Dutoronomi 13 - Ạḍinya Iigbia

¹ “Eru mạar dị nyina ẹmoogh sịphe ogbo phọ anyina oyil-aḍien mꞌọmalhaam rạmalha dị ramiteghom ghan reḍeenaan rꞌịiḍaany;

² eru mạar dị ạreḅeni phọ ọdi rꞌịiḍaany phọ ịpe ọdi ịḅeni bọ inyina kụ ẹtuugh ni ịdipho phọ kụ emite, kụ eru mạar dị ọdi ịḅeni inyina mọ itu ọoḅereghi ịnon ạrumugh dị nyina ílegheri, mọ okumu bịdi ooseeny ghan;

³ pọ kẹ́naghanan ọghaaph oyil phọ ọpo mꞌọmalhaam rạmalha phọ ọpo, ịdi eḍighi bọ Ọmoogh-we Ẹnaan phọ anyina kụ rịdeghogh ghan inyina ophogh mụghumo nyina ẹpomoghian ni Ọmoogh-we Ẹnaan phọ anyina rꞌoomo ologhi anyina rꞌoomo uwaloor anyina.

⁴ Ịdaph ghan Ọmoogh-we Ẹnaan phọ anyina kụ erelhe ghan. Ikueni nyọdi, eeko ghan iilogh phọ ọdi, ẹnaghanam ghan ẹḍogh phọ ọdi eeseeny ghan nyọdi, eḍighom nyọdi.

⁵ Ikiigh oyil-uḍien phọ ọpo phọ mꞌọmalhaam rạmalha phọ ọpo phọ, ịdi eḍighi bọ dị rạkaaphogh ghan ịphen phọ ịlo nyina kẹbile Ọmoogh-we Ẹnaan phọ anyina ọpo ịsighe bọ inyina ạḍuanam ẹpe ade phọ Ijipt, ịtagharan inyina ạsighe esi ạdol ạrebene phọ, ịlo nyina kẹbile reten phọ ịpe Ọmoogh-we Ẹnaan phọ anyina ạlogh bọ ologh ịngo inyina mọ itelhe ghan phọ, ọbo nyina ẹwile oḍighi ghan ịkaraph sịphe ogbo phọ anyina.

⁶ “Eru mạar dị umor ạna mꞌọony onhiin ạna, mꞌọony ạna mꞌọnyani ạna, mꞌoophineen ạnir ạna mꞌọyaghiri ạna dị rꞌạna ẹḅoph ologhi, kụ aru raakeleghi mọ tue ọghi ọoḅereghi ịnon ạrumugh ịpe nạ rꞌạburude phọ anyina úlegheri bọ,

⁷ rụmugh awe phọ ạbuphe orugh bọ ikoom inyina mꞌituman inyina mꞌịkelan inyina, emiigh eekuna aḅirini ạga phọ ọphon esiemi nyẹeri phọ eekuna phọ;

⁸ pọ úmeeraam ghan ịpe ọdi rạkaaph bọ, ụ́naghanam ghan nyọdi. Kákiririom nyọdi apogh. Kạ́ngo nyọdi eepoogh, ḅịle kẹn káloghoma nyọdi.

⁹ Kiigh nyọdi. Ạḍighaagh ạna kụ ẹphur emeelom nyọdi, kụ ạraghaagh oomo ạbueri phọ awe phọ egbi osoroghuom ọdi.

¹⁰ Ịsighe sighiigh eroḅol nyọdi dị amugh, ịdi eḍighi bọ ọdi riikeleghi ghan inyina mọ ịbile Ọmoogh-we Ẹnaan phọ anyina, ọpo ịsighe bọ inyina ẹpe ade phọ Ijipt ạḍuanam esi ạdol ạrebene.

¹¹ Kụ oomo phọ anyina awe phọ Ịzirel ịnaghan, kẹ́pioghom mun ọdo phọ ịphen sịphe ogbo phọ anyina.

^12-13 “Mem mọ nyina erugh bọ sịphe ade phọ Ọmoogh-we Ẹnaan phọ anyina rịngo bọ inyina mọ itugh, eru mạar dị nyina ẹnaghan ịdi buniin ọdorodo ighiil awe mọḍua ịgbatanaan inyina, oporogh bụo ẹmha phọ ạbidi kụ rọḅem ghan mọ itu ọghi ooseeny ghan ịnon ạrumugh dị nyina ílegheri,

¹⁴ pọ iipuruan ẹwa ephogh emiigha loor epuru, kụ ipogh. Kụ eru ni igey, dị eru ịne, mọ moḍighi ḅạphanya phọ ạmuen sịphe ogbo phọ anyina,

¹⁵ pọ ikori ẹsighe elhool ẹgham ephiemiom we phọ ạbuphe ọmoogh bọ ẹmha phọ ẹpe, oomo awe ịsiphe ẹmha phọ; ịsighe ẹdume elhool ẹgham ephiemiom bịdi rꞌạsinam mọ ạbidi.

¹⁶ Kụ ekori ẹsighe oomo aruphua phọ ạbidi nyina ewum bọ eekpomoghi ekpol sịphe egbogh erugh ẹmha phọ, kụ ẹḅaram rꞌẹmha phọ eguom nịan, eḍighi ẹkia oguom ạnian ọngo Ọmoogh-we Ẹnaan phọ anyina, eḍighi ebum ẹrol sịphe kꞌagee-pọ, kọ́loghoḍi mun ruutu sịphe phọ.

¹⁷ Esi oomo ạraraar phọ ịpe mosu bọ ọkaraph ọnhu kopiemi bọ, kụ́miin rꞌeniin ịyaar ḍịghaagh anyina, ọbo Ọmoogh-we phọ kakiton esi ạghelhe phọ ọdi, iḍeenaan inyina ọnma ighirigiir. Ọdi kạmoogh ni igbiririph esi anyina, ịseph inyina, ạbughe ọophi ẹmaria phọ anyina, ịdipho dị aghunya bọ ạngo bụrude phọ anyina,

¹⁸ eru mạar dị nyina kẹnaghanan ghan ẹḍogh Ọmoogh-we Ẹnaan phọ anyina kụ eeko ghan oomo iilogh phọ ọdi ịpe mị ạlogh bọ rịngo inyina rodon kụ reḍighi ghan ịpe eseleman bọ, eru bọ ịne riḍien Ọmoogh-we Ẹnaan phọ anyina.