariliom ịiruen

¹⁸ “Ikori ẹmaaghi bụo ịiruen rꞌạbuo ịtooghi sịphe ạramha phọ anyina, ịpe Ọmoogh-we Ẹnaan phọ anyina rịngo bọ inyina, ịdaph rughunughun phọ anyina, kụ bịdi oogboonaan ghan we phọ riliom ịiruen.

¹⁹ Ị́sighe ghan akeel etene apum; íkiilaan ghan oye; íle ghan ịgara, ịdi eḍighi bọ ịgara reḍighi ghan ịdi ariḍien oye dị alegheri ịyaar keḅomoghian, bịn anme elhiom ịiruen phọ.

²⁰ Ịdaph ghan oomo ịpe eru bọ riliom ịiruen phọ bịn, ọbo ẹrol eḍum ẹmoogh de phọ ạḍiphe Ọmoogh-we Ẹnaan phọ anyina rịngo bọ inyina.

²¹ “Kẹ́meremi ghan igbudu Asera, um-ạke phọ, etumeniom enmeny ạrikia Ọmoogh-we Ẹnaan phọ anyina nyẹpe nyina kẹkan bọ.

²² Ḅịle kẹn, kẹ́ka ghan tọrobo ịyaar ẹmeremi, ịpe Ọmoogh-we Ẹnaan phọ anyina aghel bọ.